WWW.TUNGZANGNEWS.COM

TUNGZANG NEWS
 
Malaysia ah Zomi Nam Ni siim phei - 3

Leitung mihingte in muhnop a sak uh nam nih om a - innkong mai a naupang tualbual leh pak huan a pak hoih pak dimdem. Zomi leh Zogam in a ngak dimdem Zomi naupangte in Ëden Huan Thak i Zogam nuam cih la hong sak uh ciangin mipi in pakta lua in khut kibeng ziahziah hi. Lasa bek hilo in ZEC Kota Damansara sangnaupangte in khut leh khe vik in pumpi kihei pelpel in hong kituak diamdiam uh a, nakpi takin muhnop in lungsim hong lawng hi. Kikhop makai Francis Khampi kammal kawmpak hile hang "khuvam" hi.  Guai, i ngak leh i kingakna ding ahi pah ding Zomi sangnaupante in - i Zogam puah in zuun peuh leng mun dang, gam dang kingai lo dinga, ei adingin Eden Huan Thak bang hong hiding hi, ci uh hi. Bil nei khempeuh in za ta hen. 

Sangnaupangte limlah khit ciangin stage nung lam pan awging khat hong kiza a 'a zi leh amah kua mu nuam zaw?' cih himawk hi. Bang cihna hiam ciin mipi in kikhuadak heihawi kei hi. Kikhop makaite in, thugen dingin Rev. Dr. Go Chin Zam, Asst Gen Secy, Global Zomi Alliance sam ni a ci nuam uh na hi a, mipi in 'a nih un' a cih khit uh ciangin khutbetna tawh muak ziahziah in thugen dingin Sia Zambawi stage tung lam ah hong tuanto theuhtheuh hi. Zomi makaite pen a pai diakdiak cih bang omlo in thanuam takin a diang leklekte ahi uh hi. 

"Zomi te in Zomi Nam Ni ki lawplua in ni tampi kizang nuam a, Malaysia bangah ni thum zat dingin makaite in hong gel uh hi," ciin a gen ciangin mipi in diksa lua in khut kibeng kik ziahziah hi. A ni nihna leh ni thumna pen makaite tutkhopna leh thusinna hun hiding hi. Zomi Nam Ni hun sung tawh kituak in Zomi khua tuamtuam in zong Khua Pawi bawl in khuabup kimuhkhopna leh makai kitelna hun tuamtuam nuamtak in na zang thei uh hi. Sia Zambawi in mailam ah Zomi Nam Ni pen a ni bek hilo in a season/khuahun in i omsak mai ding hoih lo diam ci liang hi. Kei zong hi kasa hi. Zomi Nam Ni hun sungah Zomi Nam tawh kisai vai tuamtuam nei in Zomi tawh kisai nasepna tuamtuamte uangbawl semsem leng hoih dingin ka ngaihsutna sawtta hi. Sente in Sen Kumthak (Lunar New Year) pen ni 15 sung bang zang uh a, Christmas hun zong ni 15 sung mah zang uh a, Kumthak hun zong ni 15 sung mah innzepna, pak suanna, letsong kipiakna (present kipiak hun sung) zong tua mah bangin na zang uh hi. Tua hi a, Zomi Nam Ni zong a nipi banah tua bangin a hun omsak to lai leng hong nuam semsem lai ding hi. 

"Leitungah mihing nam nih om hi: Zomi leh Zomi hih a utte" hong cih ciangin mipi in khut kibeng ziahziah hi. Zomi te hampha a, Zomi hih utte zong hampha veve uh hi. Leitung pen tua banga paipai hita hi. Ama'n a gen zom zelna ah, "I tuntunna ah Zomi Nam Ni zang ding hi hang. Zogam ah i om lai in zong Zomi Nam Ni zang hang. Gam dang i tun ciangin zong Zomi Nam Ni zang ding hi hang. Gam thumna tungin lungtup tui bang a tung zongin Zomi Nam Ni zang ding hi hang... I minam lamto in, pahtawi in thupi sak in picingsak ding hi hang. Bang hang hiam cih leh Zomi te pen minampite hi hang. Nampi lungsim nei hi hang. Zomi te in midangte huai in kawi in sam in lawmbawl in khual hi hang. Midang i khual bangin midangin hong khualloh ciangin zong Zomi te lungduai takin a thudik a genkhia a, a dinpihte hi hang. Minampi lungsim nei in ei bek kikhual hetlo hi hang. Minamneu lungsim neite in amau bek kikhual tektuk uh hi. Zomi te tuaci lo hi hang. Zomi leh Zogam bek hilo kim leh pam zong a puah sawm, a puah dente hi hang. 

