WWW.TUNGZANGNEWS.COM

TUNGZANG NEWS
 
Tuni Ka Vakna: Singapore khuapi sung


Khuapi sung vak ngeilo cih mah khuapi sung vak ka cimtak thei mahmah hi. Mite sumbuk ah van en, van lei in pai zungzung mah leh kei bel ka khankhiatna singkung suangtum nim dildial na mun mah ka mitkha ah om masa den hi. Vaphual te leng ziaiziai in, vasate ham ziaiziai a, singkung te a dum dildialna mualkuam mah nuam kasa den zaw hi. Tua pen piangsakpa bawl mual leh guam, luipi te omna gammang ahi hi. Ahi zongin tuni ka vakna mun pen khuapi sung gammang ahi hi. 
 
Singapore khuapi sungah vak kha leng paina peuh ah mawtaw lampi kizik dimdiam a, khe tawh lamkanna ding nangawn kiciangtan sitset hi. Lampi khempeuh ah meivak khuam kiphut in zan cianga taang ding meivak kibulh liapluap hi. Lamlai zong mawtaw nih leh thum pai theihna ahih leh a vekpi in lampi khenna gidung bangin kizik dimdiam a khialh theih cih bang hilo hi. Khe tawh vak ciangin zong tua teng kimu ahih manin nisa khut tawh kiliah kawmkawm mah in tuate kimu daudau hi. Lamgei a singkung kisuante lah a vekpi in a gol hilo sawnsawn ahih cianga nilim a kingah teei hangin a vekpi in nilim khin zolo hi. India khuapite banglo in lamgei ah nektheih zuakna, tui zuakna, muamkhum zuakna cih bang khatzong omlo a, sumbuk bek ah van kituam zuak sitset hi. 
 
Sumbuk peuh mah a dawl ahih leh 'kahleitai' (escalator) kithuah a, khe tawh pai nuam taleng kahlei duappi khat kidok hanhan in hong kai tazen hi. I gim ciang tawldam hangin i nawhpai nop ciang kipai mengmeng nuam hi. Ahi zongin kahleitai om napi va nawh pai susu zong mite hong et dan khat nuam mello leuleu hi. Inn khan tam zaw leh dawl nih leh thum ciangte peuhmah manlang taka kah theih nadinga 'khauluai kaklei' (elavator) kibulh te bel a kizenna khat om bilbel. Thadah man zong hilo, ut lua man zong hilo, a tawldam leh a nuam (a diak in vangik khai le'ng) himawk hi. Bishan Shoppping Mall J8 kici ah a dawl 4na dong Guitar khau lomkhat lei dinga kahleitai ah 4vei ka kivialhtoh leh khe tawh mualtung kah sang tawldam zaw a, ka tuaksuk lam zong kahleitai mah ah kidoksuksak leuleu in a tawldam hong suak pah hi. Bishan MRT Station ah North-South Line zuatna ding bang kahlei sawm zong a pha gina mello pen kahleitai kibulh ta leuleu a, khe tawh pai pak ding pen a kahleitai hong ngaksak nuam sese ahih manin a nuam ahih hang a nopvallua zaw tawh kibang hi. MRT Station khat peuh i lut cianga i maia limlakna limlangpi ah i mel hong dawksak duaiduai den uh bel muhnop sa khin den khol keng!
 
MRT (Mass Rapid Transportation) meileng sungah i tuan ciang i tunna ciangciang a min hong gen uh a, a meileng sungah zong a kimu dingin kigelh a, a station i pusuah ding ciang zong paungaihna tawh a gen kikkik se uh pen a sep ding uh omlo lua in 3vei tak a genkikkik hilo in a kizenzia uh a lahna uh khat na hi gige hi. A theikhial a omloh nading mite a khualna uh na hizen hi. 
 
