WWW.TUNGZANGNEWS.COM

TUNGZANG NEWS
 
Singkungpi le Khualzin minih

Khat vei, khualzin mi nih gamzang kuam khat ah sun ni sat laitak hong tunguh-a,lam phei pai ahih manun nem simthamin ni-sa lelin hong tawl peuhmah uh hi. Agal gamla lualo khat ah mual-bo no khat hong deihuh-a, tua mual-bo khen diakah Singkungpi khat hong gal muh uh hi. Khualzin nih zong singkung lim bel dingin thasanin hong nawh pai-in, singkung nuai ah hong tung petpet uh hi. Singkung nuai ah tawlngain a tui puakte uh dawnin tawmvei sung hong tu uh hi.

Khualzin khat pa in singkung tung lam dakto kawmin "endih ve lawm, hih singkung in gah anei het kei mawk a, ateh nget nek theih ding cih bang dan nangawn om kei veh aw, bangci singkung hi lawmlawm ale? ci-in hopih hi. Alawmpa in zong "hi sa mah ing mataw, vasate nangawn in bel lo dan ahi ta-ve, nek theih om lo singkung hi lo dia, kimanna nei lo singkung pawl hi ei" ci-in kithutuak dep uh hi.
 
Tua laitakin singkungpi hong kilok-in, thu hong gen mawk hi. "Mihaite aw, Kei pen hih zangkuam sung a-uk Vantungmi ka hi hi. No gel ni-sa lakah na gim na tawl lamuh kong muh ciangin, singkung bangin ka lim nong belh theih dingun ka na om hi. Tua nangawn na lungdam thei kei uh a, na duhhop, huaihamna lungsimuh tawh gah nei lo, nek theih om lo, kimanna nei lo ci-in nong gensia lailai uh hi" acih khit ciangin singkungpi hong mang vingveng hiau hi. Mi hai khualzin nihte zong ni-sa lakah belh ding lim nei nawn lo-in kimlepam khuadakin akampaute uh kisik in hong om ta uh hi.
 
Duhhop, huaihamna tawh akidim mite pen bangzahtakin neih le lam kipiapia ta-se-leh, lungkim thei lo uh a, deih beh, deih beh lel dinguh ahi hi. Lungkimna lungdam theihna pen bangzah hau, bangzah nei cihte tungah kinga lo-in, I neih pepeuh tungah lungkim zawhna tung bekah kinga zaw hi. I neih bangbang eite tawh kilawm kituak dingin Pasian in hong piak hi-a, I hihna bangbangah I lungkim theih leh hong pia Pasian zong lungdamin I kisap dangte hong piak beh thei zaw ding hi. Lungdam theih ding kisam hi.

By: Khat Thang



 


Comments




Leave a Reply