WWW.TUNGZANGNEWS.COM

 
England gam London khuapi a om Kawlte phungzi sang minthang khat ahi " Tattamah Zanti phongyi sangpi " in kum sim aneih uh a (11) veina Kawl ngeina tuibuihpawi (kum khen pawi) pen April 14,2012 (Saturday) ni-in, London khuapi Innpi (Ealing Hall) ah thupitak kibawlin mipi 1000 val kihel thei ci hi. Tua Phungzi Sangte in Kawl kumthak ( Tuibuah pawi) hun sungah pahtawi huai mi thupite kumsim in pahtawina thupitak nei zel uh hi. Abeisa hunin suahtakna lam tawh kisai pahtawina kipia in, tukum ading in kilemna lam asem mite pahtawina piak dingin President U Thein Sein teelkhia cih kiza hi.

U Thein Sein in Kawlgam President hong ngah akipan Thau tawi mualtungmi (Ethnic groups) te le Daw Aung San Suh Kyi tawh kipawlkhawm in, gam sungah daihna le kilemna om theihna ding lunggulhna tawhnasiatak ahanciamna hangin, hih bang pahtawina kipia ahi hi ci-in, London khaupi a om Tattamah Zanti Phungzi Sang pan Phungzi makai khat ahi U Auh Tarah in BBC News te kiangah genkhia hi. Kawlgam ah President sem khempeuh lakah Kilemna lam Pahtawina ( Peace Award ) a ngah pen U Thein Sein bek mah hi dingin kilamen hi.

Tua banah Thein Sein kumpi in Kawlgam sungah mualmi thau tawi tuamtuamte tawh kilemna ( Ceasefire) abawl zawh hangin,  Kachin State ah kidona tuni dong khawl zo nai lo hi. A hi zongin a mau deih bang danin, thakhat thu tawh kilemna a om zawhloh hangin, Thauvui thautang le thatang hatna suang lo a, kilemna om zawhna dingin President U Thein Sein in hong hanciam zawh semsemna ding deihna lianpi tawh hih bang Pahtawina kipia hi ci in, Phungzi sangpi ah thunei uliante in genbeh uh hi.

President U Thein Sein pahtawina akipiakna ding tawh kisai Zaksakna lai zong England gam London khuapi a om Kawlgam Sikzum (Myanmar Embassy) panin kipuak in, a lai tungah President Thein Sein min mah kigelh ngiat ci hi. Tua bek tham loin, Tattamah Zanti Phongyi Sang te' makaihna tawh kibawl tua Kawlngeina tuibuah pawi ah England gam a om Kawlgam Sikzum Vaisaipi (Ambassador) pa zong lawp takin kihelthei ci hi.

TZN: Source: BBC,News
Translated: Pa Kham Khan Suan (Tongsan Translator)


 


Comments




Leave a Reply

    Tungzang News

    All