WWW.TUNGZANGNEWS.COM

 
Picture
Pu Gin Kam Lian le President U Thein Sein Kimuhna Nei
Zomi Congress for Democracy pan Pu Gin Kam Lian le Mualtung mi party makaite Kawlgam President U Thein Sein tawh kimu dingin 4 Aug 2012 in Zangkong pan Nipidaw Vanleng tualpi ah  zingsang 7:30 AM pawl in tung uhi. VIP uliante tawlngakna mun ah tawlkhat omkhit ciang un President U Thein Sein tawh kumpi pa’Lobuk (Farm Resident) ah paisuak thei uhi. Kawlgam sung 1990 kum kitelna ah Mualtung mi party kipawlna UNA sungpan SNLD, ALD, MDP ZCD le NUP party pan makai khatta , 2010 kum kitelna pan CPP, KPP le kawl party honkhat tawh aki gawm in party 14 pan makai 16 pha uh ahi hi.  

Party tek in abanban in thu sunna kinei tek in President tawh kimuh hun pen 9:00AM- 1:30 PM sung ahi hi. Mualtungmi party te lampan a diakdiak in Gambup Thukhunpi (Constitution) thanem na hangin gamsung tualgal piangna thu sungin, akisam Abucing Thukhunpi neihna ding le Panglong Thukimna mah bulphuh in, gamsung kiukna kalsuan ding mah limgen pen uhi.  Kawl partyte lampan in bel lokhomite thuneihna,  lokho mite loneihsate thuman lo tawh laksak  lohna ding le Civil Society lamte suahtakna khantohna ding genpi in nei uhi. 

Zomi Congress for Democracy pan thupatna ah  1948 kum suahtakna ngah khit Kawl kumpite akhang akhang in, Panglong Thukimna thusim lo, nawlkhin uh, Constitution sungah Panglong Thukimna laigilte (????????) guanglo uh ahimanin tualgal piangin, tudong kum 60 val veng thei lo hi. President U Thein Sein makaihna tawh Panglong Khawmpi tawh akibang gambup minam kim khawmpi samkik ding cih thupen ko lam panin, thangah in, dik sa hi ung. Tua mun ah na gengen uh minam 135 sungpan tangmite sapding cih sangin, Mualtungmi party omte, Mualtungmi thautawi kipawlnate, Democratic party te, Kumpi lampan uliante, Galkap makaite cih bangin kipawlna kim, mikim in kihel ding kisam zaw hi.

Tua khawmpi ah kum 60 valsung buaina te, khasiatnate, thangpaihnate akipan, kisam isak thute  lungsim takpi tawh sungkhia khawm tek in, tua mun panin Panglong bulphuh policy kip khat ngah khia zoleng, gambup mipi deih ahi Atawntung kilemna, gamdaihna ading in lam-et-na taktak hong piak khia zo pan ding hi. President makaihna tawh tulaitak na hahkat mahmah uh ahi gambup kilemna, galdaihna ding. gam khantohna ding nasepnate ah ko ZCD te in zong kapan theihna pantek uh pan in, hong panpih ding  hi ung ci’n thupatna in thu kisung ahi hi. 

ZCD in Zogam le Zomi adingin thusunna ah thu 8 kisung khia thei hi. Tua thu 8 sungah President U Thein Sein in, tu le tu in septheih pah ding leh, vaihawm theihpah dingin thu 2 hong sansak thei in thukim pah hi. Adang te kanlai dingte kanin, lungduai dingte lungduai dingin,  dawng kik hi. Zogam ading thusunnate anuai lam ah, Kawllai pan Zolai ah aki leh kik , a tom kim cingin  kisim thei ding hi.

ZCD pan thusunte tawh kisai in President Thein Sein in No (1) na le No (8) na vaihawm pah dingin thukim hi. Adangte sung pan Meitei te vai tawh kisai, akician in, na kan cian lai ning ci hi. CNF vai tawh kisai in, na  ki lungduai sak mahmah lai un ci hi. Tedim District vaitawh kisai in bel, Chin State Hluadaw ah thu kikhen kipsa pen, suk laih tolaih ding haksa ding cih danin dawng hi.(kiallap lohi, akikhensat ma in, ngahna ding vaihawm ding namte hi).

Party 14 pan makaite leh President kimuhna ah hungelna thugenna teng aman khit ciangin, social kiho limna ah, Pu Gin Kam Lian in President Thein Sein tungah, ‘Kalay ah Commander hong sem ngei cin’ Zomite ading in mikhat sakhat in kong muh uhi, kacih leh nui teutau ei’ ci hi. Nipidaw pan in vaiteng aman khit ciangin Pu Gin Kam Lian le apawlte Zangkong ah nitak 4:00 PM khit pawl in cidam tak in tung kik uhi.

Note: President Pu Chin Sian Thang USA ah tawivei sung hong zilkal in, Nipidaw paiding thu hong piang vatna le party khat pan mimal 1 ta bek kingah ahimanin Pu Gin Kam Lian ava pai thei ahi hi. 



Reported by:

Info Team

ZCD, Yangon

4 August 2012

--------------------------------------------

Zomi Congress for Democracy pan Pu Gin Kam Lian in President U Thein Sein tawh kimuhna ah athusunte Kawllai pan Zolai ah, atomkim cingin anuai a bangin kisim thei hi.