Lamdang ka sak leh Singapore te in thupi a sak uh pen - sumbuk golpi MALL a kici peuhmah lut leng a sungah Naupang Pattahna (Children Development Centre) nam tuamtuam a omsak uh ahi hi. Laipilna kisinsakna Tuition Centre maw, pau leh ham siamna ding sinsakna Language Centre maw, thutheihna leh khuamuhna khansakna Knowledge Development Centre cih bang a tuamtuam a koih zeizai uh ka haza mai hi. Banghangin Zomi te in Zogam ah hih bangin naupang pattahna ding mun tampi kibawllo hiam cih hong ngaihsunsak a, hong khasia sak hi. Mite in a tate uh, naupangte sangkhak ciang a pilna sinna uh khawlsan lo in a sanginn pua lam ah pilna sinna mun tuamtuam ah puak in a lawm a gual tungah a theihna a tuanna dingin hanciam uh a, Zomi te in naupangte sangkhak peuh leh lokuanpih, sakol hawlsak, kel ann zongsak, naukem in inngaksak hizen hi hang! Mite in a tate uh pilna zonna, pau siam sinna, thugen siam sinna, laigelh siam sinna, lawmta kikholhdan siamna cih bang a tuamtuam na sinsak ngakngak uh hi. Naupang tan 1 pan tan 6 dong pen pau leh mathematics bek limtak in sinsak diak se uh hi. Pau thei kei leng thu tampi i thei zongin kigenkik theilo, kihilhsawn theilo. Khuak manlang mahmah taleh tuat theilo, manlang takin nambat tawh gualkhia thei kei leng i khuak manlangna a zatna tawm hi. Tua manin 'siamna' (skills) tuamtuam a kisinsak ma un a naupang lai vua a kisap pen uh bang hiam cih ngaihsun masa in tua pen - Maths leh Language hi a, sinsak masa pen pah uh hi. 
 
Naupangte sangkah sak dan uh, a lai hilh dan uh pen lamdang kasa leuleu hi. Ganhing tangthu bekbek nipi kalkhat sung bang hilh in a kalkik ciang Singkung lopa thu bekbek, a kalkik ciang vasa tangthu bekbek, a zom ah ngasa thu, etc cih bangin khat khit khat a banban in hilhse uh hi. Gawm khin gawp lo in a banbanin sinsak se uh hi. 
 
Siam kei teh, thei kei teh, thei teh cih kammal te zang hetlo in pilvai takin kuamah nopmawh sak ding kammalte na zang hetlo uh hi. A thapia theithei dingin na kisinsak uh a, a ziakaite zong na ziakai uh cilo in a manlangzaw in na hih lecin bang a phatuam tam ci zen uh hi. Bawhlung suih bang a thahatte in a suih ciang 'hatlua teh' cilo in, 'na thahatna kidek in, na tha sitbawl zaw in, tha tamlua kisam lo hi' cilel uh a, mawhsakna leh nopmawh a sak ding uh kammalte na zangkha hetlo, a zatkhak ding uh na kidawm uh hi. Pilvai kasa a, a pilte gamtat dan tua dan na hizaw hi. Zomi te hunkhat lai bang: hat lua, hatlo lo, dak lua, ziakai lua, tha neilo maw, anne lo maw, etc cih bangin kikam khauh vatvat thei mawk hi (tun bel tuaci nawn kei hang in). 
 
Singapore ah vuikhu a om lo bek hilo in phalbi nangawn a omlo ahi hi. Leitung laizang equatorial line ah om ahih manin khua hun vot, sa cih bang omlo in a tawntungin sa den himai hi. Ni in a kapna mun kibang den a, a tung pan suk kap veva den ahih manin sa mahmah hi. Zogam pen Khuakhal ciang ni in  tung pan suk kap a, Phalbi ciang a sawi lamin kap in khuavot hi. Zogam bangin Singapore ah ni kiheilo a, sawi kap omlo hi. Tua manin namsia leh thokang tam a, innlawi bang phe maimai vetse hi. Zawhngeu adingin meilum a kihai den kullo in innuai khawngah lum le uh zong lum lel ahih manin mun nuam a suak hi. Tua manin zawhngeu tam a, a kikhawi ahilo zong innkim innpam ah vak ngeingai uh hi. Zawhngeu omna ah zusa zong a nek ding un a om kisam a, ahi zongin Singapore zawhngeu te in zusa ne lo bilbel uh hi. Zusa te pen a za kikap den ahih manin a mul uh lang theuthau a, nek dingin zong limci lo hi. Tua manin zawhngeute nek ding numeite in zankim dekdek ciangin puak uh a, zawhngeu annpiate bang zawhngeu in thei ahih manin delh vangvang uh hi. Thau kelkul in ihmumu lel uh hi. Zawhngeu anpia pawlkhat pen lawmte in 'nungakpite hi' ci se uh hi. 
 
Singapore a dung tai 40 Km leh a vai tai 20 Km ahih manin a gamgi nawl tuak pen ko khua Murlen pan Tonsim tan khawnga gamla hilel hi. Khe tawh pai leng zong gamkhat pen nikhat in kitung lua mahmah a, kinileh zo ding cihna hi. Ahi zongin khuasung meileng MRT om ahih manin nai khat sungin khualu leh khuataw kitung man a, khuanawl leh khuanawl zong tuabang mah ahi hi. Khuasung meileng noplua mahmah ahih manin mawtaw neih kisam lo a, Bus khawng bang a tuang ding tawmlua in ei bek i tuankhak hun zong tampi vei om mawk hi. Meileng nangawn ei guak bek i tuan khak hun om phial mawk hi (zan kim meileng te ah tuangkha leng). 
 
