WWW.TUNGZANGNEWS.COM

 
Picture

Syria kumpi Mr. Barshar al-Assad in amah lang pang pawlte omna khuapi te le adiakdiak Homs khuapi ah gialpikia bangin bomb tang kia ziahziah hi. Tuni February 24,2012 dong mah nisim in tawlnga loin, thangpaih bawlna tawh sual ziahziah lai ahih manin, leitungbup ah thuthang lianpi khat suakin, UNO le leitung gam thahat tuamtuam in zong kilunghimawhpih mahmah ta hi.

Tua bangin nasiatak a kido/kikapna phualpi khat ahi Homs Khuapi sungah bang mah theilo naupang te leh naungek tampi sihlawh hi. Hih naupangte asuahtakna ding akihanciam hangin, kidona khawl hun omlo mawk ahih manin, Siavuante akipan mipite in a hanciam uh hangin thaupi ging lakah baih loin, haksatna tampi tuak uh hi. Mimal 13 apha innkuan khat bang a vekpi un sikhin zen uh ci-in Media te in pulak hi.

A pumpi phel khat anasia liam kum nih bek apha pan naupangno khat akem Siavuan(Doctor)pa'n tua naupangno kawk kawmsa'n agenna thu in,'Tulaitak ama a ding Zato(Hospital)khat kisam mahmah ta hi. Ahihhang eite'n ama'ading bang mah ihbawlsakzo nawn kei uh hi,acih hunsung mah in tua naupangno aliamna hang tawh hong si hi.ci'n zong gen uh hi.Bomb kitapna pan athemleng te'n tua asi naupangno i pa zong atahlam khut leh aveilam akhupte liamgawp in,ataluanghawm atawi kawm leh nasiasalua ahihman'Kata aw abangci himawk na hiam? Kua te'n nang hibang a hong bawlsia uh ahiam?Ci'n khitui,naptui luang kawm sa in,genkhia hi,ci hi.Tua akibawl tawm pah zato inn i pulam ah bel,thaupi gin leh bomb tang puakkham zihziah nate hang,ginngaih mahmah in vut leh vai khu kitung keeilai hi,cih gen uh hi.

Syria kumpi galkap te'n kumpi lang pang te omna Homs khuapi tung teng kitatsatlo a thaupi tawh akapna hang'misi leh aliamte nangawn kila,kikem/kikhoi manlo liang hi. Tawm vei akhawl pak hun sungin aliam abaite honkhia uh a, zatui zaha huhna pia uh a, vanzat tuamtuamte apiaksawmna uh hang tawh, Leitung zatuilam kipawlna(International Redcross Committee) in Syria kumpite kiang ah nisim khawl hun omlo a thaupi tawh akapna pan nikhat nai nih sung akhawl nading anget hang un phalna apiak sawmlo manin, Syria kumpi lam te thukizakna(News Agency)te'n ka gam uh'ah Annek tuidawn leh zatui/zaha kitangsam acih uh zuauthu hi ci'n agen uh thamlo in tua(International Red cross)te agam sung uh luttheih nading mun teng zong khaktansak lai uh cih kiza hi.

UNO te'n kumpi Mr.Bashar al-Assad ado ding a ahanciam uh hun sung kikal ah,mipi 5,000 val bang Syria kumpi galkap te bawlsiatna leh thaknate hang sikhinding in ummawh uh a,Syria kumpi lang pang pawlte Homs khuapi ah apiang thu teng leh kumpi tawh kido/kikapna hang tawh,asi 7,000val bang aphakkhitna thute zong genlai uh hi. Souce: Tongsan/Pa Kham Khan Suan
 


Comments




Leave a Reply

    Tungzang News

    All