WWW.TUNGZANGNEWS.COM

TUNGZANG NEWS
 
 Sese aw ei mete!

Numeite ngeih takin hong nuikhia baba uh leh lungdam mahmah cihna hi in, Pasalte tua bangin ih nuih khiat baba leh a kilawm gamtat luheekdan a thei lo mihai kisuak hi.

Numeite awnem takin hong pau dakdak leh a ithuaina uh khang semsem a, pasalte tua bangin pau dakdak lehang numei uk tuak lua hong kicihsan ziau ding hi.

Numeite vansai ah vanlei dingin hong pai khia uleh mite muhna panin a khangto numei pil hong hi ziau uh a, Pasalte vanlei inpai khia lehang nulehpa neihsa sumlehpai mawk zat hong kici hi.

Numeite pau lo in hong omcip leh a maizum hi kici a, Pasalte tua bangin daai deda lehang a maingap huai lo migilo hong tangsak uh hi.

Numei kamtam lua te mimuhna ah numei hiven ahiding mah hi kici lel a, Pasalte kamtam lua lehang numei tawh kibang kamtam lua hong kicihsan hi.

Numeite Online tu leh hunawng tomno zatdan siam ei kici a, Pasalte Online tu lehang thadah leh uisan thuah hong kici hi.

Numei kamnial haat lua te pen lungsim nei khuak haat kici a, Pasalte kamnial haat lehang bang hong kici?

Numei a lukunkun te a lungleng kici a, Pasalte lukunkun lehang zukham zatui kham hi’n teh hong ci uh hi.

Numeite thum leh li bangin lamsiau khawm leh kuamah in bangmah ci lo uh hinapi, Pasalte thum leh li vaak khawm lehang “Kua inn luh ding ahi uh  tam?” hong ci sese uh hi.

Thei zo nawn khang ei. Tel haksa sa mawk ingh.

Francis Lamthang (Zomi Quavadis)

 


Comments




Leave a Reply