WWW.TUNGZANGNEWS.COM

 
2014  Pinlong nihna ading kua…CNC maw.

Gam thukhunpi ( 2008 constitution ) pen puahpha ding ahih keileh athak
khat at pha zaw ding cih ngaihsuhna namnih tawh kawlgam buppi a kibuai
mahmah laitak ahi hi. Eimi sung leuleu ah thukhunpi vai ban ah CNF le
CNC ( Chin national conference )vai te  ah ngaihsutna tuamtuam om to
lai hi. Akuama peuh in hih thute khinkhai in  I ngaihsutna ah
phattuamna a om khakleh cih lunggulhna tawh a cih taaklo kei tel dan
pawlkhat kihawm sawn nuam hang.

Pinlong nihna cih pen Kawlgam Democracy ading mikhempeuh in a lunglut
leh a kilam et mahmah thu khat ahi hi. Hih thu a pankhia pen ZNC ( tun
ZCD ) hi a, Zomite patsa hi cih theih ahi hi.

Tu tunga panglong khawmpi ding pen I pute hun lai a tawh kilamdanna
pawlkhat ong om ding hi.

1)      Inntek ding pen kumpi ( myanma peace centre )ong hi ding hi. Nay
Pyi Taw ah kibawl ding ci phot hi.

2)      Abeisa bangin ukpi te bek tawh hi lo dinga MP te, galkapte,
thuneite, state level palai, thautawite, party te, CSO’s te ( civil
society organization ) cih bangin kim takin kihel ding hi.

3)      Abeisa lai in suahtak khit Kawlgam mailam ding thu kikup mah bangin
tu tung in zong Democracy tawh Kawlgam mailam kalsuanzia ding kikupna
hi ding hi.

4)      Hih sungah gen nop bangbang deihna bangbang ngetnop bangbang (
minam vai, gamvai, thukhunvai, district vai, federal vai, autonomous
vai… ) suakta takin thu kisung thei ding hi.

Kumpi in “Pinlong khawmpi tawh a kibang khawmpi khat”  acih kiukiau
hih Pinlong nihna khawmpi tungtawn in  Kawlgam mailam kalsuanzia ding
le gamlim ding a kisek pha kik ding hi  cih theih ahi hi. Hih khawmpi
ah state palaite le thautawite’ thusunte pen palai dangdang te
thusun’na sangin ong thulut zaw ding hi.

CNC ( Chin National Conference )

Pinlong khawmpi sungah Zogam (Chin State ) bup tangin  ading ding (
palai )le thusun’ ding zong ong kisam hi.  Kigin kholh kisam pah hi.
State tanga thusun’ theihna dingin gambup khawmpi khat bawlloh ong
phamawh hi. Tua gambup khawmpi pan a ging khia aw te , thukimnate,
deihnate pen gambup tangin palaite in Pinlong khawmpi ah athului ding
ahi hi.

Tutunga Zogambup kawmpi pen Zomite ading khawmpi nihna cih theih ahi
hi. Zomi namni ong piankhiatna Falam khawmpi ( 1948 Feb 20 ) pen
khawmpi khatna ahi hi. Akisam taktak pen Zomibup a huam zo khawmpi a
hih ding a kisam ahi hi. Tu ciangciang Zogam bup huama khawmpi abawl
sawm/ kithawi pen tu laitaka I gengen CNC bek om pan hi. CNC ah inntek
ding pen join committee a tuam om a, CNF in sponsor a sem ahi hi. (
thukimna le thukim lohna hi loin thuluanzia gen na hi ) Tua CNC sungah
kihel ding leh kihel loh ding cih ngaihsutna nam nih om leuleu hi.

Kihel leng

CNF pen sponsor hi a inntek hi zenzen lo hi. Ahi zongin inntek za I
piak lehbel nuam mahmah sawnsawn ding uh hi. Tua khawmpi ah va kihel
leng CNF ( sponsor ) lungdam toto lai ding uh hi. Banghang hiam cihleh
khawmpi a lawhcing suak pah dinga, Pinlong khawmpi ah Zogambup tangin
maingal takin a kihel to thei suak ding uh hi.  Amau lunggulhna tampi
lakah Zogam sungah panmun gina khat ngah theihna ding pen athupi pen
khat ahi hi. Adangdangte in zong ei deih bangbang ( minam vai, gamvai,
thukhunvai, district vai, federal vai, autonoma …… ) state tangin
pinlong khawmpi ah CNC tungtawnin thu a kisung thei ding hi.

