WWW.TUNGZANGNEWS.COM

TUNGZANG NEWS
 
Tukum bangci kalsuan sawm?

Kumbul ah i din laitak in tukum bangci kalsuan sawm na hiam cih na ngaihsun dide kha ngei hiam? Khatvei ngaihsun kik dih ni e. 

I hun hong bei hanhan ahih manin i sepnopte bangteng hi a bang hih nuam i hi hiam cih ngaihsun mengmengin i sepnop lam ah kalsuan mengmeng dih ni. I sepnopte a manpha ding ahi hiam cih i theihnop leh a pai masate, a theisate dongin khentat mengmeng ding hi hang. Dinkhawl man hilo hi hang. Tua manin na hun awng sung bek zong pammaih a, na hihnop telsa in na hun zangzaw in. Tua ahih manin i hihnop bang hi a, i hun neih bangzah hiam cih tel tek ni. 

Kumkhat sungin kha 12 om a kha bangzah sungin bangteng hih nuam cih gel khol in. Kha khat sungin nipi 4 om a, nipi khat in bangteng hih nuam na hiam cih zong ngaihsutsa in nei in. Na hun a manpha thei penpen a zang dingin gelkhol lecin kumbei ciangin na kisikna tawm ding hi. 

Na sepnop pen a haksa hi thei a, hanciam mahmah a kisam zong hithei hi. A baih hetlo ahih lam na theih leh zong na sepgah khum mahmah ding ahih lam na theihsa ahih manin lungkim takin kipan in sem buatbuat lel in. Haksa i cih pen a gimhuai zong hithei a, upmawh leh lamet bangin zong mazanglo thei hi. Sum tampi, tha tampi beih khit ciang zong sepgah kimulo thei ahih manin tuate ah zong lungkia lo in sem veve ding cih nopna hi. 

Nang mimal khantohna ding tampi gel khol inla, nang mimal theihna, muhna, zakna tangzai sak in. Sepzia a thak kipan inla, ngaihsutna a lamdang pipite zong tel sawm in. Mite tung pan dot theih ahih leh zong dong inla, laibu pan sim theih ding ahih leh zong sim in. Mi tawh kikholhna pan ngah dingte ahih leh zong mi tawh kikhawl in. Na muhna tuamtuamte pan a hoihzaw ding ahih a, na kikhel a kul a omte na theih leh kikhel ngam mai in. 

Tukum bei ciang na tunna ding mukhol inla, na hihnop teng na hih khit ciang na nunghei dinga, na lungkim mahmah ding ahih leh na gelkholhna thupi hi cih thei in. Zong sem takpi ta inla, lawhcing in kalsuan toto in. Na sepna, na kisinna khempeuh ah kilungnuamsak tawm inla, mite tawh zong lungnopna bawl khawm zel in. Lungnopna, gualnopna a om kumthak kalsuanna hipeuh leh na gim na tawl zong noptuam hamtang ding hi. 

Maikum tu hun ciangin tuni a na kipatna na enkik dinga lungdam maitai in nuihna tawh na kidim ding hi. Topa in tua bang kumpha leh nasep hoih a sem dingin tukum in hong mabunpih tawntung ta hen. 

Hau Za Cin

Phuitong Liim

www.hauzacin.blogspot.com

 


Comments




Leave a Reply