Van zuak van lei baihsak uh ahih manin a hoih in kibawl mello a paih pah theih ding pian vive in zuakse uh hi. Chinese te bangin a kumthak sim un a van uh a tamzaw laih uh a, a thak sitset kum khat kikhom dingte tawh laih den zo mawk uh hi. Innsung, innpua, vankoihna, vanzat cihte a lui nena pangpalen kai cih bang nianua omlo mawk hi; siang sitset mawk hi. Leitunga gam siangtho pen a cih mah bangun a khuasung bek siangtho lo in amau innsung leh innkim zong siangtho sak sitset uh hi.  
 
Tenna inn nuai ah nek leh dawn zuakna sumbuk om pahpah ahih manin nuamtak in kisapte kilei ziauziau thei hi. Sumbuk bek ah va delh a van va lei ding cih hi sese lo in inn gei pan zong kisap tampi kingah khin zo ahih manin vaiveng mahmah  hi. Mawtaw khawng bel a man tamlua mahmah ahih manin a nei nuam taktak te bek mah in a nei uh hi. Kisap mana neih hilo in a deihte in a neih uh ahi hi. Mawtaw laidal (license) leina pen a mawtaw man sangin tamzaw den mawk hi. Tu laitak bang mawtaw laidal leina dingin SGD90,000 pan SGD 1 lakh bang tung mawk ahih manin a mawtaw man zah nih bang a pha suak hi. Tua pen a gam neu lua in mawtaw tamlua ding khakna namkhat hi a, a lei nuam peuhpeuh in lei ziauziau ding khakna namkhat zong ahi hi. Mawtaw license man bekbek tawh zong gamdang ah mawtaw hoih nih leh thum kileithei ta thamtham hi! 
 
Ka meh ding lei a ka ciahkik leh meh zuakna nitak nai 1 kikhak ding pen minit 10 khawng bek na omlai a, ka lei zangzang leh ka leikhit ciang sumbuk khempeuh zong nai 1 cingta ahih manin hong khak zangzang uh hi. Nai golpipi, mantam pipi bulh tuanlo uh hi. Ahi zongin a hun tawh kituak in sem uh a, a hun in kipan in a khak hun a cih uh a cin ciang khak lel uh hi. Zomi te in nai tul tampipi man i bulh nangawn a nai en manlo in i om kha thei zen hi. Hunlap a nasem Singapore gam khangto a, hun lap a nasemlo gam tampi Singapore zah in khangto zolo mawk hi. Mipi in zong khantoh ding utzaw uh ahih manin hun lap in diang ziahziah uh a, kuamah ziakai nemnum cihte om lo hi. Ei hun i lap i kei leh ei zoma in na sem masa a, ei a ziakai, mi a phalo kisuak ziau hi. 
 
Zomi te in zong i etteh ding a om lam ka phawk kawmkawmin ka meileng hong khawlvat a, ka tuakna ding mun ah tuak in kahleitai ah ka dingto a, leinuai pan leitung ka pusuak ciang guah na zu seuhseuh ahih manin khuahun themkhat na vot zaw deuh hi. Leinuai ah gul bang kitholh henhen MRT meilengte nop mahmah lel a, i tuan ding ciang zusa kua kullut i bat tei sam hangin i tunna ding mun kitung ziauziau ahih manin leinuai panin sak leh khang sim leh mal kilet khin dikdek hi. Khantohna i cih zong a tunglam vive na hikhin khol kei e, leinuai a kitholh ziauziau a utna mun peuh ah zusa phih banga pusuak ziauziau theih zong khantohna namkhat na himawk ei ka ci hi. Meileng kongkhak pusuak in ka innlam zuanin ka pai a, nisa taleh Zolukhu khuk kullo, guahzu taleh Zolukhu khuk kullo dinga a tungdal a kibawl suak sitset nuai ka tawn a, nisa thuaklo, guahmal thuaklo in inn ka lut hialhial hi. 
 
Pu Lengtong Pauno laphuah ka phawk a, ZOGAM HONG PAL DING HI ciin kei zong ka innkong ka hon kawm in ka lungsim ah ka kinem hi.
 
 
Hau Za Cin
Phuitong Liim
www.hauzacin.blogspot.com
 


Comments




Leave a Reply