WWW.TUNGZANGNEWS.COM

 
October 25, 2013

Athu: Athum veina Zomi Khawmpi (The 3rd World Zomi Convention) Hopihna

Kongit ka mipih ka cipih Zomi ulenau khempeuh aw,

Zawhthawhna tawh ki-ukna (Colonialism) vai a bei khit Kum zalom (20) kiim 1950 kum pawl pan a kipanin Leitung bup ah minam tuamtuamte ahihna tak uh (Identity) hong lahkhiat nop na-uh lungsim hong khang hethat hi. 1955 kum a Indonesia gam Bandung khuapi ah kibawl Asia leh Africa gamte (Asian-Afro) kimuh khopna Khawmpi (Bandung Conference) mahmah in zong minam veina leh phawk thakna (ethnic- awareness) hongpia in hong khanglo sak mahmah hi.

Atung a, leitung tawnzia dungzui mah in sim leh maal a kikhen Zomite zong nidang a, ih zumpih leh ih pholak ngamloh ih Zo minam lungdam pihin tu-in ih teen cilna Zogam bek hilo leitung bup dongin ih Zo minam pahtawi-in a munmun ah ih tangko khiat man in lungdam huai kasa mahmah hi.

Ih Zo minam i-it takpi leh Zomi khempeuh zong ki-it in kilawmtat siam a, khut kilen khawm in Zomi bup khantoh nading hawmkhawm geelkhawm in ih sep khop kul ding hi. Leitung bup a om Zomi khempeuh in mailam ah lametna lianpi ih nei hi. Tutung a, Athum veina Zomi Khawmpi (The 3rd Zomi Convention) pan in ataang Zomite mailam ding nong vaihawm khiat ding uh ka lunggulh mahmah a, ka omna mun pan in thu kong ngetsak hi. Leitung bup Zomite ki-it in khut kilen khawm a, mai ih nawt khawm ding vai hong hawm ta un. Zomite ih nungkik ngei kei ding hi. Banghanghiam cih leh, Zomite hong bawl leh hong kem hong huai a, lam honglak, ih biak Pasian pen a nungkik ngeilo Tung Pasian ahihi.

Athum veina Zomibup Khawmpi a kihel khempeuh leh leitungbup a om Zomi khempeuh ih biak Pasian in thupha hongpia hen la, Ama’ minthan nading leh Zomibup pi khantoh na dingin hong zang kim ciat ta hen!

Itna takpi tawh,

Rev. Dr. S. Pau Khan En

GZA Makaipi

Yangon  



 


Comments




Leave a Reply