WWW.TUNGZANGNEWS.COM

TUNGZANG NEWS
 
Picture
Pu. Thawn Tuang
Muhcil Ngaihno Obama Michelle

Obama leh a zi Michelle a ki muhcilna, ki theihcilna uhleh a zi numei
lak ah a etteh huai in a ki gen ahih manin tawm sutsuk ni.

Sialvom leh Sialvom ki ngai cih Zomite paunak ana man mahmah na hihi.
Lungsim ki bang, mel leh sa ki bang ki teenpen Obama te nupa inzong
nuamsa mahmah uh hi.

Obama zi Michelle in kum 1988 kumin Harvard Law School sang pan Ph.D
hong ngah hi. Kum 1989 in khuakhal sang khak ciangin Obama zong
thukhenna tawh ki sai asin dingin hong paiteh a zi Michelle in Obama
hong laihilh kha hi. Mivom pen amaute geel bek ahih manun a deihdan a
khuahek dan uh hong ki bangin hong ki-it bawl uhhi.

Sangnaupang ahi Obama in a siamahnu Michelle tungah itna ngaihna thu
hong gen ngiap in hong ki ngai thei uhhi. Kum 1992 Oct 18 in hong ki
teng uhhi.

Obama zi Michelle in:

1. Pasal a neih khitleh a neihma a zingthoh hun laihlo hi. Nisim
4:30am in thohden cihi.

2. Taina set ah tai-in thala den hi.

3. A tate sang a tuahteh Sangah bang teng sin cih gelhsak hamtang hi.

4. Ki ginni nipi ni TV leh Computer ensaklo hi. Computer pen innlai
bawlna ding bek hi cihi.

5. An a ki pia khat peuhpeuh thupi tak in sangin ne hi.

6. Amah leh amah ki muangngam hi.

7. Ka pasal pen ka lutangpi uhhi ci den hi.

8. USA kumpite zi lak a din sang pen Nu hi. Pi 5'11" pha hi.

Michelle in kumkhat sung akhasum gawm pen dollars 270,000 $ val ngaih
in Obama khasum ii  azahnih pha hi. A hih hangin Obama kiteelna ah
agualzawh nading in Michelle pen tua khasum hoih anasep khawlin apasal
panpih hi. A nupa un a pan khop manun gualzawhna hong ngahto uhhi.

Nungtolh kik pak leng a tawpna dingin Michelle pen USA Chicago leitaw
lam mizawng veng panin Jan 17, 1964 in suak hi. A pianna inn leh a
khankhiatna innpen anhuam buuk lah hi-in lupna lah hi pah hi. A inn
uhpen a laizangh ah puan tawh ki dal in a lang khat ah a Nu leh Pa
lumin a langkhat ah a upa tawh lum thilthial uhhi.

Na khan khiatna tualniamlua aiteh a niamdin mun tawh ki tuaklel cih
bang om theilo hi. A tupna lianin hanciamna tak tawh a kalsuan ahih
manin 2008 kum July kha sung aa abawl uh ahi mipi lunggulh kaihkhopna
khat ah 30% in amah deih in 35% in deihlo hi ci hi. Tua khit kum 4
ciang in American AP in khatvei akaih khop kikna uh ah American gammi
64% in amah deihin 53% in Obama sang pahtakna ngahsak zaw hi. American
Media tuamtuam te in hun khat ciang Michelle pen kumpi dinmun ngahzo
ding in um hi lai hi.

Zomi tangval nungak khangnote zong bang hi tuan ihiam? Na dinmun mite
in hong ciangtan sak phial mahleh Pasian in mihing khempeuh amuhna ki
bang lel hi. Hanciam in, Citak in, Lunglaulo aw sawtnawnlo ding......

Thawn Tuang
Nashville TN USA
Oct 11,2015

 


Comments




Leave a Reply