Zomite pen eima ngeina mahmah a kembit zo dingin a thupite hi hang. Tuni in zong Zopuan nong silh zihziah vua kilawm in ka muhna peuh etlawm ka sa hi. Minam lahna puan khat ciat i pumpi tungah i baat manin lungdam ngiat ing. Minam khat i hihna hong lak a, thupi hi. Kei pen Zomi ka hi hi. Zomi hong ki-eng hi. I vekpi in ci zuaizuai leng utphial ing: 'Zomi ka hi hi. Kei hong ki-eng hi'. 

I maban ah Zomite, mite mai ah maingal takin hak gega in kimuang tak in kampau in mite mit et kilkelsa in hopih to den ni. Tuni ciangah i hihna te thupi hi. Mite mai ah nam neute omzia bang hilo in minampite om bangin om gega ding hi hang. Ahi zongin kiphasak hetlo ding hi hang. Mi pawlkhat mi mai ah a kiniamkhiat kineih in a lungsim tawngah kiphasak uh hi. Tua bang in Zomi om ngeilo hi hang. Tun zong gamdang USA khawng i tun ciangin mite in hong dot leh 'Zogam ah bang sem ngei na hiam?' hong cih pen, "Ka tupa pen America President ding pa hi," ciin na dawng un. Na mailam limci mahmah ahihna tawh dawngin na lak hamtang un (mipi in khut kibeng ziahziah hi). 

Zomi sungah khasiatna khempeuh tuni panin Zeisu min leh Zomi i itna tawh kimaisak ding hi hang. Tua i cih ciangin, mawhna nei kei ing, cihna hilo in mawhzaw teh cihna hang zong hilo in kei hangin khasia hikha niteh, na khasia kei in cihna hi. Mawhna neite in mawhmaisakna a nget pen niamna hilo in nuntakna a lamzang zawkna ding hi a, mite in mawhmaina hong nget leh maisak theihna zong minampi lungsim hi. Mi a maisak ngamte mi hangsan hi. Mi a mawhna uh hong thum ciang maisak nuamlo a khihcip den cih pen upadi thupisakna hi a, tuni in Upadi (law, legal system) pen upa sak nawnlo ding hi hang. Upadi sangin Zeisu itna leh Zomi i itna tawh kimaisak in kalsuan ding hi hang. 

Mailam en in nunglam thu ah a tuang, a tualbual nawnlote hi ni. Nunglam sepsate ah bual nawnlo in mailam pen thupi bawl in mainawt ding hi hang. Mailam ah Zogam singkungte a nosuah kikna dingin hanciam ding hi hang. Singkungte suan kik ding hi hang. Zogam ah 'lam kiangah a tuk kuate hiam' cih a zong dingte hi hang. I singkungte zong tuk hi. I mual leh guamte, i suangtum leh lopate zong tuk hi. I mipih sapihte zong a tuk om hi. Tuate a zong dingte hi hang. Samaria mihoih pen kua hiam cih tuate i zon ciangin Zomi sungah hong kidawk ding hi. Levi mi omlo, Siampi nam zong hi tuanlo; Samaria mihoihpa ganhing in zong hong zang thei hi. Samaria mihoihpa bek hilo a ganhing in zong mite hoihna dingin, mite damna dingin nasem hi. Mite pua hi. A inn in zong cinate na tungsak lai hi. Tuni in nang leh kei zong Samaria mihoihpa bang, a ganhing bang, a inn bangin Topa in hong zatnopna peuh ah hong zat dingin i nuntakna kipiakhia ding hi hang. 

Tua ahih manin - minampi i cihte pen: 

-Thukhual,

-Nunglam enlo,

-Mi kim tawh nasem khawm, 

- Mailam khual,

- Pasian leh minam khual,  

- Itna leh lainatna takpi tawh nasem hi. 

