WWW.TUNGZANGNEWS.COM

TUNGZANG NEWS
 
Tedim Zomi te’ Zolai Pupi Gin En Cin

Rev. Job Nang Khaw Thawng in Tahan Awging Lom 27 Hawm 1, Jan – Feb, 2006 a suak a nunglam butuam sunga Theihsakna a tawnung penpen No. 7.ah Tedim Zomite Zolai pupi Sia H. Gin En Cin (GEC) Feb. 25,2006, 9:a.m in Emanuel Baptist Church, Yangon ah ” Reaching the World Bible College-te in Doctor of Divinity (D.D.) degree pia uh hi. Nakpi-in angtanpih hang, ci-in suaksak hi.

Kei pen Tedim Zomite Zolai pupi cihtak ding mah ka hi hiam, Cope bang cihtak zaw lo ding hiam! ci-in kei le kei ka kingaihsun dedu hi. Ka ngaihsun kik a Cope pen Sangmangpa cihna ngah khin ahimanin kum 34 tak ka sepna hong pahtawina hi’nteh ci-in, “Hm” ci-in ka lungsim ka ngahiat lel hi.

Khatvei ka khuadak kik a, kei pilna hang hi lo-a Pasian hong tawisangna hanga mite in Zolai pupi hong cih buangin Zolai vai-a ka ngaihsutna mite haksasak namte lai beekin hawmkhia leng , ka ci hi. Tua hi-a Zolai puahzia cih thulu tawh tawm kong gelhkhia hi. A lunglut khempeuh in hong kum ciat dih un. Zolai mal i zatzia ding kikum dih ni…

Zolai malgawmzia i puahsan laitak hi a.hoihtaka i puah theih leh i tu i tate gou hoihpi khat a guan I suak ding hi.Amau puahpuah nawn loin zang ta ding uh hi. Laimal i puah ciangin a phawkhuai khat: A kitheihkhialh kei ding leh a tom theithei a puah ding hoihpen hi. gt. Saklam Zomite in mikangte in LORD ci-a a gelh uh Tangtawn Toupa ci-in gelh deudau uh hi. A khiatna pen “JAH” cihna hi a Kawlgam Zomite in bel TOPA ci ziau-in mikangte aa tawh kikim hi. Hih pen Telhak a sa ding tuhuna upasate bek hi a,tuzawh kum 10 ciang khawngin om nawn lo ding uh hi. Khangnote in zongsang pah ding uh a zatnuam sap ah lel ding uh hi.

Zolaimal khat in khiatna khat bek nei lo-a a aw zui-in 3 pan giat dong bang a nei om hi.Tuate khempeuh a aw zui-in Kawllai bangin ciamtehna bawl ni cileng Zomite zat ding Computer tuam bawl kul ding hi. Tua ahi manin leitung buppi a kizang taang Roman laimal zanga Zokammalte a tel thei pena i gelh theih ding mah a hoihpen hi dingin ka ngaihsun hi. Hih a nuai-a “t+u” bekbek in khiatna bangzah nei-a a khiatna zui-in puah ding hileng a aw bangci puah ding i hiam?

Tu =(now), A hun genna.
Tu =(grand child) Tate’ tate.
Tu = (shelves) Buhkung a tang om nawn lote.
Tu = (sit down) Ding lo.
Tu = (sugar cane) Kawlgam piana kingah tu..
Tu = (hoe) Lo khawhna-a kizang tu.
Tu = (sheep) Kheli nei ganhing nam khat (tuu)
Tu = (landed) Vanleng tualah vanleng tu.
Tu = ( ) Akpi in zusa tu.
Tu = (forest) Mualtung singtamna munte

Hih a tunga teng lakah Cope in tuu (sheep) laimal tuam a a gelh ciangin adangte tawh telkhialh nading om nawn lo hi.Adang teng amal tuamin bangci bawl ding. Amal tuama i bawl sangin a thu i gelhna ah a kitel theithei dinga gelh ding hoihpen ding hi.

