WWW.TUNGZANGNEWS.COM

TUNGZANG NEWS
 
Malaysia ah Zomi Nam Ni siim phei - 1

Kum dang mah bangin tukum zong Zomi Nam Ni hong tun ding ciangin Zomite tawh zat khawm ngeingai ding kilunggulh in kei mimal takin zong ka kithawi khol simsim hi. Singapore a om Zomi leh Malaysia ah om Zomi khempeuh in zangkhawm kik leng cih makaite ngaihsutna a om ciangin 'pha ei' ciin ka thukim pah a, tua tawh kitona pai ding ka lungsim in ka khentat hi. 

Zomite minam a hong bawl Pasian in hih ciang hong tonpihna lungdam ko khawm ding leh i omom na ah hong kep hong khoinate kikum khawm a mailam maban bangci kalsuan ding cihte genkhawm a mainawt khawm dingin Singapore pan in mi a man thei, a pai ut teng pai man koh leh koh kisik ciat in Bus tawh 18 Feb 2015 zan nai 9pm in a pai phei uh hi. A zingciang 19 Feb 2015 ni pen Malaysia a om Zomi khempeuh in mipi kikhawm in Zomi Nam Ni a zatkhawm ngeingai ni ding ahih manin ngaklah in koh zong nitak annek nangawn valh khin manlo, ka gawl vuah awk kawmkawm in ka dingkhia liang uh hi. Malaysia ah om Zomite tukum lawp lua in Zomi Nam Ni ni khat bek zat ding hawmthawh in ni thum zang ding ci ahih manun koh zong 'nop tuak ei' ka ci mai uh hi. Tua mana a ni khatna pan lap loh ding lau a annek valh khin manlo, kam khuah manlo, singgah ne manlo lianga ka annek kuang nangawn uh a mun ah nusia a tai heethaat ka hi uh hi. Sum zattawm dingteng Bus station ah khek tawm pak in, ka van uh zong a kisam pak teng bek guang in KL lam ka delh phei henhan uh hi. 

Singapore gamgi ka tun uh ciangin ka van teng uh tawi ding hinapi pawlkhat bangin tawi kha lo in Bus sungah ka nusia uh a, ahi zongin Pasian huhna tawh bangmah na cilo bilbel hi. Sente kumthak sung ahih manin Singapore pan Malaysia zin nuam mi na tamlua mahmah a lampi khempeuh ah mawtaw dimin gamgi kanna zum khempeuh zong miksi pemta mahmah bangin na kimeizop diudeu hi. Mi tamlua mahmah ahih manin a vekpi un Zomi Nam Ni siim ding ka sa uh hi; amau lah a zinna ding uh hong hilhlo hiven :) 

Zingsang nai 4am in KL tung pan:

KL ka zin ciangin Singapore pan nai 4 pan nai 5 sungin ka tung den hi. Tuzan zong tua dan ding ciin Zomi makaite ka hilhkhol a, nai 9pm a pai pen a ziakai pen nai 2am in tung ding ciin ka kamciam hi. Ka upmawh uh bangin kilamzanglo ahih manin zingsang nai 4am in ka tung pan uh a, ahi zongin Zomi makaite in mit hak teta in hong na dawn lai veve uh hi. Singapore pan a pai mi 14 teng maitai takin hong na dawn uh a, a car vuah hong pua in Zomi Innpi ah hong puak in zinbuk ah nuamtak a giak dingin hong tawldamsak uh hi. Ka khualzin sung khempeuh ah ka tun hak penpen ahih hang Zomite ki itna leh kikhualna hang tawh ka tawlloh penpen hun ahi hi. 

Zomi hih mah nuam ngaungau ei.