Topa in Zomi khempeuh thupha hong piata hen," a cih khit ciangin a khutvik in mipite hong hopih ziahziah a, lungdamna leh pahtawina khut kibeng ziahziah in a tutna mun a tun dong kipahtawi hi. 

Zinmang Sia Zambawi thugen khit ciangin Modern DJ a siam Khuppi in a muk bek tawh a ging bawl in music hoih mahmah hong gingsak liahliah a, lamdang kisa in ka gei a Zoliate bang a kam ka hehaw ngen uh hi! Siamna nam khat a lamdang mahmah himawk ahih manin mipi in kipakta in khutbeng in kipahtawi ziahziah hi. 

New Eden Ansai leh Khualzinna neite Pa Kaino te nupa mipi mai ah kidingsak a, amau minam leh gam adingin a piakkhiat uh Zolia Zotaang te hong lapsangsak ahih manin khutbeng in kipahtawi ziahziah hi. 

Kikhop makai Sia Kam Mung in, "Zomi pawlkhat in Zomi Nam Ni a kihel khak loh ding dah lua in a nasep nangawn uh tawp in hong pai uh hi. Tuni in tua banga nasep khawl lianga Zomi Nam Ni hong siim teng na khut uh hong lik un," acih leh ka muh manin zong mi 8 pan 12 kikal peuhmah pha ding hi. Gam leh nam itna pen Zogam ah i om lai sangin mi gam ah ei thuneihna a tawm ciang kitam neih zaw, hong khangzaw a hi tam ka ci phial hi. Ahih kei leh ei thuneihna tawh i kalsuan nawnloh ciang i thuneih lai ngai in gam leh nam itna nangawn hong khang ahi tam ka ci hi. Leitung gam tampi suahtakna deiha kipante tua lungsim nak liat lua mahmah ahih man a, luang kham ngam ahi uh hi. 

Pawlkhat bel nasep a khawl uh ciang, a gen dan siam bilbel in: "Ka boss te ka deih bang mello" ci ziau lel uh ci... ha ha ha... 

Zomi Education Centre, Cheras pan Zangsi Seino te in lam lahna hong nei uh a, "I gam leh nam ading lam khawm tawng" cih la tawh hong lam ziahziah in nak muhnop, nak siam, lungsim hong lawng in i nam i ngeina tawh i khantoh ding, i kep ding ahihna hong lak a, tuate mah in hong gawm, minam khat i hihna hong lak na hi takpi hi cih hong phawksak hi. Ka zak kikna ah ZEC ah a sem sangsiate pen khasum ngah vetlo, amau leh amau mawtaw tuanman kipia tawm, a khe tha ding, a khut tha ding, a lungsim tha ding kipia tawma nasem uh hi cih ka zak ciang 'lamdang' ka sa a, hih thu Zomi khempeuh in i ngaihsut khop, i thungetna ah i phawk ding khat ahih ding hoih kasa hi. 

Bangbang ahi zongin Zomi, Zogam, Zolei pen ei mah in i zuun kei leh kua dangin hong zun lo ding hi. Eden Huan Thak Zogam Nuam i bawl kikna dingin nang leh kei a kisam hi hang cih mangngilh ngei kei ni. Hih la khatvei ngai khawm kik dih ni, guai. 

Eden Huan Thak Zogam Nuam:

https://www.youtube.com/watch?v=pld6sHazyiI

(zop lai ding)

Hau Za Cin

Phuitong Liim

www.hauzacin.blogspot.com

He Knows How You Feel

Jesus was angry enough to purge the temple, hungry enough to eat raw grain, distraught enough to weep in public, fun loving enough to be called a drunkard, winsome enough to attract kids, weary enough to sleep in a storm-bounced boat, poor enough to sleep on dirt and borrow a coin for a sermon illustration, radical enough to get kicked out of town, responsible enough to care for his mother, tempted enough to know the smell of Satan, and fearful enough to sweat blood.

He is able to run to the cry of those who are being tempted and tested and tried.

Hebrews 2:18 (AMP)

Whatever you are facing, He knows how you feel.

