WWW.TUNGZANGNEWS.COM

 
Kawlgam kumpithak U Thein Sein in gamvai kipuakzia tawm khat hong laih akipan UNO, US le EU akipan leitung gam thupi tuamtuam in Kawlgam hong lunglut mahmah ciat uh a, Kawlgam ah kizopna thak a bawl nuam bang zong hong tam mahmah ta in, Kawlgam hong zin ziahziah hi.

Tua bang kawmkal pan tutung in Canada gam pualam vaisaipi- Canadian Foreign Minister Mr. John Baird zong March 7,2012 ni-in Kawlgam hong zinin Daw Aung San Suu Kyi tawh kimuhna nei bek tham loin, March 8,2012 ni-in, Canada gammi suah' pahtawina (Canadian Honarary Citizenship Award) Laipi piakna zong University Avenue Street, Yangon, Daw Aung San Suh Kyi inn phual zangah thupitak vapia thei hi. Tua lai mahah Thuthak lamsai pawlte tawh thupulakkhopna ( Press Conference) khat zong bawlpih ci hi.

Canadian Foreign Minister akhatveina Kawlgam hong pai cilna hi-in, Kawlgam mai lam kivaipuak zia mah lunglut le Democracy makai Daw Aung San Suu Kyi mahmah tawh limtak holimna nei nuam a Canada kumpi sawl ahi hi. A kimuhnopna thu bulpi pen mai April 1,2012 ni ciang a kibawl ding Kawlgam Lailut kiteelna (By-Elections)vaite a kipan mai lam Kawlgam khantohna ding deihsakna tawh Canada Kumpi in hong piak sawm uh huhna tuamtuamte tawh kisai kikupnate zong neih khawm nuam cih kiza hi. Tua banah Daw Aung San Suu Kyi tungah Canada gammi suahna Pahtawina laipi(Certificate)zong piakhia nuam uh ci hi.

Tua banah Kawlgam kikhel lam manawh cih tawh kisai-in, akikhel takpi mah hiam cih hong encik ding a hong pai ahihna tawh kizui-in, mai April 1,2012 ni akibawl ding Lailut kiteelna (By-Elections) pen leitung gambup i lametna bangin thuman/ thudik kiteelna om takpi/ takpi lo cihte tungtawn in, abeisa hun a Canada kumpi in, Kawlgam kumpi a guhgawina (Sanctions)te leh dantatna (Action) tuamtuam te angeina bang a koihsuak lai ding leh hepkhiatsak ding cih thute hangin hong zinkhia ahi hi.

Canada kumpi in ahih le abeisa 1988 lai pek akipan Kawlgam sung gamvai (Politics) leh mihing khat i ngah ding akilawm thu ( Human Rights) te peuh mah mipite in nei het lo ahihna hangin, Kawl kumpite thusim het lo le thangah vet lo ahih manin, thauvui thautang leh galvan cihte limlim Kawlgam kumpite tungah zuak lo bek tham loin, a lut khak hetlohna ding lampi tuamtuam tawh hanciamin khaktan uh ahi hi. 2007 Kawl phungzi te lungphona ahi Shwe War Young 'Lungphona tungtawn a Phungzi le mipi alomlom a thahna hangin Canada kumpi in Kawlgam a gawtna (Sanction) zong behlapto lai uh hi.

Ahih hangin Kawlgam kiteelpi (General Election-2010 ) khit gamsung mun tampi pan khantoh theihna ding lam manawh a kikhelnate hong bawl uh ciangin,Canada gam tawh Palai kizopna (Ambassador) kikoih tuah kikna nei kik uh a, kizopna hong khangto semsem ahi hi. Gam khat leh khat kikaal a kikhaktat'na leh kiguhgawina (Sanctions and Action) te akihepkhiat siang theihna dingin, gamsung vaite agenna te uh tawh kizui a akhantona te hong kilang leh hong khaupaihnate tung ah etcik lai phot dingin kithukimna nei uh ci hi.

Source: Internet

Translated: Pa Kham Khan Suan (Tongsan Translator)
 


Comments




Leave a Reply

    Tungzang News

    All