WWW.TUNGZANGNEWS.COM

 
Florida Zomi Innkuan President Term (3) asem Pu Thang Do Hang tawh holimna

Dotna:      Na min, na nu leh pa, u nau bang zah cih leh na khua uh koi lai cihte nong gen thei dia?
Dawnna:  Ka min pen Thang Do Hang ( Hangpi ) hi. Ka Pa Kham Cin Kap ( 99 in ong nusia) ka nu pen Nu Ngai Hau Cing, unau vekpi 10 pha, a u pen numei leh a tum pen pasal in ong sih sanin, numei 6 leh pasal 2 nungta lai in, kei pen pasal lam pan a nihna, ka khua uh pen Tungzang hi in Tedim pan tai 18( 18
miles) pha.

Dotna:      Pilna laitan bang zah ciang zo khin na hia?
Dawnna:  Mandalay University ah B.A(Hons.) M.A(English) na zo thei ing.

Dotna:      Florida Zomi Innkuan kipawlna leh nang bangci bangin kizom kha thei na hiam?
Dawnna:  America ka tun zawh ciang eimi minam vei pawlkhat kikhai khawm in Florida Miami Beach a, Sia Thawng Lian Khup-te’ inn ah 2000 Easter Sunday ni(April 23) in na kiphuan khia. Kei pen tua laitak,Florida lam pan Virginia ah ka pai laitak. 2000 Thanksgiving tak ciang Miami Lakes ah Pa Sian Ngen Kamte’ inn ah, kitel kikna nei uh in thukhun pawlkhat zong bawl uh. Tua zawh a sawt lo in Virginia pan Florida lamah pai kik in, hih kipawlna ah na lut ing.

Dotna:      Makai dinmun bang teng, bang kumte in na seem kha hiam?
Dawnna:  2001 June kha pawlin sushi sai thak khat ngah in, North Miami veeng hausa in ong kikoih ciang, damdam in a kihel to suak ing. 2001 Thanksgiving ni in Kendall-a Pa Tuang Khan Nangte’ inn ah inn honpawi leh Khuado pawi ah kiteelna a kineih ciang, kei pen Secretary dingin ong kiteel. 2002 Thanksgiving  ciang kiteelna ah Secretary dingin ong kiteel leuleu, 2003 kiteelna ah zong Secretary mah in ong kiteel leuleu a, thumvei a seem kha suak ing. Thukhunna ah, makai khat peuh in a kizom in kum 3 sung a sep leh kum khat tawlnga phawt ding cih om ahih manin, kei zong kum khat khawl phawt ing. 2005, 2006, 2007 kiteelnate ah a kizom in President in ong kiteel suak.

Dotna:     Kipawlna thukhunte ah, President khat pen kum 3 kizom in a sep leh makai ah kiteel kik thei nawn lo ding, tawlnga suak ding cih khat om ven, a hi lai mah hia?
Dawnna:  Nung kum in puah phatna khat kinei kik in, a tawlnga sa President khat pen mun khat peuh ah a sep kik nop leh mipi in teel kik thei ding cih khat kikip sak. Kei bangin, bangbang hi leh, min hoih in khawl sak suak le hang ka cih hi in, aihang a tam zaw thukimna tawh a kikhel suak ai veh.

Dotna:      A zenzen in nang mipi in ong deih in ong teel kik hi leh na sep sawm na?
Dawnna:  A beisa in a seem ding kua mah zong ki-om nai lo ahih manin kei ong ki-teel hi dingin um zaw ing. Tu hun ciang, kei lian sangin, pilna/siamna leh experience kicing zaw a, a nei zaw makai thei ding tampi ki-om ta ahih man in ah, lut kik luat dingin sawm kei zaw mai ing.

