WWW.TUNGZANGNEWS.COM

TUNGZANG NEWS
 
8. Pawlpi Sungah Lungkimna




Thu-um mi khempeuh in pawlpi sungah lungkim thei uh hi. Pawlpi khantoh nadingin ama lungtup masa pen hi ding hi.  Ama pumpi sangin pawlpi  it zaw ding hi. Pawlpi tawh a kizom khempeuhin, pawlpi’ phattuam nading a bawl zawh kei leh pawlpi sungah om kei leh hoih zaw ding hi. Pasian nasep nading mi khempeuh  hihtheihna nei uh hi. Mi tampite in a kisap loh na munah sum tampipi zang uh hi. A gawl duhna uh zui uh hi.  Ahi zongin pawlpi aading sumpi themkhat a piak bekz ong a gik mahmah siahpia bangin kingaihsun uh hi. Pasian kiangpan thupha ngahnuam napi-in piakkhiat ding ciangin Pasian sangin mi dangte pia nuamzaw uh hi. Pasian gam khantoh nading a lunggulh khempeuhin a sumte a hunhunin a kisapna munmunah piakkhiat ding zekai lo ding hi. (4T-18).




A manpha mahmah LaiSiangtho khuavak sunga nuam a sa mi in, tua khuavak mun khempeuhah puakkhiat ding vei mahmah ding hi. Pasiangam zai nading nasem dingin a kisap simin a lungsim leh a sumbawmte honsa-in om a, piakkhiat ding kigingsa-in om hi. Pawlkhatte in a sep ding zah sangin tamzaw sem uh hi. Amaute in vantung sumkholna-ah kholkha lo a a sup ding a lau tawh kibang uh hi.




A tawm thei pen sep ding a hanciam zong om leuleu hi. Amaute in amau aading sumzong uhhi. Asum apaai-uh amau phattuam nading bek in zang uhhi. Pasian gam aading a piak khiat uh ciangin zong itsiit in tawmcik bek piakhia uh hi. Pasian aading pia ding ci-in kiciam khin hinapi a hun sot-to to-in pianawn lo uh hi. Sawmah khat zong a tawm thei penpen in pia uh hi. Pasian aading a piakkhiat sumte a maimangin ngaihsun kha uh hi. Pawlpi mun tampi takin sum haksatna tuak uh hi. Ahi zongin a tunga i gen mite’ lungsim sungah pawlpi a khangto a, a kiamsuk zongin amau tawh a kisai lo bangin om uh hi. Leitung khuavak puakkhiat nading hite in vanzat-te ahi hi. (4T-477-478).




Tuiphumna Tawh Kisai Kiciamna




Pawlpi tawh a kizom khempeuhin pawlpi aading bek lunglut dinga, lunggulh dang khempeuh tungah koih ding hi. A nasep in Pasian tawh a tawntung a hing kizopna hi ding hi. Gupkhiatna nasepah zong lungsim takpi tawh kihelin sem dinga, a nuntakzia leh a gamtatzia-ah zong Pasian thukham pen leitung ngeina tuamtuamte tawh a tehkak ciangin thupi zawtham cih kilang sak ding hi.  Zeisu a sang, kha khempeuhte in a Topa’ nasepna-ah lunglut taka sepkhiat zawhna tawh a kidim kha lam nasem khat ahih nadingin amah leh amah kiciam ding hi. Mi khempeuhin a sep ding peuhpeuh kicing taka a sep ding uh Topa in lamen hi. Tua ahih manin hih thu in nungzuite’ aadingin thusim hita hen.




Topa’ hong piak sum leh paaite banah Topa’ gam zai nading a kipia sumte i zat i zeknate-ah pilvang takin i zang dinga, Pasian tungah i thumaan-na i lak ding hi. Mawhna ii khuhcip mite’ tungah LaiSiangtho thumaan a tun nading Satan in ahih theih zahin khaktan ding hi. Ahi zongin hilhkholhna aw leh thuumna aw amaute’ tungah tung ding hi. Hih nasepna-ah mi tawmcik bek a om hangin amau mah banga, a lunglut mi a tullom in a om ding kilawm hi.(5T-460-462).




