WWW.TUNGZANGNEWS.COM

TUNGZANG NEWS
 
Gi Bang Khen Na

Nitak khat inn ka tun phetin ka zi Cingno in an hong lui pah hi. Kei zong Cingno khut len kawmin "kong gen nop khat om veh aw Cingno"

Cingno an nek sabuai kiu khat ah tu in an tawmcik khat a ma-a ding a thuk ne kawm hi. A mai khingin, dahna khat peuh nei ngel cih a mit hat pan kilang hi. Ahi zongin ka gen nop thu khat ka gen kul ahih manin, lungnop lo pi mahin "Kikhen mai ni aw Cingno" ka cih leh;

Ka thugen almawh lua lo bang khatin "A bang hangin maw U?" ci-in, aw damin hong dongkik hi. Ka dawnna ding kician mel om lo ahih manin thu kawi gengen pongin kician mel lo-in ka dawn leh Cingno hong heh lua peuhmah ahih manin a sikkeu paii-in "mi hing lungsim nei nawn lo na hiam?" ci-in hong awng phei hi.

Tua nitak ka kiho uh zop theih om nawn lo-in, Cingno bel zan thapai-in kap niloh hi. Ka kiten vua kipan tu ni ciangciang kikhen lawh liang dingin bangmah khialhna Cingno in a neih loh lam thei ka hih manin, a lungkim theih ding bangmah a dawng thei lo ka hi hi. Cingno ka khen nopna pen lawmngaih thak khat nei kha ka hih man hi leldih hi. Cingno hehpih huai ka sak hangin, cimtak ta mai banah zong a ngai zo nawn lo ka hi mai hi.

Keilekei zong kiawi sam lo ka hih manin kikhenna lai sungah ka Inn, ka mawtaw le ka company neihsa 30% Cingno min dingin koih sakin ka pia hi. Kikhenna lai Cingno in a et khitteh bangmah pau het lo napi-in, hong balkek dikdekin lawn khia hi. Kum sawm val bang ka tenpih Cingno tu ngawngaw teh bel mi mawkmawk khat bang hong suak ta hi.

"A beisa hun a nong it nong ngaihna tawh limtak nong bawlnate hangin ka lung nuam het lo hi. Ahi zongin, ka neu lawmngaih mahmah numei khat tawh innkuan thak khat kipat dingin khentat khin hing" ci-in Cingno ka gen siang ta mai hi. Ka lem-et sa mah bangin Cingno hong kapkhia hi. Ahi ding mah hiven, a kahna in a it a pasal khahsuah ta cih kipsakna khat suak hi ta ven. Hun sawt sim peka ka gen ding ka hanciam zel thu tun a gen khia zo pan ka hi hi.

A zingciang nitak inn ka ciah hak sim pian hi. Cingno na lum nai lo-in, lai atat khat a neih ka mu hi. Sun niloh ka zawl thak nu tawh aung takin kithuh dikdek ka hih manun nitak an zong kin zo nawn lo-in lupna lam zuanin ka ihmu pah vingveng hi. Zan khang khat ka lawh dong Cingno in lai na atat lai mah hiven a thei lo kineih in ka ihmut san kik lel hi.

A zingsang ciangin, Cingno in kikhenna dingin a ma deih pawl khat ngetna lai hong pia petmah ta hi. Neihlelam, sumlepaii bangmah hong ngen het lo-in, kikhen ding kha khat sung bebek nong ngak lai ding, tua kha khat sungin zong kiten cil lai bang mahin nong it bawl ding, cih bang teng gen hi. Cingno hong nget thu zong hoih ka sa pah hi, banghang hiam cih leh ka tapa uh tu kha sungin laihuanpi nei ahih teh a sangvai kipelh khak ding patua hi ding cih thei ka hih man ahi hi. Ahi zongin hong nget beh khat pen poimawh ka sak sim khat hong hi citciat se hi.

Tua pen kha khat sung vilvel zingsang simin lupna khan sung panin Inn lim kongkhak dong ka mopawi nitak vua ka tawi bang dan lianin tawi den ding cih ahi hi. Maan nawn mel lo ahi mai diam aw cih ngaihsun kawmin, kikhen ma kha khat sung hi lel ven a lungkimna ding ahih nak leh poi kei ee ci-in ka thu kim mai hi.

Ka zawl thak nu kiangah Cingno hong nget teng ka gen leh zahpih in nui kauhkauh liang hi. "Bangbang ahi zongin hong mankik zo ken teh nak patauh kei mah sing" hong cih san hi.

Ka zawl thak neih a kipan Cingno tawh kilawng kha ngei mel lo ka hih manin, lupna khan sung pan innlim dong tawi kawmin ka tuah masak ni bang ka nih tuak un ka kisuang phial uh hi. Ka tapa in hong mu kha sawnsawn ahih manin "hahaha.. Papa in Nunu tawi ei" ci-in khut beng liangin hong kipak lua peuhmah hi. Ka tapa kampau in ka lungsim hong sukha velval sim ahih manin nawh kalsuan zo lo-in damtakin innlim lam ka manawh hi. Cingno ahih leh mitkup deudeuh kawmin, "i kikhen ding thu I tapa thei sak het ken aw" hong ci khiankhian hi. Dawngkik se lo-in thukim cih lahna in ka lu ka kun san hi.

