WWW.TUNGZANGNEWS.COM

TUNGZANG NEWS
 
ZEISU HONPA & TOPA-in SAANG IN

Pasian' Thu kuppihteng,

"ZEISU-pen HONPA leh TOPA -in Na Saanleh Vaan Kumpigam Na'ng-a Ahihi". Na' up leh uploh atuam hihenla!!!

Kei mimal-in mi' gen, mi' thun cihte-tawh ZEISU-pen Honpa-a asaang daan mawkmawk ka-hi kei-a, keimahmah-in LST sim-in anuai-a bang-in mukhia-in ka-umhi: (Lai Siangtho Tiddim Chin akici translation kician salo kahih man-in keima' translate hi-a, New King James, Chain Reference Bible leh Good News Bilble tengmah bulphuh-a ka-letkhiat hi-a, ICBC Journal 2011 sung-ah ka' gelhsa ahihi).

BC hun laai-a Yahweh or Jehovah akawk "Honpa" kammal teng leh AD hun-a ZEISU akawk "Honpa" kammal teng anuai-abang ahihi (King James Version-ah: I am the Almighty God who saves you -pen Good News-ah I am the Almighty God, your Saviour cihdaan om-a, mal- 2, 3 ciangpen Honpa kammal tawmzaw, tamzaw thei-hi. Hih suutna-pen theoretical and theosophical scrutinisation nam hi-a, pumnial namte hilo-hi. Argument akibawlleh theoretical, philosophical leh logical argument kisam-hi; theosophical lampi-bel hongngen keng, banghanghiam cihleh nupa kilem meello, innkuan daihna neilo, sumlehpaai-tawh buai, sum thalawh-a innkuan nangawn kihonuam ngeilo mite-in tuabang hunsiangtho zatna "nei-ing" acihleh mizuau ahihlam kitel ahihman ahihi.

BC HUN:

Thuhilhkiikna 32:15 (b)

Amaute-in amau’ Piangsakpa Pasian taaisan uh-a, amaute’ thahaatpha Honpa nolh-uhhi.

(Moses’ minsialna) 

(Minsial ~ khasiatna ahihkeileh lungdamna khatpeuh kammal agil-athuukte zangh-a mipi’ zaak-a sungkhia: nupi hileh ‘tammlo’ kici-hi)

Thuhilhkiikna 32:18

Amaute nunna apia amaute’ Pasian, thahaatpha Honpa mangngilh uhhi. (Moses’ minsialna akizom)

2 Samuel 22:03 (c)

Amah keima’ Honpa ahihi; hiamgamhna pan-in amah-in hong hum-in hong honkhia-hi. (Kumpi David’ minsialna ahihkeileh lasakna ahihi)

1 Khangtaangthu 16:35 (a)

Ama’ kiang-ah ci-un, “Hong honkhia-in, kote’ Honpa Pasian-aw.”

(Kumpi David-in phatna la-makaai ding-a aseh Asaph leh alawmte’ phatna lasakna ahihi)

Late 27:09 (b)

“.., hong nusia kei-in, hong taaisan kei-in, ka' Honpa Pasian-aw.

(Kumpi David’ phatna thungetna)

Late 38:22

Tu’n hong huh-in, ka’ Honpa Topa-aw! (Kumpi David’ laguuisuut)

Late 40:17 (b)

Nangmah ka' Honpa leh ka' Pasian na-hihi – hong-huh meengmeeng-in! (Kumpi David-in ngaklahna-tawh thunget-lasak nei)

Late 42:05 (b)42:11 (b)43:05 (b)

Ka-lametna Pasian’ sung-ah ka-koih ding-a, ka- Honpa leh ka- Paisian ka-phat kiik dinghi. (Korah behte’ laguuisuut asakkiik thumvei)

Late 70:05 (b)

Nangmah ka- Honpa na-hihi, hong-huh meengmeeng-in – TOPA -aw!

(David’ minsialna, tamlawh thunget)

Late 85:04

Hong lakiik-in, kote’ Honpa Pasian-aw, kote-tawh na-lungkimlohna khawlta-in! (Korah behte’ laguuisuut)

Late 88:01

TOPA Pasian, keima’ Honpa-aw, suunthapaai ka-hong kiko-a, zaan ciang-in nangma’ maai-ah ka-hongpai-hi. (Korah behte’ laguuisuut)

Late 89:26

Amah-in hongci dinghi, “Nang-pen ka- Pa leh ka- Pasian na-hihi; hong huupa leh ka- Honpa na-hihi.”

