WWW.TUNGZANGNEWS.COM

 



2010 Nobel Prizes in Medicine, Physics, Chemistry

Tukum Nobel Prizes ngah dingte kipulaklak ta a, science category teng kipulak khinta hi. Adang thumte zong October 11, 2010 ciang a vekin ki pulak khinta ding hi. Leitunga pahtawina thupi akisa pen leh mite bil dawh pen ahih manin Zolai tawh tawm i gelh ding hi. I theihsa ciat mah bangin Nobel Prizes pen nam 6 ah kipia a: Physiology or Medicine, Physics, Chemistry, Literature, Peace leh Economic Sciences. Tuate pen kumsim Nobel Foundation in a piak ahi hi a, nam khat ah 10 million Swedish kronor (Sweden sum million 10, tua pen USD 1.5 million kiim pawl hi) pia cihna hi. A 6na Economic Sciences pen bel Nobel Prizes Foundation phuankhiapa Alfred Nobel phawkna hi.

1. Medicine: Robert G. Edwards, University of Cambridge, UK ah a sem laitak in "in vitro fertilization" a muhkhiat manin ngah hi. In vitro fertilization or IVF i cih pen mi nautang theih dingin Test-Tube Baby zong kici hi. Numei ci leh pasal ci lakhia in kuang sungah gawm, test tube sungah gawm, naungek keuhsak, a keuh khit ciang numei naubu ah guangkik pen hi. Hih IVF hangin nau neilo ding tampi in nau neih theih lawh a, naubu kholo, nautolh i cih tampi hunkhia hi. Tua nasep a mukhiapa tuni in Nobel Prizes in Medicine kipia hi. Hih IVFzat ding a kisam leitungbup ah nupa za ah sawm, 10% bang hi ding hi kici hi. Numei ci leh pasal ci numei naubu ah kituah theilo, kimu theilo, kituakkha ngeilo ahih ciang hih IVF kizanga, tua in olno takin nau piangsak hi. Tua zaha manpha na hoih hong mukhiapa kipahtawi hi.

1950 kiim pan a pat pen 25 July 1978 kumin "test tube baby" masa pen hong piang hi. Kum 27 sung bang lungkia hetlo in na sin to ngakngak a, a tawpna ah lawhcing hi. Lawhcing bek hilo in tua zawh mi tampi in phattuampih hi. A ki upmawhna ah tuni tanin IVF tawh naupiang pen 4 million phata dingin kituat hi.

A kipat ciil in Bilpi tawh na sin phot a, a pian tuak ciangin mihing ah na sin kik hi. Mite in a ci uh phaltak in pia in tuate tawh na semto a, lamet bang takpi in mainawt hi. Lesley leh John Brown te nupa in kum 9 sung nau neih sawm in a hanciam uh hang a neih theihloh uh ciang amau zong phaltakin a ci uh pia in, Robert G. Edwards leh a seppih Steptoe in panpih uh a, 25 July 1978 niin numei naungek melhoih mahmah Louis Brown hong piang hi. Tua naungek pian ni pan mihing cidamna lam nasepna nakpi in kilumlet in Hun Thak sungah kilut hi. 

Tuni in leitungbup ah IVF pen Hospital tampi ah baihtak in kimu ziauta a, a  lamdang hinawnlo hi. Khantohna tampi kibehlap a, pasal ciltang pan pasal ci kisutnaphim (syringe) tawh hupkhia, lakhia ziau in numei ci tawh kigawm ziauziau ta hi. Naungek zong cidam mahmah in, ngeina neih tawh kilamdanglo a, nawngkaina zong bangmah omlo hi. Nausiat cih zong omse lo ahih manin nupa pawlkhat in numei naubu kawm in amau ta pai sak a, a zi nausuak gimna pelhsak hi.

Tua bek hilo "Test Tube Baby" Ms. Louise Brown in zong ta nei khinta a, bangmah nawngkaina omvetlo hi. Tua manin Edwards nasep gah hih IVF tawh a piang naungek peuhmah a ngeina banga piang naungek tawh a kilamdanna omlo hi, cih kitel hi. Minthang semsem lai ding kici hi.

Amah, Robert G. Edwards pen 1925 kumin in Manchester, England ah piang hi. WWII sung galkap a sep khit ciang sangkah kik in nuntakna lam Biology a sin hi. A research zom toto in leitung a IVF Clinic masa pen Bourn Hall Clinic kici a lawmpa Patrick Steptoe tawh phuan uh hi. Ama nasepna hangin leitung mihing nupa tampi muk ah nuihna piangsak in, lungdam maitaina leh lametna guan kik hi. Tua nasep a thupi hi.

