WWW.TUNGZANGNEWS.COM

 
Kumthak i lut lian leh tukum December 21, 2012 ciangin leitung bei ding hi cih thu hong kithang a, i lungsim hong lawngtek mahmah hi. A takpi hi ding maw, takpi lo ding maw cih a kitheihloh hangin a gente in zong a mawk gen uh hisamlo dinga, ngaihsutna tampi mah a zat khit uh ciang agen uh zong himai ding hi. Ahi zongin leitung bei ding leh beiloh ding pen a thei taktak khat bek om a, a bawlpa bekmah hipah hi. Leitung leh a sunga om khempeuh a bawlpa in lungsim thei hileng kician takin kigen thei bek dinga, ahi zongin a bawlpa ngaihsutna a theizo dingin pilna leh theihna a kicinglo leitung mihingte ihi hi.

Tua ahih manin leitung ah mual puakkham, aksi kia, huihpi nung, guahpi zu, Ni puakkham cihte in i tenna leitung hong nawkkha zel mah leh a tawpna taktak ding a thei pen tunga Pasian bek mah ahi hi. Mihingte ngaihsut tawmna pan leitung a beisak thei ding pawlkhat om hi kici a, tuate tawm ensuk ding hi hang.

1. Aksi them kia in leitung deng zaan ding: Zomi te in i theihsiam mahmah khat pen vantungah om aksi leh ni leh kha te pen a them lengkhia in huih lak ah hong kiasuak uh a, khatveivei leilak hong tu in leitung kuak lianpipi omsak hi. Mi pawlkhat ngaihsutna bangah tuma kum million 65 bang pai khinzo ah tua banga aksi them kia te in dinosaur kici Thankikpi banga mel nei ganhing gol pipite na denglum khin hi ding kici hi.

Aksi them lian diak hong kia nunung pen hi a kigen pen kum 1908 kuma Siberia vuk lak ah kia pen hi. Inn khan 10 a sang zah dinga lian hi a, a puakkham in singkung million 80 val delhcip in, Tunguska Lui kiim kilometer nih kimkot bang tuamcip hi. Mihing tenna mun hilo ahih manin a si kuamah omlo hi. NASA officer khat in a genna ah tua banga aksi them neucik khat kia leltak in zong Hiroshima khuapi ah kikhia Atomic Bomb sangin na tampi susia theizaw lai hi. Tua manin aksi them golpi hong kia hizenzen leh leitung pen a dengzaan thei ding himawk hi, ci hi. A kiatna sang, a kiatna tha hatlua ahih man hi.

Russian scientists te upmawhna ah 16 April 2036 ciangin football tualpi nih cia a pha aksi them in leitung hong deng kha thei dinga, tua hangin leitung a kipeina orbit ah kipei nawnlo in kilawnkhia dinga, leitung kisia thei kha ding hi, ci uh hi. Ahi thei thu a hih hangin amau zong a upmawhna uh neu mahmah a, aksi them in leitung deng kha lo zaw mai ding hi, cih upna zong nei uh hi. Kum 2028 mateng kitel taktaklo dinga, leitung hong dengkha takpi ahih leh bel siatna tampi piangsak ding hi, ciin Sergei Smirnov, St. Petersburg's Pulkovo Observatory ah thupulakpa in gen hi. Khuahun nangawn kilamdangsak dinga, tuipi tung a deng khak leh zong tuipi kilok in tuipi mel kilamdangzo ding hi, ci hi.

2. Solar storms: Solar storms kici pen ni pana hong lengkhia meikuangpi hi cileng i telnop pak ding hi. Meikuang leng bang hi a, ni sung pan hong lengkhia ahi hi. Kumlui 2011 in zong tua bang om a, kum sawm leh khat halta in solar storms om den hi. Tua solar storm om ciang huih sa leh charge particles tampi lawnkhia ahih manin pawlkhat in leitungah tawh kinai ah hong tu a, leitunga sik-hup nasep nawngkaisak hi.

Kum 1859 a 'Carrington Event’ akici pen bang ni giat sung bek hi napi telegraphs nasepna tampi siasak in inn tampi kangsak hi. Tuhun ciang tua banga nizung khauh hong om leh minit khat sungin meitha piakna 280 bang siasak man ding a, mihing million 126 bangin mei ngahlo pah ziau ding uh hi, ci uh hi. Tuhun ciang meitha kilim zat deuhdeuh ahih man hi. Kum khat sunga a siatsak bekbek pen pound trillion nih bang hi dinga, tua teng bawlkikna dingin kum li bang sawt ding hi.

Thakhat thu in mihing khempeuh hong maimangsak ziau ding ahih loh hangin siatna hong tut ding leh haksatna hong thuaksak ding neulo hi ci uhhi. I kizopna khempeuh hong siasak dinga, i meivak khempeuh hong sukmit sak in i kihona khempeuh hong lakkhiatsak ding hi. Tua pen noptaksa a a nungta khin mihingte adingin baihlo ding hi, ci uh hi.

