WWW.TUNGZANGNEWS.COM

 
A 63 veina Zomi Nam Ni 2011- ni a Pu Thang Lian Pau ( President -ZRO) thugenna tom kim leh Zomite vaimuakna: 

Zomi Namni a 63 vei dong hong musak a hong tonpih I biak Pasian min ka phat masa hi. Tuni a hih hun sungah hong kihelthei azatakhuai Zomi Nam ni pa Pu Thangsei akipan kumpi lama palai dinga i sawl elected memberte, Special Invitees, officialte, philanthropic Organizationte, Student organizationte, Artistes Associationte, Cultural Troupete, Artistist individual a hong paite leh Zomi mipi hihzahte' maiah thugenna leh thungetna hun nuam i zattheih manin lungdam huai mahmah hi. Hih bang a hun hong pia Zomi Council makaihna ahi Indo-Myanmar Zomi Namni Celebration Committee tungah lungdamna lianpi kapulak masa hi.

Zomi Nam ni pianzia akipan thuhoih tampi i za khin ta hi. Zomi Namni akhiatna (or) Tangthu (history)atom kim cingin tawm gen nuam hi hang. Mihingte suahtakna ding/mipi kivaihawmkhopna (Democracy) deihna hang a hong piang khia ahi hi ci leng kicing pen kha dingin ka um hi.  Tua ahih manin Zomi Nam ni i cihpen Zomite a dingin Suahtakna/ Zalenna Mualsuang ci leng kikhial lo kha dingin ka lamen hi.  Tuni a i thubulphuh ahi " United, We can " cih om mah bangin kithutuahna/ kipumkhatna loin lawhcinna taktak kimu zolo ahi hi. I minam hihna toh tuni a i nuntak ziate kituak mahmah ahih manin i thu bulphuh ahi  “United, We can” cih toh kisai in  thugen nuam i hi hi. Kithutuahna dingin akisam tampi om dinga, tuate lakah tawm khat gen nuam hi hang.

I Kithutuahtheihna dingin:

Khatna ah- I hihna le i minam i kitheih cian masak ding kisam pen ahi hi. Nam kibanglo pen kingaithei mawk loin sisan kineh /kibanglote kingaithei mawk lo hi. Tua ahihmanin tunia hong pai thei/ hong pai thei lote khempeuh in i theih ding i nam vai thupi pawl khat om hi. Mi pawlkhatte in CHIN hong ci om uh a, pawlkhat te leuleu in KUKI ci in hong kithei a, Old Kuki i ci hiam (or) New Kuki i ci hiam. A hih kei le pawl khatte MIZO i kici a, tuate khempeuh Zosuan, Zomite i hihna athak in gen nuam hi hang. I hihna i (identity) pen ciang khia photphot leng a innkuanpih, asanggam mudah kua mah omlo ahihmanin, tuni in, i kam un khatveivei i gen ua, Zomi i ci ciat hi. Laisiangtho sungah i muh mah bangin “Sanggamte aw kampauna bek tawh ki-it loin, lungsim leh chitakna tawh ki-it ni " ci hi. Tua mah bangin tu ni-in zong i kampi bek/ i leii bek tawh hi loin, i hihna tak I kha, i lungsim, i pumpi khempeuh tawh " Zomi ka hi hi " ci photphot le hang Zomi sungah kithutuahna/ kipumkhatna hong piang pan ding ahi hi.

Pawlkhat te in i pau, i ham kithupi ngaihsut huai lo hi. Tun nang sisan leh mi sisan, i pau i beh le phung a tuam ciat hi mah ta leh i sisan lakhiain enleng, hite pen Zosuante hi lua liang a, Mongolian suante i hihna leh hong kici ding ahih manin, kampau in hong khen mah ta leh, i beh leh phungin hong gawma, i behlehphungin hong khen ta leh i kampau in hong gawm veve lai hi. Tua ahih manin akikhen theilo Zosuante i hi hi cih athak a i theih ding deih huai ka sa mahmah hi. Tua banah kithutuahna dingin ah, i hihna i theih banah, tulaitak ih dinmun thei le hang kipumkhatna piang baih penpen dinga, gam leh nam vai bek tham loin i biaknate zong tephat huai lai hi. Abeisa hun khat lai-in, Zomite in dawi le kau, sing le suang bia in i om hi. Tua akipan khanglo in tu in  khristian i kic hi. Khristian hihna hang le i biak Pasian hangin hih ciang dinmun atung thei bek i hi hi. Ei khristian te'n limtak ki puahphat huai mahmah ta hi. Laisiang Tho (Holy Bible) sungah Pasian in Israelte gam ciam munah Moses makaihna tawh Kanan gam zuan uh hi.

