WWW.TUNGZANGNEWS.COM

TUNGZANG NEWS
 
Rights and Responsibilities

Tu ciangciang I minam sungah democracy tawh kisai kigen, kigelh a tamzaw pen Rights (mihing pianngei thuneih theihna) thu vive kigenin, kigelh ciatin zong nasia thei bilbel hi. Democracy kammal huam sungah tangpitangtate thuneih theihna, hamphatna tampitak aom mah bangin (Responsibilities) sep ding, bawl ding akisam mawhpuakte tawh zong om khawm tonkhawm den ding ahih lam kiphawk kha mel lo mawk hi.

Rule of Law (thukhunpi bangin zuihna) tawh kisai lamah zong kumpite thanemnate bek kimuh sak diakin, mipite thukhun zuih loh bek tham lo, thukhun bang teng hiam cih nangawn a kitheih mel loh lam kitam gen ngei lo hi. Media lam semte in zong, kumpite siatna lam bek kilim genin mipite kitangsapna lam a gen kiom mel lo hi. Hi bang likliak tawh I Kawlgam democracy kalsuanna mai lam ding pen lungzin huai peuhmah hi.

Zingsang khat ka nasep pai zekai pian kha ka hih manin, mawtaw ka nawh hawl pian leh mei-san tuak citciat hing. Ka vei-le-tak ka et khiankhian leh mawtaw dang mu lo ka hih manin kinawh nopna huhauin, mei-san ka kan ziau hi. Ka gamtatna hong gal muh khikhe putek pian khat in a mawtaw tawh ka nasepna dong hong delh in, "denin mei-sanpi kan kha hi teh, lauhuai  mahmah hi, mawtaw dang aom loh hang mei-san ahih nak leh khawl ding ahi hi. Ni dang teh tua ci nawn ken, na lungsim thumaan tawh ki-uk sak in" ci-in hong tai dikdek hi. Ka khialh lam thei ka hih manin ka kisuang peuhmah hi.

US ah pemta khat ka hih hangin, mihing khat ka hihna ii (rights) hamphatnate ngahin mawtaw hawl thei, nasep nei thei, a dang hamphatna tuamtuam tampi zong a ngah thei ka hih hang, ka zuih ding a kilawmte ka zuih kei leh democracy gam tawh a kituak lo pa ka hi ding hi. Hong nung delh putek pa pen palik zong hi bek lo, mi mawkmawk khat ahi hi. Aw! mite in a gamuh it I cih hidan hi mawk aive cih ka thak phawk hi. I gam, I minam I it tatak leh a maan lo I muh phetin kei tawh kisai kei ee, ci lo-in I hilh pah ding mikim mawhpuak ahi hi. Kumpi nasemte mawkpuak bek hilaizang lo hi.

Nung kum April 2013 Kawlgam ka ciah leh, Yangon ah mawtaw hawlte a utut un hawl in, om zilzul uh ka mu a, I gam pen democracy gam dingin mipi in Rights bek deih in Responsibilities a neih loh luat lam ka mu hi. Yangon panin Kawlpi ka ciah toh leh na suk semsem lai mawk hi. Motorcycles ut bangbangin kihawl zeuzeu mai hi. Muhna tawh hawl uh a, a awnawnna ah hawl cih dan hi mai zen hi. Hi bang thute pen kumpi thuneite bek mawhpuak a puah ding hihet lo-in, ei mipite mahmah kikhelin thu khun omte zuih ding, neih ding kisam lua peuhmah hi. Biakinn ah Siate in mipite gen ding kisam hi. ZYA bang-a kipawlnate in mipi hilhcian ding kisam hi. Kumpi lam thuneite tawh kipawlin ma pankhop ding zong kisam hi. Khangnote lungtang sungah sum om peuh leh piang lel ee cih tuak phial uh a, cycle hawldante bel dipkua peuhmah hi.

Mihing khat I hihna tawh rights I neih pen, gtn; UHCR bang ei mimal ai ciang I siau thei hi. Ahi zongin UNHCR card ngah sa pipi khat in, phuhtawm min dang khat tawh siaukik in sum bawlna ding na zuak leh tua pen na rights zangkhial in, responsibilities lam a nei nawn lo na hi hi. Democracy kiukna deihin I awtawt hang' human rights deih ciang bek kitam-a, Responsibilities neih ding a kul lam a phawk kha se-lo kitam lai hi. 

I gennop pak ahih leh, Democracy pen a lang bek deih, a lang lam deih lo cih bangin kingah thei lo hi. A buppi in I san kul hi. Rights neihna pen a panglang hi-a, responsibilities kisapna pen a lang khat ahi hi. A kigawmteh pum khat sa khat ding hipan hi. I kumpite bek I mawh sak kawmkawm in ei-le-ei mipite zong kietphat zel kul tham ding hi. US te in our young president ci-a a kisak theih pih mahmah uh John F. Kennedy January 20th, 1961 ni-a, a thugen min thang vangvang "ask not what your country can do for you - ask what you can do for your country." hih kammal phawk huai ka sa hi.

Khat Thang

-- 

 


Comments




Leave a Reply