WWW.TUNGZANGNEWS.COM

TUNGZANG NEWS
 
Makai Thakte Theih Ding

Vai khat peuhpeuh ah makai dingin hong kiseh, hong kikoih ciangin lametna leh muanna lianpi tawh hong kikoih ahih manin hun tomno sungin nang hong muanna uh a kipna dingin muantak na hihna na lah pah a kul ahi hi. Makai a hong kiseh pan ni 90 sung (kha thum sung) bang khit ciang mite hong muhna leh hong muanna a kip ding maw kiplo ding cih kician khinta hi. Tua ni 90 sungin a mailam ah nangmah hong kiguang kik ding hiam cih zong mipi lungsim ah kitel khinta hi. Tua ahih manin hun lap in na tai pah zangzang a kisam ahi hi. Tua banga mite hong muan muan na bat theih nadingin thu pawlkhat na phawk ding om hi. 

1. Bang Sem Ding: Nang hong kiguanna mun pen bang sem dinga hong kiguang hiam cih na tel nadingin tua bang a sem ngeite in bang sem hiam cih limtak in kan kik inla, a nasep uh leh a mawhpuak uh, a gim dan uh a hahkat a kisap dante na tel sawm hamtang in. Na sep khempeuh tua kipawlna adingin bang phatuam a, bangciangin noptuampih uh hiam cih zong kan phapha in. Nasepzia leh nasep dingte tawh kisai na theihna a kibehlap theihna dingin a sem ngeisate thu dongin na theih dinga kilawmte theilo in na om khak lohna dingin hanciam in. Makai dinmun cih ciangin nang bek i sep ding hilo pah limlim ahih manin hong seppih thei ding kuate hi a, hong tawsawn thei ding kuate hiam cih kanin tuate tawh pangkhawm in kalsuan pah ngekngek in. A tomin gen leng: makaite in sem leh hoih inteh na cih teng nangmah in sempah in!

2. Na Tuak Ding Theikhol in: Makai na sep ciangin na tuak theih thute, na tuak ding thute theikhol in. Cihnopna ah na hihtheih ding thute thei in, na hih theihloh ding thute zong thei in, na kikhual ding a kulna munte zong thei in. Banghang hiam cih leh na sep masak ding leh na sep nunung ding hong telsak dinga na makaih sepna ah mavang tuam ding hi. A hoihzaw ding thu na theih nak leh khek ngam inla, a kisam ahih nak leh ngaklah lo in ngak zo inla, a manpha zaw ding ahih nak leh thuak ngeungau in. A huampi mu thei inla, na matut theih ding khempeuh na mitkha ah gual diudeu in. A kisam thute kan inla, thukhenna na bawl a kul ciangin zong khentat ngam in. Na makaih mipite a theih ding vua kilawm khempeuh theisak lo in om kha kei in. Mipi in na tup na ngim leh na sepzia, na matut ding a theih kei uh leh hong ngaklah kha pahpah ding uh hi. Thu theite dot ding lunghiang kei inla, nasep peuhpeuh hahkat giap in. 

3. Na Sepna Theisak In: Na makaih mipite tungah hong deihna uh leh hong lamet uh na sep mahmah laitakin na sepzia zong na theihsak a kisam ahi hi. Tua mah bangin nang mai ah a taisa, a semsa upate leh siate, makai luite leh a makaih khinsa te zong na matutna ciangciang theisak den inla, amau hong kuppih nop a om leh zong lungduai takin bil dawh in a hoih khempeuh sem pah in. Mipi leh upate in hong muang peuh leh na nasep pen a hoih cihna zong hipah a, nang adingin zong maban zopna hong nuam toto ding hi.  

4. A Kisam Thei In: Makai na sepna ah a na na sepsak mite adingin matutna lianpi na neih theihna dingin sum leh pai, vanzat, mi leh thatang - a kisam khempeuh na ngah theihna dingin upate leh mipi tungah a nget dan siam mahmah in. Tua hileh na khut na khe ding hong kicing dinga, vanzat kisam omlo in na tup na ngim na tangtun thei ding hi. Kua kiang pan hong pai thei, kua in hong seppih thei, kua in hong nungthuap thei cihte zong na tel ding a kisam hi. Cidamna leh lawpna kisam ding nahih manin lawm leh gual hau inla, annek lim ne in thahatna dingin khua-ul luanna ding kimawlnate hahkat in. 

5. Lawm Thak Bawl In: Makai thak na hih ciangin vaithak a nei himawk na hih manin lawm thak, hong huh ding, hong makaih ding, hong tonpih ding kisam na hih manin bawl mengmeng in. Na seppihte tawh thu kiza in kithei mengmeng pah lecin na vai hong lem hanhan ding hi. Na lawmhoihte na haksat ni ciangin hong huh dingte ahih manin it bawl in kem siam mahmah in. Makai gina i cih taktak te in mite nuntakna a hoih lamin kikheksak ahih manin kilawmtatna gina tak bawl hamtang in. Tua hi leh na makaihna khempeuh hong nuamzaw thamtham ding hi. 

Topa in makai hoih leh gina Zomi sungah hong piangsak toto ta hen. 

(Hih pen Zomi sunga makai hoihte nuntakna leh makaihzia pan a phatuam i zoptohtoh dinga hoihte kei muhna tawh gawm in kong lui khiat hi; Zolai Zunna kawm in). 

Hau Za Cin

Phuitong Liim

www.hauzacin.blogspot.com

 


Comments




Leave a Reply