WWW.TUNGZANGNEWS.COM

TUNGZANG NEWS
 
Sum Tawh Kisai Thu 10

Kumsim Kumthak hong nai ciang mite kiho na ah - annek kidawm in, na thau luat ding kidawm in. Zatep kidek inla, khua-ul luanna ding ciammuih leh kimawl hanciam in ci thei zel uh hi. Sum zatzia ding zong na kisin kik zel in cih tam kizalo hi. Sum muhna haksa deuhdeuh, a zeek dan zong siam hak deuhdeuh, a omkhong nuamlo, a diangdiang nuam lah tam semsem. Bangcih ding?

1. Innkuan a zat ding ciangtan nei in. Nek leh dawn ah bangzah bei, puan leh van leina ah bangzah kisam, lawm leh gual tawh kikholhna ah bangzah kisam cih khensiam in. Na sum ngah tawh a kituak in zeek siam ding kisin in. Lai tawh gelh leng hoihpen a, kha bei ciangin ki enkik thei ahih manin koi ah khiam ding, koi ah behlap ding cih kithei hi. Ka sangkah sung khempeuh ka sumzatna laibu tawh ka ciamteh a, khasim in kha bei ciang ka enkik den hi. Pek khat zatna zong kigelh ahih manin a kullua lo ah i zatte hong pammaih mahmah a, tua in sum zatsiamna hong neisak tuam kasa hi. 

2. Inn neih ding hanciam na hih leh na inn deih tawh kituak in sum bangzah kisam ding cih tuat in a kisam zah na neih theih nadingin hanciam in. Khol a kul leh khol in, kidek a kul leh kidek theihna teng ah kidek in na inn ding mitkha ah koih in sum zeek in. Na mitkha ah, na sunmang ah na bawl theih, na muh theih leh bel na neih ding a hun hong tung pelmawh ding hi. Tua manin na inn ding sum khol kipan in. 

3. Leiba peuhmah a manlang penpen in pia masa in. Mi sum leitawi in piak masak dingin koih hamtang in. Leiba lo in kuamah ki omlo hinapi, a pia pah nuamte lungsim nop in suakta baih a, a pia pah sawmlote, a kinbawl lote in a nungsangah lunggimna leh sinkhamna ngahlawh thei hi. Tua manin sum na ngah kik peuh ciang leiba peuhmah siangsak masa den in. 

4. A kisam a na zat ding sum sehtuam nei hamtang in. Natna damlohna cih bang a kisam vat, a kigen khol theilo vai na tuak cianga dingin kigingkhol in sum khol hamtang in. A kul mahmah ahih kei leh tua na 'sehtuam' sum pen a dang ah zang het kei zaw phot in. 

5. Leitung pen Zomi te zong kim leh pam khantohna in hong nawk in hong pha ahih manin ei bek kituam om thei nawnlo hi. Tua ahih manin tek nung, huai nung, nasep theih nawnloh cianga dingin na sum na pai na kisap ding (ahih theih leh) na khol kisam ta hi. Tua banga khol ding cih ciang a kisam masa dangte a kicin khit ciangin khol pan ding cihna hi. Ansal ah an kholsa i nek nawnloh ciangin Zomi te zong sum leh pai, logam leh innmun, vangil leh nate tawh i mailam ding i khual hong kulta hi. 

6. Tu leh ta neita ding na hih manin na suan na khakte adingin sum leh pai kisam ding hi. Amau a khan khit dong na kep na khoi ding hi a, a kisam dingte - pilna sinna, puan leh van leina cihte na kisap ding khempeuh tuat in na sum na khenkhiat hong kisam ding hi. 

7. Meltheih u leh nau kiang pan sum na leitawi pak simloh bank leh a dang sum leitawi theihna munte pan na leitawi loh hamtang ding hanciam in. Tuate kiang pan hi leh a lohkikna a baihloh ban ah a hun zui in summet khangsak thei uh ahih manin vangik penpen suak thei hi. 

8. Na kisap loh van lei kidawm mahmah in. Na kisap bek lei in na deih na leiloh ding thupi mahmah hi. Gentehna in phone na kisap khat hi. Ahi zongin iPhone maw, samsung maw na kisam takpi hiam? Nokia phone tawh na hithei lai hiam? A kullopi ahih leh na zatloh pen niamna hilo in pilna hizaw hi. Mi neih khempeuh neihsawm pen a hoih ahih hang eima sum lut tawh a kituak zah vala deihgawhna ahih leh hoihlo hi. 

9. Vakkhia lo a inn pan nasep theih a om khempeuh inn ah sem pah in. Tua hi leh na sum beina tampi hong nuamtuam ding hi. Khuasung na vak a sum a bei teng taang in phone tawh a kiho thei ahih leh phone tawh ho pak in, laito ah khak theih ahih leh laito pan khak ziau in, mi vaikhak theih ahih leh mi vaikhak ziau in. 

10. Sum zekna leh zatzia tawh kisai in a theizaw nu leh pate, upate kamdot ding maizum ngaihsut kei ni. A theizaw leh a siamzawte kiang pan dongin en zong zangthei le hang i mailam ading hizaw hi. Sum pek khat omlo in zakhat cing theilo a, zakhat omlo in tul khat cing theilo hi. Tua ahih manin tawmcik khol lecin zong a meet na hikhinta hi. 

Sum zat ding, zeek ding bek hilo a khol ding zong a nei dingin thupha tampi tung Pasian in kumthak ah hong pia ciatta hen. 

Hau Za Cin

Phuitong Liim

www.hauzacin.blogspot.com

 


Comments




Leave a Reply