WWW.TUNGZANGNEWS.COM

TUNGZANG NEWS
 
Makai leh Ulian



Mi makaih cih pen a baih om ngeilo hi. Mihon makaih pen a baih hi hetlo hi. A kisam theihna na neih kul a, a kisam siamna na neih kul hi. Makai hi in ulian hitaleh mi makaih uh, mi kem uh ahih manin a kisam theihna leh a kisam siamna a neih nak leh a baihzaw deuh ahih tei hang 'a baih' omlo a, siam taktak cih zong a om theilo ahi hi. A kisam banga zatsiam ding leh a kisap hun a hang taka dinkip ngam ding a kul ahi hi. 

Makai cih leh ulian cih pen a kibanglo ahi hi. A nih tuak un mite makaih, huai, khoi, uk in kem hinapi, a kibang kiuhkeuh lo ahi hi. Ulian te in a kisam khempeuh vaihawmsak in hilh a, makaite in mite kisap khempeuh pia in sinsak a, a siamnelna ding un pattah toto lai hi. Ulian in a omsa tungah vaihawm a, makai in a om nailo teng kaikhawm in a tup gam zuan dingin dinkhiatpih, paipih hi. A omsa zeek ziau a baih ding a bat hang baih tuanlo a, a om nailo suktuah khit ciang a kisam teng kaikhawm a, hilh a, lawpsak ding, theisak ding, telsak ding, a lunglut dinga zol ding, a mai vuah pai dingin a tup tungsak dinga tonpih ding cih pen a baih hetlo ahi hi. 

Sanginn ah sangsiate in sangnaupang a omsa teng tungah a kisap uh pia a, pattah in a tupna uh a tunna dingin hilh uh hi. Papi khat in a inn sungah a om nailo a zi ding la in, a tate hong pian ciangin a bul panin pattah in a picing dingin khoito a, a manpha nuntakna a nei hidingin pattah picingsak to uh hi. Biakinn ah upate in pawlpi mite a omsa tawh nasem in kikum in vaihawm in genkhawm uh a, a hoih nasep sem dingin kalsuan uh hi. Khuasungah minam makaite in mi tuamtuam - pawlkhat bang cikmah a kimu ngei nailo nangawn huai in kaikhawm in kipawlna sungah a lunglut ding uh genpih in, a tup a sawm uh hilh in, a kisap uh tawh a kisap loh uh tawh, a lawp ding, a uuk ding, a nungzui dingin in zawn, zol uh hi. A ma muhkholhna lam tawn a paitek ding leh a nuam gam i tun ding genpih, musak, theisak in a tup a tun dong haksa taleh kuamah kinusia lo dingin thapia in tawsawn a, a pai lah ciangin zong zol bawl zel, maiet zel, kun' zel in paipih hi. 

Makai nasep leh Ulian nasep a kua a baihzaw ding, a kua a haksa zaw ding cih na tel theih ding ka umta hi. 

Uliante a nuaia mite khempeuh amau sep ding ciat sem dingin thalawpsak, hilh in lawpsak ding hanciam hi. A omsa, a kizangsa nasep dan, mite uuk dan namte thei in tua bek tawh hihhih leh zong a mite mainawt zel, a sep ding uh khin den lel hi. Makaite in bel a upmawh loh penpen dan nangawn un vai hong om leh bangci sep ding, bangci nawk ding, a mite bangci kep ding cih nangawn luzanga sam pulh liangin a ngaihsut den kul ahi hi. A omsa omlo in a thak phuan den kawmin a sep a kul hun zong om hi. Sepsa dan bek zuilo in a kul leh sepsa dan nangawn pelh in mite kisap tawh kizuiin khel ngam, bulpat ngam kul hi. A mite khahsuah leh a tup tunglo ding ahih manin a mi leh a tup a thupina, a kisapna, a pawimawhna akibang ahi hi. A mite a tupna tunpih ding, guak tunpih lo ding. A mite tawh a tupna tunglo in a mite in lampialsan khin cih zong om thei hi. Tua manin makai nasep pen a baihlo ahi hi. 