1) Zogam sungah gamdangmi tourist te suakta tak in paitheih cih athu in om hi. Aihang in, Haka, Falam, Tedim, Thatalang khuate ah gamdang mite suakta tak in khualzin ding kiphal nai lo hi. Zogam khantohna dingin tourist, NGO, INGO te hongpai in, nasepna, huhna hong piak ding uh kisam hi.                                                 

 2) Kumpi in gamgi lam haksatna gamte pan Tan X ongte (Science) ading atuam in Medical University zoptheihna dingin, atuam in vaihawm sakna te kilung dam hi. Tua ban ah, Marine, Forest le Defence University te ah zong tuadan mah in, vaihawm ding hong ngaihsut sak un cih hi.                                                     

3)  Rakhine gamah zandiak in apiang ahi Rakhine le Bengalite tualgal dan mah in, ko Zogam ah zong mailam ah hong piang thei ding patuah huai ahi Meitei te om hi. Tonzang gam, Thangkai kual Thangsih, Lennakot, Thuambual, Sihpek, Senam, Khuangkhan cih khuate ah thau vui thautang tawh mimal in 1000-1500 bang kibusa uhi.  Zavom zong cing uh in kum khat in tawi tul 5 bang zavom piangin, tua gamlam ah mi tampi nuntakna sia sak hi.  Inntek mipi te bawlsia in, a utut uh in gamta uhi. Tua ban ah Cikha, Tonzang, Tedim, Tamu le Kalay ah zong zum hong in, suakta tak in om thei uhi. Mailam thu tampi khualin ngaihsun ding hi leng lau huai mahmah in, buaina tampi hong piangsak ding ahi hi.                                      

4) Kumpi le CNF kikal kilemna ngahna tawh kisai in, athu khempeuh dik kasa gai kei zongun, kong muak veve uhi. CNF tawh gal le sa vengta ahimanin Tedim gam ah Bukphil, Tonzang gam ah Dalkhai le Cikha gam ah  om galkap lente, galkapte koih nawn loh ding kisam ka sa uhi. Galkapte in tua khuamite tungah tangtha cialna, vok, ak, buhsih akipan,  buh le meh te galkap van ding ci’n avan man tawmno takin, leisak, laksak uh ahimanin khuamite ading vangik pi suakden hi. Tua ci suak den leh, khuamite le galkapte kikal, deih masak loh pen, buaina hong om den ding hi cih hi. 

Tua ban ah, CNF te in Tedim , Tonzang, Cikha kuam ah zum hong hon loh ding vai tawh kisai mipi tul 70 val in deihlohna lai pulakna om khin hi. Tua hina pi, zum hong dingin CNF te ki thawithawi lai mawk uhi. CNF te in zum hong hon teitei uh leh, inntek mipi tawh buaina hong piang ding hi. Hong piang lohna dingin amanlang in vaihawm ding kisam hi.

5) Chin State saklam ah, District khat behlap ding vai Chin State Kumpi in, 13.3.2012 ni thu kikupna ah  meeting minute 17/2012 khensatna tawh Tedim, Tonzang, Cikha khuteng gawm in, Tedim District khat in piak ding khensatna te Nipidaw Kawlgam kumpi tungah thupuak khin hina pi, 1.6.2012 ni Chin State Hluadaw panin Haka-Thantalang kigawm in Haka District pia uhi. Tua hi in, Chin State kumpi le Chin State Hluadaw thuneihna hong tukalh  dan suak hi.  Kua thuneihna lian zaw cih kitel zolo hi. President in Chin State kumpi te 13.3.2012 ni meeting minute 17/2012 tawh kituak in, apiang theihna ding hong ngaihsut sak kik in cih ahi hi.

6) President in deihsakna le itna tawh thongkia mi tampi suahtakna nong piaksak hangin ka lungdam mahmah uhi.  Zomi khangno sungpan Go Pian Sing , Article .33(b) Electronic Transistion case tawh Taung Ngoo thongpi ah kum 15 thongkia in aom hi. Kumpipa in itna le deihsakna tawh ama suahtakna ding nong ngaihsut sak ding kong ngen uhi.

7) 2008 Gam Thukhunpi tawh kituak in Kawl gamsung ah minam pawl khat in, Union Territory kiukna ngah uhi. Tedim. Tonzang, Cikha huamah teng, ko Zomi te pen, amimal in (160,000) val bang pha in, tangthu, ngeina, kampau, biakna kibang khat minamte ka hi uhi. Chin State sung ah teng midangte tawh ngeina, kampau cihte ah ki thuapkhat lo hi ung. Tua ahimanin, ka gam uh pen Zomi Union Territory khat ka ngahna ding uh in, President in nakpi tak in nong ngaihsut sak nading kong ngen uhi.

8)Ministry of Border Area Municipal khutnuai pan Progress of Border Area National Races Development School (??????????????????????????????????? ???? ????????????????????)cih min tawh khuakim ah sang khatta  hong uhi.  Tuapen Buddhist Phungzi te hon lah hilo, layment kumpi nasemte hon hinapi nasep dan paikhial mahmah uhi.  Sangkahnuam sangnaupangte, pen sanghonma Kawl Buddhist biakna ah kal khat  lutsak masa in Phungzi suak sak uhi. Sangkah sung zing le nitak sim in 38 Mingala Tayadaw thungetna neihpih den uhi.  Christian biakna atam zaw omna, Zogam ah, hidan thu hong om ciang, kilung nuam lo tek ahimanin, biakna tung ah kinga lo, biakna tawh aki dendai lo, pilna sinna sang taktak asuahna dingin President in hong ngaihsut sak in cih ahi hi.

Reported by:

ZCD Info Team

Yangon, Myanmar


 


Comments




Leave a Reply

    Tungzang News

    All

    ZNC Pu Chin Siang Thang
    ZNC Pu Chin Sian Thang