Zolai gelhzia a puah nuam tampi in Kawlai bangin a aw suahin puah sawm hi. Zolai mal dingin Kawllai mal kizang leh gen kul loin kiphuah thei pah ding hi. Ahi zongin Zolai mal dingin Roman laimal i zat laisiah Kawllai bangin a aw suah zui-in kigelh thei lo ding hi. Mi khat in ama awsuah tawh gelhin hoih sa mahmah taleh adang khat in ama awsuah tawh sim thei tuan lo ding hi. Ahang pen mual khat in hong hal leh i awsuah kilamdang pah hi.Hih Roman laimal tawh a awsuah kibawl thei hileh mikangte in zong na bawl kha ding uh hi.Tua hi-a mikangte in zong aw a suaksak (vowel) laimal le laimung (consonant) tawh a lai uh na bawl uh a leitung buppi in kizang thei hi. Mikang lai ah zong a aw a suak lo laimal tampi kizanga a khiatna kithei pah lianlian hi. Mikangte laimal a aw tuamtuamin kisim taleh amal in a khiatna a neih bangin Zolaimal zong a aw a tuamtuamin ging taleh a khiatna i theih kim ding thupizaw hi.

Tua mah bangin ei zong Roman laimal i zat nungsang mikangte puahzia mah a i puah ding hoih pen dingin ka um hi.Cope in “inn”(house) i tenna inn pen “n” nih na zang a tel khial nading om lo hi. “tu” ganhing pen (sheep) “tuu” ci-in ‘u” nih na zanga tel khialh nading om lo hi. Tuate bangin ei zong laimal tuam nei a khiatna kitel pah lianlian honkhat nei leng Zolai hoihna hipah ding hi.Hih a nuai-a laimal 113 teng mal khat in khiatna khat a nei pah lianlian hi. Tua lo laimal khempeuh a thu tawh kizui-a a tel thei dinga gualsiam kul ding hi.Nang na theih beh lai om hiam?

Lawm Zolai itpa aw, na tutna muna Zolai hoih kei ci-a na gengen sangin a kibawlsate sanga hoihzaw ding na theih tel taktakte kikumkhawm dih ni.. Na upmawh bek hong gen kei in. Tu hun kikupkhawm hun hi dinga kipsak khinin Computer ah guang khin leng ei laimal hi ta ding hi. Hih sungate a hoihzaw ahi zongin hih sunga kihel nai lo a hoih ahi zongin na theih leh a nuai-a email ah hong theisak in.

TD: Hi thei hileh Cope in Zolai mal gawmna sunga kizang lo laimalte a cih: f, j, q, r, x, y tawh puah loin tu-a i zatzatsate tawh puah ding sawm masa dih ni. Hih laimal teng pen Mikang lai pana Zolai i suahsak pahte bek ah zang ni. gt. January, Radio adt.

