WWW.TUNGZANGNEWS.COM

TUNGZANG NEWS
 
Na Muhna Laih In

Hun khat lai-in, sum hau mahmah papi khat a mit hong na citciat ahih manin, lunggim, singimin hong om hi. A lawmlegual Siahuan, Siamate dong kawikawi-in amit damna ding kibawl sak hi. Amuan mahmah mit lam siahuanpite in zatui nuh ding, nek ding apiak ban-un a theih tawp vua a bawluh hang hong dam thei tuan lo-in hong suk semsem zawsop mawk hi.

Tua leh a tawpna ah cihna ding a bei ciangin Biak Inn-a, Father pa khat thungen sak dingin sam hi. Father pa in mihau pa' mit hong vel sak leh a mit a hoihkik theihna ding thu khat hong mu khia hi. Tua in mihau pa mit pen green color (a-eng) bek tawh kituak in color dang tawh kilem lo cih ahi hi. A-eng bekbek tawlpi khat sung mumu leh dam ding cih thu ahi hi.

Tua leh sum haupa zong inn-za zutte samin a Inn khan khempeuh sualpek akipan a vanzat tutna, sabuaite dongin a-eng hong zut sak pah hi. Tua banah a muhnop, a etnop khat pepeuh aom simin a nasemte a-eng zut sak masa tangtang hi.

Nipikal khat khit pawl ciangin Father pa zong sum haupa veh dingin hong paikik hi. Huang kongkhak cingte in zong a Pu uh mit dam lohkik ding patua banah a Pu uh kihta ahih manin Father pa puantual kangpi le a sam, a mai, a khut le khe teng a-eng-za hong zut sak uh hi. Nasemte in "Father aw hong telsiam in, ka Pu uh a mit in a-eng bek en thei ahih man hi" ci-in thum dep uh hi.

Tua leh Father pa zong sum huapa gei hong tun teh nui kawm sa-in hopih-a, "Na mit in na khempeuh a-eng ding a muh theihna dingin mitlimlang maan eng kituah khat lei ziau le teh hih zahin buai liang leh sum tampi bei in na inn le na vente a-engza na zut kisam lo ding hi, Za-zutin pan ding hi le teh leitung bup za-zut theih ding sa kha na hiam?" ci-in thu hilh hi.

Hih tangthu in eite hong hilh thu ahih leh, i kimlepamah hoih i sak loh, i muh dah, i ettheih loh khempeuh eite mit tawh kituak dingin va bawl ding pen sumlepai bangzahta in i hau zongin ahi zo ngei lo ding ahi hi. Tuate i ettheihna dingin i bawl theih ahih leh ei-mah ciat mit, ei-ma ciat muhna i laih ziau ding ahi hi. Tangthu sung-a sum haupa in mitlimlang a-eng khat bulh ziau leh a muh khempeuh hoih sa in, lungsim dam pumpi cidam, a mit zong dam ding banah kua mah zong buai sak kul se lo ding ahi hi. Eite zongin lungnuam, sinnuam, pumpi cidam ding i ut leh i muhna, i mit laih a kul hun tampi om kha ding hi hang. Tua bang hi leh kua mah zong kikawkkawk kul se lo ding dan na hi gige hi. Lungdam!

Khat Thang

 


Comments




Leave a Reply