(Amah ~ Kumpi David agen ahihi) (Ethan the Ezrahite’ laguuisuut)

Late 144:02 (a)

Amah-pen hong huupa leh ka-gaalnangpa, ka-kiliahna leh ka- Honpa, bitna’ ading ka-muan ahihi. (Kumpi David’ laguuisuut)

Isaiah 12:02

Pasian-pen ka- Honpa ahihi; Amah ka-muang ding-a ka-laukei dinghi. TOPA-in thahaatna leh thatang hongpia-hi; Amah ka- Honpa ahihi.

(Kamsaang Isaiah’ minsialna)

Isaiah 44:24 (a)

Keimah-in note’ Honpa TOPA ka-hihi. (Kamsaangpa tawn-a Pasian’ ki-pulaakna)

 

Isaiah 49:07a

Nasiatak-a paampaihthuak, minamte-in a-muhdah, ukpite’ naseempa’ kiang-ah Israel-mite’ siangtho Pasian leh Honpa-in ci-hi: “Note hongki-suahtaaksaklam kumpite-in muding uh-a, zahtaakna honglak ding-in hong dingtoding uhhi; kumpi-taangpaalte inzong muding-a, note hong pahtawi ding-in niam-awnsukding uhhi.”

(Kamsaang Isaiah-in akamsaante apulaakna)

Hosea 13:04

TOPA-in cihi, “Keimah-in Egypt pan-a hong lakhia note’ Pasian TOPA ka-hihi. Keisimloh Pasian na-neikei uhhi. Keimah-bek note’ Honpa ka-hihi.”

Habakkuk 03:18

Nuam-in ka-kipaak laaiveve dinghi banghanghiam cihleh TOPA Pasian-in ka- Honpa ahihi. (Kamsaang Habakkuk-in supna baaina namcin ama’ tung-ah tungphial lehzong ama’ Honpa atheih man-in anuamna kipdending ahihna apulaak ahihi)

AD HUN: 

 

Luke 01:47

“.., ka- Honpa Pasian’ hang-in ka-kha kipaak-hi, banghanghiam cihleh amah-in a-naseem mi-niamtak keimah hongphawk-hi!”

(Mary’ tamlawhna ahihkeileh ala-phuak)

Luke 01:69

Amah-in ama’ naseempa David’ suan-khat, a-thahaatpha Honpa hongsik-hi. (Amah ~ Pasian) (Tuiphuum John’ pa Zechariah’ kamsaanna)

Luke 02:11

Tuni mahmah-in David’ khua-ah note’ Honpa – Topa Khazih suakzo-hi! (Vaanmi Gabriel’ thupuak)

John 03:17

Banghanghiam cihleh Pasian-in leitung’ thukhenpa ding-in a’ Tapa sawllo-a, ahizong-in leitung’ Honpa ding-in sawl-hi. 

(Lungdam Thupuak St. John’ Pulaakna)

John 04:42 (b)

Tu-in ka-um uhhi, nang’ genhang hikei, ko mahmah-in athugen ka-za uh-a, amah-pen leitung’ Honpa ahih taktaklam ka-thei uhhi.

(Samaria mite-in amau’ theihna pulaak-uh)

Sawltaakte 05:31

Israel-mite’ kisiikkiik nadingleh amawhnate-uh akimaaisak nading lampi-khat hongpiak nading-in Makaaipipa leh Honpa ding-in Pasian-in aziatlam-ah amah saangkhaanto-hi. 

(Amah ~ ZEISU)

(Nungzuuipi Peter leh sawltaak dangte-in Jews upavaaihawmpawlte’ maai-ah apulaak-uh)

Sawltaakte 13:23

Pasian-in Israel-mite’ Honpa ding-in a-kamciamsa bang-a abawlsa, David’ suan-khat, ZEISU ahihi. 

(Pisidia gamsehsung Antioch-ah Paul’ thugenna)

Rom 11:26-27

Israel-mite khempeuh aki-hotkhiat ziading hihdaan-hi. Laaisiangtho-kammal bang-in, 

“Zion pan-in Honpa hongpai ding-a Jacob’ suanlehkhaakte’ kiangpan-in siatna khempeuh heemkhia dinghi. Amaute’ mawhna ka-laakkhiat ciangin amaute-tawh hih thuciamna kabawl dinghi.”

