WWW.TUNGZANGNEWS.COM

 


Korea Gam le Mi te: Zomi Khat ii Muhna Pan_V
Na Hau Nuam leh Lampi Hoihtak Bawl Masa In!
Korea gam lampi

“Na hauhnop leh lampi hoihtak bawl masa in!” cih Sen te’ paunak pen Confucius influenced Korea-mi te in ciing mah mah uh hi. Lampi hoihtak bawl uh hi. Pak Chung-hee hun lai pek 1960s pan agamsung lampi hoihtak bawl ahihmanin mun khat le mun khat kikawmna baih mah mah a, khangtona manlang sak hi. Ih gen sa mah bangin Vietnam gal sim a pai te’ kiangpan mi khat ciang kha khat $ 400.00 ta cut in gamsung lampi bawlna le gamkhangtona ding nasepna te ah zangh hi. Korea gam pen tu laitak leitungah transportation hoih pen khat in kingaihsun hi. Seoul metro subway pen leitungah sau pen hi. Lei nuai pan mual tung dong ah escalator bulh hi. Seoul khuapi sung city bus system le khua pualam kikawmna te nak hoih lua hi mai hi: tu laitak a president pa Lee Myung-bak ngaihsutna le vaihawmna vi ve hi. President aseemma in Korea gam sung Mortor car company gol pen ahi Hyundai president sawtpi seem a, tua khit Seoul mayor seem in, Seoul khuapi nakpitak puah pha hi.
Traffic tamna mun lampi te ah lam laizang ah bus lampi khat bawl a, lam lai mah ah bus stop koih pah in zatnuam mah mah hi. Meileng lam zongh nuclear tha tawh electric bebek zangh in KTX acih uh bullet train te zongh 15min hal in taisak uh a, Seoul stn le Pusan stn [S. Korea sak lam le khang lam] Km 330 pen nai 3 sung bek tai hi. Kimpo vanleng tual pan minute 5 sungin vanleng 3 ta leng khia hi.

Zogam lampi

Zogam khangtona ding, hauhna ding ih deih le lampi limtak bawl masak ding ahi hi. Panglong thuciamna bawlna sungah maikai lam a kihel Zomi te’ gam pen suahtak ngah khit U Nu hun sung hong kipuah loin, Japan gal lai a, Thuamvum ah akahto Japan te’ zik motor lam mah kizangh lai hi. Zogam ih puah sang in Kawlpi le zaanggam ah hong kum suk zaw un la, Kawlpi khuapi in nei un la, Gun Khawm pen tembaw port in zangh un, Kawlgam tawh kizopna ding ci in hong suggest hi. Tua pen Zomi makai te’n “Kawlte peuhmah uk zo kei ni in, amau’ hong zo thawh zaw un teh, Zaanggam limlim deih k’hang,” ci in tai kua dong bek Zogam in la uh hi.

Aung San ii cihna ah: “Zogam mualtung pen nidang a gal na bukna uh hi in, tu’n gal veng khin a Union gam kisuak ding ahih ciang, Chin Hills pan mi khem peuh Kawlzaang ah hong tuak suk kik ta un, nidang a na tengna uh Kalay, Kabaw valley ah hong teeng kik un,” ci in Khamtung pen India tawh gamgi dalna le natural reserve ding ngaihsutna nei hi.

Ne Win’ hun ciang hong lungkimsakna in amasa pen motor car lampi thak hong zik sak hi. Tua pen Zomi te kilungdam mah mah a motor lampi thak hongna pawi ah : “Bu-chok Ni Vuan, Zingvaihawmna, Doh Bamapi, Kilbang khang hen, kilbang khanghen aw…” ci in laphuah in thupha nakpitak ih pia hi. Ne Win in Kawlgam a mi neihsa lamsa teng suttol a, tua teng Zogam khawng leh mundang ah hong hawm kawikawi nahihtuak mawk hi.

1965 kum in Sen gam makai pipa Mou Tsi Tung tawh a lawmta un, gam dang mi limlim gam sung pan hawl khia uh hi. Zogam pan ih sangmang topa, tonu te khempeuh ciah ta uh hi. Zang Kong ah buhtang nek ding om nawnlo ahihmanin pongmoh [khomun] lei ding mi nisim kigual ta uh hi. Gammi te lungkim nawn lo cih atheih ciangin, hibanga ih haksatna pen gam sunga Sen-mi te’ hang hi ci gum mawk a, Sen le Kawl kivatna piang sak hi. Galkapte civil puan silh sak in China town sim sak a, Kawlmi te lungkimlona teng Sente tungah hei pak ziau hi.

Lamkhatpan en le’ng siammah mah cih ding ahi hi. Ne Win’ siam dan pen gen le’ng gen ding tampi om ding hi a, tam gen nawn kei ni in khat gen pak lai le’ng: U Saw that pen amah mah hihtuak lel hi. U Saw in gui awk ma deuh, na gennop bang om hiam ci a kidong ciang in, “Aung San that pen kei hi lo hi ing,” ci in nui hiuhiau sa in gen ci hi. [U Saw pen Independence hun lai Kawlgam PM hi.]