1 aa ( his ) Ama neihsa genna
2 aam ( jealous ) Deihsakluatna.
3 baak ( bat )-min- Zana gamta ganhing nawi nei.
4 beek ( at least )Hawmthawh genna. gt.Tawmkha beek.
5 beel ( pot ) -min- An huanna beelte
6 belengh ( ) Van behlapna
7 bengh ( opium ) -min- A kikham thei lopa nai nam khat
8 bongh ( weevil ) -min- An ne lung namkhat.
9 buuk ( hubble-bubble pipe )-min- Tuibuuk teepna
10 ciing ( cane )-tatna- gam khaugui to mahmah nam khat.
11 Cingh (generous) -zialak- Migi a neihsate mi piapia nuam.
12 Cinghpi( rhinoceros)- min- Ganhing lianpi, a nakcianga kip o.
13 Daang ( pale )-zialak- Si tawma daang ngote
14 deek ( back side of head ) -min- lutang nunglam
15 diik ( inhale ) – tatna- Nak sunga huih lutsak
16 diit ( skim ) -tatna- A paa dikdekin metkhia
17 dungh ( not ripe ) -zialak- Mai a san nai lo a eng laite (g. mai san nai lote)
18 eek ( dung or stool ) -min- Taw a paikhia a patkhiate
19 eel ( part of the back ) -min- Sibin aihkeh awdon.
20 eeng ( envy ) -tatna – Mii neihsa deihgawh.
21 Gaam (fine) -tatna- Liau sum piasak.
22 gamh ( heir ) -min- A neite innkuan sigma khin a, a tanau kinaipih khatin a luahte.
23 gamhtat ( force ) -min- Thatanghat suanga bangmah khualo-a gamta.
24 geel ( arrange or plan ) -tatna- Sepzia ding geel.
25 giit ( draw line ) – tatna- Lailam giit
26 gongh ( throat ) – min- I gawl mailam teng.
27 gou ( inherit ) -min- Dam sunga neih vangilte, tate in inn tawh a luahkhawm tohtohte.
28 haa ( solidify ) -zialak- A tui om lo ahaa
29 heek ( twist ) -tatna- Khauzang nih aihkeh thum hualkhawm
30 hkheng ( adhere ) -zialak- Malh lo, sip bekbak.
31 hlawm ( working cooperative ) -min- Na sem khawm dinga kilawmte.
32 hli ( scales appear ) -min- A vun khek, gt. the aihkeh gul.
33 hmei ( concubine ) -min- Zipi bana neihthuah zite
34 hngal ( boar or wild pig ) -min- Gam sung vok.
35 hngan ( poisonous snake ) -min- Gupha mahmah gul neu namkhat.
36 hongh ( miss habit ) -min-A neksate duh kik.
37 hsel (to kill trees by girdling) -tatna- Singkung kimkot satgeek in kungkeusa
38 htel ( lope side ) -zialak- Maam lo lengh
39 hteng ( stagnant ) -zialak- Zu khum lo, lehthuk.
40 huu ( breath ) -min- Diksuk diktoh huihte
41 huup ( sucking ) -tatna- Kam sungah huu tawh tawpto
42 iik ( side of the body ) -min- Pumpi pang tuak teng.
43 iip ( ) -tatna- A paikhiat ding deih lo-a khaktan
44 inn ( house ) -min- Tenna inn
45 kaat ( sulphur )-min- Thauvui laka kihel zatui nam khat
46 keek ( lightning ) -min- Van gin cianga meikuang piangte
47 keel ( goat ) -min- Kheli nei ganhing a ki a nunglama awn.
48 khaa ( bitter ) -zialak- Khum lo, thuk lo, al lo, lim lo.
49 khaal ( groin ) -min- Phei le gilpi kimatna teng
50 khaang ( crack ) -min- Kitam, bit lo.
51 khaat ( masculine an old ) -zialak- A kum cing a tangtat peuhmah. Sai khaat
52 kheel ( upper part of tight ) -min- Phei bullam teng.
53 Khiim (lull) -tatna- Ihmu dinga awi, khua phawk lo ding daisak.
54 Khuul (grave, cave) -min- Misi phum nadinga a kito kuavang..
55 kungh ( blunt ) -zialak- Hiam nawn lo mawl ta.
56 laa ( donkey ) -min-Sakol bilgol nei tawh kibangte
57 laan ( flag ) Br.-min- Pawl ciamtehna dialkhai.
58 laii ( navel ) -min- Lamh gui pona mun.
59 lamh ( placenta ) -min- Nau suah cianga a nungzui pen.
60 lee ( scented plant) -min- A nam nei lopa nam khat,
61 leen ( net ) -min- Ngasa mat nadingin kiphante
62 leeng ( cart) -min- Pei nei-a kibawl set kithuah lo kisawnte
63 leii (tongue) -min- Kam sunga a tang thei na I liahna pen
64 lii ( ) -min- Lolai-a kituh loa pomawkte
65 liik ( full moon ) -zialak- Khapi a benkim ciang.
66 liit ( water leech ) -min- Lui sunga om ganhing, vot tawh kibang.
67 lingh ( ) -zialak- Mam lo kawi thilhthelh(gt. akmul)
68 luaii ( cradle ) -min- Luai nadinga khau kivawh, a kikhaite.
69 meet ( profit ) -zialak- Sum lo, sumpi tung pana ngahbeh
70 meii ( cloud ) -min- Vana tui malneu kaiite.
71 mii ( young louse ) -zialak- Hik, khah a neulaite
72 miim ( a kind of winter crop) -min- Ankung nam khat.
73 neel ( cuddle ) -min- Taw pana dawkkhia ngoi.
74 ngonghtat ( violent ) -zialak- Thukhual loa-a gamta gawp.
75 Ni ( Sun ) -min- Tunga Ni pen – a patna N gol leh
76 niin ( menstruation ) -min- Numeite khasim niin pen
77 nongh ( ticket ) – min- Sing le khaugui kithuah gamlak
78 paii ( conceived ) -tatna- Nau nei, gai.
79 pheek ( mat ) -min- Phah ding ciing aihkeh nang kiphan
80 phiit ( whistle ) -min- Huu tawh kimutging namte.
81 phuii ( incantation ) -min- Dawi thoih cianga kisam kammal
82 phuu ( revenged ) -tatna- Luang tanga luang la
83 pii ( lead or guide ) -tatna- Makaih, va puak, aihkeh va la.
84 saak ( sort of taboo ) -min- Lipkhaphuai zek.
85 saal ( barn ) -min- Van tampi mun khat a koihna
86 sangh ( glean ) -zialak- An lak khita kimusiate.
87 siik ( iron ) Leisung a piang a sak mahmah tu le hei dinga kiseek.
88 siim (a kind of insect worm like ) -min- Savun meu peuh a ne lung.
89 siing ( ginger) -min- Leisunga pinei a thak, kisial nek thei.
90 siip ( crown of the head ) -zialak- Luguh kituah nunungpenna mun teng.
91 soo ( spike trap ) -min- A zuma kisui a sun dinga kisiah thang.
92 sungh ( father-inlaw ) =min- Zite nu le pate
93 suul ( womb, uterus )-min- Anute sunga naubu.
94 taa(possession) -min- Amau neihsa genna
95 taal ( stretcher ) -min- Cinate aihkeh misite zawnna.
96 taam ( forest ) -min- Mualdawn sing tampi pona tulak zong kici.
97 taat ( a kind of tree ) -min- Singkung a gah ankam pak mel nei
98 tangh ( chicken pox ) -min- Vun natna nam khat.
99 tanh ( share ) -min- Ei aituam dinga i neihte.
100 tee ( glittering ) -zialak-Mitte leng thei.
101 teem ( shrivel ) -zialak- Guh tungah vun bek belh, sa dim lo.
102 thaam ( python ) -min- Gulpi gu nei lo nam khat
103 tongh ( cubic ) -min- Kiu le khutme lai dawn kikal.
104 tuu ( sheep ) -min- Ganhing keel tawh kiveivalak a migi.
105 tuuk( a kind of bamboo) -min- Asung bing guan am khat
106 tuum( a kind of palm ) -min- Sawtpi hing nisuh nam.
107 tuun ( mother-poet ) -min- Lakam nu cihna
108 uuk ( hobby ) -min- Sep ding utpenna
109 vaam ( radiant ) -zialak- Tangpha mahmah lelaa.
110 veel ( scrutinized ) -tatna- Sitel, veelcian.
111 zaang ( loss ) -min- Ngah kha lo,Nuak le awk a zaang.
112 zeek ( distribute ) -tatna -A kisapna zui-a pia.
113 zonghzaw ( sluggard ) -min- Bangmah sem nuam lo thadah, guhzaw