Zingsang Kiallap Lim: 

Zingsang ka thawh phet un lupna puansilh singkhia in ka diangto uh a, a gei a anzuakna ah niangtui leh moh a lim nono delh in a man masasa ka kizui ngelhngelh uh hi. Zan ihmut nuam in zingthawh nuam ahih manin kiallap ka vaikhak bangbang uh limtak in ka ne uh a, a ha lah bei hanhan, a tui lah kiam hanhan... lungsim ah nuam hanhan... Zomi Nam Ni zatna phual pai ding lah hong nai hanhan... ka lawpna uh lah hong khang hanhan... 

Zomi Nam Ni ah pai phei pah saisai:

Kiallap ka nek khit phet un Zomi Nam Ni zatna ah pai phei ding ka cih uh leh Zomi Youth Association makaite Zogam pan hong zinte tawh ka kimu uh a, khut kilen in ka 'kibansah' ziahziah uh hi. Amau zong gam leh minam itna hang bekbek tawh a inn lum, a loma uh nusia a hong zin cih ka ngaihsut ciang ka khasiat bang hong suak liang hi. Ahi zongin Topa in Zomi leh Zogam a dingin i sepna khempeuh ah hong makaih ding, thupha hong pia in hong gualzawhpih ding a a gah khum mahmah a lo, a ne pen Zomi nang leh kei i hi veve ding hi. Amau minam adingin nu leh pa bang, sanggam u leh nau laizom bang hi a, panpih theihna khempeuh ah panpih ciat dingin ka khentat hi. 

Zomi Khangno makaite tawh ka kimuh khit uh ciangin KL khuasunga mawtaw hoihnono Zomi te tuanna dinga hong tai keukeute khat lamgei ah khawlsak in a sungah ka lut pah uh hi. Ka pai nopna khempeuh vuah hong paipih in a sum nangawn la lo dek liangin hong pua nuam uh a, Zomi Nam Ni zatna ding mun ah hong tunpih uh hi. Ka paina lamdung vuah Zomi Nam Ni zang dinga khe tawh lamgei tuak ah a pai diamdiam, a kizui diamdiam Zolia Zotaang te muhnop mahmah hi. Numei naupang, nupi papi zong a om tei uh hangin khangno vive hizaw ahih manin lawp-huai mahmah hi. Koh mawtaw tawh a tuangte nangawn ka kum khit ma un lawmte zong hong tung to ngeingai uh a, Zomi Nam Ni zatna ding innpi Chinwoo Stadium mai tualpi ah maan kizaih ziahziah uh hi. A vei a tak vua Zodial, Zopuan, Zokhi kikhaite etlawm in kumpi David tausang tunga kikhai galhangte thaltang te ziahziah tawh kibang hi. 

Zomi Nam Ni hun nai 11 a kipan ding pen koh nai 10:30am in ka tung uh a, innpi sungah mi na dim zihziah ta uh hi. A lutna kongkhak ah zong vaidawn nungak tangvalte in zopuan kilawm taka silh dimdiam in na ding dimdem uh a, a tung masasa angsuan na suansak in tua ciangin a suang masasa inn sung lut thei uh hi. Koh zong suang dingin ka kigual uh a, ka awmtung vuah ka suan khit uh ciangin ka lut phei pah uh hi. Ka vei lam vuah Zokhi, Zopuan, Zodial cih bang na kizuak zeizai a, laibu zong a tuamtuam na kizuak zihziah hi. Ka leinop a om hiam ciin ka et kiaukiau leh ka nung pan innpi sung lut nuam mipi hong tam lua mahmah ahih manin hong kiphu zuazua a lut loh phamawh ahih manin lei manlo in ka lutsuak hi. Kikhop tawp ciangin ka en kik ding ka cih leh kikhop tawp ciangin lawmte'n na zuak khin man uh a, na om nawnlo uh hi :(

Inn sungah music tumsiamte in tumging na tum ziahziah uh a, Zogam ngaihla, Zomi Nam Ni la cihte na kitum zihziah hi. Hun kipat ding nai 11 lah hong nai semsem ahih manin mipi dim phitphet kikal a paina ding lampi kihong tawnin ka lut pheiphei uh a, ka tutna ding uh mun ka tun uh ciangin zinmang dinga Zogam pan hong zin Rev. Dr. Go Chin Zam, Associate General Secy, GZA tawh ka kimu uh a, makaite mah na tung masa ahih manin Zomi adingin lungmuanhuai hi, ka ci hi. Makaite tung nunung hilo in makaite mipi tawh tung khawm, tung masa cih pen 'khantoh gim nam' hi khin hi. 

