WWW.TUNGZANGNEWS.COM

 
Abeisa January 6,2012 ni a Kawlgam kumpi tawh State level hiamkham abawl CNF/A te in Tedim gam Bukphil le Zimpi/ Zimte khua ah zum (Liaison Office) hon sawmna vai tawh kisai Zomi khua tampi in anialna laite uh Pu Vum Nang le Pu Nung Sian Tuangte in Nyipydaw zumpi ah puak uh hi. Tua banah gam pua a om Zomi kipawlna ahi World Zomi Congress, Zomi Association of US te in zong nialna lai akhahkhiat banah, adiakdiak in Zomi Innkuan USA in abeisa January 16,2012 ni in Indianapolis ,US ah Chin Suprem Council, zumpi ah laikhai bek tham loin, makaite tawh kimuhna nasiatak nei uh cih kiza hi.

Tua kimuhkhopna tungtawn in Chin Supreme Council makaite in akhatveina CNF / Chin Suprem Council Meeting pen February 22-24,2012 sung America gam, Washington DC ah nei uh a, tua laiah tulaitak CSC President Dr. Za Hlei Thang, Pu Lian Uk ( President 1), Pu Salai Kip Kho Lian ( President-2), Pu Thang Nang Lian Thang ( President-3) te le CSC member 12 kihel cih kiza hi.

Tua Meeting ah abeisa January 6,2012 ni a CNF le Kawlgam kumpi kikal Chin State Level tawh hiamkham (Cease Fire) abawlna tungtawn a CNF/A in Tedim gamah Zum (Liaison Office) ahon sawmna tawh kisai Zomi Innkuan USA i khaktanna lai tungtawn in kikupna thupitak nei uh cih kiza hi. Tua thukikupna pan thukhensatna tungtawn in Tedim gamah CNF zum ( Liaison Office) hon ding vai tawh kisai Tedim gam a om mipite' deihna bangin kalsuan ding akisapna le abeisa hun a Tedim le Tonzang gam sungah CNF te tatsiatnate hang a Zomi( Tedim kampau) te' lungkimlohna khempeuh kilemna le kilungkimsakna neih masak ding akisapna thute bulphuh in Chin Supreme Council President Dr. Za Hlei Thang in February 23,2012 ni-in thupulakna ( CNF Statement) khahkhia hi. Tua CSC Meeting le a lai khahkhiatna hang pen Zomi Innkuan USA makaite laikhakna tungtawn a khahkhia cih kiza hi.

Tua banah hih CNF- Chin Supreme Council Meeting tungtang ah Kawlgam kumpi tawh kilemna a bawl khit uh anihveina kimuhkhop ding vai, Kilemna a bawl khit nasep maban tuamtuam te nasiatak kikupna nei cih thu USA a om Chin Supreme Council, member khatin gen hi. CNF le Kawlgam kumpite kilemna abawlna tungtawn in CNF i sep ding vaipuak apiakte sung pan Tonzang le Cikha gam ah Beng ciinna le zuaknate kumpi tawh mapangin nasiatak suksiat/ khaktan ding cih kiza hi. Tonzang le Cikha gamah Meitei (kate) te' khemna le makaihna tawh Beng nasiatak kiciing in Zomi khangno tampi in siatlawh/ sihlawh cih kiza hi.

CNF in Tedim gam ah Zum a hon sawmna vai tawh kisai Pu Vum Nang le Pu Nung Sian Tuangte in Nyipydaw ah President Thein Sein, Vice President le Hlutdaw President te min tawh nialna lai apiakna pen Kawl kumpi in diksa/ thukimpih uh ahih manin, CNF in a mau thuneihna bek tawh gamta thei nawn loin, Tedim gam a om mipite' deihna bangin a gamtatna ding thukhensatna nei ta cih kiza hi.

Source: KNT & BBC
Translated: Tongsan tanute
 


Comments




Leave a Reply