WWW.TUNGZANGNEWS.COM

 
Picture
ZNC Registration Bawl Theihlohna
ZNC Registration Bawl Theihlohna le Hoihtak Nungkikna Kihel Mainawt tawh Zomi Mailam
Biakna sungah khialtak le uangtak in a kizang kha Zomi cih min in gamvai nasepna ah a kilawmciang khat hong nawngkaisak ta cihthu hong kidawk mawk hi. 1990 kum in a kingah minam min khat in bang hang tua zawh kum 12 ciang kingah lo cih thu tungah Zomi cih min in bang tuak hiam?

Election Commission nialna ah biakna min tawh a nung pan kizom sim cih comment khat hongom hi. Biakna hangin ZNC in bang tuak hiam cih hong kilang hi. Tua hang bek hi ding hiam ci leng hi tuan lo ding hi. Kumpite hong piaklohna tungah lungkim loh dingsangin kumpi lamte in bangtungah kinga in hong pialo hiam cih kanpha a lungkimloh ding kisam zaw hi.

Ziakai tak in kumpi zumlam nasepna ah mi kitawmsuk mahmah hi. A diakdiak in Central Election Commission Committee ah a kihel Zomi sungah Zomi cih min deih mi om ding ka lamen kei hi. Tua pen Zomite lelhna kipatna ahi hi.

Kawlgam kumpi pa Thein Sein dan in bang mah hun in nungkik lo ding hi ung ci nuam tek ding hi. Hih in a kisam nailo kalsuanna hong hi ding hi. Bang hanghiam cihleh I mai ah guam thukpi om hiam, ken sangpi om hiam? Etphat ding kisam hi. Kahlei lak nadingin nungkik kul kha thei ding hi. Hamsatna guamthuk i kan na dingin khauhual I lakna dingin kinungkik kha thei ding hi.

Kalkhat nungkikna in lelhna hilo a, maikah kiknawnlohna in lelhna hi. Tua hi in nungkin nawnlo ding cih kammal sungah a kisam bangin kimainawt ding hi cih huai zaw hi. Nungkin lo cih kammal pen maikah nawnlo, dingcip le hang zong nungkik lo hi lel hi. Mainawt na ah a kisam bang in nungkik ni. A kisam bangin mai kah ni. A sangzaw bo khat ah I lentoh zawh nadingin kalkhat nungkik in thala ni.

Zomi cih min hong kisang theih kikna ding leh a gualzawhkik nading in kal bang zah nungkik ding kal bang zah maikah ding, hun bang zah bei ding cihteh hoih tak tuat pha in sep ding kisam hi. Khang gui kizom in sep ding nasep khat in, gam le gui bangin kisuat ding kisam hi. Khang khat bek tawh a a lemtang thu khat in khang khat sung bek hong kikhom sangin khanggui zui in sem in khang sawnsawn dong ah kip leh ut huai zaw hi.

Hehna, thangpaihna, dahna, khasiatna te cildam tawh valh khawm phot ni. Lungsim khempeuh daisak in Zomi cih min in bang ci in gualzo kiksak ding I hiam cih hunsau gelna tawh lungduai tak kipan pha kik ni. Bang bang hi leh kal khat a ziakai I hi ta hi. CNF vai ding lametloh in I tuak a, ZNC vai upmawhlohpi I phu kha hi. I mailam ah a piang thei ding thute kikum khol I gel khol ding tampi kisam hi. Kipumphatna thu bekbek gengen in kalthak suan ding a gel zo nawnlo Zomi minam sungah hoih tak kalthak suan haui ta hi.

“Zomi aw khanlawh hunta” David Pauno

Written by,
Tg Zam Thuam


 


Comments




Leave a Reply

    Tungzang News

    All

    ZNC Pu Chin Siang Thang
    ZNC Pu Chin Sian Thang