WWW.TUNGZANGNEWS.COM

TUNGZANG NEWS
 
Malaysia Zomi Khuado 2014 Ka Siimna - 7



Zolia Zotaang te a khatna, a nihna, a thumna cihte hong kitel a, mipi in lawptak leh lunglut takin na pahtawi ziahziah uh hi. Zomi lasiam kitelna zong a khatna pan a thumna dong a banban in hong kiteel suk deudeu a, nop semsem in mualtung kahto bang hileng mualdawn a tuangto lian tawh kibang hi. Mualdawn ah kidingto veva in kikhuadak a, a gallam ah Vaphual nupa singsang dawn ah kuamah dang englo in na tuangkhawm hilhial uh a, itna zailate sa in itna sinthute na lel khawm uh hi. Tua laitak in a kim a kiangah sakhi sa nam tuamtuamte amau om mun hun ciat ah hong ham in hong hawk ciaiciai uh a, kuamah englo-a a tuallenna gam uh nuamsa in a gah ne in, a tui dawn in a mual a guam a thawn uh hi. Tua bang hun ah Zomi te hong lamsangto a, kuamah neumuh hituan hetlo napi a suk et vive in Zomi te hong omsak a, van leh lei bawlpa hong piak thupha hikei leh hizah lungdamna, angtannate kimulo ding cih ka ngaihsut ciang ka dip hong kua in ka lung hong gol hanhan hi. Laphuakpa in "Topa hoih hi, Topa lian hi" a cih pen a mukhin lua na hi mawk hi, cih ka phawk hi. 

Pasian hong piak Zolia melhoih te, Zotaang duangcing te, Zomi lasiamte lungdampih a khut kilen ngeingai in ka omlaitak uh ka ban bulh nai ka et leh nitak nai 7:40 P.M. na hita a, hun kipatzawh nai 8 sung bang hong hito zen mawk hi! Ahi zongin tukum Zomi Khuado ah vai thum a kizo himawk hi cih ka ngaihsut ciangin a hun hilo in a mite hampha kasa hi. 

1. Zomi Khuado hun nuamtak kizang. 
2. Zolia & Zotaang kitelna limci tak kinei. 
3. Zomi lasiam kidemna kizo. 


Khuado siim dingin Zomi Innkuan Singapore pan mi 4 - Malaysia ah palai a ka muan mahmah uh khat, makaipi, makaipi huh leh khangno makai in va uap thei in, hun limci takin va zang thei uh a, UK pan Sia Gin Khan Khual naupa, Kawlgam pan Zogam pan, India pan Zomi lasiam Mungbawi Neihguk leh a u Kim, etc cih bangin Khuado siim mi ki om diudeu hi. Tuate khempeuh minam khat a hong bawlpa in Zomi a hong piansak man, pau leh ham kibang, ngeina kibang, sisan kizom, laigui kizom, si khat sa khat i hihman ahi hi. Zomi bek leitungah minam hihna a angtanpih hilo in minam pil masasa in amau minam angtanpih uh hi.

Zolia Zotaang telna ah hong makaih dingin Malaysia gambup tangval melhoih leh nungak lasiam, limcin siamte bang hong hawh cih ka ngaihsut ciang thupi kasa hi. Amau zong nuamsa in vaimim leh voksa mah va ne ziahziah uh a, mipi innpi sung dima kiphu metmet a muh uh ciang amau zong nuamsa gawp veve uh hi. Amau lah thupi, eite zong thupi in hampha tuam sese hang. Amau teng mah leh Zomi sungah lasiam a minthang leh i muan i suan Lengtong Pauno, lasiam Pa Suanno, Tg. Vai, Sianu Niang Suum, teng ban ah amau hih mun tek ah a siampen vive ahi Zomi uliante hong ki thuap diudeu uh a, nak nop in nak limci mahmah hi. Lasiam khangthakte a kitel ciangin zong a siam vive hi in mipi bangin teel ding a kitheilo himawk hi. A vekpi un siam uh a, a aw uh hoih daldal khin hi. Kei teel ding hileh a vekpi un khatna piak huai kasa hi. Zolia te zong teel ding tuam om lo phial in a hoihna uh kibang himai hi. Singapore lamte zong ka mit uh na kibanglo a - ken a No. 3 mah hoih ka cih laitak ka lawmte thum in bel a No. 8 na mah na ci veve uh hi (im khia kha ci mai ni)! 

