WWW.TUNGZANGNEWS.COM

 
WINDOWS  8  &  MICROSOFT  SURFACE:

Rev. Vung En Thang/Florida

Saturday, July 28, 2012

Lai leh Laigelhna, Thukizakna, tuamtuam te’ khantohna te, Leitung tangthu ah ih et kik ciangin: Khuulsung-a, kisuai Lim (Picture on Cave Wall), Buantangh tung-a, akigelh Lai (Clay Tablet), Papyrus-singteh leh Savun tung-a, kigelh Lai (Papyrus and Parchment), Laidal tung-a, kigelh Lai (Wooden Fiber Paper), cih bangin khantohna adawl-dawl in kimu thei hi. Tuate Suangzum (Sharpened-stone), Vasamul or Akmul (Quill Pen), Laitui, Laikung (Fountain Pen), cih bang Vanzat tuamtuam te zangin na kigelh hi. AD 18-19 Century hun hongtun ciangin, Typewriter, Printing Press leh Telegraph te hongpiang ta ahih manin, Lai leh Thukizakna ah Khangthak kilamdan-na khat hongpiang hi. Hih Typewriter, Printing Press leh Telegraph te pen tuni, tuhun dongin Leitung muntampi ah omlai, kizanglai hi.

Leitung Galpi Nihna hunk hit ciangin, Typewriter, Printing Press leh Telegraph te bulphuh in, “Computer” kibawl thei ta-a, ahih hangin, gollua ahih manin, munkhat a akiphut “Stationed Computer” hongsuak hi. Ahih hangin, 1980 kum hun-a, kipan Computer Company te ahi, adiakdiak in, Microsoft, Apple, IBM cihte pawl in “PC” (Personal Computer) hongbawlthei ta uh-a, Inn leh Zum atuam-tuam ah kikoih, kizangthei ta hi. Tuahun ciangin, Lai leh Thukizakna ah Khangthak kilamdan-na khat hongpiang leuleu hi. 1990 kumhun ciangin, “PC” pen “Internet” leh “Email” tawh hongzomthei leuleu uh ahih manin, tuahun aa kipan hih nasepna pen “IT” (Information Technology) hun kici hi. “PC” leuleu pen, Zum leh Inn bek-a, akikoih ahih manin, Business nasemte, College Sangnaupangte cihbang mipawl-pawl te-in, apai-pai na ah apuaktheih ding ci-in, kum 1995 hun-a, kipan “Laptop” hongkibawl leuleu a, America gam bangah Zomi ihnau ihtate tampi in “Laptop” kuahin, zumkah sangkah uh-a, nuamsa mahmah uh hi.

Computer Company te “IT” hun-ah hongtun uh ciangin, “Innovation” nasiatak in hongkidem pah uh hi. “Innovation” cihciang in, a omsa akibawlsa nakhat peuhpeuh, ahoihzaw anuamzaw a bawltoh theihna cihna ahi hi. Kum 2000 hun-a, kipan Apple CEO Steve Jobs makai in, Apple Company te-in, “Innovation” nasia takin ahongbawl uh ciangin, tuhun-a, “Media & Mobile Device” Vanhoih leh Van-nuam tuamtuam ihneih te ahi, “iTune, iPod, iPhone, iPad, Smart Phone” cihte hongpiang khia hi. Steve Jobs pen October 5, 2011 in “Pencreatic Cancer” natna tawh sikhin ta hi.

“iTune leh iPod” te pen Music leh La-khum na, La-ngaih na dingin, kizang hi. “iPhone, Smart Phone leh iPad” te pen, Thukizakna (Mobile Information Device) leh Vanzat tuamtuam dingin kizang hi. Tuate in ihkisap Vanzat theihding tampi nei uh hi. Gentehna in: Phone, Internet, Email, Map, GPS, Camera, Video Camera, Calculator, Clock, Dictionary, Games cihbang Vanzat-theih tuamtuam nei uh-a, ih omna-na, ihpai-pai na mun ah kizangthei hi. Internet kizangthei ahih manin, Online Shopping, Online Banking, Online Payment, Oline Oders cihbang kibawlthei a, ih-ut leh Lai Siangtho aakipan laibu tuamtuam, News tuamtuam kisim in, La kingai thei, Movie ki-en thei hi. Akilawng-thei “Touch Screen” vive hi-in, nuam mahmah hi. “iPad” in pen Phone neilo hi. “iPhone leh Smart Phone” te-in, “Apps” anamkim in aneih uh hangin, neuzek ahih manin, azatna nuam phalo hi. Tua ahih manin, “iPad” nuamkisa-a, mipawlkhat te bangin, Van namthum (3 Devices) puaden pah uh hi. (iPad, Cell Phone leh Laptop). “Apps” cih ciangin, “Application or Appliance” cihna hi-a, eikam in “Vanzat” cihmaiding ahi hi.