(Isaiah 59:20 leh Jeremiah 30:31-33 sung-ah akigensa-pen Paul-in Kha Siangtho-tawh a-hilhcian ciang-in “Honpa” hongguang-a thumaan hidinghi)

Ephesians 05:23

Khazih-in pawlpi’ tung-ah thuneihna aneih bangteekteek-in pasal-in zii’ tung-ah thuneihna nei-a; Khazih-in ama’ pumpi ahi pawlpi’ Honpa ahihi.

(Paul-in Ephesus-a thu-umte a-thuhilhna)

Philippians 03:20

Bangtenghileh, eite-pen vaan gammite I-hi uh-a, vaan pan-in eite’ Honpa, Topa ZEISU Khazih hongpai-ding lawptak-in I-ngaak uhhi. 

(Paul-in Europe gamleitang-ah aphuh masakpen Philippi pawlpi mite’ kiang-ah alaaikhaak) 

 

1Timothy 01:01

Eite’ Honpa Pasian leh eite’ lametna ZEISU Khazih’ thupiakna-tawh ZEISU Khazih’ sawltaak-khat ahi, Paul pan-in –  

 (Paul’ laaikhaak thupatna)

1Timothy 02:3-4

Hihte hoih-a, thumaanthutak theihna ding-in akuamapeuh aki-honkhia saknuam eite’ Honpa Pasian hihte-in lungkimsak-hi. 

(Hihte ~ kumpite leh thuneite leh mi-khempeuh’ ading thuumna, thungetna leh lungdamkohnate  Pasian’ kiang-ah puaksakding)

1Timothy 04:10

Eite-in thasaan-in na I-naaksep uhhi, banghanghiam cihleh mikhempeuh adiak-in amah a-umte’ Honpa, anungta Pasian’ sung-ah I-lametna I-koih khinzo uhhi. (Paul-in Timothy alamlahna)

2Timothy 01:9 (b) – 10

ZEISU Khazih’ ziak-in hih hoihnaphapi-pen leitung pianma-in eite’ tung-ah hong kipia khin-a, Ahihang-in tu-in eite’ Honpa ZEISU Khazih hongpaina tungtawn-in eite’ tung-ah hong kilangh khinzohi.

(Hoihnaphapi ~ mite’ tung-ah Pasian’ hong hoihna, khualna, hehpihna, leh huhna, hong veina-a kipan mihingte hong deihsak ahoih khempeuh)

Titus 01:03 (b)

Hihpen keima’ mawhpuak-in seh-in eite’ Honpa Pasian’ thupiakna-tawh ka-phuangkhia-hi. (Hih ~ Pasian’ kamciamsa tawntung nunna sung-a lametna)(Paul-in Titus alamlahna)

 

Titus 01:04 (b)

Pa Pasian leh eite’ Honpa ZEISU Khazih-in hoihnaphapi leh daihna hongpia tahen!

Titus 02:10 (b)

Amaute’ sepna khempeuh-ah eite’ Honpa Pasian’ tungtang thuhilhna’ tung-ah ameet alawh nading-in amaute a-hoih leh a-muanhuai nilohna lakzaw hamtang uhhen. (Silate thuhilhna ding-a Paul-in Titus a-lamlahna)

Titus 02:12 – 13 

13 Alian Pasian eite’ Honpa ZEISU Khazih’ vaanglianpi hong kilat-hun, I-lamet-et thuphadim Ni I-ngaak kawm-in, 12 pasianneilo khuasakna leh leitunglamsang veiisiatnate I-khahsuah nading, leh pumpi-kikeem-in tangdin-a, hih leitung-ah biakna-hahkat khuasaknate I-neihzawh nading-in tua hoihnaphapi-in hong lamlak-hi. 

Titus 03:04

Ahizong-in eite’ Honpa Pasian’ dikna leh itna hong kilat ciang-in amah-in hong honkhia-hi.

Titus 03:6 – 7 

Ama’ hoihnaphapi’ hang-in Pasian’ maai-ah thutang-in eite’ lamet ahi tawntung nunna I-luah theihnading-in, 6 eite’ Honpa ZEISU Khazih tawn-in eite’ tung-ah Pasian-in kicingtak-in Kha Siangtho hong buaksuk-hi. 