Zomi hih hong nuam semsem...

(zop lai ding)

Hau Za Cin

Phuitong Liim

www.hauzacin.blogspot.com

He Knows How You Feel

Jesus was angry enough to purge the temple, hungry enough to eat raw grain, distraught enough to weep in public, fun loving enough to be called a drunkard, winsome enough to attract kids, weary enough to sleep in a storm-bounced boat, poor enough to sleep on dirt and borrow a coin for a sermon illustration, radical enough to get kicked out of town, responsible enough to care for his mother, tempted enough to know the smell of Satan, and fearful enough to sweat blood.

He is able to run to the cry of those who are being tempted and tested and tried.

Hebrews 2:18 (AMP)

Whatever you are facing, He knows how you feel.


Malaysia ah Zomi Nam Ni siim phei - 2

Zomi Nam Ni zatna mun ka tun khit uh, Zomi pihte tawh ka kimuh ziaizuai khit uh ciangin bel zan nitak a nawhsa a ka tai hehu khawng uh, gamgi lutna dinga immigration office thupi sa lua a maan zaih kha - palikte in ka phone uh hong matsak sawma ka maan zaihsa teng uh phiat khin dinga hong sawl laitak vua ka dipkuat dan khawng uh... ka mangngilh pah uh hi. Tua bek hilo, Malaysia paina dinga ni nih bek omta himah leh visa a sun a zana va ngen saan a ihmu man lo lianga khualzin vaihawmte kiangah va tu teta cihte ka phawk nawnkei uh hi. Nai 5 sung bus tuanga kitung ziau pen nai 8 ka tuan uh ka gimna khempeuh uh zong hong bei khin a nuamtaka Zomi 5000 val paikhawmte tawh Zomi Nam Ni zangkhawma khutbet ziahziah ding lam ka mitsuanzawta uh hi. 

Puankhai tawh maan kila: 

Nai 11 hong sat leh hunzat kipan ding ahih manin tua ma in meltheih a tung masa pawlkhat tawh stage nunga puan kikhai THE 67TH ANNIVERSARY OF ZOMI NATIONAL DAY, 19-21 FEBRUARY 2015, KUALA LUMPUR, MALAYSIA cih kidawk dingin maan ka kila ngeingai uh hi. Zinmang Dr. Zambawi tawh ka lak khop theih ban vuah, Zomi lasiam minthang thak Muanpi (pasal aw leh numei aw tawh lasa siampa) tawh zong kila kha. Zogam Khampat khua pan hong zin Rev. Go Za Sum, Korea pan hong zinsuk Rev. Dr. Lian Ngaihte tawh zong holim bek hilo in maan kila kha in "gam tuamtuam ah om Zomite Zomi Nam Ni in hong gawm, hong kimusak hi maw" ciin lungdamna leh hamphatna gen khawm in Zomi hih hong angtan huai saan hi. Mipi lam hek in maan kizaih khit ciang ka khuadak leh mipite lak ah zong Zolia Zotaang hoih nono a kizemte leh nupi papi kizem sitset ban ah a tanote uh Zopuan hoih nono tawh a zem uh kimu ziaizuai a, eima omna ciat pan maan kila in tuni phawkna ding lim tampi ka kep sawm uh hong kibang tek hi. 