Ne Win pen lam khat pan Zomi te hong it mah mah khat hi ta leuleu bilbel hi. Amah om kei le Zomi le Christian te hong gum ding om khol lo hi. Zomi te thuman hong sa a, dik hong sa hi. Revolutionary Council hun 1962-1973 Chin Uzi Zozum ah lampi puah nading le gam puahna dingin budget tampi mah hong pia a, Zo Zum a Zo Mangpa in amanna ding thei loin Ne Win kiangah sum teng puak kik niloh hi. Mi hai!!! Tua khit Ne Win Socialist BSPP hun sung buppi 1974-1988 motor lampi hoih zo tuan loin, tar road pen Kawlpi pan Taingen ciang bek mah tai 36 bek tung tazen hi.

Tu lai galkap hun ah tua ci pi hi lai. Ih khangto nuam zonghin koicih nawn ding? Lampi hoih lo hipah phot! Tamu-Gun Khawm lampi India kumpi’ hong bawlsak pen zongh ahoih, ato ding deih loin ton 70 agik thuak zo ding abawl sawm pen, phal loin ton 30 bek do dingni bawl sak zen uh hi. Kawl galkap ulian teng akikup tak uh ciang, ton 70 acih pen tank paitheina ding gelna hi ngel ding hi. Hih ‘Kala’ te’n nikhat ni ciang amau’ lam bawlsa mah tawn in tank tawh ih gam hong sim nuam hi ding hi, cih ngaihsutna solution ngah ta zen uh hi. Tu in Tamu-Gun Khawm lampi zongh kisia sia ta cih thu kiza hi. Korea galkap kumpi hun sung abawl highway lampi le lei te ton 80 do dingin bawl uh a, cik mah in kisia ngei ding hi lo hi.

Korea Gam Prostitution le Human trafficking

Lampi transportation ahioh zah khat mah in Korea gam sungah prostitution le human traffic mikizuak naseemna zongh khangto mah mah kawikawi zel hi. Prostitution pen legal ih sak le  illegal na hi gige hi. Ahizongin 2007 kum sung sex trade pan in sum lut pen $ 13 billion bang hi ding ci in Korea Women Development Institute in gen hi. Tua pen gambup GNP ii 1.6% ci hi. Nidang sangin tampitak kiam zaw ci hi. A tangthu kan le’ng: Japan gal bei zawh 1947 kum in American kumpi uk sung illegal state registered prostitution kibawl a, 1948 kum in Korean kumpi thak in law kipsakna nei hi.

1960s pan 1980s sung ih gensa Korea gam galkap ukna nuaiah economic khangto hun sungin [economic first motto] Korea kumpi in American galkap te’ ading in prostitution naseemna ah kihel uh hi. Numei kizuak te’ ading basic English class bawlsak uh a, kizuak service siam na ding le ahithei zahin G I te kiangah siam thei tawpin kizuak nading pantah in lam hilh hi. Kumpi in cidamna lai medical certificate tawi sak a, natna nei ding aki um mawh pian te palik te'n man in, zatui tawh bawl uh hi. Hi banga kumpi kihelna pen North lam te in gal asim ding launa pan a hung a dal ahi American galkap te ciah san ding uh alauman ci hi. Tulaitak American galkap 28,000 Korea ah om uh a, Korea gam in na khempeuh support uh hi.

2003 kum in Korean Institute of Criminology pan in a pulak na ah numei 260,000 pen sex industry ah nasem ci hi. Tua pen Korea-mi numei khangmoi 25 lak ah 1 rate hi. Korean Faminist Association te pulakna ah 514,000 pan 1.2 million kikal Korea-mi numei te prostitute industry ah kihel hi ci hi. 2004 kum in kumpi in anti-prostitution law neih ding phalna pass a, Korea gam sungah prostitution kham hi. Tua in illegal numei kizuak, kileina piang sak leu leu hi. Azuak te bek hi loin alei te zongh man in thong khia uh a, 2007 kum sung 2003 kum sang in alei client mi azah 2.5 khang mawk hi.

2006 kum in Ministry for Gender Equality pan in hanciamna khat kipan uh hi. Company te kiangah ministry in sum pia a, pasal naseem te company party man khit sex alei lo nading sum pia in kiciam sak liang hi. Deihna bulpi in pasal te party ah zu neek khit sex a lei zel uh ngeina culture pen kham na hi. Tu laitak office-gel ci in zum khan no ki kawm thei a, tua lai te ah numei te in inn sap in a client te hawh sak ziu mawk a, palik te in ki man zo tuan lo hi ci in nung deuh news sungah suak hi.