Tu laitak Ni leh aksi no te kiang pan siatna lua a piangsak ding meikuang ahi zong, a them leng khia ahi zong i thuak pak nailoh hangin tua bang hun hong tung leh i pelh theihloh ding haksatna neulo hi, ciin UK government’s chief scientific adviser Professor Sir John Beddington in gen hi. Mai kum 2013 ciang zong solar storm nam khat hong om mai thei ahihna zong gen hi.

3. Leilu Leitaw kilaih ding (Pole shift): Tuhun ni leh kha kihei dan a sin, a siam, a thei pawlkhat genna leh nidanglaia Mayan genkholhna a kici te in a genna vuah 21 December 2012 ciangin leitung leh Ni, Kha, leh Phalbi Lampi icihte a kitangin om dinga, tuate lak ah leitung a laizang ah om ding hi. Tua hangin Mayan te upna ah leitung sik-hup nasepna kilamdang dinga, leilu leh leitaw kikhek in, tuilu leh tuitaw kilaih dinga, leitung kilumlet in siatna lianpi piang ding hi cih um uh hi. Movie '2012' na et leh tua bang hiding cih upna om hi.

Maya te upna bek hilo in mipil misiam (scientist) tampi te in zong tua banga leitung kilumlet thei ding ahihzia theihna nei uh hi. Albert Einstein nangawn in leilu leh leitaw, tuilu leh tuitaw a kilumlet ngei ahih ding upna lianpi nei hi. Ahi zongin NASA mipil te in tua banga leitung kisiatcipna a pian ding umlo uh hi. "Bangmah siatna lianpi a tun ding um kei ung, kum 2012 zong a ngeina bangin bei lel ding hi. I tenna leitung pen hih bangin a om zawh kum billion li bang phazo a, tua mah a bat tohtoh ding kilamen hi," ci uh hi.

4. Meimual puakkham gawp ding (super volcano eruptions): Kum 2010 a Iceland gam meimual puakkham in leitung leh vanleng tampi a nawngkaisak thu i thei hi. Tua sanga azah tampi a gol meimual puakkham himawk leh leitungbup a nawngkaisak zo ding ahi hi. Tua banga meimual puakkham nasia tuma kum tul 75 paisa hun in Indonesia ah na om ngei hi, kici hi. Leinuai pan leisa tampi kilawnkhia a, gam lianpi kangsak in, mual tampi vukcip a, siatna lianpi piangsak hi. Leitungbup nisa ding liahcip ahih manin leitung khuamialcip a guahzu nangawn tuithuk (acid) bangin thuk lela hi, kici hi. Tuhun ciang tua bang hong om kik hileh mihing tampi si dinga, singkung lopa in zong siatlawh in, leitung mihing a za a sim bek suakta thei ding hi. Tua bang meimual puakkham a om theih thu mipilte in sut in kankan uh a, a sutna uh pan kum tulza sawmguk (600,000) hal in hih bang piang hi ci uh hi. Tua hileh a nunung pen tuma kum 640,000 hun in piang ahih ciang a zom ding pen a nai mahmah ding hita hi, ci uh hi. Tua bang hong om takpi hizen leh USA gam a kim khat zah pen olno in leinuai pan hong luangkhia mei-am sa in metre khat vala sah in tuamcip dinga, mihing leh ganhing ban ah singkung lopa a suakta ding om hetlo kha ding hi kici hi.

5. Leitung lum deuhdeuh hang (global warming): Tuma kum 50 sunga leitung lumna a kibehlap bangin mailam kum 50 sungin kibehlap leh a sawtlo in leitung khuahun kikhelna tampi piang ding hi kici hi. (Tun zong a piangpiang khin ahihna mel i theihloh!). Tua banga kikhekna lianpi om hi cih a kitheihna pen mihingte ciamtehna Intergovernmental Panel on Climate Change (IPCC) sungah kimu hi. Tua bang siatna in i tenna leitung a siatsak theih ding tuni mahmah in kidal thei lai hi. Tua ahih kei leh i ten theihloh zah donga lumlua, votlua, niinlua, cih bangin kisiasak kha ding hi.

Tuni banga leitung lumna a kah zel leh, tuzawh kum za khat ciang singkung lopa tampi si in mangthang dinga, lei hoihna kiam in singkung po theihlohna sehnel gam suak dinga, leilu leh leitaw ah vukkhal peuhmah kimu nawnlo ding hi. A vot mahmah London zong a lum mahmah Cairo khuapi bangin sa vitvit dinga, mihing tamna khuapi Tokyo, New York, Mumbai, Shanghai, Dhaka cihte tui khang in tum zel ding hi. Huihpi guahpi tam deuhdeuh dinga, guahzuh loh manin lei keucip in tui malkhat zong ngahlo tam ding hi. Natna puang dinga, sihna kipelh theilo ding hi. Awmna leh lungtang natna kibehlap dinga, khualum thuakzolo naupangte a neu lai un si pahpah ding hi. Tui nom zaw deuh gam leilu leh leitaw te ah mi sawt damzaw deuh dinga, ahi zongin amau zong khualum lua in nawkkha in a si nunungte cih hibek ding uh hi. Tua banga i mangthang lohna dingin i leitung a lumlua ding, votlua ding i kep i khoi kisamta hi.

By- Hau Za Cin
 


Comments




Leave a Reply

    Tungzang News

    All