A ni nihna ciangin ka nihun zumna kisuanna cih dan hong om nawn lo ahih manin Cingno ka awm ah hong kingam hi. Hoih tak ka et khak loh sawt sim ahih lam Cingno' sam kang khat le nih omte banah a cilesa guai piante ka muh ciangin hong phawk sak san hi.

A zingsang li-na ka tawi ciangin, ka kingaih cil lai vua ka kinoh dante uh ka mitkha ah hong suakkik dandan mawk ahih manin, Cingno in kum sawm val sung bang a nuntakna hong pumpiak ahi mawk a cih ka ngaihsun kha san hi.


Ni nga, ni guknate ah ka tawi mun man ahi diam ah Cingno a zang tetek ding bang khat ka sa hi. Zingsang khat a puan silh ding tengin Cingno hong buai pian ka mu kha hi. A puan khempeuh gol lua khin pian ahih manin Cingno a na gawng semsem ahih lamtak ka phawk kha phingphing zen hi.

Aw! Cingno kei hangin khasia lua, nasa lua hingel aive maw cih phawk ka hih manin, ka lung hong nop lo lua peuhmah kawmin Cingno a kawng pan ka kawi phei leh, ka tapa hong pai-in "Pa ka Nu na tawi ding hun ta ei" hong ci ahih manin "aw tate in NulePa ki-it a kitawi a om uh a mu nuam, tua bang mu le uh a na lungkim zo uh hi gige mawk veh ee cih ka phawk thuah ta hi. Cingno in ka tapa kawi-in, a nungzang zawtsak hi. Kipasal sakin lungsim khel nuam lo kek khat bangin ka lu hei san hi. Tua zingsangin ka mopawi lai bang lian mahin kiptakin Cingno ka inn mai kongkhakpi dong ka tawi phei hi. Cingno in a khut nih tawh ka ngawngah hong kawito kawm hi. Ni dang sangin a zang zaw tham Cingno pumpi hangin ka lung hong nop lo lua peuhmah sim hi.

Kha khat cin ni Cingno ka tawi ding a nunung pen ni ciangin hong awh khat om bangin ka vangik ka sa lua peuhmah mawk hi. Ka tapa bel sangkah pai khin ahih manin, Cingno hoih tak le kiptakin tawi kawm sa in, "I nupa kawmkal a ki-itna, kiho limna le hun zat khop zelna I kisap mahmah lam ka phawk khak kei mawk hi" cih ka gen khia kha hi.

Tua ni ka zawl thak nu kiangah mawtaw hawl in ka tai vingvenga, a kong mai uh ka tun phetin mawtaw kongkhak zong khak man lo liangin, ka gen mai hi.

"Ka lung bel nop het kei na ven, ka zi khen zawh ngap nawn keng"

Zawl thak nu in hong ngeu et kawmin dam lo na hia leh ci-in ka tal hong lawnsak hi. A khut lakkhiat sak in;

"bangbang ahi zongin  Cingno khen sawm nawn lo hing, ka nupa kawmkal uh khat le khat ka kitelsiam loh khak man vua a kicimtak a bang kha hi ung. Tun ahih leh kitelsiamin ka ngaih luat lam phawk ta hi veng aw"

Zawl thaknu zong hong nak heh lua ta hi diven ka pang hong beng vatin hong kap hi. Kei zong nung hei sanin Inn ah Cingno tawh kimuh ding ngak lah takin ka ciah hi. Lamkal ah paak kizuak lom khat Cingno a ding ka lei hi. Paak zuaknu in paak lom tungah bang lai na at nuam aa Sia hong cih ciangin, kei ma khut lam tawh post card tung ah;

"Zingsang simin hong tawi den ning maw Cingno, sihna in hong khen dongin"

Tua ni ka paak lom tawi kawmin, ka lungsim lungdamna tawh kidim ahih manin, matai le lawp takin Inn sung ka lut suk hi. Lupna khan sung ka lut leh lupna tungah Cingno luanghawm daitakin a na kisial ka mu hi.

Tuma kha tam sim khin hun pawl pek panin Cingno in cancer natna a nei na hi gige mawk hi. Ka zawl thaknu tawh kimlepam phawk lo zenin ka lenkhop hun sungin Cingno bangci, dam maw, dam lo maw, cih na ngawn a thei kha lo ka hi zen hi. Cingno in ahih leh a sawt lo-in si ding cih a mahlemah kithei khol ahi hi. Kikhena lai sungah hong nget thute pen a ma a ding hi het lo-in, ka tapa a dingin Pa gina lo khat ka hih ding dinmun panin hong honkhia na hi hi. Ka tapa muhna ah ka Pa in ka Nu it mahmah hi a cih theih ding a hong bawl a na hi hi.

Na zi na it takpi hiam? Innkuan sung pen neihlelam sumlepai peuh a thupi himasa khol lo hi. Nupa kawmkal ah khat le khat thukikup ding, kiho ding, kithusim ding, nisim I tuahkhak thute ki hawmsawn ding, itna kilah theih tawntung dingte thupi masa hi. Na innkuanpih nazi, na pasal, na tate hun pia in hopih tangtang in. Tua hipauh leh innkuan sung hong nuam semsem ding ahi hi.

Credit to; Kimmies Floral ; kammal pawl khat kong khek ahi hi.

Khat Thang
 


Comments




Leave a Reply