Tua ahih manin, makai ahi a, ulian ahi zongin a nunga hong zuite muh theih dingin a pai, a madawk zek mah a kisam veve ahi hi. Mite muh batloh a hat in a pai lehlah a mite in delhpha lo ding. Ziakai lua lelah mipi in hawmthawh in makhelh kha thei hi. Tua manin mite phak khom ciangah pai in a kisam vante, nate, pilna, theihna, siamnate a piak, a hawpsawn den akisam ahi hi. 

Muhkholhna a kisap tuaktuak hangin a kisam zaw diak bel makaite ading ahi hi. A huampi in mu thei dingin, a lungkiat sawmlo mi hiding hi. Haksa taleh a dinkhawl utlo, khawl kullo in pai ding cih lungsim a neimi ahih kul hi. A muhkholh metna leh hamphatnate peuhmah mitsi manlo lianga en a delhpih, a lappih a kisam ahi hi. A haksat penpen hun in zong a phunlo, a ciaklo, a kipasalsak den mi, a kuhkalna leh a hanciamna mite in a paktat ding bek a deih hilo in khangsawnte in a etteh dinga nusiat thei mi hiding hi. Min leh za deih man hilo in, tuahphat metpih ding deihna bek hilo in, a hoih a pha khat sep ding a theih hangtak leh muanhuai taka sem ngiatngiat mi ahi hi. 

Makai cih pen mite kiangah a thu bek in a gen, kam bek tawh a sem hilo in mite muh theih dingin a semkhia, a lakkhia ahih hamtang ding ahi hi. Mite a huh leh a lak, a sem thei takpi ahih na a kidawksak ahih kisam hi. Ulian zong tua bang mah in. A tamzaw ah numei makai hiam, ulian hiam ahih leh a deihna uh hangtak in gen ngam in pulak khia ngam uh a; pasalte in numei zah in gen ziauziau ngamlo zaw hi. Khat leh khat kihona uangbawl in, a kisam thute siangtho tak, tangtak in kidong in kiho theite makai muanhuai, zuihtaak, ettehtaak ahi uh hi. A mipite kiangah a kisap uh bang hiam cih dong ngam ding, a mipite tungah lungdam thu ko ngam ding, a kul leh maisakna zong ngen ngam lel ding (a tamzaw ah makai khat, ulian khat adingin hihte baihlo thei hi). A zuihtaak leh a ettehtaakte in a neupen pan a lianpen dong a kibangin hopih thei uh a, a kisap uh a kibatloh hangin a kibangin en uh hi. Ama minthanna ding sangin a tamzaw hamphatna ding thupi masa hi cih khual hamtang a, a tup a tunpih man kei leh zong azom a makai, uliante in a tunpih dingin nusiat thei, nusiat ngam hi. Ama makaih sunga matut dingbek vai a gelte muhna sau neilote hi a, ama zoma makaite in zong a zop dinga nasep hoih a nusiat theite muhna sau nei, makai gina leh a muantak, a thudottaak mite ahi uh hi. 

Tuni in hong kidong hileh - nang makai sem ut zaw maw, ulian sem ut zaw? Nang makaih sungin bangteng na gel a, nang ulian sep sungin bangteng na sem khia a; na nunga hong pai lai dingte zop theih ding na nusiat nasep manpha, bulpat manpha a om hiam? Nang hong kidot loh ciang na lungkiat ding namte na sem kha hiam? Nang bek hong kithupi bawl hileh cihte nusiat in na nei thei hiam? 

Zomi khangnote in leitung kilumletna sungah hunthak kilut hi cih i theihna dingin makai leh ulian a kibatlohna, a kibatna, a haksatdan, a nopdan, a mawhpuak uh cihte kong luikhia gawp hi. Zomite in leitung mite kalsuan tawh kitona kal i suan ciangin hih bang thute i phawk ding a kisap hun om thei hi. I kim i kiangah minam khangto masate leh a khangto laitakte in a hun zuiin kikhel thei uh, kikhangkhan thei uh ahih manin a madawk toto suak uh hi. Zomi khangnote zong a madawk toto dingin Sian in hong siam hi.  


Ka lungdam. 


 
Hau Za Cin
Phuitong Liim
www.hauzacin.blogspot.com
 


Comments




Leave a Reply