Tuun sung khat piang...:

Nai 11 hong cin ciangin kikhop makai dingte in paungaihna tawh dawhsang (stage) kiu pan hong kidawk in dawhsang tungah hong ding dimdiam uh a, amau min leh hihna ciat hong kigen khit uh ciangin "Tuni Zomi Nam Ni nuamtaka zang dingin kong muak uh hi" acih khit phet un mipi khempeuh lungdam in khut kibeng pah ziahziah a, kikhop a kipan ding hipah hi.

Zomi khempeuh unau sa khat mi khat i hihna lahna la minthang "Tuun sung khat piang" cih la sa in mipi dingto in sa in khut kibeng ziahziah a, vei leh tak a omte khut kilen in "Zomi Nam Ni thupha" ciin ka kimaitai (nohset, greet) ciat uh hi. Ka taklam liangko tungah ka dakphei leh Zogam Labupi Pu Lengtong Pauno zong na ding khikhe a, khut kivaan in ka kisawk bat loh uh hangin ka kivaidawn tuah uh hi. Zomi sungah i mi minthang leh mi masate hih bang hun ciang a kim diamdiama hong pai ciangin nakpi takin Zomi i hihna vangpia in thupisak a, i khamuanna kibehlap hi. Zomi Nam Ni vaihawm makaite zong kimtak in tu dimdiam a, Zomi makai tuamtuamte zong amau tutna ding mun ciat ah kimtak in tu dimdiam uh hi. Ka taklam nawl lam ah Zomi Education Centre sangnaupangte lam lak thei lian dingin kithawisa in Zopuan silh in tu dimdiam uh ka muh ciang kei zong sangnaupang hi kik thei leng maw ka ci hi. 

Kikhop makai dingte Zolia Zotang melhoih nonote ka muh ciangin nung kum Khuado a Zolia ngahte, Zotang ngahte hiveh ciin ka phawkkik a TS Khai la thu kawm in, (kei zong) 'la kik thei leng maw' ciin... khatvei khangno kik thei leng maw ka ci hi. I pallai, i khanlai, i hoihlai nite in hong ngaklo a, a ni kha in hong taisan a i khangno hunte, i nunnop hunte zong hong bei ding hiveh ka ci hi. Tua manin Zomi Nam Ni uangtak, nuamtak in a zatsawm a hanciam teta a ka angkawi ngaihno Sm Cingpi tawh a zinphei, a simphei mah ka hi uh hi. Pallai nite hong vul ding aw... Zomi lia leh taang aw, am un, am ni, am ni...

Minam a hong piangsak, mite tawh liangko kikim a hong lamto, tu ciangciang Zomi te hong kempa kua dang hilo Pasian ahih manin Ama tungah vai khempeuh ap in hih ciang hong tunpih lungdam ko kawmin mimal khempeuh leh tuni hun ap in Rev. Thawng Ngaih Khup in 'Tapa Zeisu min in kong ngen uh hi' acih khit ciangin mi khempeuh in a ging thei pen a AMEN cih khit ciangin kitu diam a, lungmuang takin hun kizom to hathat hi. 

Thu Kong Honna: 

Sia Hau Suan Khai, President, Zomi Association of Malaysia in hong neih tak ciangin mipi khempeuh vaidawnna kammal kilawmtak in hong gen a, zin muakna leh tuni Zomi Nam Ni nuamtaka zang dingin deihsakna hong pulak hi. Hih ciang i tun theihna pen Zomi khempeuh i pankhop man hi ci hi. Mimal khempeuh pankhopna hang hi a, khua khempeuh pankhopna leh pawlpi tuamtuam pankhopna hi ci hi. Nopna dahna ah kinusia lo in genthei haksatna ah kihuh in kidon in kiveh in kikhoi in kidelh in i omna hangin i minam a etlawm semsemnate limtak in gen a, Zomi hih hong namtui semsem hi. Minam khat - eima gam hilo mi gam ah i om ciangin i nop i dah kitheihpih, kiphawkpih in kidelh ding, kihuh ding mah hi cih hong telsak semsem hi. Zomi khempeuh Pasian hong bawlna - minam khat i hih na mangngilhlo a mi gam mi lei ah zong eite hong bawlpa Pasian phawk a nisim nungta dingin hong vaikhak hi. 