(Hih Titus 02:12-13 leh 03:6-7 tepawl a-malsim akizomzom-in kamlet suklehang adeihna kilamdang ahihman-in ciantak-in ka-hong laksuk-hi)

2 Peter 01:01

ZEISU Khazih’ naseempa leh sawltaak Simon Peter pan-in – Eite’ Pasian leh Honpa ZEISU Khazih’ thumaanna tawn-in kote’ a zahmah-a amanpha upna aki-piakhinte’ kiang-ah: (Peter’ laaikhaak thupatna)

2 Peter 01:11

Eite’ Topa leh Honpa ZEISU Khazih’ tawntung Kumpigam luut-theihna dimtak hihbangdaan-in note hong kipia dinghi. 

(Hihbangdaan ~ Pasian’ ading sepna hahkatzaw, haanciamzaw seemseem)

2 Peter 02:20

Mite-in Honpa ZEISU Khazih eite’ Topa atheihna-uh’ tungtawn-in leitung siatnate-pan taaisuakkhin napi-in, tua siatnate-in mancipkiik-a amaute azawhgawp kiikleh tuabang mite aciillaai-a’ sang-in atawpna asiazaw dinmun-ah om-uhhi. (Piangthak akici atawtolh mite’ dinmun)

2 Peter 03:02

Sawtpilaaipek pan-in asiangtho kamsaangte’ gensa kammalte leh sawltaakte’ tungtawn-a note hong kipiasa Topa leh Honpa’ thupiakte hong phawksak nuam-ing. 

(Misiate, huukna-lanna’ ukcip mite, leh Topa’ hong paiding a-umlote Pasian-in agawtding thu)

2 Peter 03:18

Ahizong-in eite’ Topa leh Honpa ZEISU Khazih’ hoihnaphapi leh thutheihna-ah khang zomto ta-un. Ama’ tung-ah tuleh atawntung-in vaanglianpi omta-hen! Amen. (Peter’ laaikhaak thukhupna)

1 John 04:14

Kote-in ka-muzo uh-a, Pa-in leitung’ Honpa ding-in ama’ Tapa hong puak ci-in midangte’ kiang-ah kagen uhhi. (ZEISU’ thu John’ hilhcianna) 

Jude 25

Eite’ Honpa Pasian’ tungbek-ah  eite’ Topa ZEISU Khazih tawn-in vaanglianpi, vaangphapi, thahaatna, leh thuneihna abeisa khangtampi pan-in tuciang, leh atawntung-in omta-hen! Amen. (Jude’ laaikhaak thukhupna).

Hihteng lungngai lehang adiak-in laigelh John bang-in "Pa-in leitung' Honpa ding-in Ama' Tapa hongpuak" ci-in gelh-hi. BC hun laai-ate en leuleu lehang Honpa-pen PA ahihkeileh Pasian hi-a, Pasian mahmah-in "Honpa adang Ka-thei kei-hi, Keimah bek" ci tangtang-hi.

Pa leh Ta daan-in saang lehang eite-in HONPA NIH (Two Saviours) anei I-suak ding-a, Pasian' Kammal-tawh kipelh pah-hi. Honpa-pen Khatbek hi-a, nih hi ngeilo-hi. Lungngai thei mihing khempeuh-in lungngai tahen!

(Husband ~ Pasal) Zii leh Pasal-tawh Tehgenna: ensuk laai lehang kician mahmah-hi:::::

Thuciam Luui sungpan:

Isaiah 54.5 (a) (CRB)

                  Note’ Piangsakpa-pen note’ pasal-bang ahihi – Alianphabel TOPA-in Ama’ min ahihi.

Isaiah 62:5 (CRB)

                  Akhangmoi pasal khat-in nungaak bitlaai-khat ama’ mo ding-a alaak bang-in – note hongbawl Amah-in hong kiteenpih (marry) dinghi.

Hosea 2:19 (CRB)

                  “Israel-aw, Ka’ zii-in nang kong’ bawl dinghi; maan-in Ka-muanhuai dinghi; akizomden itna leh hehpihna nang kong’ lak ding-a nang-pen atawntung-a Kei’ a ding-in kong’ bawl dinghi.” (Israel ~ Pasian azuui-mi)

Thuciam Thak pan-inthuzuuite’ Pasal-pen ZEISU

2 Corinthians 11:2 (CRB) St. Paul’ pulaakna

                  “………… note-pen pasal khatbek’ tung-ah kiteenpih ding-a ka’ kamciampa (kamciam ka’ piakpa) Khazih mahmah’ ading-in asiangtho nungaak bitlaai-bang na-hi uhhi. 

