WWW.TUNGZANGNEWS.COM

TUNGZANG NEWS
 
Dotna leh dawnna

Dear Thelma,
Kong dot nop thu nih om hi. 

A khatna ah, kei pen ka kum 17 cing ta hi. Ka nuntaakna sungah a thupi pen a hi SPM Exams tukaal sungin a phi ding ka hi ta hi. Mite hong muhna ah kei pen lawm leh gual lakah laipil mahmah khat ka hi a, mailam ah na lianpi a sem thei dingin a kuamah peuh in hong hanthawn in hong lamen ciat uh hi. Ka innkuanpihte mahmah in zong mi mawkmawk lo ding dinmun ah hong koihkhin uh hi. Ahizongin kei mimal ngaihsutna lampan in tutung a ka laiphi ding uh pen kihtaakpi mah in ka kihta hi. Ka lungsim sungah lauhna leh patauhna bekbek om hi. Tua ahihman in lai zong ka sim thei kei a, a kullopi peuh ka buai niloh hi. ka lungkham mahmah hi. Bang cih ding ka hiam?

Anihna ah, ka sangkahpih numei khat ka ngai sim khinkhian hi. Amah pen ka lawm kithuahpih den khat ahihi. Ka kithuah zawh uh kum nih a cing ding hi ta hi. Ahizongin tuni ciang dong amah ka itna kam tawh ka gen khia ngam nai kei a, ama hong tel siam theih dingin gamta luhek tawh zong ka kilang sak ngam kei hi. Cimawh mahmah ingh. Bang cih ding ka hiam?

Nau aw,

Dawnna: 
Haksatna a hih keileh thulian khat peuh ih tuah khak ciangin mi a tamzaw in tua haksatna zawhna in ih nuntaakna sungah a thupi mahmah dingin ki ngaihsun ciat hi. Gentehna in Mopawi bawlni, ta neih cilni, nasep kipat ni, mite ngah zawh loh nasep hoih en ih ngah ni cih bangte pen ei aa ding in thulianpi a hi hi. Ahizongin tua te pen ih nuntaakna sungah thu lianpi hi den sam lo hi. Hun khat ciangin thu lianpi a ih ngahihsut leh ih tuak khak hamsatna te hong veng lel hi. Na tuak khak thu hanga na lungkhamna pen hibang in kinawk to thei hi. A khatna ah nang a dingin Exam pen thupi mah hi. A khatna na ngahtoh zawh leh bel a thupi mahmah na hi dinga, ahizongin a khatna na ngah loh leltak hangin College leh University khempeuh ah kah thei lo ding cihna hi pah tuan lo hi. Exam ih cih in nang hihna taktak kilangsak lo a, a kilatsak zawk pen na Exam hun laitak a na phawk khak thute tam maw tam lo, maan maw maan lo cihte hiziau lel hi. Examna ah hoih tak lai na gelh theih lohna hangin na mailam nuntaakna bing cip ding cihna hi lo hi. Examna ah a khatna a ngahden zote bek mihau mipil leh mi lawhcing hi lo uh a, a ngah zolote zong a ngah zo dente sangin minuamsa leh mi lawhcing tampi kei ngiat in ka thei hi. Na laisim leh na Exam ding bek na ngaihsut den leh na lungkham lel ding hi. A dang tampi na lungsim hong khanglo sak thei leh ngaihsutna hoih tampi hong guan thei  kimawlna leh movies tuamtuam om hi. Na laisim kawmkawm mah in tuate na pampaih loh ding thupi mahmah ding hi. Ahizongin sangnaupang khat na hihna tawh kizuiin na laisim na mangngilh suak lohna dingin nang leh nang na ki ukzawh hong  kisam leuleu hi. Mite hong ngaihsutna mun na tung kei zongin na hihna khat peuhpeuh ah hanciam mahmah peuh lecin mi nuaiah om tuan lo ding hi teh.

A nihna ah:
Sangnaupang khat na hihman in lawmngaih tawh na buai ding kong deih masa kei hi. Zi neih hun nailopi a lawmngaih neih pen a diakin sangnaupang ih hih lai takin nawngkai mahmah hi. Bangbang hileh haksatna na tuak laka khat ahihna tawh nong dot mah bangin kong dawng ding hi. Na it mahmah na lawmnu pen hoih tak kithuahpih in. Gamtat luhekna tawh na gen ngam loh itna kilangsak nuam na hih leh thupi hi. Bang hangin kum nih bang a kithuah khinsa na it na ngaih lam na lawmnu in tel zo nai lo hiam cih pen a ngaihsut huai thu khat ahihi. Gamtat luhekna tawh na itna kilangsak nuam na hih leh a lahkhiat dan na siam mahmah kul ding hi. Na siam kei leh na lawmnu in na lehlaak thei hi cih mangngilh kha kei in. Tua ahihman in na siam ngap kei leh nang ngiat in Facebook sung pan a hizongin Email sung pan ahihkei leh khanglui lai danin laikhak mah  tawh na itna thugen in. Tua na kingap kei leh niangtui na dawn khop laitak un nang ngiat pau khia inla gen in. Tua hileh kitel pen dinga pasal vai mahmah ding hi.

Hong it,
Thelma.
(Magazine sung khat pan ka laaksawn hi. )

Francis Quavadis

 


Comments




Leave a Reply