Korea gam sungah inn man ham mah mah ahihmanin mi atamzaw in innsap uh a, numei tampitak in inn agent [broker] official in seem uh hi. Tua inn agent te’ [Kawlkam in ‘puaisa’] zum real estate office pen Korea-kam in ‘PU TONGSAN’ ki ci a, Tongsan net Pupi tawh amin kibang hi. Laitui san lela tawh laimal golpi in gelh uh a, gamla pek pan kimu thei hi. Inn sap ding ih zong ciang tua Pu Tongsan zum te ah kipai in inn awng kiman kidawp hi. Numei te in inn khan neu khat sap ziau in a ut ut seem thei uh hi.

Human Trafficking nasia mah mah a, Southeast Asia le Russia gam, Sen gam te pan in numei tampi khem thuak in Korea atung uh ciang, prostitution seem ding in sex industry sung tung uh hi. Korea-mi employment agency [puaisa] te in mikhem siam mah mah a, nasep hoih ngah ding in khem zo mah mah uh hi. Tua bang numei te a kimat ciangin Korea kumpi in hehpih cih thadah visa phiat sak a, gam sung lutna vai tawh thukhen zum pan charge a, agam uah puakkik lai hi. Korea te vaivai zongh!

UN pan in tua thu te nakpitak pressure apiak ciangin 2004 in tua bang gimngah mi te a gupna ding law khat bawl pan uh a, tua bang gimngah victim te om na ding omna shelter zongh vaihawmsak ta hi. Hibanga mihing zuak nasepna zongh nakpitak in kumpi in suksiat ding hanciam a, mi tampi man khin uh hi. Ahihhangin numei tampi in inn sap meng meng uh a, amau private in na seem thei mawk uh hi. Tua  banah Korea-mi numei te tampi mah US ah ki exported hih tuak hi. Los Angeles palik te genna ah prostitute kiman 90% pen Korea-mi te hi a, tua khuapi sung le akim ah Korea-mi numei prostitute 8,000 bang om ding in um uh hi.

US State Department pan in report piakna khat ah a title: "Trafficking in person's report: June 2008," sungah 2008 March kha sung in AFP news  le DIAC Department of Immigration & Citizenship Ausie te kipawlin joint operation khat abawl na uah, Ausie Sydney numei kizuakna legal brothel khatah Korea-mi numei te a zuak syndicate puaisa kipawlna khat in kumkhat in $ 2.3 million sang tamzaw sum ngah uh cih mukhia uh hi. Ausie gamah nasep hoih no no ngah ding ci in khemna vi ve tawh atung uh ciang a travel document teng pia kik loin, amau neihsa Sydney khuapi sung legal brothel ah nikhat nai 20 [20 hr/ day] by force in nasem sak uh hi.

Korean National Police Agency in gamdang law enforcement agencies te tawh kipawlin mihing kizuak kilei nasep human smuggling networks te suksiat ding hanciam uh hi. Human smuggler te in numei te pen sexual exploitation ding bek in trafficking abawl uh hi ci hi. Korea-mi numeite hi bangin gamdangah a kizuak laitakin Korea gamsungah gamdang numei te prostitution nasem mi tampi om zel hi. Sen Chinese numei te tul, then tampi Korea ah kizuak uh hi. Sen numei 20,000 bangin kum sim in Korea-mi pasal te tawh kiteng uh a, tua te lak ah ¼ bang in a kitenna uh phualsel in nasem uh ci hi. Sen numei atamzaw pen  Korea ah prostitution tawh sum thalawh uh hi.

Zomi numei te hibang ki om lo ahihmanin Pasian min ih phat hi. Kawlgam sung le kim le pam ah ih sanggam minam dang te a numei te uh kizuak tampi om uh hi. Ei Zomi numei te mailamah ih character hoih limtak ih kepsiam ding thupi mah mah ding hi. Numei kizuakte pen ataktakin athadah teng ahi hi. Leitungah natna khempeuh bawl na’ng zatui om na pi, thadah natna bawl na’ng zatui om nai lo hi. Zomi te thadah natna ih ngah khak ding lauhuai mah mah hi. Kidawm in sepna peuhah hanciam ni! Pasian muang in heina peuh ah hanlungciam ni!

 **********And this Gospel of the Kingdom
 *will be preached in the whole world  as a testimony to all nations, and then the end will come. (Matthew 24:14)*********

*** Your's Sincerely ***

JOSHUA  THANG ( MISSIONARY )
# 333-5 (M-10 ) MAESAI P.O(Box-54),

ChiangRai-District (571 30 )  ,THAILAND :
-------------------------------------------------------
Mobile No.{82-10-2271-9191= KOREA }
Mobile No.{66-860 457 385 =Thailand }
Office Phone :{ 66-53-732871 =Thailand }
http://Nanumwm.Onmam.Com
Internet Phone My LG-( 070-8283 3386 )
 


Comments




Leave a Reply

    Tungzang News

    All