WWW.TUNGZANGNEWS.COM

TUNGZANG NEWS
 
I Kisin Theih Pawlkhat Om

 


Kum hong bei hiaihiai in kumthak hong nai hiaihiai a, kumlui khak dan ding leh kumthak dawn dan ding na lungsim ah hong lian mahmahta hi. Nangma mimal nuntakna zong na nunghei a na etkik ciangin na hih hoih tampi na mu a, na bawlphat nop zong tampi na mu hi. Na lungsim ah bang ngaihsun in bang hih masa ding cih leh mite in bang ngaihsut in nei leh hoih ding hiam cihte na ngaihsun hi. Ngaihsutna a hoih leh manphate in nang leh na kim na kianga omte bek hilo midang khempeuhte nuntakna zong khangsak in lamto hi cih na thei hi. Tua ahih manin kumthak ah bang thu ngaihsun in bang kisin ding cih lungngaih ding thu hoih ahi hi. I kisnna leh i ngaihsutna hoih tawh i khantoh kawmkawm in midangte zong a lamtoto i hi hi. 

I kisin theih tampi tak om a, tuate lak ah pawlkhat ensuk zalzal pak leng:


1. Bangciang tungta ka hiam cih kienpha den ding: Ei leh ei i tunna ciang kiet, kivelkik pen a thupi mahmah hi. Mite hong muhna ah kei bangciang tung ka hiam, mite in bangciangah hong koih uh hiam cih kitel mahmah ding a hoih ahi hi. Kei leh kei zong ka tup ka ngimna a sangpen pan bangciang tungta, bangciang kahtota ka hiam cih pen i kisittel, i ki etkikkik kul ahi hi. I ngimna, i sawmna ciang i tun khit leh mite bangzah in i panpih, bangci'in i tawsawn, i lamsang ta hiam cih kisittel kik ding hong om hi. I tunnopna ciangtan i tun nai kei leh i kisap bangteng om a, bangteng sin kullai, bangteng hanciam kullai hiam cih i ngaihsut ding a kisam thu hong hileuleu hi. 

Kisam lai ahih leh sangkah kik, laisim kik, kisin kik ding hilel hi. Gol zawh ciang sangkah maizum huai cih om tuanlo hi. Theihloh khat theinuam a sangkah kik, laisim kik cih a thupi mahmah ahi hi. Laibu sim a mi phakna ding ahih leh sim huai hi. Sepkhiatna tawh siam ding nam ahih leh zong sep kipat a, siam sawma hanciam ding leh siamlohte kisin ngap ding a thupi hi. Mite tawh kikupkhop a theih ding thu ahih leh zong kikuppih a theihsawm ding ahi hi. A theisate dotbawl a, a siamsa tung pan sin ding a kisap leh zong kalsuan kipat ngap ding ahi hi. Tua bang kisapna na neih lam na kitheih leh mai kumthak ciangin koi ah sin ding, koi ah zong ding, koi ah kan ding, koi ah mu ding, koi ah ngah ding cih kan khol inla; sum leh pai a beizah ding; tha leh ngal a kisam ding zah cihte zong tuatsa dimdiam in koih in kumthak lut lian in! Na theihloh na siamloh khat na sin, na siam ciangin na kisik kei ding hi. 

2. Midang adingin ka phatuam hiam cih kienpha kik in: Mihing khat lungdamna leh lungnopna pen midangte adinga phatuam leh midangte adinga thupha i hih ciangin na hi nuam mahmah hi. Midang huh thei cih pen nangmah mah in siam mahmah, tel mahmah leh thei mahmah cihna hi a, zong semzo, zong pia zo, zong kuankhia zo cihna ahi hi. Na khat peuh nanga ding beka zang hinawnlo a na kim na kiangate adinga na hopsawn zawh, na zeekkhiat theih ciangin nanga pen a khangto leh a kisangkhai mahmah hita cihna hi. Tua bang sepkhiatna leh piakkhiatna pen na khangkhan semsem lai ding zong a hoih ahi hi. Midang tungah na zat theih khitsa pen na siamnel mahmahsa thu khat na hi hamtang hi. Mite khantohna ding a ngaihsutpiakna hawm thei, mite suakta taka lungsim sungkhiasak thei, mite patau hetlo a gamtangsak thei cih pen midangte adinga phatuam nuntakna nei khat nuntakzia ahi hi. Nang zong tua bang na sepna kienpha in kipuahtoto, kisin toto, kikhangkhan toto in. 