Mangmuhna 19.7 (CRB) Alian tokhomluun pan-a awging

                  Nuam-in kipiak-ni; Ama’ liatna phat-ni! Banghanghiam cihleh Tuuno’ molopna hun hongtung zo-a, tua-cialpi’ ading-in ama’ monu kithawi khin-hi. 

Gawmtuahna: Hih kammalteng-in Pasian leh ZEISU pumnih ahihlohna, atuamtuak ahihlohna, leh “Pasian” akicici-pen “ZEISU” ana-hihgige lamtak hih laaikhilte-in (um-in umtakei lehang) hong lakcian ahihman-in upding leh nialding-pen mihingte’ tung-ah teltheihna (Choice) om-hi. 

Pasian atuam, ZEISU atuam-in I' saanleh akuazaw I' Pasal hiding? ZEISU-pen Khalamsang I' Pasal-a I' upleh (if we believe JESUS as our Spiritual Husband), Pasian-tawh khalamsang akiteeng khinsa kimaa-a atapa-tawh kiteengkiik kisuak ahihman-in ZEISU-pen Pa' Zii Sut (apa' zii ateenpih) suaksak cihna ahihi. Khial-hi! Pasian' mite-pen BC hun-in khalamsang Pasian-tawh kiteeng-a, AD hun-in ZEISU' mite ZEISU-tawh kiteeng-hi. Amah-pen BC hun-in Yahweh or Jehovah kici-a, AD hun-in Yeshua or Yashua kici-in Zomite-in ZEISU ci-hi. Kitel ding-in ka-lamen mahmah-hi.

Pasian akawk vilvel "Kumpi" kammal ensuk laailehang,

Isaiah 6:5 (b) (CRB)

                  “…………. Alianphabel TOPA, Kumpi ka-mu zo-hi.” Isaiah’ pulaakna 

Isaiah 11.1 (b) (CRB)

                  “David’ suan sungpan-in athak Kumpi khat hongkhang dinghi.” 

(Hihpen ZEISU hongpai nading genkholhna ahihi)

Isaiah 33:23 (b) (CRB)

                  TOPA mahmah eite’ Kumpi honghi dinghi.

Isaiah 52:7(b) (CRB)

                  TOPA-in gualzawhna phuangkhia-in Zion’ kiang-ah ci-hi, 

“Note’ Pasian-in Kumpi ahihi.”

Jeremiah 23:5 (CRB)

“David’ suanlehkhaak athumaan khat Kumpi-a ka-teelding huh   hongtung dinghi, …” TOPA’ kammal-hi.


Jeremiah 30:9 (CRB)

“Keimah, amaute’ TOPA Pasian, leh Kumpi-a tokhomluun-ah ka-tutsakding David’ suanlehkhaak khatpa’ na amaute-in aseemding uhhi.”

Jeremiah 46:18 (CRB)

                  “Keimah, Alianphabel TOPA, -in Kumpi ka-hihi.” (Pasian’ kammal-hi)

Jeremiah 48:15 (b) (CRB)

                  “Keimah Kumpi, Alianphabel TOPA ka hi-a, kahong genkhin zo-hi.”

Ezekiel 34:23 – 24 (CRB)

“Keimah, TOPA,-in amaute’ Pasian ka-hi ding-a, Ka’ naseem David bangdaan Kumpi khat-pen amaute’ Ukpa ahi dinghi.”

Ezekiel 37:24 (CRB)

                  “Ka’ naseem David bangdaan khat-pen amaute’ Kumpi hiding-hi.”

Obadiah 21 (b) (CRB)

                  “TOPA mahmah-pen amaute’ Kumpi hiding-hi.”

Zephaniah 3:15 (b) (CRB)

                  TOPA, Israel’ Kumpi, -in note-tawh omhi.