Hih a tunga laimal 113 te banah laimal dangte tawh i gelhkhawm cianga a kitelkhial thei pawlkhat mal tuam neisakin mal khat khiatna khat neisak ding theihbeh na neih leh hong theisak in. Zolai mal kicingtakin puah thei leng Mikang lai zahin hoih pah ding hi.

Zolai pen a aw tuam nei dingin bawl ta kei leng a thu luanzia (contect) tawh kizui-in thuah siam peuh leng kitel hi. A khiatna nei dingin sim peuh leng theih lah ding om lo a, a khel theithei in sim leng lah a hoih khat beek om lo hi.

Zolai na sim ciangin a Zolai mahmah itna lungsim tawh sim inla, a khiatna bang hiam cih na tel theih nadingin sim in. Zolai na gelh ciangin nang bek in na tel dingin gelh kei inla, midangte tel theih dingin gelh in.

Zolai pen leitung bupa kizang Mikang lai zahin hoih a i lakam bang mikangte aa sanga i tungnunzawkna ahi hi. I zatsate banah laimal khelkhel ta kei leeng phazo ka cih hi napi mi tampi in Zolai puah ding hong gengen ciangin kul sa lopipi in kong geelkhiat hi ei. Topa’n Zolai thupha pia hen ou!

Hih teng khit ciangin kikup tuak tampite a banbanin kikum toto lai ni.

Zolai itpa,
Dr. H. Gin En Cin
 


Comments




Leave a Reply