WWW.TUNGZANGNEWS.COM

 
TZN: 3 March 2012 nitak lam in Park Royal Hotel, Zangkong ah Zomi National Congress makaite le Malaysia gam pan hong pai NTV 7 pan reporterte kimuh khopna kinei thei hi. NTV 7 te lampan in News and Current Affair Department pan Ms Tan Poh Ling in President Pu tawh interview hong bawl thei uhi. NTV 7 pan in dotna thu thum hong neihpih uhi.

1) Zomi le Chin ki lamdangna, 2) ZNC ngimna policy, 3) Bang hangin Malaysia gam ah Zomite alomlom in hong tai uh cih thute ahi hi. President Pu in adawn kikna ah, Chin cih minam min kammal pen Chin State khua 9 sungah anei ki om lo ban ah akhiatna tuni dong kimu zo nai lo hi. Mangkang kumpi khutnuai ah sila in ka om uh akipan akingah sila min ahi hi. Ko le ko ka pu kapa hun lai tangtawng pek akipan in Zomi ka kici uhi ci’n dawng kik hi.

ZNC ngimna policy pen Panglong thukimna tawh Mangkang kumpi khutnuai pan suahtakna lak lai in, Federal gam kiukna tawh kiuk ding cih thukimna atang tung nading pen ZNC ngimna ahi hi ci’n dawng kik hi.

Zomi tampi tak Malaysia gam ah gambel in hong taina thu pen, Kawlgam ah Federal Democracy kiukna om lohna hangin, minam ki nenniamna, biakna ki deidanna, mipi tangtha zawhthawh thu tawh kisawlna tam, mipi nuntakna haksatna, kumpi nasem sung ah zong minam le biakna ki deidanna nasia lua, cih bangin thuman lo, haksatna tuamtuam hangin Kawlgam kikhel masiah, Federal Democracy kingah masiah mipi tampi gamsung pan kitai khia, zong hong ki taitai lai ding hi ci’n dawng kik hi. 1989 kum lai in ZNC min tawh Television ah thugenna le newspaper ah suak thugenna laite NTV 7 te kipia thei hi. President Pu Chin Sian Thang tawh kihona NTV 7 pan hong ki lak ding hi.

NTV 7 tepen 30 March 2012 in Daw Aung San Su Kyi inn huang sungah kibawl National League for Democracyte Press Conference ah thula dingin hong uh ahi hi. Tua lai in zong NTV 7 pan reporter Ms Tan Poh Ling mah in, DASSK a thudotna khat ah Malaysia gam ah gambel in a om Zomite vai na koi ci muh hiam cih dotna nei hi. DASSK in adawn kik na ah Kawlgam ah Belpawlgam taktak ahih lohna hangin mualtung mite haksatna tampi tuak uhi, Belpawlgam taktak akingah mateng hi danin mualtung mite cimawh in, gambel in atai uh bei thei lo ding hi ci in dawng kik hi. ZNC makaite le NTV 7 te kihona aman ciangin Malaysia ah ZNC tawh kisai contact person dingin Pu Thomas Thang Len Piang (+60166100877) min le phone number kipia hi.

Info Team
Zomi National Congress
4 April 2012
Zogam

 


Comments




Leave a Reply

    Tungzang News

    All

    ZNC Pu Chin Siang Thang
    ZNC Pu Chin Sian Thang