WWW.TUNGZANGNEWS.COM

 
                                                                                                      Singapore ah Zomi Nam Ni

Sia Piang in, "... Penglam in Zomi Nam Ni laplo ahih hang ei Singapore a om Zomi khempeuh in tu nitak nai 8 pan nai 10 i zat ding lap sawm tek ni..." ciin hong to khol ahih manin laploh ding lau in nitak ann ka ne daidai hi...

Biakinn ka tun ciang Zomi lia leh taang, nu leh pa, a lian a neu kuamah peuh minam puan silh in na kileh ziahziah a, kei zong ka lut phei suakpah hi. Vaidawn Zolia hoih nonote in hong na dawn pah in "Zomi Nam Ni thupha" ciin ka khut hong len uh a, vaimimciim leh niangtui hong lui pah in anne khin phet cilo in ka hawp pah liahliah hi. I khanna ann himawk ahih manin 'gilpi leh sakhau' mah ciin a kinolh theilo himawk hi. Lung lah tai, a kihel peuhmah etlawm, mite lah lawp ahih manin kipat hun ding bekbek kingaklah ta hi. Zopuan vive tawh kizem i muh ciang Yangon University ah Zopuan a design lai khawng uh i lungsim in phawk velval hi!

Ka vaimim nek kawm in ka kim ka pam ka khuadak leh ka gei ah a thacing mahmah numei khat na tu a, melhoih sa pian, lah kua hiam cih theilo, lah hopih pak ngamlo; kua hiding hiam ciin ka etphat kikkik leh ka muh ngeite na hilo a, ka dot pak ding lah makaite omlo ahih manin upmawh nei kawmkawm in ka hopih theih dan ding ka ngaihsun a, ahi zongin a piangthei tuan kei hi. Vaimim hawp khin masasa biakinn sung lut ahih manin ka zawh ma in ka kianga teng na dingto khin  uh a, kei zong makaipi lui tawh ka dingkhia khawm uh hi.

Biakinn sung ka lut ciang Zolia te Vaphual singgah bawm mahmah na bangin na pak ziaizuai uh a, a sam tee zialzial uh tawh, a Zonik leh Zopuan uh etlawm salua in ka khuadak lua kha dek liang hi. Ahi zongin ka tangval nawnloh lam bel ka mangngilh kei hi!

Zomi Innkuan Singapore pastor Sia Piang (Rev. Nang Sawm Piang) kiangah, "Na geia tute kuate hiam, i lasa siamte hiam?" ciin ka dot leh "Hong pai o, hong kimusak ning ei, ....Siamah Cingsan, a lawmpa Sia Thangneu...." "Aw, lasiam Cingsan! Aw, himaw, i mang bang liang e, nang tawh kimu kha ngei dingin kilamen kaang. Lungdam peuhmah ung ei, tuni nong kihel theih uh, Singapore nong zin theih uh..." ka ci samsam a, "Noh om peuh le uh cin, 'Phuitong Heisok pakte san silsial' ding hi, singapore ah zong" ciin ka lungdamna thu leh ka phawk mahmah mana ka pahtawinopna ka pulak hi. Lasiam Lia Cingsan leh Tg. Pauno (tun Lengtong Pauno) peuhmah pen a min uh i neutung pan i theih hi a, Sunday School ah a kisin khalo bek ahi hi. Kiza mun lua, kitheilua, ahih hang a mi taktak kimu ngei nailo. [Ka phawk kik khat bel, mi minthangte pen u, nau, pu, sia kicici manlo amau min tektek tawh kilo tamzaw ahih manin 'lasiam Cingsan maw' ka cih khak demdam zong kamsiamlo hong sak ding nangawn a phawk manlo ka hi tazen hi. Zongeina a theilo, a zang nawnlo hong sa sam ken cia, mate!]

Hun geelna i et leh min kigualsuk tam pian. Hunciam lah 'cingta' ahih hang hun 'kipan nailo'! Ziakai cih pen a kihih baih mahmah, ahih hang ggeina dinga a deihhuailo pen hi, Time Machine (by HG Wells) lah a taktak in kibawl nailo mawk ahih cianga maw.

Ahi zong hun hong kipan taktakta, 'I Topa itna tawh nang kong muak hi' cih la sa in mi khempeuh khutbeng ziahziah, kim leh kianga te tawh kikhutlet, kinuihsan, kimaitai, thupha kipia, kivak kawikawi in lasak a bei ciang eima tutna mun ciat ah kitu kik hi.

