WWW.TUNGZANGNEWS.COM

TUNGZANG NEWS
 

MIPI MAI-AH THU NA GEN CIANGIN

-Tg. Samuel T.K.Mung

Leitungah mi khempeuh in a lauh mahmah uh na nih om a tuate in: Mipi mai-a thugen leh sihna hi, na ci uh hi. Mipi mai-ah thugen siam ding pen thupi mahmah a zong haksa mahmah hi. Ahi zongin kisinsin na tawh piang thei, kisiam thei mahmah hi cih hong gen masa nuam ing. Tanglai leitung ah Greek mi thugen siampen Demosthenes pen kammal khat bek nangawn maan takin a lawh theih nadingin hun sawtpitak la hi. Mipi mai-ah thu a gen cilin ciamnuih bawl hi lo buang, mipite in nakpitakin zumpihna tawh na nuihsan ngei uh hi. Lungkia theilo-in a kisinsinna hangin thugensiam pen pa na suakzo hi.

Thugen dinga hong kiseh ciangin hih thute ngaihsun masa in : Na thugen a ngai ding mite pen khangham vive maw, khangnote, nupite cih bangin kum bangzah gual mite tam pen ding hiam cih ngaihsun masa in. Tua na theih khit ciangin amau bang thulu koici gen leng lunglut thei ding uh hiam cih ngaihsun kik in. Na gen ding thulu leh kammal zat dingte pen amau adingin a tel haksa lua ahih loh nangin pilvang mahmah in. Thulu hong kipiak leh tua na thulu in a deihna limtakin tel sawm in. Na gensawm bangbang lai-ah gelh khia inla tua ciangin sim kikkik in. Puahphat kisamte ciamteh inla a hoih zawk nadingin puahpha kikkik in. A thu lam na man ciangin nangleh nang kisin inla kisin kikkik in. Tua bang kisin nang a hoih khat pen limlangh mai-ah ding kawm a thugen ahi hi. Tua ahih kei lehna innkuanpihte, na zi, na tate, na nu le pate mai ah maizum het lo-in gen ziahziah lel in. Mihing kuamah a bukim ki-om lo ahih manin amau kiang panin kipuahphat nading a muh bangbang uh dong kik inla hong gen bangbang uh kipuahphat nadingin zang in. Kipuahphat nading hong gente uh hehna-in la het kei in.

Bangci gen leng mipite lunglut ding: Na thugen sawm pen a lunglut huai leh tha-ngah huai sak mahmah in. Tua dingin na thulu tawh kituak gentehna; tangthu tomno, mipilte’ zat kammalte ahih kei leh tulai a leitung thupiangte hel sawm inla tua ciangin na thulu-ah lut pan in. A ngai mite tel siam theih nadingin mawl gen siam ding hanciam in. Na thulu tawh kisai kilkel lo thudang khawng zong sing mat in mawk behlap het kei in.

Koici gual ding : Mipi mai-ah thulu khat peuhpeuh na gen ding ciangin lungsim bekah ciamtehna pen a hun ciangin kimangngilh thei ahih manin lai ah hih bangzia-in gelhkhia in:

I. Thupatna (introduction)

II. A pumpi (body)

III. A hialna (conclusion)

Thupatna ah bang teng huamsak ding: Thungai mipite’ ngaihsutna/mitmei veng siam in. Mipite muak inla tua ciangin nang hong thei ngei nailo ahih uh leh nang leh nang kipulak in. Na thulu tup leh ngimna leh tua tungtawnin amau phattuampih dingte zong theisak in. Thugen na kipat ciangin naak manlo liangin gensawm kei in. Gual khat leh khat kalah huih diik inla, tomno sung khawl zelzel in. Mipite’ lunglut nadingin ciamnuih siangtho, mipilte kammal hoihte tawh na pat theih leh kilawm mahmah ding hi. Khuam bang a ding tang geugau sangin pumpi tatsak ding kisin in.

A pumpi bawlzia(Body): Na thulu siksan in a deihna leh a huam khak thute tel gen in. A kitel zawk nadingin a huh thei thu dangte zong khil khop siam in. Na thugenna tungtawnin mipite thalawpsak in.