Khuado Khakna:
Tua banga hun nuam taka a kizat ziahziah laitak in -  a nuam hun leh i nunnop gualnop hunte nangawn in hong ngak lo in hong kheng diaidiai a, zan khuamial dinga kithawi ciciai laitak in innpi kima singkung tungah Zolengthe te hong khuang ciaiciai a, Zomi te in VAI HUNTA i cih hun lian hong hita hi. Ngai in khoh ta leng hong ngaklo, kun in dinkhawl nuam taleng hong dinkhawl man nawnlo in Khuado Ni in mual hong khupsan a, MAI KUM CIANG KIMU KIK NI MAW ciin khut kilen ziahziah in Topa sathaunilh Sia Thawng Ngaih Khupthupha piak tawh ko innlam ciat zuanin ka kikhenta uh hi. 

ZAM makaite tawh kikholhna leh hong thupi bawlna uh: 
Zomi papite in 'lengla gina nei le'ng zingsang kikhangma' na ci se uh hi. Zingsang cianga a khuang ding akluipi nangawn a kul leh gawh a lengla gina taka do ding kisam zaw ahih manin ihmut phawng ding akluipi a om nawnloh ciang zingsang thawh ding nangawn a huna phawklo in kikhangma hi, a ci nuam uh ahi hi. A taktak in kuamah khangma samlo a, itna hang tawh kalsuanna ah a ithuai zaw om nawnlo hi cihna hi. A kul leh akluipi gilngak nangawn gawh a kul ahi hi. Tan 9 ka sin laiin ka Pa Rev. S. Neng Za Khup a khualzinna Philippines pan hong ciah ciangin meltheih u leh nau kiang hong vaan in hong zin kawikawi a ko khua Murlen a phak khit ciang Hnahlan ah ka Pa Suak Khaw Gin Suante innkuan zong hong pha hi. Akluipi khat bekbek a neih uh a go ding, a bawl dingin kei hong sam uh a, sanginn Hostel pan pusuak in ka va bawlsak a, zingmeh in ka nei uh hi. A zing ciang pan kipan akgil kah ding om nawnlo hi! Itna hang hi. 

ZAM palaite in Zingmang Pa Hang Khan Lian bek hilo, ko a nungzuite nangawn itna lianpi tawh hong tutpih in nitak ann hong nekpih uh a, zan nih bang ihmu lo khin nangawn maitai takin hong khawlpih uh hi. Nitak ann lah lim, gil lah vah, Singapore ka ciahkik ding bang uh a hun hong suantoh pih liangin hong it in hong thupi bawl uh a, Zomi te ki itna VAPHUAL lungsim taktak ahihna kilang semsem hi. 

Khawlkhawl tale ung khawlcim ngeilo ding, gengen tale ung gen khin zolo ding ka hih man un zan 11pm ciangin 'guai' ciin aam pipi in ka kikhen bawlta uh hi. Ka ciahna ding uh Bus in a kongkhak na khak nailo deuh a, ka lut khit lian uh leh a kongkhak kikhak in Times Square gei teng meivak pempem a, ko lah lungzuan luankhi tawh ka mit uh a ziing ciciai hi. Uliante nung zuih lah nuam, uliante a vaidawn, a tutpih Zomi makaite lah thupi in zahtak huai... Mai kum ding ngaklah khinta ing! 

Zomi khempeuh i omna mun ciat ah Khuado thupha in i innkuan sungah thupha namcin hong tungsakta hen. 

A nuamzaw in maikum ciang awleh!

Takkheh Zomi :)

PS: Cidam a pai in zingsang nai 5am in Singapore ka tung uh a, inn kongkhak ka hon lian ciang 5:35am hi in nai 3 ka ihmut khit ciang zingtho in gam leh minam maban zom dingin ka sepna lam ka manawhta hi....
 
 
Hau Za Cin
Phuitong Liim
www.hauzacin.blogspot.com
 
 


Comments




Leave a Reply