CNC ah kihel manin CNF te mi hi pah ding cihna hi zenzen lo hi. Kisai
vetlo hi. Gtn:  DASSK in u Shwe Mann le President U Thein Sein  te
tawh khut kilen in na nak sep mahmah uh hi. Tua pen Piteknu zong
galkapte mi suak ta ei , aki ci thei diam. Piteknu kiangah hih
galkapte ong bawlsiatnate theilo na hiam, bang hang amaute vaihawmna
sungah kihel na hi hiam akici thei ding tawh kibang napi kuamah in ci
tuan lo hi.

Kihel kei leng

Kuamah kihel khol kei leng CNC vaihawmte pawl ( a diak in CNF )te nuam
veve ding uh hi.  Kua mahmah kihel kei vet leh ut zaw lai ding uh hi.
Akihel nuamlo te tungah lungdam ong ko nuam phial ding uh hi. Banghang
hiam cihleh  CNC pen a lem bangbangin bawl veve ding uh a, Zogam bup
tangin CNF in amau deih bangbang Pinlong khawmpi ah thu sung hiathiat
thei pah ding uh hi. Tua thusun’na pen CNF thusun’ ong hi nawnlo dinga
Zogam ( Chin State ) thusun’na ong hi hiau ding hi.

Gtn:  Galkap kumpi bawl ahi Nyaung Na Pin Conferenec panin NLD palaite
 ( 1993 ) a nuak tai tawh etkak theih ahi hi. Tua conference sungah
NLD te a om nawn loh ciangin a lungdam taktak pen galkap kumpi mah na
hi zaw hi. International in zong NLD le DASSK pakta in khut kibeng
ziahziah hi. Ahi zongin DASSK a kipan Kawlgam mipi a kisum mahmah hi
lel hi. Banghang hiamcihleh constitution pen galkap kumpi in amau deih
bangin bawl thei bek tham loin kin bawl hetlo uh a, kum 10 val sung
bawl hithiat zezen hi. 2008 ciangin thukhunpi kipsakna kinei a, 2010
ciangin thukhun siksan in kitelna kinei to hi.

Lampi dang om tham hi

Zogambup tangin thusun theihna lampi dang zong kivaihawm thei veve
ding hi.  Zogambup khawmpi bawl in gam bup huam zo peuhleng tua zong a
kip ong hi veve ding hi. Party te in zong party min tawh thu kisung
thei ding hi. CSO ( civil society org ) te in zong kisung thei kha
ding hi. Ahi zongin tua khawmpi sung lut theihna ding lampi I zuih kul
masa hi

Minam vai, gamvai, thukhunvai, district vai, federal vai, autonomous
vai…cih te pen meeting tu ziau a, ngah theihna ding lampi pen iplah
huai ngiat takpi mah hi. Ciamnuih kam in “ em sa ” cih theih ahi hi.
Nek theih lian ahi hi.

Gam vai khawng gengen napi khua-ul sisan luanglo, hluttaw thukimna
zong kul nawn lo a, deihteng sep theihna mun tun theihna ding vai
alunglut zo lote bel na laibu sim tawm lua hiam,  na mipite khual
khollo na hiam , na ngimna taktak bang hiam cih nop huai kha ding hi.

Thukhupna

Gam khat minam khat mailam hun saupi ding thukhentatna hunthupi te pen
a om denden hi lo hi.
 Hih bang hun sungah ei le ei ( ei teng bek ) I din zawh ding a
kisapna mun a om mah bangin, ei tawh dinmun kibangte tawh I dinkhop
ding mun zong om theizel hi. Midangte tawh I dinkhop ngeingai hangin
ei ading ciat mah tawh a kiding veve hi lai hi. Mimal muhna hi a, dik
na sak leh na tawm in la, dik na sak keileh na pai lel in. ( kawlgam
constitution tawh kizom to ahih manin hun a lemleh behlap lai ni )

Liantuang
kawlpi ( 09400511757 )
 


Comments




Leave a Reply