3. Mite ettehpha ka hi hiam cih kienpha in kisin toto in: Ettehpha cih ciangin mikangpau in 'model' cih tawh zong kigen thei hi. Mite adingin limpha ka hi hiam cih pen mihing nuntakna ah kivelphat taak thu khat ahi hi. Mi khempeuh tawh kuamah kiho kim manlo hi. Mi khempeuh tawh kuamah thu kikum, kiho, tukhawm manlo hi. Ahi zongin mi hoih khat gamtatna leh nasepna hoih hangin mi tampi in etteh in phattuampih uh hi. Ami tawh kimu kei taleh mite gen sawn, mite zak sawnna panin zong mite in na etteh uh a, na nuntakpih thei uh hi. Hong etteh leh hong ciing tam semsem leh i nuntakna man nei semsem a, mipi leh gam in zong hamphat lawh hi. Nang tawh a semkhawmte in meetpih pen a, nang tawh a kisawhkhate in hamphatpih pen hi. Tua ah khawllo in mi khempeuh lungsim ah kizel in nasem hi. Mite in nang tawh kizop ding ut in nang tawh kitheih ding ut in, nang tawh kikholh ding lunggulh uh hi. Nang hong nungthuap kibehlap in nang hong dal ding nangawn na hemkhia thei hi. Tua ahih manin mite adingin limpha, ettehpha na hi hiam cih na kivelpha in a kisap bangin na kisin toto lai in. 

4. Mite nuntakna ka gahsahsuak thei hiam cih kienpha in: Paunak khat in, "Na itte ngasa kholh kei inla, ngasa mat dan hilhzaw in," ci hi. Mite kiangah nahoih sep ding, tua cih ding hicih ding cihte i gen thei a, ahi zongin amau mahmah in hih in a sepgah uh a gah i losak tam kei hi. Mite pattah in mite i hanthawn a, amau mahmah sepkhiat hi in amau thatang pan piang a gah alo uh hi cih i theisak, i ciamsak tam kei hi. Tuni in tua banga gahsuah thei dingin nungkum sangin maikum ah bangzah na hanciam sawma? Na siamsa ahih leh zong na behlap sawm lai hiam, na sepna na khan sawm lai hiam? Mite nuntakna ah a gah a lawh theih nading un nangmah mah va pai, va hihpih, va seppih in na khoi toh kisam ding ahi hi. 

Mi na panpih ciangin siksan dawl li om hi ci uh hi. A dawl khatna ah, ken hih dingin nang hong en ding. A dawl nihna ah, kei hih banga nang zong hih ding. A dawl thumna ah, nang hih dingin ke'n hong encik ding. A dawl li na ah, nang hih dingin midangte in nang hih hong en ding. Tua bangin mi khat pan midang tungah, midang khat pan midang sawn khat tungah cih bangin a pai toto ding ahi hi. Tua pen mite pattah dan leh khantohna kipiaksawn dan ahi hi. Tua bang sepna in mite nuntakna ah gahsuahna piangsak hi. 

5. Kei mahmah zong ka khangto hiam cih kienpha ding: Kei leh kei zong ka kisin den hangin ka khangto takpi hiam cih kienpha dingin ka khantoh takpi kei leh kisinpha kikkik ding. Ka siamna ka behlap hiam, ka theihna ka behlap hiam, ka sepdan a hoihzaw ta hiam.... cih bangin ki etphat tohtoh ding ahi hi. Ka khantohna in ka kim ka paam a lawh hiam. Ka kiim ka paam, ka lawm ka gual in a phattuampih hiam, a noptuampih hiam, hong it tuam uh hiam, hong ngai tuam uh hiam cih kivelpha ding hi hang. Ka khantohna leh ka kilapsangna in midangte adinga phatuam hilo a midangte a bahsak, a tuantualsak, a maizumsak ahih khak leh ka kietphatkik a, ka kisinkik ding a kisam om cihna hi. A thei a pilte migi in maingaphuai semsem a, kiniamkhiat semsem in lungduai semsem uh hi. 

Thukhupna: Mihing kuamah a bucingsa omlo hi. Zomi te siambu ding nupite in a kaihkhop uh ciangin a ciampek ding a pasalte un suihsak a, a ciangtang ding khawng a suihsak mah om hi. A duap dingin savun kisam ahih manin a pute savun khawng mah na ngen in na diah uh a, a lawngpi ding, a nahvawh ding cih bangte a banban in na kaikhawm uh a, a tawpna ah siamngat theihna dingin a kisam van khempeuh kicingta ahih manin siambu khat cingta hi. Siamngatna dingin siambu khat bek zong a van tampi hilo napi kaihkhop a kul mah bangin mihing nuntakna ah zong khantohna dingin hih theih tampi, sep theih tampi, thu leh la tampi, kizop kikholhna tampi leh kihuh kipanpihna tampi kisam hi. Tuate khat khit a kaikhawm a, a behlap den zo ding in mimal kim Topa in kumthak 2015 sungah thupha hong piata hen. 


 
Hau Za Cin
Phuitong Liim
www.hauzacin.blogspot.com
 
He Knows How You Feel
Jesus was angry enough to purge the temple, hungry enough to eat raw grain, distraught enough to weep in public, fun loving enough to be called a drunkard, winsome enough to attract kids, weary enough to sleep in a storm-bounced boat, poor enough to sleep on dirt and borrow a coin for a sermon illustration, radical enough to get kicked out of town, responsible enough to care for his mother, tempted enough to know the smell of Satan, and fearful enough to sweat blood.
 
He is able to run to the cry of those who are being tempted and tested and tried.
Hebrews 2:18 (AMP)
 
Whatever you are facing, He knows how you feel.
 


Comments




Leave a Reply