WWW.TUNGZANGNEWS.COM

 
Bang hangin "Zo Vakhu Kop Bangin" kheset tul theilo hiam?:

Tui Buasa Kiluakkik Theilo te a tawpna ah Tedim khuamual mualtung lam zuan in a paitoh ciaiciai banga Zo Vakhup Kop Bangin te zong Pangzawl khuakhung lam ah a pai toh ciaiciai man in a tul theilo hi lo hi. Tawi kawlciangin laidip hong tan na'n leh zang huiva'n hong leng va'ng na siang zuan in, Simlei tui bang gawm lo zong, laukha van ah gawm ding.... cih banga itna kip kipiakna la tam ahih man in leh, a dang hang khat om hi ding hi, hih la en pak leeng...

Kumsawt mel a mulo, duangsuah mel kilawm no,
Nungciang hong kihei vaw kei ngaih gimsi na nam lai ei?
Tong hong dawng aw pal lianu aw

Kum zatam vang i ngai nunnuam guallai i hei lung in ngilh ta maw?
Ken lah nang ngilh maw'ng e
Vailo kuan tuanglam panga sahei pak i lawh lai te

Gel sih aw nunlai ngaih um dondon ding zong na sang senleh kia thei lo
Kei zong nunlai ngai khamkhan vei lawh ing ngaih aw
Kum kivei zong kei ding kahna

Ni khat singtang gamlei vailo ka va kuan leh va ciin ham za'ng e
Khuang luitui luangging te lah na dang tuan nailo
I lenlai hong phawng e na saang

//Sencil vang ngaih aw nunlui mualliam te
Ngilh siing e ngaih aw kumsang ki vei zong in //

Kumkhat ning nek lah tuang hong tung zel a, kei lah khattang in
Hei in nunlui ngai in naubang nuih lai ni te,
Nang lah singdang ang ah zalta

Damtui a ta limnga te zong simlei tungah len ding geel naan zong
Damtui a ta dia Sianmang laitan hi e ngaih
Sawlbang hulta mai aw ngaih aw....

Hi mah hi, ngasa te tuisunga bual dinga Pasian in a bawl hi a, leitung ah nuntak a sawm uh hangin a hi theilo thu hi. Tua manin Pasian in a gawm loh pen mihing itna bek in a pianglo thu hi mawk hi. Bangzah in ngaih gimsi nam ta leh 'sian gawm loh' pen a khasiat huai lia leh tang ki ngaihna hi....

Hih Zo vakhu kop bangin  keset sungah late a hoih dan pen a gendan ding dang lua zong om ka sa kei mai a, thu leh la kim hi ci leeng i genzo nai diam maw ka ci hi. Thu leh la gil ciik pipi kiphum ahih manin Shillong omlai pan U Sianno (tu in UPSC Delhi ah officer in omta) tawh ka favorite uh ana hi a, tu tung Delhi ah ka ban kik ciang zong ana ngaicim nailo lai hi. Tua manin a thu a thei taktak te in hih keset pen ngaicim theilo uh hi. S. Chingnu in ngaihluat man a selung sumbang ze etna hi bo e a cih leh kumsang tuipi let nan leh e.e.e.e.e.e.e.e.e...... a cih te ngaihbang ngaungau hi.

Ni khat meel muh loh zong guikhau sawt ah zam a, mel kimulo a tong kisan zong lailung muang tuam takpi hi. Tun leh zua sinthu vanga khenlo ding nih gel pen anglai naubang pomta ding nun nuam a heita ding thangvan tun dong in hi ven, tua sanga nuamzaw leitung ah om tuan ding hiam aw.

A la thu pawlkhat en suk zalzal leeng:

Lungin ngilh ding a lawmlo,
Solkha vak ah naubang i kinoh lai,

Sun in ka zal mang, zan ciang ka zal mang
Anglai ken hong pom lai ing....
Taka naubang pomlo kei ding na e

Ngaihno gimsi nam theita sing
Ngaih gimsi na nam lo zong, keidin leidi pak namtui bang
Khenlo naubang pom va solkha vah a,
Bu-al a khuan nop leh khuang hen,
Taikhua a val nop leh val hen

....tunnu khuai bang hang va?
Tunnu khuaibang han ding na khual
Kumsawt lo bang nong tulpih zo diam maw
....lelta ni, lelta ni ngaih, muikhua i zin leh aw tuibang gawm mai vai e
..naubang i ki noh nuam e...taikhua val mai vai...
taikhua val man..kei sausiang lam zuan mai vai...
...von zatam i tawi dong naubang pomcim lo ding...

...kei ka heina gam pan sinthu khuaimu hong leng
singgual tang ding sinthu kileel ta ci...
...na teh kimpih gual tawh khenlo tongciam mai ta'n
ciin sumbang na nual ing..
....sialsial tam vot aw ngaih...hanlung i ciam poh leh
nang kei a kei nanga...
Zodamtui bang gawm ding vang, kei lengthei nai sih ing
Kei dawng lai ing e..kum 2, 3 hong na ngak in...
Kei nanga din sahei pah in pah vaang

15-vei sinthu a lel zawh ciang zong ngahzo nailo ahih cianga bang hang hiam ci a a dot leh amah in singdang tunnu in ningzu tawh ei kham ta e na ci hiat lel hi.

(ut leh zoplai ding)

Hau Za Cin

Phuitong Liim

www.hauzacin.blogspot.com
 


Comments




Leave a Reply

    Tungzang News

    All