Apple Company te ii “Innovated Products” te lak ah, “iPad, iPhone leh Smart Phone” te hong minthang mahmah ahih manin, Microsoft te’ vante kilei nawnlo zahdong in, Microsoft te hongkiam mahmah pah uh hi. Ciamtehna khat ah, 2007 kum laizang hun-a, kipan June, 2011 hun kikaal sungteng in, Apple te 413% khangin, tuahun sungteng mahin, Microsoft te 26% bek khang hi ci-in, kiciamteh hi. Ciamtehna dangkhat ah, May 26, 2010 aa-pat April 14, 2011 hunsungteng in, Apple te $223 billion pan-in $306 billion dong khangin, tuahun sungteng mahin, Microsoft te $219 billion pan-in, $212 billion ah kiamsuk uhhi ci-in kiciamteh hi.

Hih bangin, Microsoft te nakpi aa hongkiam uhciang leh, Apple te-in, Leitung pumpi “Market” khempeuh phial hongluah uhciang in, Microsoft te-in zong “Innovation” mah nasia takin hongbawl leuleu uh-a, tu-in “Computer” thak namnih (Innovated Products) hong taangko khia-ta uh hi. Tua te-in:

1.      Microsoft Windows 8 (or) Windows 8

2.      Microsoft Surface (Hihpen “Tablet” namte hi).

“Tablet” cihciangin, Lai simtheih nading, Internet, Email leh “Apps” atuam-tuam zattheih nading-a, akibawl “Mobile Computer” neute ahi hi. Apple te-ii “iPad” te, Amazon te-ii “Kindle” te cihbang tepawl pen, “Tablet” vive ahi hi.

“Microsoft Surface” pen Model namnih in kibawl hi.

1.      Surface for Windows RT (or) Surface RT leh

2.      Surface for Windows 8 Pro (or) Surface Pro cih namnih ahi hi.

Windows 8 pen, Microsoft te-in Windows 7 khitciang a, abawl masak penpen uh hi-in, “New Generation Windows” ci uh hi. “Type” ngakngak kullo in, “Akilawngthei” “Touch Screen” dinga, abawl uh ahi hi. Windows 8 pen, tuhun a, ihneih leh ihzat ahi Windows XP leh Windows 7 te’tung ah ki “Update” theiding hi ciuh hi. Tua banga aki “Update” khitciang in “Touch Screen” tawh aki zangthei dinga abawl thak uh “Microsoft Office 2013” “Install” lehang nakisem thei pahding hi ci uh hi.

“Microsoft Surface” pen hoih mahmah leh lawphuai mahmah hi.

1.      Surface RT pen: Apple te ii minthan pih mahmah ahi “iPad” tawh akibang, “iPad” banglian mah-a, akizang ding “Tablet Computer or Mobile Device” ahi hi. “iPad” banga “Notes or Letters” gelhtheih nading “Work Sheet” or “Word, Excel, Power Point” cihte neidinga, ahih hangin, “Full PC” hilo-deuh ding hi ci uh hi. Anung ah “Kickstand” khat neiding a, Atuam-na (Cover) pen “Keyboard” aa akizangding “VaporMg” tawh akibawl “Touch Cover or Type Cover” hiding hi ci-uh hi. Paa-mahmah, Zaang-mahmah dinga, hoih mahmah ding hi. “Surface RT ii “Particulars” pawlkhat anuai aa bangin, gen uh hi.

