WWW.TUNGZANGNEWS.COM

TUNGZANG NEWS
 
Ei le Ei Kimuanna

Khat vei lai-in business sem tangval khat tuipi nawl a om paakhuan sung khat ah lungkia lua in hong tung hi. Singkung nuai a om tutna khat ah mun la-in, a business sep a khahsuah ding ahihna tel kawm sa-in, maigum ngeungau in hong tu hi. A van laknate in a batin bangmah pia nuam nawn lo hi. A leibatsa tam lua a hih manin nisimin mat zetzetin leiba sikte in phone sam den hi. A credit card teng zong kikhak sak khin hi. A customers neih sun tengin zong muang zo nawn lo a hih manun, mun dangah tai-san manguh hi. A company bankruptcy loh phat mawh dinmun hi ta ahi hi.

Tua laitakin putek sim pian khat a gei ah hong tu-in, "lah na mai gum ngeungau keii a, bang lung himawhna nei na hia?" ci-in hopih hi. Business sem pa in zong a company a khahsuah ding a hihna gen hi. Putekpa in "ken hong huh thei ngel ve ning aw na vai pen, na min bang a hia leh?" ci-in dong hi. Putek pa in check khat lakhia-in, tangvalpa a piak kawmin, hih tawh na business na kipankik in la, tuzawh kum khat khit teh hih mun lianah kituahkik ni in, tua ciang hih sumte hong lohkik in ci-in, pai khiat san hi. Sumbawlpa in zong putekpa check piak a et leh US$500,000.00 (teng nga) tak hi in, a sign thu min pen leitung mihau pen khat a kigen America gamah billionaire masa pen John D. Rockefeller ci-in sign kithuh hi. Sumbawlpa zong lungdam lua mahmahin, "sum vai lungkhamnate bel veng lian ai ta ve" ci-in hong maitai zo pah lian hi.

A mah le a mah kimuanna hong nei ta in, a sem pepeuh a piangzo dingin khamuanna tawh hon gkidim ta hi. Khensatna hoih khat hong bawlin, bang le bang leh hih sum pen zang nai kei phot ningin, ka nasep hanciamkik ning ci-in, a check ngah thoh lo-in hici kep phot hi. A khut sungah $500,000.00 om cih thei a hih manin lungdam le khamuang takin a van laknate kiangah va pai hi. "Leibate tawmvei hong ngak lai un la, bangbang ahi zongin van zuak ding pawl khat hong pia lai dih un" ci-in kimuanna lianpi tawh va gen hi. A customer neih teng zong hopih in, lawpna le khamuanna tawh van hong zuak hi.

Lem-et ngam loh zah dong ding phialin, a business hong dingkik zo bek tham loh, khasim in a met a pung hong khang sak semsem hi. A leiba khempeuh hong lohkik zo banah van khawmg semsem a hih manin kum khat sungin gualzawhna lianpi hong ngah zo hi. Kum khat a cin ni lianin, mihau pa John D. Rockefeller tawh kimukik ding, a nasepna a lawhcinna gen ding leh a check piak a zat lohnate gen nuam lua a hih manin sumbawlpa paakhuan ah hong nawh tai mahmah hi. Tu-ma kum khat lai-a, a tutna mah ah tu in, mihau pa John D. Rockefeller hong pai ding gal etet hi. A sawt lo in, putek pa hong pai gal muh takpi hi.

A gei nai hong tungin khut kilen ding a van laitak, putek pa nungah zato siama (nurse) khat hong tai in, tangval pa aw, hong mai sak in, a mah pen lungsim cidam lo a kakep zawh kum khat val ta hi, ka muh loh kalin na vak khia zel in, a kimuh pih peuh kiangah leitung a mihau pen John D. Rockefeller ka hi ci-in mawk gen kawikawi hi, nang zong hong nawngkai sak kha hiam? na heh kei in maw!" ci-in zato siama nu in hong tum saisai hi. Tangvalpa in a kampau ding thei pak lo a hih manin, zato sianu in zong putekpa khut pan lenin paikhiat pih vingveng hi.

Sumbawlpa in zong, kum khat tawntung a nasep matutna, van laknate, customer te tawh a kihona ah a gualzawhnate hong lungngaikik hi. A lungsim sungah kipawk thakna khat hong ngahin, gualzawhna pen sum tungah kinga a hih lohna hong mu khia ta hi. Gualzawhna pen mimal, ei-le-ei kimuanna, khamuanna tungah kinga zaw a hih lam hong tel ta hi. $500,000.00 a khut sungah om cih kha muanna in a sep khempeuh lawhcing sak a hi hi. A tatakin tua $500,000.00 pen laidal mawkmawk khat na hi lel ngel hi.

I biak Pasian in vantung leitung na khempeuh a nei, a piang sakpa hi a, tua Pasian I neihna I lungsim sungah kiptak, khotakin koih zo leng khamuanna I ngah ding hi. Tua khamuanna in hong lawhcing sak ding na hi gige zen hi.

Khat Thang

 


Comments




Leave a Reply