WWW.TUNGZANGNEWS.COM

TUNGZANG NEWS
 
kilawmlel napi ahihetlo khat

Khatvei, innlam (Tedim) pan aa minam kipawlna khat in Yangon ah zum vai sepding bawl ding khat nei uh ahihman in Ygn aa om minam vai a vei khat tung ah amau taang aa sepsak nading huhna ngen hi. Tuading in kei ong palaisak uhhi.

Ygn aa pa tawh kimu in ka pai uhleh tua nasep tawh kisai kumpi tung ah tul 50 piakding kisam ong ci uh aa, ahihhang tuleh tu aa kisam hinailo in, vaiteng a sianteh kisam panding ong ci uhhi.Asum zong kumpi bank aa guanding ahihi.

A sum pen a hunciang kei piak photding hi aa, kalawm pa'n, "Nasemte mai et nading tawh tul 80 bang kiging lehang" ci-in tuani kakikhen phot uhhi.

Anitaak ciang ka lawm pa'n, (innlam aa te cial pa'n) phone tawh ong hopih aa sum tul 100 ong ngen in, tul 50 simloh adangteng zum aa nasemte piakding ong ci ahihman in, kei zong Kawlgam kumpi nasemte tawh nasepzia katheih hang bangzah taktak kisam cih theilo leh tua akisap beh tul 50 aitaang receipt omlo ding, i piakkhiatlam lahding omlo ding ahihman in athei ding leh ong theihpih ding thum leh li tung kakan beh kawikawihi. Tuazah kiim bang bei mawk mah inteh ong ci uhhi.

Hih kakan kawikawi teng ka lawmpa'n nazakik aa ong hopih leuleu in, "Nong muan kei leh ong cial ke'n" ci-in ong tawng hi. Ka dawnkikna ah, "Muanlohna hilo in, taangpi taangta sum zangding ihihman in sum hizah kisam takpi maw, kisam takpilo kakan ding kei sum pia khiapa nasep ahihi. Ke'n tangpi tangta sum hingawn ci-in ong kingenzah kanbeh nawnlo in pia khia ziau ngei loding hi-ing" kacihi. Tuateng tawh kihehsuah in kakikhen uhhi.

Innlam aa tetawh amau na kizom uh aa semsuak uhhi.

Tul 250 kingen in kipia uh cikhat-in katheihi. Tedim pan Ygn hih vai aa pai hilehang tul 100 nangawn kicinglo ding cih hi aa a kingetzah uh kipia dan hi-in amau lungkim aa kipia ci-in kadawp nawn keihi.

Kawlgam tawh kituaklo, nasem theilo, kithumansak cihdan kasuak hi. Zong hitakpi leng kakilawmhi. Mi' nuihsat, nehpik angah kahihi. 

Kei sanzawhloh in:

1. Taangpi ipsung sawk ding ihihman in, sum zat nading, sum pai nading kan masalo, theilo, laktheilopi, theihpih omlo aa sawk thangding hi a sa zolo kahihi.

2. "Ei pai hilehang, hizah nangawn kicing loding" or "amau ong pai leh hizah val bei ding ahihteh kituak gawp" cih pen akilawm mahmah kammal, paulap ahihi. Ahihhang, minam nasepna ah zatding mah ahidiam? I sep theih bangbang atawm bei thei pen aa ciltat ding hizaw mahmah ding in ka umhi. Kilawm lel napi ahihetlo khat ahihi.

ASSKyi in Singapore ah, "Golh guuk kici limlim a late leh apiate amawhna akibang ahihi. Apiate'n a late a siasak hizaw laihi. Tua ahihman in golhguuk pongpong kua ma'n piaksawm kei un. Piakloh aa pianglo ahihleh piang kei zaw hen, pia kei un. Gambup milip in piak sawm kei limlim lehang, ahi hilelhi" cihi. A piate mawhsak zaw laihi.

Sente leuleu in "kam vang a neih nak leh..." ci tangial uhhi.

Tuni dong:

Golhguuk ne aa khang nih khang thum genloh ama khang akhom, anuamsa, adau pai a mukha nailo kahihi. A enhuai khatzong a munailo kahihi.

Atung aa tul 250 kilate zong tawlkhat sung a gil avah phialzongin tu'n kialkik khin in ka umhi. Sawtvei kikhom hetlo kacihnopna ahihi.

Tuabang gamtat ding sawm in nei kei in, pelhnopna lungtang nei tentan lehang Pasian mahmah in lampi dang ong zonsak hi a cingam kahihi.

Ahihhang tutadih inbel, Kawlgam zia tawh akituaklo,  nasem theilo, anuihzak huai, a zum huai, a kithumansak...

(Hih atung aa thuteng a piang taktak hilo in, sum leh paai tawh kisai tuhun Kawlgam aa Zomite kalsuanzia tawh akilawm akituak ding aa kong gualhtawm ahihi)

-- 

Hang Khan Lian
Block 646#13-115
Jalan Tenaga
Singapore 410646

 


Comments




Leave a Reply