WWW.TUNGZANGNEWS.COM

TUNGZANG NEWS
 
Lungkhamna Vangik

Sang sia psychologist khat in a sang naupangte lungkhamna vangik hepkhiat zia ding hilh nuam a hih manin, maanhai sung khat ah tui a lang khawng om hong tawi hi. Sang naupangte zong a laisim khak ngei dan khat vua Sianu in hai sung a tui dim maw dim lo cih hong dong ngel in teh ci-in kiging uh hi. Sianu in nuih mai seuhsueh kawmin hih hai le tui a gihna bangzah kua teng in thei? a cih leh sang naupangteng in "8oz - 20oz ciang bang gik ding hi" ci-in a upmawh dawn ngeingai uh hi.

Sianu in "Hih hai sung a tui a gikna bangzah lian pha cih pen thupi masa lo hi. Ahih hangin hih hai bang tanvei tawi ka hiam? cih thupi hi. Hih tuihai minute khat sung tawi leng bangmah phamawh kasa kei ding hi. Nai khat sung tawi hi leng ka khut hong kham sim pian ta ding hi. Ni khat sung tawi kenkan hi leng ka khut hikin zaw zo phial ding hi. Tuihai gitna pen kikhel lo hinapi sawtvei tawi semsem leng tuihai gik semsem ka sa ding hi." a cih khit ciangin sabuai tungah a tuihai nga suk hi.

Sianu in a thugen hong zomin, "Ei mihingte zong I lungkham, sinkhamnate hih tuihai mah bang a hi hi. Tawmvei sung na puak leh bangmah phamawh na sa man kei ding hi. A sawt sim na phuak leh bel na sin hong so dinga na lungsim sungah na sa semsemin na khuisa ding hi. Tua lungkhamna ni thapai na puak khak leh bel na tha zawnin bangmah sem thei lo zah dongin khakham na vei lawh ding hi." cih thusinna khat neih pih hi.

Hih takpi hi, lungkhamna khawng puak kenkan sawm lo-in, I suah khiat pahpah ding thupi hi. I Topa Pasianin zong "vangik pua a gim mite aw ka kiangah hong pai un, tawldamna kong pia ding, na hakkol uh pua tentan kei ve un, keima hakkol a zang, a nuam kisuan dih un, hong ci hi. Lungkham sinkhamna I tuah simin a manlang theithei in I suah khiat theih pahpah ding thupi hi. Sun tawh zan tawh lungkhamna pua thapai leng, I cih dam loh lawhin I khan tom zo tuam ding ahi hi. Na khut sung a na tuihai tawi sabuai tungah nga suk le teh na tawl hong dam pah ding a hih lam phawk in. Kitawldam sak ciat ni. Lungdam.

Khat Thang

 


Comments




Leave a Reply