Zechariah 9:9 (CRB)

“En-un, note’ kiang-ah note’ Kumpi hongpai dinghi! Lawhcingtak leh gualzo tak-in Amah hongpai-a, ahizong-in kiniamkhiat-in sabengtung, sabengtung’ no – sabengtung pano’ tung tuang-hi.” (ZEISU hongpaina genkholhna: Matthew 21:5, John 12:15)

Zechariah 14:9 (CRB)

TOPA-in leitung khempeuh-ah Kumpi hiding-a; mikim-in (tua Kumpi-pen) Pasian-in bia-in akibang min-tawh (min-maantawh, min kibang-tawh) Amah atheiding uhhi. (Pasian-in ~ as God; Pasian-hi ci-a bia; Akibang min ~ Pasian’ min amaan thei tading, banghanghiam cihleh “Pasian” cihpen “min” hilianlo-in Alianpenpen sapna-a kizangh)

 

Zechariah 14:16 (CRB)

Jerusalem adogawp minamte’ lakpan-a athaamlaai khempeuh-in kumsim-in tualaai-ah Alianphabel TOPA-pen Kumpi-in (Kumpi bang-in) abiading, leh Buukbawl Cialpi abawl ding-in paiding uhhi.

Daniel 4:3 (c) leh 6:26 sung-ah, Kumpi Nebuchadnezzar leh Kumpi Darius te-in, “Pasian-in Kumpi hi tawntung-hi” ci-a amaanna (confession) kimu-hi.   

TOPA ZEISU’ Kammalte:

 

Matthew 25:31 (CRB)

                  “Kumpi-in Mihing’ Tapa hongpai ciang-in, ……………………………” (as King, not like a King).

Matthew 27:11., Mark 15:2., Luke 23:3., John 15:26

Hihpen Pilate-in Topa’ kiang-ah thusitna abawl hun-a, “Kumpi na-hihiam?” cih dotna Topa’ dawnkiikna ahihi.

Luke 23:42 (CRB)

                  “ZEISU -aw, Kumpi-in na-hongpai ciang-in hongphawk-in!”

1Timothy 6:15 (CRB)

“ Amah, kumpite’ Kumpi, topate’ Topa, ….” St. Paul’ pulaakna

2Timothy 4:1 (b) (CRB)

Kumpi-a hong-uk ding-in ZEISU hongpai dinghi. (ZEISU-pen eite’ Kumpi hong hiding cihna ahihi).

Mangmuhna 12:10 (CRB)

“Tu-in, Pasian’ hotkhiatna hongpai zo-hi! Tu-in Pasian-in ama’ thahaatna Kumpi-in (Kumpi hihna-in) honglak zo-hi! Tu-in ama’ Messiah-in ama’ thuneihna honglak zo-hi!”

Mangmuhna 17:14 (CRB)

“Amaute-in Tuuno ado-ding uhhi; ahihang-in Tuuno-in ama’ sapsa, teelsa, leh ama’ nungzuui muanhuaite-tawh amaute (gaalte) azocip-ding uhhi, banghanghiam cihleh Amah-pen kumpite’ Kumpi, topate’ Topa ahihi.

Mangmuhna 19:16 (CRB)

Amah (saklo kaang’ tung atuangpa ZEISU)’ puantualpi leh apheipi tung-ah min kigelh-hi; “Kumpite’ Kumpi, topate’ Topa.”

Mangmuhna 19:6 (b) (CRB)

                  Amaute’ cih ka za-hi,

“Pasian phat-un! Banghanghiam cihleh Topa, eite’ Pasian Alianphabel, -in Kumpi ahihi!”

Khalamsang Khazihmi maaktak I-hihleh KUMPI NIH kinei lo-in Kumpi Khat bekbek kinei-a, Tua-pen ZEISU ahihi. BC hun laai-in tua Kumpi-pen Almighty God, Sovereign LORD kici-a, AD hun-in Yeshua, Jesus, ZEISU kici-hi. Pata hileh apa-lah Kumpi, ata-lah Kumpi, ata-bang "Kumpi te' Kumpi" hiding ahihteh apa-in ata' na seemding (Father will serve the Son) cilehang paizia khial ahihi. Vaantung-ah Kumpi kiteelna election om-in Tapa-in ngah cihdaanlah hisaamlo ahihman-in BC hun-a Kumpi-penmah Mihing ahong suaksuk ahihi. Mitnei khempeuh-in mu henla, telsiang tahen!

