WWW.TUNGZANGNEWS.COM

TUNGZANG NEWS
 
Kum 67 Cinna ZOMI NAM NI (Feedback on Feedbacks)

"Zomi" akicici "Tuuno Gun asilh Ngiate,"

1948 pan-a akisimto kum 67 cinna February 20-in munciteng-ah cialpi akhaam omtek-a, Capital of Chin State, Myanmar-a akibawl Feb 20 ni-pen "Zomi Nam Ni" aci teeiteeite' idea or concept-pen khangthakte mengcip theiding ahihziak-in hong khutthak zeel-ing. Tuabang ngaihsutna-tawh thugen/laigelh te-pen "Zomi" akici pheenpheente ahih baan-ah I-muan I-suan tengmah ahihziak-in anuai-abang lungdeih thusunna kongnei-hi:

Hakha Khuapi-ah Chin A Myo Tha Neh akibawl kimlaai "Zomi Nam Ni kibawl" ci-a angtang liang-a apulaak nilohte-in:

"Zomi cihteh Chin acihna-hi" aci ahih uhleh banghang-in Zomi akici ko abangmahtheilote' lak khawngbek-ah Zomi ci-kaka pongmawklel kei unla,

 a-Laimi, Cho, Ashu, Khumi, Matu, Mara,..... te' kiang-ah "ei Zomi hihang, seem khawmding hihang, kozong hong mapang sak-un, hong deih-un" ci-in va-kitah, va-kipia beek unla, minam noptuamna honglawh beek le-uhcin naakpi-a akilawm ahihi.

Laimite-in February 20 ni-in Minam Ni abawl-pen "Zomi Nam Ni-tawh ani akibangbek hi-a, amau' bawlpen Laimi Phunpi Ni hi-in, Zomite'n abawlleh Laimi Phunpi Ni hi ngeingei lo-hi" cih uplehsaanna-tawh akikeelkii ahihleh banghang-in Chin minpua mapannate-ah luut nuam tuanlo nahi-uhhiam? (adawknuam khatlehnih bel kihel saam ve-uhcin maw).

Zomi cihteh Chin huamkim cici napi-in a-Chin minpua mapangte' lak-ahlah uutlo or kitah nuamlo or tazolo or pelhbawlbawl., hihbang mihing peuhmah-pen Pasian-in nana zadahkei tapeuhleh Ta-Key-Tha kiim-a kawl-ui cithakvei kihhuai mahmahte' sang-in amanphatzawkna omding-in ka-seh kei-hi.

Kei' khangual mipih sapih ataangpi-in "Zomi hihang, Zomi-pen Laimi hilo-hi" cihthu apomkip kimciat ahihi. Mipil neihsun, lubawk neihsunte ngalulok bang-a lubek abawl leltak ciang-in hong-om kei-un. Khangthak mipoi nihlehthum-in note' thugen/laigelhte malmat-in neivial ding-a, nawngkaai mahmah dinghi.

Akician Clarification kisam-hi: Chin leh Zomi akibang ahihleh I-ki ngetnget khitsa mahbang-in Chin te' lak-ah ma hongpang pah unla, alulam (Pasian-in"note alulam-in hong bawl-ningci ahihteh) hongpang pah un. Tua ahihvetkeileh Zomi-in ama' maailam nawtnawt tasaam ahihteh Chin-tawh mehphei niloh keizaw le-uhcin na' tu na' tate-uh minam sung-ah maaimawl lozaw dinghi.

2012 kum nungsang GZA upate nangawn phiil-in Zomi huamna kician ka-phuul ngeekngeek-a, Dr. Do Kham (paisa)' kam mahmah pan-in "kampheen kisam loteng" cih ka-ngah khia-hi. 2013 kum akim lam-in ZCD upate' concept naakpi-in kalhkhiatna ka-bawl khin-a, "Zomi-pen kampheen kisam loteng" cih ka-ngah khia-hi. 

Tu-inzong ulian mipil neihsunte honbaak khat-in Zomi-pen Chin-hi cihtawh thugen lasak hongneih zeel-pen Zomist Movement' ading-in salamkhaak (obstacle) lianpen khat ahihi.

Athu-a kampi-tawh Chin huam luakluak ponglel, Tedim leh Tonzang kuam pan-a akhangkhia mite' lak bek khawng-ah Ngalkhuahaang bang-a ciak lualua cihkhawng naak zumhuai lua-hi. Pasalvaai hetlo-in ui-haangvaai mahmah kasa lel-hi. 

Pu Nang Lian Thang banghoh thupi kasa bilbel-hi Zomi ahihna-zong taangkoko lo-in, Chin leh Zomi akibang cihzong keibang-in za ngeilo hi'ng. Ama' mapanna-ah panglel, Chin = Zomi cihkhawng mehmeh selo (ama' ngiimna thusim ei'n theilo); tuabang vet-in hong mapang vevua Chin ahuam thapaaite, pasal niikteeng, eh, pasal _ _ _ _-khai na-hih uhleh!

Mimal uplehsaanna

Zomi cihciang-in Zomiteng bekmah huam-hi. 

·  Zogam-ah suah sese kuullo-in, Zopau apau mi (Zopau: Dim awsuah, Saáizaang awsuah, Teizaang awsuah, Siyang awsuah, Zohaam or Zo awsuah, Losau, Khuano, Hualngo, Paite, Simte, Vaaiphei, Gangte, Ngawn, Kuki, Thado,.............)

·  Zomi nulehpa pan-a apiang mi

·  Apa' sanggam numeite "Nii" ci-a asam mi

·  Anii' pasal "Gang" ci-a asam mi

·  Anu' sanggam pasalte "Pu" ci-a asam mi

·  Anu' sanggam numeite "Nu-"tawh zom-a asam mi

·  Azii' nulehpate mi' kiang-ah agenteh "Sunghnu, Sunghpa" aci mi

·  Apasal' nulehpate mi' kiang-ah agenteh "Teeknu, Teekpa" aci mi

·  Atapa' zii  mi' kiang-ah agenteh "Monu" aci mi

·  Atanu' pasal mi' kiang-ah agenteh "Maakpa" aci mi

·  Apianna numei "Nu" ci-in apianna pasal "Pa" ci-a asam mi

·  Anulehpate' nulehpate "Pii leh Pu" ci-a asam mi

·  Uzawte "U (Kawlte' "Oo" -pen hilo)" ci-in uzaw meelthei-a asam mi

·  Atung-a mi khat-tawh kiteeng-a, atung-a mi' ngeina leh zialehtongte hoihsa-a aciing tosuak mi 

Hihteng zahvaal Zomi-in ahuam theihding omlo-a, huam nuammah lehzong a-uutding omlo dinghi. Zogam Topenna akingah takciang-in Zogam leitang tung-ah ateeng khempeuhte' Citizenship -pen "Zomi" hiding-hi. Citizenship-pen Origin hilo-hi. Kei-pen Australian or Australian Citizen kahih hang-in ka' origin-pen legal tak-in 2011 Census-ah "Zomi" ci-in akip ahihi. 

Zomi Pasian' Thupha!

Zokhai 

 


Comments




Leave a Reply