-- 

 


Malaysia ah Zomi Nam Ni siim phei - 4

Zomi Nam Ni zingsang ka din khiat ma un Zogam pan Zomi Youth Association (ZYA) makaite kiangah thu hong tunga, "Tuni zingsang ciangin Zogam ah ZYA khua 51 ah kiphutta hi," cih thu ahi hi. Zogam khua 51 ah ZYA omta cih theih khit cianga Zomi Nam Ni zang dinga kuan khiat pen thangah dan nuam mahmah hi. Zomite tuanna dinga Japan mipilte in khuak sa lianga a bawl uh mawtaw vot hiuhiau sungah tu kawmin a limlang pan ka khuadak kiaukiau uh a, lampam a pak hoih nono pak te lak ah Vaupak zong ka mu hi. Zomi Nam Ni zatna ding innpi luttoh nadingah nahtang kung phung khat po khawm liliai a, a gei ah nisuh kung sangpi a teh palh ziziai in na ding hi; Zomi te lungtuak taka omkhawm hong phawksak in, kim leh pam tawh kikhawl diamdiam a kalsuan, tengkhawm i hihna hong telsak hi. 

Zogam pan hong zin ZYA makai Sia Kham Do Dal in Zogam ah ZYA te nasepna te hong pulak a, mipi in dai dide in kingai hi. Amah Sia Daltawng pen Nahnuai Tuiphum Sia sem ahih hangin Zogam leh Zomi adingin nakpi takin nasem in ma a pang khat hi a, tuni ciangciangah sisan thawl 12 hawmta hi. Amah bangin Sia Kam Suan Mung @emung, ZYA, Gen Secy in zong sisan thawl 12 hawm khinta hi. Sisan thawl 8, thawl 10 cih bang a hawm khin makai honpi khat omta hi, ci uh hi. Hih bang nasep hoih a semte pahtawi huai a, panpih huai bek hilo in gengen tak ahi hi. Nang leh kei in i sep theihloh nasep manpha tampi sem a, ahi zongin khatveivei a nitha uh pen "simmawh bawl" ahi hi, ci hi. Ka khasiat hong suak vat mawk hi. 

ZYA te pen cimawh dongtuakte a hu, zato ah si kisamte si a hawm, oxygen kisamte pia in, lampi ah a pukte a phong ahi uh hi. Samaria mihoihpa nasep bangin minphat deihna hang hilo in itna hang tawh a sep uh tha leh ngal piak khiatna bek hilo in, amau nuntakna tui ahi a sisan mahmah uh nangawn sukkhia a pia, a semte ahi uh hi. Tua ahih manin zahtak huai a, etteh huai in, Zomi bup in mapan khop theih dan ding ngaihsutpih huai hi. 

Kei ka khankhiatna India gam Mizogam ah YMA in tua bang mah in dongtuakte huh, cimawh genthei panpih ding neilote panpih in, Christian nuntak dan kilawm a nuntakna etteh in kalsuan uh a, a gambup khantohna bek hilo in a minam kilaptohna bulpi khat hong suak hi. Pankhawm hatna hi ciin pangkhawm uh a, kuamah in a neu pen zong simmawh theilo dingin kihuh ngeingai uh hi. Zomi leh Zogam in tua ding a neita i hi a, ZYA te nasepna tua ahih manin AMEN ka pia a, ka thukimpih a, zong thapiak huai kasa a, ka hih theihzah in ka hihpih hi. Zomi leh Zogam hong paal leh a gah khum ne ding nang leh kei i hi hi. 

Inn lam Zogam lam ah ZYA in a sep mah bangin Malaysia ah zong Zomi Association of Malaysia te in dongtuak, cimawh, panpih ngaite panpih in Christian ngeina kilawm tak i nuntakpih te mah masuan in kilawm tak in sem den uh hi. Tukum pai 2014 sung bang luangpham 47 nei uh a, a vekpi in tu ciangciang ah luangpham 149 khin uh hi. Hizah a Zomi te haksatna ah a van, a huai Zomi makaite zahtakna ka pia a, a sem a gimte a gimna thaman uh a zah tampi in thupha namkim tawh tung Pasian in hong piaksakta hen ciin ka deihsakna leh zahtakna ka pulak hi. 

