WWW.TUNGZANGNEWS.COM

TUNGZANG NEWS
 
PLANET SHAKERS-TE IN TEDIM LOK ZIAHZIAH UH 

Tedim December 4

Rev. Go Za Nang (Senior Pastor, AMC) vaihawm siamna leh deihsakna tawh ZYA-Tedim innteekin leitung a Pasian’ mizat minthang Apostle Tim Hall leh alawmte ahi Planet Shakers team –te in December 3, 2014 ni-in Zogam Tedim khuapi lok ziahziah uh hi, cih kiza hi. 

Sun 12 hunin Tedim khuapi sung pan mawtaw  hoihte 12 leh mawtaw saikel 50 val tawh mipi 200 val in Welcome Gate ah kidawn zihziah a, Rev. Kai Cin Mang in han la sa-in Dimtui Cultural Corp-te in Zo la sakna tawh  vai kidawn hi. Mipite in Sakollam veng Timothy Bible School dong kikha suak a, nopci mahmah hi. 

Sound System pen Kawlpi khuasungah ahoih pen ZAWL BUK –te a zan khat Ks. 1000000 (10 lakh) tawh kisap hi. PlanetShakers-te hong tun taktak uh ciangin Digital Mixer Amp hong pua uh a, sound system amau len suak pah uh hi. Tumging khempeuh amau tumin amau’ van vive kizang a, muh nop banah zak nop mahmah hi. Tedim khuapi ah hi bang vai lian atun akhat veina ahih mah bangin mipi zong hall ah ta zo loin asak mual dung khempeuh dim zihziah hi. 

Australia gam pan a hong pai limlim mi 24 hi a, Rev. Nang Lian Kap (Principal, Timothy Bible School) in giahna khawlna akipan nek le dawn khempeuh tavuan la hi. Kawlpi pan a hong pai Rev. Go Za Nang, Kamphen Rev. Kham Khen Tual leh khangnote mi 15 pen BAG Pawlpi in tavuan hong laksak hi. Sound system –te leh mawtawte pen CMBC Pawlpi in tavuan hong laksak uh hi.  

Pasian’ thugenna, cina damsakna leh concert lianpi kigawm khawm hi a, mi khempeuh in tha kingah kim ciat hi. Zomite tangthu ah hi bang vailian hong neisak Zomite ahong phawk Pasian’ hoihna lamdang hi, ci-in Tedim  nupite kikumkum uh hi. Tangvalte in Keyboard tumpa Tedim ah kemsuak le hang anvak zong kikhel leng hoih ding hi, ci-in kum 22 apha pan keyboard tumpa apahtakna uh kikum tangtang uh hi. Pawlkhat in drum tumpa, pawlkhat in a lead, pawlkhat in a bass cih danin amau’ muhna ciat ah siam asak dan uh kikum tangtang uh hi. 

Pawlkhat leuleu in a meitang teng bekbek zong pai thaman om khin, ci uh hi. Pawlkhat in Tedim khuapi ah mi hizah akipha thei maw, ci-in mipi tam zia lim gen uh hi. Pawlkhat in hun paizia biakna vai lo phial, simple mahmah napi mipi hong sukha kim mahmah hi, ci uh hi. Pawlkhat in mipi ding to, khut lam, lam zel diang zel hi kinken ahih manin Pasian min tawh hizah a ka ban kham leh ka khekham om ngei kei, ci uh hi. 

Leitung level tumginte leh atumsiamte tawh Pasian’ min phat a mipi hizah khutlam a diang ziahziah Zogam ah om ngei lo ahih manin Zomite tangthu pen hong kikhel tuam hanhan ding hi, aci zong om hi. Pawlpi tuamtuam hizah kikhawl a Pasian i phat khop bel lamdang ei maw, aci zong om hi. A hai tata leh a zawng tata Pasian’ min phat ding athadah teng hi zaw hang, ci-in akitel muh thak zong tampi mah om hi. Tangvalte in MC sem Lia Huaipi leh Lia Kimnu-te in Zopau leh Mangpau tawh siam tak a announcer a sep ziahziah mahmah uh Zoliate nasia lua, ci-in gengen uh hi. 

Zawl Buk-te in hizah a sound system hoih nei thei uh ahih leh bang hangin Zomite Pawlpi khat beek, kipawlna khat beek in nei zo nai lo ihiam acici zong bei lo hi. Pawlkhat in Security atuamin kila lo napi bang hangin Tedim ah migenhak leh zukham gina lo kimu lo hiam, ci-in Zawl Buk set siate in lamdang sa uh hi. 

Mang la vive kisa hi a, mipi in Mang la hizah a asak ziahziah theih lamdang si, ci-in papite kikumkum uh hi. 

-------------------------------------------- 

TZN: Src: Tedim Post

 


Comments




Leave a Reply