Lasiam Khaipi (Banzaal) in "Kua eng tuan ding ihi hiam?" ciin mipi hong phawng ziahziah a, Zomi zong mi tawh kim dinga Sian in hong siam mah hi a, kuamah i eng tuan ding omlo mah hi cih hong phawk zuaizuai hi. Zomi te in kuamah englo a i kalsuan hun ding zong hong musak a, kuamah i enloh nadingin mi neih bang i neih kul, mi zat bang i zat kul, mi hih bang i hih kul cih hong phawksak hi. Tua lam manawh in Zomi khempeuh i taai a, zong i taihat mahmah hi. I kung zong i tung hak kei ding hi. Khawllo, tawpsanlo, dinkhawllo a i pai den ding a thupi pen ahi hi.

Lasiam Cingsan pasal John Thangneu in, "Nihgel Itna" cih la tawh hong hawt kik ziahziah a, khutbenglo a ki om nawnlo himai hi. Nuam deuhdeuh, mipi lah lawp deuhdeuh, ngaklah mahmahte zong hong nai deuhdeuh! Zomi te tangthu sungah a mang ngei nawnlo ding lasiam Cingsan leh Pauno te lungsim ah hong kilang zuaizuai a, tuni in Cingsan bek hong om thei ciin ka lungsim tawng ah ka hawm hiauhuau hi. Ahi zongin a lasak ding ka ngaklah a, a aw ka za nuam a, Aizawl a ka pa Suan Za Thang bangin a damlai in, "Cingsan aw bel a hi hiauhuau khat hi" ciin siam a sak luatna thu a gen den khat hi.

"Zogam thupha" cih la tawh mipi te hong awih hiauhiau ciang daidide in ki om masa a, ahi zongin i sunga lawpna kisepcip theilo ahih manin mipi in khut kibeng kik ziahziah hi. Amah lasiam Cingsan zahtakna leh a lasiam thupi sakna tawh mipi lungsim hong zo mahmah a, nuam kisa, kisuakta, kisakpih ziahziah hi. Inn ka tun ciang ka angkawi ngaihno Cingpi bangin ka iPhone4S tawh ka lak video en a, "Nang zong la va sa gawp nai ve maw" hong ci liang hi. Ahihloh a, i neu tung pan i ngak tuni a mel kimu pan, a lasak 'LIVE' in kiza kha pan hiven!!

A ban ah lasiam Thawn Kham in "Zogam Aw" cih la tawh hong zop tak ciang bel mi khempeuh kuamah kidekzo om nawnlo, biakinn sungah kisakpih ziahziah, eima hih theih tek tawh kidiangkhia hita hi. Pa Mang Lian Thang in a namsau tawh hong lam khia a, Pa Pau Khan Khup in a Liando Thangho lamkhuang hong beng in, makaipi pan kipan Zolia, Zotaang te a tu om nawnlo in lamgui a kisai hita mai hi. Lasiam Thawn Kham in zong tua banga a lasak a kisakpih, a kilampih a tam muh mahmah ding uphuailo hi.

Tua manin tu nitak in Zomi hih thupi a, nuam a, kilawp a, hun bei theikei leh kici hi.

Ahi zongin hun leh nai in hong ngaklo ahih manin zan nai 11 a cin tak ciang bel aam mahmah taleng biakinn kongpi kikhak ding hita ahih manin, "Mai kum ciang Zomi Nam Ni ah kimu kik ni maw" ciin utlo pipi in MANGPHA ka kikhak phot uh hi. Inn ka tun ciang ka video lak khempeuh ka zi in en a, "Nang zong lasiamte tawh va lam khawm nai ve maw" hong ci a, "he" ka ci hi. Nuam kisa, ki aam ciat hi. Kum khat khatvei bek hong tung himawk hiven maw!

"Zomi leh... " cih thugenna limci mahmah ZIS makaipipa Pu Hang Khan Lian in a gen khit ciangin Pasian kiangah Zomi te adingin mipi in thungetna kinei a, Sia Khampi' in Topa Thupha Piakna tawh hunte hong hialbawlta hi. Group photo kilak sungin anuaia la hong kikhah a, lungsim ah thaksuak den hi:

I Zogam Sian in hong tawisang a,

Zomi mipil misiamte hong pia a,

A hoihna damtui bang hong luan a,

Topa hoihna Zomi'n pak bang tawita.

Maikum 2013, February 20 ni ciang kimu kik ni.

Mangpha!

Hau Za Cin

Phuitong Liim

www.hauzacin.blogspot.com

 


Comments




Leave a Reply

    Tungzang News

    All