Zomite pilna..... Pasian sungah

Zomite khantohna..... Pasian sungah

Zomite kipumkhatna..... Pasian sungah

Zomite lawhcinna..... Pasian sungah

Zomi leh Zogam Lei..... Pasian sungah

ciin mipi kiko ziahziah in Pasian bekmah eite belh ding, muan ding, suan ding ahihna ka tangko ziahziah uh hi. Vanggam malep ka hi mai uh hi!

ZIS pan kipulakna:

Dr. Hau Za Cin, President, Zomi Innkuan Singapore in Singapore pan Zomi Nam Ni sim dinga pai khempeuh maitang lahna nei in mipi mai ah samto a, dawhsang ah kigual diudeu a dingsak in a min uh gen a, amaute in khutlam in mipi khutletna nei uh hi. 

Pa Hang Khan Lian

Dr. Hau Za Cin

Sm Vung Deih Cing

Sm Niang Sian Muang

Dr. Chinkhanlun Guite

Tg. Langh Biak Lian

Tg. Lian Sawm Sing

Sm Niang San Cing

Tg. Eric Suan Za Tuang

Lia Zam Khek 

Lia Destiny Lun

Lia Manbawi

Lia San Niang

Hihteng khempeuh maitang lahna neih khit ciangin Zomi Association of Malaysia te in kumlui a "Best Community-based Organization Award 2014" a ngah uh Lungdampihna Laipi ZIS President mah in ZAM President tungah pia a mipi in lungdam khutbeng in khutkawite kitum ziazua a, nuam mahmah hi. ZAM leh ZIS pen mihing bang hileh nupa bang hi a, sepna vaihawmna khat peuh ah a kalsuan khawm ahih manin tukuma Zomi Nam Ni bek hilo vai dang tampi ah zong kikalsuan khawm ahih manin tutung in zong Sepkhopna ciin Singapore Dollar 1000 (tul khat) tawh a kisapna khat peuh uh (a diak in cimawh huhna lam ah) a zat ding uh ciin Pa Hang Khan Lian, Vice-President, ZIS in ZAM President tungah hong piaksak hi. A piak kawm in mai mahmah hong tung ding ZOSUAN TUAILAI KHAWMPI ah Zomi bup in i sepkhop, i kalsuan khop a kulna limci takin hong gen a, mipi kilawp mahmah a, "Kei zong ciah ningin ZTK siim ning" aci kihona kiza pah kawikawi hi. Zomi te mailam limci semsem hi. 

ZIS President in, "Nang vai nang khut ah, nang thuneihna ah a om loh ciang bang na ngaihsun a? Nang leh nang zingvai kihawmlo in, mite khutnuai ah na nasep ciang bang na ngaihsun a? Hih mun ah na pute un Zomi Nam Ni zatna dingin khawlhun (leave, akhuan) hong pia kei leh bang na ngaihsun tam?" ciin mipite ngaihsut ding a gen khit ciang "Zomi Nam Ni hih banga i zatkhop nuam kasa a, mailam ah a nuamzaw tampi zangkhawm lai ding hi hang," ciin mipi tungah lungdamkohna leh lametna, ngimna pulak hi. Mipi khutbeng ziahziah in nuam kisa toto hi. 

Zogam Zun Ni cih la ZEC lasakna:

Youtube pan ka la deih mahmah khat pen tuni in Zomi Education Centre, Kota Damansara te in hong sa a, a lim tawh lak lailai uh ahih manin ka diangkhia dekdek hi...

(zop lai ding)

Hau Za Cin

Phuitong Liim

www.hauzacin.blogspot.com

 


Comments




Leave a Reply