WWW.TUNGZANGNEWS.COM

 
India gam New Delhi khuapi UNHCR pansan a gam thumna paitheihna ding ngak a om, Zomi gambel (Refugee) pawl khat pen UNHCR malakna leh India kumpi panpihnate muanna kinei zo nawn lo ahih manin, April 2012 kha kipat lam akipan gam thumna lam zuan nawn loin,Inn lam zuanin, a ciahciah ki omta cih thukiza hi. Tua bang a inn lam a kiciahna ahang bulpite pen nidang in UNHCR zumpite ah a kisam laikung, laidalte lakna leh panpih ngetnate ah baih zaw deuh a, tu lamlam ciangin ki thudonsak nawn het lo ci-in, New Delhi a om Zomi gambelte in gen uh hi.

Abeisa 2010 kum akipan UNHCR te nasep zia pen kimuangzo nawn loin, tukum 2012 ciangin lametna tawm semsem ahih manin, inn lam a kiciahciah ta hi ci in gen uh hi. Adiakdiak in Foreign Registration Office (FRO) vai tawh kisai nidang in, suaktatak kibawlthei a, tuciang in bang mahmah kibawlthei nawn lo zah dongin haksa ta ci-in New Delhi , UNHCR zumpi ah a siau ngiat Zomi khatin gen hi.

Tua bang haksatna a phukha Zomi khat in agenna ah, “ Zan halin, FRO zum ka pai le nang kua mi hong ci in, Burma( Myanmar) kacih leh nui hiuhiau kawm sa-in," UNHCR zumpi pai in" hong ci ziau in, tualai ka pai kik le FRO zum a paikik in hong ci leuleu in, bawlung bet bangin hong lop tuak mawk uh hi " ci in Zomipa in gen hi. Tua manin Burma mi peuh mah hong tuam bawl deuh hi leh kilawm kasa hi ci in genbeh lai hi. Pawlkhat te leuleu pen, UNHCR pan na file hong tungnai lo hi, cih san lel in, a vaite uh dawnsak nawnlo lel uh hi. FRO lai om kei leh, kuamah, India gam pan, kipaikhiathei nawnlo ahih manin, tua hangin Zomi refugee te kilungkia mahmah ci hi.

Tua bek tham loin, abeisa kum 2010 akipan kum (18) tungsiah UN Card tawisa Refugee khempeuh huhna bang mah pia nawn lo ci hi. Bang hang a pia nawn lo cih thu gencianna om loin khaktan bikbek uh hi. Sum / huhna pia nawn loin,Refugee te haksatna lian semsem a, annek tuidawn haksa lua ahih manin, adiakdiak naupangte bang Vitamin kisam in cidamlo tampi om ta ci hi.

Tua ahih manin tukha April kha akipan tuni ciangciang a ciah khin vekpi (20) val kipha ta in, tua akiciahna ahang zong UNHCR zum lamte in awlmawh lo lailai ci hi. UNHCR in Public Meeting kisam a, UN Chief Commissioner in a genna ah a lo theilo a, natna nam tuam deuh leh a hithei mahmah lote bek, gamthumna kipaisak ding hi ci-in gen uh hi.  Tua bang a gam thumna paina ding tawh kisai in bang mah hihtheihna khat zong om nawnlo ahih manin, lamet bei a kiciahsawm tam mahmah ta cih kiza hi. Pawl khatte in Malaysia lam manawh sawm uh cih zong kiza hi. New Delhi ah Kawlgam mi refugee om zah vekpi pen (10500) val bang om a, tua lakah Zomi (Tedim kampau) 1500 bang om dingin, kilamen hi.

TZN: Source : Pu Min Thang ( Tongsan Reporter, New Delhi)

 


Comments




Leave a Reply

    Tungzang News

    All