Dotna:     Midang tampi om lak ah, kum 3 kizom in Secretary in ong kiteel ban ah,kum 3 kizom in President in ong kiteel cih mawk pen bang hang hi in naum a? Bang siamna, bang thusim nei na hia ?
Dawnna:  Hih bangin ong kiteel tohtohna dingin, bang siamna, thusim cihte theih nei keng. Kawlgam ka college kah lai in makai ka sep in zong, mee kuang zong lui ngei lo ka’i veh. Aizong, mi’ ong deihna tawh ong kiteel pen, khatna ah Pasian’ ong teel hi in ngaihsun ing. Tua ciang, hih Florida bang lian ah ci leng, a seem thei ding thu thei, mi muan huai tampi om lak ah kei ong kiteelna pen, ka ngaihsut ciang, (1) Mi khempeuh zahtaak ka hih man hi zaw in teh, (2) Nasep vai tek tawh kibuai ciat a, hun pia zo ki-om lo ahih manin, tua teng lak pan kei pen khangno khat, hun pia zo pen dingin ong kilamen ahih man hi in um ing, (3) Makai thei ding tampite in i mite’ aa ding a hun pia thei lo ka muh ciang, ih mipi’ aa ding ka deihsakna khang mahmah in, tua pen ih mite in ong muh sak ahih man hi dingin zong um ing.

Dotna:      Tua ahih leh, ong kiteel man in a seem na hia? Na sep nawp manin a seem hi zaw na hia?
Dawnna:   Sepna ding a omna munte ah, i minam aa ding panmun ka neih loh hang, ong kiseh lo thute ah zong seem ing. Aihang, kipawlna khat a om leh, kipawlna langpang in na sep sawm lo. Ong kiteel tak ciang lah, ong kiteel man a a seem zong hi veve.

Dotna:       Zomite’ aa ding na sep sungin, makai khat aa ding haksa na sakna a om hia?
Dawnna:   Kei makai masa pen hi lo ka hih manin ah, haksatna tuak kha keng. Makai masate’n tampi na nawk sak khin uh a hih ciang maw. Ahi zongin, pilna siamna leh sum leh paai kicing lo khat in makai ih sep teh, kihawmthawhna tuamtuam om thei. Tua ban ah, ih kithutuah ciang nuam mahmah napi, ih  kithutuah loh ciang, kithutuah lohnate bangci gawm tuah kik ding cih hun ciang haksa thei mah.

Dotna:      Makai nasep sungin nang leh nang in hih zo na kisakna, na lungkimna, na angtangna bang khawng om a hia?
Dawnna:   Kei’ makaih hun sung pen sep khiat hun hi nai lo a, phuh hun ahih manin ah, hih kibawl khia in, hih kiseem khia hi, cih luat ding mu keng. US ah Zomite’ kipawlna pen a kiphut cil hun hi in, hih kipawlna pen singkung no suan bang in, a lok nuam, a siing nuam, a hoi sak nuam tampi tak om. Tua singkung a po kipna dingin, a len keei, a hong keei, a kemcip keei kihi phawt mai. Sepkhiat theih a gah lian ih muh khol loh hang, mite’n Zomite’ kipawlna kician khat om cih ong mu sakna uh hi pi pen in teh.

Dotna:      Tua ahih leh, nang mai a seemte tawh kibang lo in na sep khiat a om na?
Dawnna:   Kipawlna US kumpi in ong theih pihna, registration ih bawl khiat theihna, tua zong lawm leh gual in ong huhna tawh hi. Tua khit ciang, mipi’ kitaangsapna zui in, pan mun tuamtuam behlapin, tua panmunte ah makaite in amau’ uukna mun tek uh ah, na nakpi in ong sep uh tak 9 10 10 ciang,
ih kipawlna pen ong khangto sak mahmah uh. Ih sep khiatnate, a gah ahih pah loh hang, ih kihel theihnate tampi tak kimu khia. Tua banah, ih kumcin kiteelni,
Thanksgiving ni pen, kiteelna tawh mite kicim thei ahih ciang, kimawlna khat phuanni, ci in a veeng zui in, bawlung kidemna a kibawl toto pen, 2006 tak teh, US leh mun tuamtuam pan ong kihel nuamte a kihel theihna ding ci in, a khat veina Zomi World Cup cih kipan khia thei. Tua ah, State tuamtuam pan tampi
ong kipai tak ciang, Zomi Innkuan kipawlna a hin’na kimu khia thei suak hi.