I Nasep Masuan




Leitung hilhkhol ding nasep eite’ tungah hong kipia hi. Thaman bangzah bangzah piak a kul a hita zongin, eite in Pasian thumaan i nuntakna tawh lak ngiat ding hi hang. Suplawhna a neikhinte i hih manin a kisap leh zong i nuntakna piak ding a kiging khinte i hi hi. Hun tomno sungin nasep lian pipite sem ni. I nasep ding tel mahmah a, thumaan tak-a i sepding ahi hi. A tawpna-ah gualzo a nuntakna lukhu a ngahte in, lungsim siangtho tawh  Pasian nasep ding hanciam ahih manun, Jesu dikna puanpak silhkha uh hi. Christian khempeuh ii tavuan in sisan a baang Jesu singlamteh dialkhai pua-in Satan i zawh mang ding ahi hi.




Hih nasep i sep zawh nadingin i suplawh ngam kul ding hi. I nuntak tawntung ei deihna nialna leh singlamteh puakna tonkhawm hi. “Kanung hong zuinuam peuhmah in amah leh amah kinial dinga, ama singlamteh pua-in hong zui ding hi” Topa in ci hi. Leitung sum hauhna a ngahte in sum ngam ding hi. Tawntung letsong a zongte in supna om lo-in ngah thei dingin lamen ahi hiam? (R&H, Jan.31, 1907).




Thuumding Ngakngak Ken




Hongpai kikkik ding thuumnate ngak thapai kei in. Thakhatin nasepna sungah kihel in semin la, hi zo lo dinga a kingaihsun nate ahi thei dingin sem in. Topa’ gamzai nadingin Topa’n eite khut sungah sum leh paai hongap hi lo hiam ci-in mi khempeuh amau leh amau kidong ta uh hen.




Pasian tungah citak ciat ni. I ngah thupha a kici khempeuh Topa’ kiangpan hong pai ahi hi.  A zenzen in Topa Pasian in Ama nasep nading a kisam sum zon siamna nang tung hong pia-in a semkhia dingin hong sawl hileh sem lo-in i mawk om ding hiam? “Sem zo kei ning Topa,  ka tate’n hong phal ke’n teh, Topa aw, Na thu ong mang zokei ning, nong piak siamnate leisungah phum khinta ing,” i ci ding hiam?

Zekai nading hun om nawn lo hi. Pasian nasep nading nang huhna Topa’n hong ngen hi. Pasian’ neihsa kemte i hihna tawh kizui-in konggennop thu in Pasian sumte zangkhia-in, LaiSiangtho thumaan in banghiam cih mi khempeuh in a theihtheih nadingin sep khiat ding gel in.




Nasumte leitang tungah khol dingin ze-etna nangtung hong tung ding hi. Na lawm na gual in tua dingin ngaihsutna hong pia khading hi. Nasum napaaite metbawl nading hih sang a hoihzawk namun om nawn lo ahi hiam? Nang, Topa in a sisan manpha tawh hong lei khin hi lo ahi hiam? Topa’ aadinga nazat dingin Topa’n na khut sungah hongap hi lo ahi hiam? Kikhop nading innte lam nading, dam lote in pumpi leh kha damna a ngah nadingin zatoinn lam nading, khangnote Pasian nasem dinga pattahna sanginnte lam nadingin na sum tetawh huh in.




Pasian mahmah in khalam nasepna a khantoh nadingin a kipat a kipan, ngimna gelna na nei khin hi. Pasian in mihingte’ tungah sum leh paai a val in pia a, huhna kisam a, a nget ciang  lungdam kipaak taka, a piakkhiat ding uh ahi hi. Amaute’ tungah a kepsak pak sumte thumaan takin Topa sumkholna sungah hong paipih kik uh hi leh Topa’ nasep manlaang tak in kizo ding hi. Kha tampitak thumaan lamah kaizo dinga, Topa’ hong pai  ding zong manlang sak ding hi. (R&H, July 14, 1904).







Neihsa Kepzia (Counsel on Stewardship - EGWhite) - by Pr. Kai Khan Khual  



http://myanmar3am.org/zom/ellen-g-white-2/books/

 


Comments




Leave a Reply