Israel te kimakaih zia le tulaitak Zosuante dinmun kibang kasa mahmah hi. Moses leh Joshuate in Israel minam sawmlenihte lakah Siampi zong om ciat hi. Tua bangin a kalsuan laitak un Siampite in ko makai hi kei ung ci tuan lo uh hi. Moses in Joshua kiangah hih makaihna vaipuak pen nang khutah hong ap mai ning cimawk lo hi. Israel nam sawmlehnihte zong atuamtuam in kikhen in, om loin kalsuankhawm uh hi. I biak pa Pasian in a mi Israel te ading a tapa Jesu leitung ah hong sawl hi. A hi zongin a mite in thei loin, sang zolo uh ahih manin, ei Gentail mite in hamphatna ngah lawh i hi hi. Gentail sungah khatin Jesu tung pan na khat a nget ciangin Topa Jesu in, " Tate nek ding an Ui pia ding maw" ci-in dawng hi. Jesu in Leitung hong kumsukna pen, i kha bek hong gum khia hi loin, i taksa mahmah tankhia ding ahi hi. Tua bek tham loin, mawhna sungah sal a tangte tankhia dinga hong pai ahi hi. 

Abeisa kum 20 hun lai in Manipur home State sungah, Zomite minam nei lo cibing, nambing ci-in nakpitakin thang mahmah  hi tase mah leh outside Manipur i et ciangin bangcin i kalsuana, Shillong a omte, Kolkata a omte, Delhi a om ten, Student lamah ALZOSA [All Zomi Students Association] ci-in kipawlna kinei a, Student khempeuh ALZOSA sungah na kipawlkhawm uh hi. Tua mah bangin, Khristiante biakna amte zong ZCF [Zomi Christian Fellowship] min tawh a munmun ah agamgam ah kipawlkhawm in, lungdam huai mahmah a, tuate hang mahmah tawh thupha ngahtak zong cingin ka mu hi.  A hih leh tuhun i minam sung om zia koici i sa hiam ? I homeland Manipur sunga om ten, i mun ciatah Zomi i ci ua, Zomi hitheita, ahihhangin state pua lam i paikhiat ciangin bangci kimuh i hiam? I organizationte i et ciangin, koi munmun a om ten nambing Student organization, nambing philantropic organizationte i thangsak ta. Nambing denomination biaknate i thangsakta uh ahi. Ahih leh hi taka Zomi hi in, apulamah tuadanin omleng, ong kilehbulh zel hi lo hiam?

Abeisa kum 20 hunlai leh tuhun alang khatah hoih, alangkhatah hoihlo zel. Alang khatah hoihlo, alangkhatah hoih zel cih bang khatin om in ka mu hi.  Ahihleh tuabang bialbual tawh i lungkimzo diam? Tulaitak i minam sung kivaipuak zia kei mimal muhna ah gampua lam a om (Foreign) aten, Zomi Community ahikeileh Zomi Christian Fellowship ci-in ultungsak mahmh uh hi. Hi thei hi le outside Manipur munte ah, Zomi Council (ZC) ahih kei leh I nambing Student Organization tangin Zomi Students Federatin [ZSF] bang, I nambing philanthropic organizationte tangin, Zomi Youth Association [ZYA] cih bang. Nambing-chibing leh apaubinga denominationte tangin Zomi Christian Fellowship cih bangin omleng, I nam kalsuan zia leh I biaknate tonkhawm hilou ding hiam? ka ci nuam hi.

A diakdiakin biakna lam bang kong genkha a, pawlkhatten na zadah mai thei zong om kha ding hi. Ahihhangin kei muhna ah, i nam kipumkhatna ahat semsemna dingin khalam leh salam i khan khawmtheihna dingin, biakna kipawlna le kivaipuaknate enkawm leng ahoihpen dingin kei mimal upna tawh hong pulak khia ka hi hi. Ngaihsun taktak le hang pawlpi makaite le I pastorte in kha thu i gen ciangin misite lakah kha thu kigentheilo hi. Mihingte lakah kha thu gen I hihmanin, i kipumkhat kei leh, bangmah kisemtheilo hi. Tua manin kipumkhatna dingin taksa leh kha apoimoh dan kibang cih a gen nuam i hi hi. Tua bangin i kalsuan hun ciangin, i gamsung, i nam sungah no pawl, ko pawl, no beh ko beh cihte om nawn lo ding a, Ei (Eite) cih tawh kalsuan theita ding i hi hi. India danah cibingin recognised i na mu pen lungdam huai mahmah thukhat ahi hi.