Dotna:       Kipawlna tawh kisai in na piak khiatna tampi om cih pen kimu khia hi ven, a vek in bang zah bang a sum tang in na bei ding a?
Dawnna:   Tua pen bel, na gawm kha het kei veng in, a thu in ah, kei sang a beih zaw tampi om zaw kha lai in teh. Kei’ ip sung pan ka sawk, member fee te leh a kidong tuamtuamte kihel lo in pen dollar tul 5 val hi hamtang lo dia.

Dotna:     Nang ip sung pan na piak sak cih pen, i Zomite’ lak ah piak khiatna kithaneem lua ahih man maw?
Dawnna:  Na ih sep tak ciang, siam loh manin, kigeel khol kim thei lo ahih ciang a, ih deihsakna tawh, piang hen cih ih lunggulhna tawh a hi thei bangin a kihanciam hi zaw. Tua teh, ei mite a tam zaw pen, midangte tawh tehna in piak khiatna ah kitha neem. Biakna lam ah piak khiatna ahih leh bel kihoih lel. Minam vai ah kithaneem mahmah cih bel kum tampi ka sep sungin mu khia ing.

Dotna:      Florida ah pawlpi zong ong kibehlap in, mite’n zong a pawlpi ciat uah sum piakna zong kinei semsem ci le hang, Zomi Innkuan kipawlna ah sum leh paai tawh kihelna lam ah kilamdanna a om hia?
Dawnna:   Seh suah sawm ah khat pen kilamdang kei in teh. Sum piak i thaneem deuhdeuhna a hang pen, nidang US ih tun’ cil lai in, maban kikhualna ding om nai lo ahih ciat manin ip sung a om zahzah kipia khia ngam ciat in mu ing. Tu hun ciang, mi kim in, innkuan maban geel tek ta ihih ciang, budget system tawh kikal suan ta ahih manin, hih aa ding tawh a tuamtuam sum zatna ding haksa kisa tek. Tua mun ah bel, mipi mawhsak khol keng. Tua khit teh, US ah sum bawlna zong ong kiam lailai ahih man zong hi in cia.

Dotna:     Nang makaih sep sung, Secretary/President sep sung pen pawlpi kibehlap hun sung tawh kituak a, tua pawlpite kibehlapna hang in, Zomi Innkuan kipawlna tha neem sak zaw na sa hia?
Dawnna:  Pawlpi tuamtuam ong kibehlapna hang in, Zomi Innkuan’ tha tampi ong dawn zaw in mu ing. FZI in a sep ding a hi, nopna dahna vaite va vaan zo kei le hang, ong kikhasia ding, kikhasia leh, kithutuah lohna kipan ding. Ahih hang, pawlpi tuamtuam a om ciang, a mau leh a mau ong kivaan zo zaw deuh, ong ki-en zo zaw deuh uh ahih man un, vai tampi tak ong nuam tuam. Tua pawlpi teng ong kithutuak a, i kalsuan khop ciang, tua in i Zomi Innkuan thahatna in ong piang sak zaw.

Dotna:      Biakna lam tawh kisai kitha hat seemseem ta suak ahih teh, Zomi Innkuan in biakna tawh kisai tam vaihawm lo zaw in, gualnopna lam ah kithuklut zaw leh hoih na sa hia?
Dawnna:   Abei sa in, kei’ President sep nunung pen kum in biakna lam tawh kisai makaite in biakna vai ki-niam bawl kha. Ih thu bulphuh ah, minam min tawh Pasian bia khawm ding cih na hi ahih man in ah, biakna lam i thaneem sak kum pen kikaam sia, ki-zaawm sa ing. A zenzen in, biakna lam khawl in, gualnopna lam ah pai le hang, i mi bup mah in ong ngen kik ding. A beisa kum in zong ong kikun kik.

