WWW.TUNGZANGNEWS.COM

TUNGZANG NEWS
 
Milim le Kah Lei

Khat vei, Sengam a om mual sang tung khatah Buddha lim khat kibawlin etlawm kisa mahmah hi. Tua mual dawn kahtohna dingin zong suang kiciangin kahlei hoih takin kidawh hi.

Nisim phialin mitampitak tua mualdawn a om Buddha va bia dingin kipai den hi. Mualtung kah pepeuhin nuam sa-in lungkimuh a hih manin, mi mualtung kah nuam hong tam semsem hi. Khual gamlapi pek pan hong delh lianguh hi.

Tua bangin phimlekhau bangzah phialin a kahto tawh a tuaksut tawh hong tam semsem hi. A kahtote bang mualdawn tungin Buddha va biak ding lawp lua kisa a gim lamuh zong phawk lo phialuh-in, kahleite hong sikto detdet zo uh hi. A tuaksukkikte sem zong lungkim in, kahleitungah hong kimawl sukin nuam hong sa ciat uh hi.

Tua leh, khuadaih khit sim zan khat, kahlei bawlna suangtum khat hong pau in, milim hong hopih hi. "Lawm aw, nang zong suang hi-a, kei zong suang mah hing-a, bang cia nang mai-ah hong kikunin, zahtakna hong kipia tek napi in, kei ka hih leh khe bebek tawh hong kisik gawp, hong kituan gawp a hi hiam? Nang mai-ah hong tuntoh na dingun kei sitsanin hong kinei toto hi napi kei tungah lungdam ing hong ci khat bek om ngei lo mawk hi" ci-in khasiat hopih hi.

Milim in zong "lawm aw, nang na hih leh kahlei a hong kibawl dingin na pang kiu-liteng bek hong kisui tang ziau hi. Kei ka hih leh milim ka suahna dingin tamveipi hong kisat, hong kisek hi. Zumlehiam nam tuamtuam zangin hong kidawt zel, hong kitan zel, hong kisui zel hi. Bektham lohin lai-haam (sand papers) tawh tamveipi hong kinawt gawp lai hi. Ka pumpi buppi a namsia mahmah a man duakduak za-nuh tuamtuam hong kizut gawp lai hi" ci-in dawngkik hi.

Kahlei suangtum in zong telsiam ta a hih manin a om na ngei kahlei mun mahah khe tampi sik dingin om suak hi.

Hih tangthu deihna a hih leh, mihingte khatveivei mun sangpi a tung khat, zahtakna, minphatna a ngah khat a naui a om pawl khatte in kihaza-in, mi hing ciatciat a mah bang hi tuan peuh kici kha thei zel hi.  A hi zongin mun sanna a tung, mipil, milian, mihau a zahtak huai mite ii thuakna, gentheihna, a haksatnate uh I theih pih khak loh thu tampitak na om gige thei hi. Nuntak khuasakna ah haksatna, gimna tawlna, ze-etna tuihual tampi I tuak hang lungkia lo-in, I palsat zawh leh ni khat ni teh mi tampite it, zahtak le pahtawite a suak thei ding I hih lam hong phawk sak hi.

Gentheih haksatna tawm tuakin a lungkia pahpahte a hihleh bel kahlei suang bangin mite sik suk, sik toh peuhin kiom thei hi.

*Hi tangthu zong original writer unknown mah hi zel hi. A lung himawhte a ding. A thei I om zenzen leh lah hehpih takin nong hilh dinguh lungdam khol ing.

Khat Thang

 


Comments




Leave a Reply