I tribe organizationte ahi bangbangin koih ta leng. Student organization ahi a, phattuamngaihna na asem philanthropic organizationte hileh, kipanpihtuahna, pilna-siamna, khantohna ding nasem pawlpi hi a, chibing kepbitna hita dihlo, cibing-nambing kepbitna pen tribe organization om ahihmanin, tuabang khempeuh khatah kipawlkhawm tazen leng no, ko cih ong bei dinga, khangthakten mun ong luah to ding uh a, upate tribe a na kipuapuate pen innkuansung vaihawmna in i nei dinga, Nam vaihawmna pen Zomi ah kalsuanthei ding i hihmanin, tule tuin i kalsuan pah theih loh hangin, tal domin ngaihsun ngeungau le hang cih ka lunggulhna thu hong pulak khia hi.

Eilo midangte, i etteh theih ding pawl khat om hi. Manipur context ahi ka gennop adang hilo. India a, Zomi ci a hong kalsuantheina dingin, i biak pa Pasian kiangah thu i ngen dinga, ei te khempeuh mapang khawm lehang, Sabuai (table) khat um khawma, na i sepkhoptheih ciangin i dinmun kiciantak hong kilangkhia ding hi. India a Manipur context  Zosuante dingin Zomi Council (ZC) upate leh i Pawlpiten ana ngaihsut ciangun Phualpi kumpi toh kiho ta leng, bang hoih pen diam cih ana kigel a, tua dingin India Constitution  Article 244 (A) a, Autonomous State, tuapen i kihona ah thukimna hileh a ci nuam i hi hi.  Tua in nambing-cibing nomenclature pen base kei henla, Manipur a om singtangmite huam leh cih thu hipen hi. Kihotuahna a om theihna dingin tu ni-in makai tuamtuamte akipan i laisiamte hitaleh, I pankhop kul mahmah hi. Tuhun pen i ngaihsutna sunkhop hun ahi hi. Tu bang hun kan a hun hoih om khollo ding hi cih a thakin kagen nuam hi. 

Ka gensa om mah bangin Israelte zong akalsuanna uah, mipite le makaite uh pangkhawm diamdiam uh hi. Israelten gal adolaitak un, Moses in akhut alik ciangin Israelten zo uh a, akhut akhiat suk ciangin lel dek zel uh hi.  Tua bang hun ciangin Moses mawhsak mawk loin, akhut akhe kham( gim) ding donpih uh a, tutna ding pia in Joshua, Aron ten aban domkangsak uh hi. Tua ciangin “Moses in, " Ni aw hong ngak aw, Gideon ah hong khawl aw, Aizalon kuam ah ding cip in la, Ni aw na khawllai aw, ka galpa khut sung pan gam ka ngah mateng Ni aw hong ngaklai aw” na ci hi. Gal azawhtak ciang bekin Ni tum pan hi. A galzawh dong uh Ni in ngaktakpi mawk hi. Ih makaite a khe uh akham teh, tutna ding pia a, akhut uh akham teh a ban uh dopkangsak ding ahihlam ih phawk ding thupi mahmah hi.  Ni aw, na khawllai aw, Kha aw, na khawllai aw, gam ka ngah mateng uh, Ni aw na khawllai aw cihna ahi hi.

Zogam sung Zomite dinga vaihawmna thu ah, pankhawmsiamna, ngaihsuthoih kipiaktuahna, sumlepai tawh mapankhopna, pilna khuak zngh theite in zang khia in, agen siamsiam , a sa siamsiam in sa in,  thal tawitheiten tawi in, kalsuanleng nikhat ni ciangin ih lawhcing pelmawh ding hi. A 63 veina Zomi Namni ahih toh kitonin Zomite sungah kithutuahna, kilemna, muanna, kipumkhatnate kip semsemta hen ci in i thungetna hi sak ciat ni. Zogam, Zomite damsawt hen.



Posted by : Tongsan Tanute

 


Comments




Leave a Reply

    Tungzang News

    All