2. Physics: Andre Geim, University of Manchester, UK leh Konstantin Novoselov, University of Manchester, UK te in meihol thu a sinna uh pan (ci pak ni) ngah uh hi. Amau nasep pen "experiments regarding the two-dimensional material graphene" cih hi. Langnih pan graphene etna thu ci leng a kician tam maw. Hibangin ci ni. Meihol vui pen laidal banga a pan mahmah tampi a kiciang, a kithuap hi a, tua a kithuapte dawlkhat, layer khat thu a sinna uh cileng a kitel tam aw...

Tua meihol laidal banga pan cialkhat, dal khat, layer khat pen na bawlna dingin a pan pen, a to pen hi ciin mukhia uh hi. Sik sang meihol dal khat tozaw cih bel i pute kiang gen leng 'na hai man hi' hong ci nuam leh kilawm maw! Tua dal khat pan dildel pen Graphene kici hi. Pan mahmah napi, bit mahmah a, atom neupen Helium in zong pailet theilo hi. Phulsuak zolo, kitalo hi. Ngasa matna ngen ah ngasa neute a kita ziauziau hang, a liante kitalo ahih manin kiman thei hi. Tua banga ngasa neupen zong a kitalo ding ngenvang neu tawh mitkha ah bawltawm leng kitel ding hi. Carbon, ahih kei leh Zokam tawh Meihol i cih, Va-ak mel, a vom bilbel pen leitungah mipilte buaipih penpen khat na hi gige hi. A vom hang a manpha mawhlo khat na hi bilbel hi. Meihol om kei leh hih internet pan zong hih thute i kikum thei kei ding hi.

Tua hi a, meihol ne tum ziau ken la, a manphatna zong na suut kawmkawm in. :-)

Hih scientist nihte nasep, research i cih pen a haihuai mahmah tawh kibang hi. Amau pencil i cih, (pawlkhat in khedaan i cih luapluap lai), laikung pen amau laibelhna laiman tawh belh in a hawkkhiat kik khit uh ciang tua laiman tungah a belh meihol ci ni, carbon pen limlang sungah en uh in, khutpek bang, laidal banga kiphah mu uh hi. A etna uh bel mit sanga hoihzaw etna te hi ci pak ni. Hih a cialcial, a dawldawl, a layer in a om carbon pen a manphatna ding a zonzon uh ciang tulai electronics van bawlna ah kilim zat theihlua ding cih mukhia uh hi. Radio transistor bawlna khawngah kinak zat theih lua ding, tua hangin i cell phone te, i computer te tu-a zah tampi in hoihzaw ding, manlangzaw ding, hatzaw ding cih mukhia uh hi. Meihol "vom" i cih pen pan mahmah leh khuavak bangin taang, paisuak, transparent a; meisa in kang leh zong tui suaklo, kuang theilo ahih manin a manpha mahmah ding hita hi. Touch screens, solar cells, light panels cih khawngah kibawl thei ding hita hi. Buangnai, plastics tawh hel lailai lehang graphene pen meitha (electric) pua thei ahih manin a sa mahmah mun ah zong meivak khau in kizang thei ding cihna hi. Satellite, vanleng, mawtaw, i cihte hong hoih semsem, hat semsem, to semsem ding cihna hi. Khaih, khaih, khaih... nop panpan ei...

Novoselov, 36, pen Geim, 51, nuai ah the Netherlands ah Ph.D. hih hi a, kum tampi semkhawm khin uh hi. Anih un tu in University of Manchester ah Professor sem uh hi. Tua ma in Geim in Russia ah physicist na semzo hi.

3. Chemistry: Richard F. Heck, University of Delaware, Newark, DE, USA, Ei-ichi Negishi, Purdue University, West Lafayette, IN, USA, leh Akira Suzuki, Hokkaido University, Sapporo, Japan te in test tube sungah chemical zanga deih bangbang mel pua bawl theihna a muhkhiat man un ngah uh hi (great art in the test tube). A english in "for palladium-catalyzed cross couplings in organic synthesis" cih hi.