Surface for Windows RT (or) Surface RT:

·         Processor: NVIDIA Tegra-based ARM chip

·         Weight: 676gm (1.5 pounds)

·         Thick: 9.3mm

·         Display: 10.6 inch

·         Battery: 31.5Wh

·         Connectivity: microSD, UBS 2.0, Micro HD Video, 2x2MIMO antennae

·         Software: Window RT + Office Home & Student 2013 RT

·         Accessories: Touch Cover, Type Cover, VaporMg Case & Stand

·         Storage Capacity: 32GB (or) 64GB

Hih Windows 8 leh Surface RT te-pen, October 26, 2012 ni-in, kingah theding ki “Release” dinghi ci-in, Microsoft CEO Steve Ballmer in genkhin hi. (Microsoft Founder pa Bill Gate pen 2009 aa kipan khawlta “Retired” ta hi). Thukizakna khat ah Surface RT pen $599.00 pan kipan dinghi ci-in, kigen hi. A kigen dangkhat ah tuabangin, tam a-mat pah leh Microsoft te in Apple te demzo hetlo ding hi ci-in zong kigen hi.

2.      Surface Pro pen: Surface RT mahbang hi-a, ahih hangin, “Full-fledged PC” neiding hi. Tawmkhat sahzawdeuh, tawmkhat gikzawdeuh ding hi. Kickstand, Touch Cover, Type Cover, Keyboard te neiding a, khuttawh Laigelh theihna ding “Digital Ink Pen with Palm Block” khat neiding hi. “Surface Pro” pen Akilawngthei “Touch Screen” ahih hangin, hih “Digital Ink Pen” tawh Lai nagelh ciangin, nakhut-ma pen ki “Block” (or) kikhawlsak  dinga, a “Screen” pen tang-nawnlo, “Move” nawnlo ding hi. “Surface Pro” ii “Paticulars” pawlkhat anuai aa bangin, gen uh hi.

Surface for Windows 8 Pro (or) Surface Pro:

·         Processor: Intel Core i5 (ivy Bridge)

·         Weight: 903gm (less than 2 pounds)

·         Thick: 13.5mm

·         Display: 10.6 inch

·         Battery: 42Wh

·         Connectivity: microSDXC, UBS 3.0, Mini Display Port, 2x2 MIMO antennae

·         Software: Windows 8 Pro

·         Accessories: Touch Cover, Type Cover, VaporMg Case & Stand, digital Pen with Palm Block

·         Storage Capacity: 64GB (or) 128GB

Hih “Surface Pro” pen amasa nih te ahi “Windows 8 & Surface RT” akingah zawh khathum khitciang in (Dec 2012?) kingah panding hi ci-in genuh hi. Aman ding akigen nailoh hangin, $999.00 pan bangin kipan dinghi ci uh hi. Apple te ii “iPad” pen hoih mahmah leh a minthang mahmah ahih hangin, “PC” hilo ahih manin, “Internet leh Entertainment” aading bek in kitamzat zaw-a, Business Professional te’ aading in, cingzo taklo hi ci uh hi. Tua ahih manin, “Surface Pro” pen “Full-fledged PC” kibulh in, adiak-diak in, Zum nasem leh Business Professional te’ aading in akibawl ahi hi ci uh hi. Atak-tak in, Laptop kuaha, Zumkah, Sangkah khempeuh leh Laptop azang khempeuh te’ aading in hoih mahmah pah ding hi. Van namthum (3 Devices) pua-a, akuankhia dente in hih “Surface Pro” aneih naakuhleh Van namnih (2 Devices) tawh seenpi pahding uh hi. (Cell Phone & Surface Pro).

Sum nakhol-khol in! Hih “Surface Pro” peuhmah naneih leh “Media Device” khempeuh anei, “Apps” khempeuh anei, “Mobile Office” khat anei nahi dinga, nuam mahmah ding hi. Nasepna khempeuh napai-pai na-ah kisemthei pahpah ding hi. Laptop banga, agik ten-tan hilo a, paukawm nasemkawm khawnga, khutsung ah aki tawithei ziau khat honghi ding hi. Amau’ genna ah, “It will be like a book in your hand” ci uh hi. Sitai mahmah ding, hoih mahmah ding, seenpi mahmah ding leh nuam mahmah ding hi.

Zomi te hicibang Vanzat hoih nono azang toto thei dingin, ihbiak Topa Pasian in thupha hongpia kimciat ta hen!

__________________________________________

 


Comments




Leave a Reply

    Tungzang News

    All