A hialna bawlzia(conclusion):A hialna ah na thulu in a deihnate tom gen suk kik inla, thulu tungtawnin amau adingin na deihsakte na genkhitna lam phawksak kik in. Na thugenna lunglut takin hong ngaihsak na hangun lungdamthu ko khial kei in.

Thugen khiatzia: Hih thugen khiatzia cih tawh kisai ah phawk dingin a kisam pha mahmah thu nam thum om hi:

I. Maisuahzia (appearance)

II. Aw zatzia (Speech and voice)

III. Pumpi tatzia (body language)

Maisuahzia: Mipi mai-ah thugen dingin na din’ ciangin kammal khat zong na pulak ma-in na maisuahzia mipite in hong encik masa pen uh hi. Bang mah kammal na paukhiat loh hangin na maitang puakzia in thu na gen pah cih phawk in. Tua zom-ah na kizepdante, na sam hiatdante poimawh mahmah hi. Na thugen a ngai ding mipite nuntakna dinmun tawh kituakin kizemin kipuah sawm zaw in. Nikten-puansilhzia in zong mite tungah thugen ahih lam phawk huai hi. Nik siangtho puan siangtho tawh kizep sawm in.

Aw zatzia: Mipi mai-ah dingin thu na gen ciangin aw zatdan siam ding hanciam mahmah in.

Aw ngaih -Thungai mipi phazah leh na thugenna mun a gol leh neu tawh kituakin na aw khiam ahih kei leh khan in.

Aw khelzia -thu na gen ciangin thugen inla laisim bangin na aw luandan kibangsak den kei in. Na thugen a thu luanzia tawh kituakin na aw un, eu, lai, phei cih bangin kheng zelzel in. Tua in mipite’ thalawpsak a cimsak lo hi.

Pumpi tatzia: Na din ciangin lauthawng hetlo-in suakta takin ding inla maitai hiuhiau in. Nang maisuah bangbang mipite’n hong etteh ding uh hi. Na suahtak leh thungaite zong suakta ding uh hi. A kisap hunin citak om gemgam zong siam in. Na din kawmin na mit in koi lai en cih poimawh mahmah hi. Mun khat bek, mikhat bekbek en kei inla mipite a vek un a kibang in en kual denden in. Na mit mun khat bek ah tusak lo ding cihna ahi hi. Mikhat bek mitsuanin thu na gen leh, na et lohna lamte’n amau a kipuaseh tuam in na ngaihsun pah ding uh hi. Sual (foor) thuhilh bangin na nuailam bek en kawmin thugen het kei in.

Mipite maitang na etngam kei leh zong a mit kikal ahih kei leh alutung uh en lecin hoih pen hi. A thuluanzia tawh kizui-in na khut, na ban, na lute tawh piak siam in.Thu na gen ciangin nang mahmah lawp masak sawm in. Na thulu in nang mahmah tha hong pia masa pen suaksak in. Na vei leh awlmawh thute mah gen sawm inla, na kam bek tawh a gen hilo zaw in na lungtang tawng panin a gen hih sawm zaw in. Tua in lukhawng nei a mite in phattuampih takpi uh hi. Kammal haksa leh thuthukpipite khawng zat sawm kei zaw in. Mite tel siam mahmah nadingin mawlsak mahmah lel in. Lotngah gen bangin gen het kei in. Tua ciang, na deihsak luat manin a hehsa a thuhilh, mitaii bangin thugen kei in.

Hilh inla taii kei in.Ka kiging hoih man kei, thugen zong ka siam kei a, kong thugen ding pen i zakzak ngeisa uh ahi a (zaksa ahih leh gendah lel in) cihdan kamsiamte zang kei zaw mai in. Nang kigin leh gin loh kuaman hong phawkpih hetlo kimlai "kaunei kisungsia" in nang leh nang nong kipulak ciangin mipite’ lungsim 80% si khin hi. I aw gingkhiate bek tawh thugen kihi lo-a, i pumpi hiang na khempeuh in zong thugen ahih lam mangngilh kei ni.

src:Lungdamna Aw October 2014 Issue
TZN: Soucce: ZomiNational.com
 


Comments




Leave a Reply