Organic Chemist te in test tube sungah chemical khat peuh gawm in a ut bangbang uh bawlkhia thei uh hi. Tua bang bawlna ah 'bangtawh bawl leng bang piang ding' cih a thulian mahmah lak ah amau Palladium (Pd) zangin a tuampi khat hong bawlkhia thei, a thak hong pankhia uh ahih manin tua pankhia hihna pahtawina ngah uh hi. Hih bang nasepna pan mihing in cidamna lam ah nakpi in hamphat lawh in, zatui, zaha kibawlkhia a, electronics leh vanzat tangzang tampi zong kingah lawh hi. Tukum Chemistry prize a ngahte pen 'chemical tools' a kici, chemical zanga na bawlna vanzat a bawl hak mahmah a mukhia te hi.

Tukum a ngahte zong carbon, meihol bulphuh a nasem te mah hi uh a, tua bang organic chemistry nasepna tawh a kimetpihte pen, pak mel tuamtuam bawlna, penicilin bawlkhiatna, gul gu zatui a zatsiamna cihte zong ahi hi. Hih meihol te kigualhdan, kilepdan, kithuap dan tuamtuam khek kawikawi in mihing ading a manpha, a hoih, a to tampi Organic Chemist te in a bawl uh ahi hi. Tua banga nasepna ah a kizang mahmah ding Pd-catalyst zatdan thak hong mukhia uh hi. Tua a muhkhiat uh tawh carbon, meihol te pen nidang sangin a omdan uh nam tamzaw in kilempha thei dinga, deihdan in zong kibawl, design thei ding hi. Molecule level ah tua bangin deihbangin lem thei mawk lehang, mihing piang ding mel zong a hoih ding, a sia ding a pianma in kibawlkhol thei mai ding hi. Hih Palladium sik tungah carbon te lepsiam mahmah ding kisam ei...

Palladium-catalyzed cross coupling pen a kizang densa, tun zong leitungbup ah research a kilim hih mahmah hinapi, amau a zatdan ding a tangzaizaw hong mukhia uh hilel hi. Tua muhthak pen sialo, hoihlua hizaw hi.

Gentehna in, Bawngsa bak khat pen pawlkhat in ciim huan, pawlkhat in hul huan, pawlkhat in kang, pawlkhat in tui huan, pawlkhat in a huan dan ding theilo in a koihkoih leh uihsak, tua a uih pen mi khat in a uihlo dingin bawlkik thei leh tua tawh akibang hi. Tua zah a manpha cihnopna hi.

Richard F. Heck pen American citizen hi a, 1931 kumin Springfield, MA, USA ah suak hi. 1954 kumin PhD, University of California Los Angeles (UCLA), CA, USA pan ngah hi. Ei-ichi Negishi, pen Japanese citizen hi a, 1935 kum in Changchun, China ah piang,  1963 kumin Ph.D., University of Pennsylvania, Philadelphia, PA, USA pan ngah. Akira Suzuki, Japanese citizen hi a, 1930 kum in Mukawa, Japan ah piang, 1959 kum in PhD ngah, tun Distinguished Professor Emeritus, Hokkaido University, Sapporo, Japan ah sem.

Thukhupna: The next Laureate could be you.

Hau Za Cin
Phuitong Liim
www.hauzacin.blogspot.com
[Ka lai at dangte ka blog pan kisimthei hi]
 


Comments

09/10/2014 00:36

Knowledge of how certain material reacts to certain things. Furthermore, the study of elements, substances, and their interaction has lead physicians to be able to make materials that enable them to make their labs and tests.

Reply
11/02/2015 10:09

I am so much excited after reading your blog. Your blog is very much innovative and much helpful for any industry as well as for person.

Reply
12/05/2015 07:53

I really like your modern stylish ideas which you have shared about manipulative. This blog provide extraordinary and exact information for which I was searching.

Reply
01/18/2016 15:11

Really dedicated blog! In summarizing style you set a great up to motivate others. Thanks much!

Reply
03/22/2016 13:55

Excellent post.I want to thank you for this informative read, I really appreciate sharing this great post. Keep up your work.

Reply
05/30/2016 13:10

Totally, the actual write-up is really the very best in that will worthwhile matter. I really fit in jointly with your results and certainly am going to keenly seem to be toward your own upcoming improvements. Just telling many thanks could not only be sufficient, for your exceptional readability as part of your composing.I'll use this information to provide term papers for my friends.

Reply
02/01/2017 21:08

itunes for windows

Reply

download 7 zip for windows 10

Reply

lucky patcher app non rooted

Reply



Leave a Reply

    Tungzang News

    All