* Phawkpak ding-in:

Nungzuui John mahmah-in ama' hun nunung Patmos Tuikulh-a mangmuhna angah masiah ZEISU-pen Mihing himawk ahihman-in Saangpen Pasian taktak-a asaang zolo ahihlam alaigelh khempeuh-ah kimu thei-hi. Atawpna taktak-a mangmuhna hongneih ciang-in ama' up leh uploh atuam hiding-a, mangmuhna sung-a "Akithat khinsa Tuuno-in, 

"Keimah-in Amasa leh Anunung Ka-hihi, Apatna leh Atawpna Ka-hihi." ci ahihman-in John' upna leh saanzia' sang-in "Akithat khinsa Tuunno' Kampau upding" khalamsang lampi maan/dik ahihi. Hihte-pen Kha Siangtho bek-in hong telthei sak ding-a, I' sung-ah I-kiplet khitsa akhial upna I-laakkhiat loh-in, "......, en en napi mulo, ngaingai napi, zalo/theilo" acihte I-hi dinghi. 

ZEISU Honpa leh Topa-in Na' saangthei tahia

"Honpa hikei, atapa-hi" na-ci laai-hia? 

"Apata-uh'n Honpa hi uh-e, Honpa nih kinei, muanhuai ngeel lodia" na-ci laai-hia?

Khalamsang na' Pasal-pen ZEISU-in na-saangthei ta-hia?

Na-saantheih naakleh "ZEISU-pen Yahweh or Jehovah ahihi" na-ci ngam-hia?

Na-cih ngamkeileh khalamsang Pasal nih anei-maw? Apa-tawh kimaa-a ata-tawh kiteengmaw?

Khalamsang Kumpi ding-in ZEISU na-saangthei tahia? Kumpipa' Tapa ciangbek-maw?

Ahihkeileh Kumpi Nih nei-maw? Pa leh Tapa Kumpi kituh sakmaw? 

ZEISU-in Kumpite' Kumpi ahihteh Pa anei taktak hileh a-Pa-in ama' na seemding acimaw? 

Hihte kam tungnung nuampeuh-a honggelh ka' hihlohna Pasian-in thei-hi. Pawlpi zong-a, pawlzawn-zong kahi kei-hi. Lai Siangtho simna 1984 (grade 3-a ka' omlaai) pan-a ka' kipat, version tuamtuam-tawh Semanyih Camp sung-ah suuntawh zaantawh kha 31 sung ka' thapaihpih tungtawn-a Pasian' honghilh thuthuukpite hong taangko ka-hihi.

"Agen omkeileh kua'n za theiding?

"Zaak loh-in kua'n um theiding? 

Acih mahbang-in "Anunung Thukhenna Ni' ading ka' teci" ding-a honggelh ka-hihi. "Vok maai-ah suangmanpha koih kei-in, amanphatna theilo ahihman-in tuancil gawp-in hong kihei-in hongpet laaiding" acihzong ka-thei-hi. "Tapa leh Tapa-in atheih saknop mite longal-in thei theilo" acihzong ka-thei-hi, ka-umhi. "Milian mipilte' tung-ah iim-in, miginalo daaipaamte' tung-ah hih thuthuuk kihilhcian" cihzong ka-thei-hi. Leitung thuneihna aleencip minamlian, minam thahaat, leitung a-uk mite-in hih thuthuuk kisaang loding cihzong ka-thei-hi. Nungzuuite'nzong thei uh-a, ahizong-in thumaanthutak gelh veve uhhi. "Azongte-in muding"-a, azonglote-in mu loding cihzong ka-umhi. Tuhun-a ka' mipih khempeuh-a kipan leitung mi khempeuh' zonpen Pasian' Thuthuuk hilo-in, hauhna, liatna, phungcinna, nopsakna leh suahtaakna ahihi. Hihte khalam suahtaakna (spiritual freedom)-tawh akigaal, akilehbulh, akikeelkii vive ahihi. 

MCBC upna, UPC upna, Oneness upna ataangko ka-hi kei-hi. Lai Siangtho sung-a Alianphabel TOPA Pasian' thu ataangko ka-hihi. Amalmat-nuam te-in (T. Zokhai 2011, The Reality of God, Journal of International Christ Baptist Church, Yangon)-hi.

ZEISU' daihna laisim mimal kim' tung-ah hongtung tahen!

Zokhai

 

 


Comments




Leave a Reply