Dotna:     Zomi World Cup tawh kisai ong pian khiat dan tawm nong gen thei dia?
Dawnna:  Ni dangin ah ci leng. FZI Cup ci in, ei teng bek kimawl hi in, 2006 kum kipat cil lam in, bawlung makaite’ lam pan mun tuamtuam a om Zomite zong ong kihel theihna dingun Zomi World Cup, USA ci zaw ni cih thu sunna ong om ciang hoih hi ci pah in, tua kum a Secretary seem Pa Pau Sian Lian leh Sport
Secretary Pa En Lian Pau, a mau tagel bawlung uuk tuak uh ahihman un, a sep theih zah seem ding in thuneihna kipia pah. A kipat tung ahih manin, bang mah kithei nai lo, sum beina tuamtuam a om leh thukikup a kineih man kei leh zong ip sung pan kisaih hi mai. Lianpau hi ta leh, kei hi ta leng- a kua mah peuh maw.

Dotna:     Zomi Innkuan” cih min sangin, “Zomi Council, Zomi Association, Zomi Organization,..” cih dan khat tawh min kivawh zaw bang hi leh nasepna ah a taangzai zaw in na um hia?
Dawnna:  Zomi Innkuan kipawlna a kiphut tungin, “Zomi Innkuan” ci ding cih a kikip sak ciang, tua min a zangh ih hi veh. Ih deih pen, a kipawlna hi masa zaw maw. Kei bang tua lai in om kha keng in, tua lai a, i mipite’n a teel pen uh a zangh ih hi veh. Tua bang sem ding ihih ciang ci a, min kipia hi lo zaw. Tua kipawlna in, i mipite’ aa ding ih sep theih bang sem ding cih na hi.

Dotna:       Kipawlna tungtawn in, hih US kumpi in ong theih pih ding leh, gamgii lam ah haksatna a tuakte huh theihna ding tawh kisai hanciamna kisam na  sahia?
Dawnna:  Den a ih gen sa mah bangin ah, ih sep ding tampi tak a kisem zo nai lo, a phut in thapaai lai hi hang. USA Zomi Innkuan zong, 2005 in hih lai pan mah in phut ih hi veh. Tua zong, a phutin kithapaai lai. Malaysia lam, Thailam-a te pen, ei na kiging khin hi peuh le hang, a kisam khat peuh a kibawh pah lianlian man ding hi ven, kei bang mawk pen sushi seem in buai tha pai, kizin khia man lo hi mai. Lungsim a ut hang lah, hun pia zo lo, hun a pia zo ding mi a om phial hang a, ma kai kha lo zong hi thei. Sep luat ding vive, a kiseem nai lo hi zaw.

Dotna:      US a tung khin Zomite’n Zomi min pua lo in min dang mang min khawng vawh suk ziau lel le’ng hoih na sa lel hia?
Dawnna:  Mun dang gam dang ah ih om ciang, i mite’n i min mah zangh ciat le’ng hoih sa ing. Bang hang hiam cih leh, minam dangte’n amau’ min mah na zangh lel uh ai veh.

Dotna:     Mai kum pen FZI ih phuah zawh a kum 10 cinna hi mawk ahih teh, nang lian bang President a seem hi le cin, pawi na bawl sawm hia?
Dawnna:  Kum 10 cin Tin Jubilee pen bawl zo hi le hang, bawl huai sa ing. Hih bawl kei kha le hang, Silver Jubilee ngak ding, kum tampi. Zomi Innkuan tawh kisai, leitung bup lawh zo ih hih ciang zong, bawl taak sa ing. Makai ong seem peuhpeuh in, a hih zawhzah ciang khat tawh ong bawl hamtang le uh hoih sa ing.

Source: USA Thupuak
 


Comments




Leave a Reply

    Tungzang News

    All