Zogam bek hilo, mi gam mi lei ah i om ciangin i mi i sa Zomi mah tawh kipawl in, i mi i sa mah tawh kalsuan khawm ding hi hang. I nopni i dahni ding kitheikhollo a, i tuahphat i tuahsiat ni ding kitheikhollo hi. Tua ahih manin i tun nini, i suah ni ni in Zomi kipawlna ah min khumsak in, lut in sem in, mapang ding hi hang. Leitungah midang kisam keng a ci thei kuamah omlo a, kuamah khatbek in a nungta theilo hi hang. Suangthu bangin a ki-um liliai a a zawngkhawm, a kipawlkhawm, a do khawm ding hi hanga, nopna ah kinoppih in dahna ah a kidahpih dingte hi hang. Tua hileh i Zogam leh i Zomi nam hong pallun semsem ding hi. I omomna ah Zomi khangnote in minam leh gam adingin nasep nei ihih manin hangtak, hattak in pilna siamna sitlo in Topa muangin nasem in mainawt ding hi hang. 

"Lum baih si teh" ciin Zomi lasiam Muanpi hong awt ziahziah ciangin mi khempeuh lohung bangin ki-zawng ziazua a, tha kingah in nuam kisa mahmah hi. Lasiam Muanpi pen numei aw leh pasal aw a ut bangbang in la a sa thei khat ahi hi. "Kong lasak ding pen lasiam Cingpi tawh ka sak khop zel uh hi in, tuni amah hong kihel theilo ahih manin ken numei aw zong hong sa suak pah lel ning..." ciin a nih a koppah lian ahi hi. Tua ahih manin hih banga talent hoih nei pen tuni in DJ Khuppi leh amah Muanpi ahi uh hi. 

"Laigelh dingte in zong a kammal ding uh zongzong ta ding cileng maw" ciin ka nung pan hong huausim khiankhian Steven Vocal Band ah lasa Zomi lasiam Sia Suanpu in zong a lasak ding a music khumsa a keng mangngilh pen khuisa liangin a zonzon pen hong tungta a, a sawtlo in amah zong kisam pah lian hi. "Zogam Huihkhi" cih la ama sak hiathiat khit ciangin mipi lungdam khutbeng ziahziah in Zomi lasiam Suanpu kipahtawi hi. 

ZOMI CUP 2015

Tukum zong a beisa kumte bangin Zomi Cup pen a thupi mahmah in kibawl a, khua tuamtuam pan team 32 lian kidem in muhnop thei mahmah hi. Hih bawhlung suih siam kidemna ah a liam, a bai cih bang om hetlo in a siam vive kidem ziahziah uh a, zong gimlua lo, nasep nusia leh khawlsan liangin kidem kullo in vai khempeuh kizo thei a, nakpi takin lungdam huai hi. Vai khempeuh hong gualzawhpih Pasian tungah lungdam hang ciin tukpeng makai Sia Mangpu in gen hi. 

Zomi Cup 2015 ah a kihel Zomi Innkuan Singapore te zong pahtawina hong kipia ahih manin lungdamtakin khangno makai Sm Muangnu in hong saan sak hi. Singapore Zomi leh Malaysia Zomi Feb 1, 2015 ni a tukpeng sui a kidelh taktak uh pen lawital khahsuah mahmah bangun tai hat thei mahmah uh hi (a video ah na en mai un)...

Nuam panpan ei guai...

(zop lai ding)

Hau Za Cin

Phuitong Liim

www.hauzacin.blogspot.com

He Knows How You Feel

Jesus was angry enough to purge the temple, hungry enough to eat raw grain, distraught enough to weep in public, fun loving enough to be called a drunkard, winsome enough to attract kids, weary enough to sleep in a storm-bounced boat, poor enough to sleep on dirt and borrow a coin for a sermon illustration, radical enough to get kicked out of town, responsible enough to care for his mother, tempted enough to know the smell of Satan, and fearful enough to sweat blood.

He is able to run to the cry of those who are being tempted and tested and tried.

Hebrews 2:18 (AMP)

Whatever you are facing, He knows how you feel.
 


Comments




Leave a Reply