WWW.TUNGZANGNEWS.COM

 
Dear  U le naute teng

Om tek pan I damkim tek hia.

Inn lamah thupiang tuamtuam tam mahmah ei. Adiakdiak in gamvai ah
kikhelna om to ziahziah mai hi.

Thukhun puah ding vai

Ei tawh a kisai zawdeuh pawlkhat zong ong om zel hi.  2008 thukhunpi puah ding le athak gelh pha ding cih ngaihsutna namnih om  hi. Kumpi lam panin zong puahpha nuam uh ahih manin thukhun puahding leh encit
ding committee khat ong nei uh hi. Tua committee tungah thukhun vai ngaihsutna le deihna bangbang kipuah ciat hi.

Tu ciangciang Deihngetna le ngaihsutpiakna 300,000 val om ta ci zen hi. Tua laiah galkapte le USDP te in zong puak uh hi. Hih lai ah a thulamdang phial khat ah state le Division te’ chief minister ding pen amau state le divisionte’ palai te in  tel ding cih nangawn pen USDP te in ngen zaw bilbel hi. Tua ban leisung sumpiang hawmzia ding a
kipan thu tampi kikhel sawm mahmah ahih manin kawlgam vai a lunglut leitung mipil lianpi  tuamtuamte in  zong lamdang sa mahmah uh hi.

Kum khat cin pawi bawl

2013 kum kipat lamin Gullu vai ong om ciangin a lem bangin a kidiang ngeingai ahi hi. Ei kia bek tawh hi zolo ding ahih lam I tel ciangin kawlpi khuasunga kipawlna tuamtuam (Zomi siamsin kipawlna, Naythar le ama naseppih teng, 8888 kalaymyo, upper Chindwin youth network, Chin literature and culture,…,) kizawn in amau teng tawh Gullu le kabaw kempawl ( Gullu and kabaw valley watch group ) cih thulu tawh kikal suan to hi.

Hih kipawlna pen Gullu vai bulphut kipawlna dan ding ahih hangin a taktak ciangin gullu vai bek hi loin kawlpi le kabaw kuam sung thu tuamtuam la tuamtuam tampi tak ah nasia takin a mapang kipawlna lianpi khat ong suak hi. Kum sung mapanna pen tam cih takin na tam hi. Tu nai a thu piang India le kawlgam gamgi vai nangawnah kibul din mahmah kha laizang hi.

Kipawlna kumkhat cinna pen 11 January  2014  ni 1 : 00 – 4 : 00 pm in Shin Hong Hall ah na bawl thei ung. Kawlpi le khuakim khuapam kipawlna tuamtuam 20 pan mi 150 val ong kihel thei hi.

Lawm  Andrew Thatuang ( Tg Thanng Khan Tuang ) in hun uk ong sem hi. Amasa in Naythar phonggi pa in thukong honna ong nei masa hi. Tua khit  ciangin gullu vai kum khat sung mapannate et kikna leh muhkhitna te
pulakna Zogam leisung sumpiang kem pawl tangin ken na nei thei ing. Tua khit ciangin 8888 kalaymyo, upper Chindwin youth network, mualbual khua pan palaite,  …, cih bang thugenna kinei toto hi. Nasepnate tha kingah tek ahih manin tu kum sung zong khut kilen a mapan khop ding kigel leuleu hi.  Hih kipawlna tawh tu kum sung sep khiat dingin thu 7 na gel leuleu ung.

1)      Gullu mual nisuahna lam ahi, tuingo lui dung a om khuate ah mipi
kai khawm in thugenna nei kawikawi lai ding.
2)      Kawlpi huam sungah mipi tawlngak theihna ding huan lianpi khat vaihawm ding
3)      Khangno le University sang naupangte guihtheih khamtheih tawh a
kipelh theihna ding lampi om bangbang tawh pansan la ding
4)      Kipawlna ah pawl mi behlap lai  ding
5)      Kawlpi khuasungah mipi neih tuam ngiat laibu saal khat hanciam ding
6)      Kabaw kuam sung suangmeihol khuk le project tuamtuamte hoihtak en
cik in a kisam bangin pansan la ding
7)      Kipawlna ah panmun hoih tak kigual pha ding

Cih bangin gelna na nei thei ung. Nunga I gen sa mah bangin kum khat sung tawntung mapannate etkikna laibu zong hih hun lapin a kibawl zo suak hi. Laibu pen a vekin  color hi a, A4 laimai 37 pha hi.  Laibu pen mun khempeuh a diakin kumpi thuneite in kimtakin a ngah theihna ding hanciam sawm hang. DASSK kiangah zong kipia a, tha ngah mahmah in lungkim mahmah hi.

Zogam (Chin state ) palai telna om ding

EITI ( Extractive Industry Transparency Initiative ) “Leisung sumpiang tawhkhiatna nasepnate ah mipi theihtang ding thute theihsakna ding mapanna” member lutna dingin kawlgam in I hanciam laitak ahi hi. Tu in Zogam ading EITI forum leh mun le mualzui in state palai kitelna kinei ding hi. Amun pen Falam ding pen Falam CBC (nidang ZBC ) kizang ding hi. Ninih ( 13-14  January 2014 ) sung hi ding hi. Gullu pawlin inntek panmun a kila ahi hi. Cikha pan Paletwa dong township khat pan mi 3 ta ong kihel dinga, kipawlna tuamtuam pan saptuam mi 10 ong kihel ding
hi.

State dangdangte le division dangdangte in zong a bawl san laitak hi a, tu ta a bat leh amanlang pen in March kha sungin kawlgam pen candidate hi ding hi. Candidate khit kha 6 ciangin member a suak ding hi ta hi. Hih E I T I pen gullu le leisung sumpiang vaite adingin deihna teng kicinna ahih pah loh hang in leitung bupin standard khatin
a san ahih manin hih bang  thu ong om lehzong tawl khat sung i nak ong nuam tuam zawdeuh dingin a lamen I hi hi. Akuakua in abeisa mah bangin I  mapante tatsat loin I hanciam tohtoh lai ding ong kisam veve ding hi.

Tu kum lungtup

Tu ciangciang naklah liangin I suk dian I toh na pen a taktak in kawlgam le Zogam kumpi in logam le leisung sumpiang vaite ading thukhun kip I neih nailoh man hi lel hi. Tua hi a, Zogam ading logam le singkung lopa, leisung sumpiang vaite adingin thukhun gina khat a om zawhna dingin tu kum sungin  hanciam sawm hi hang. Hih pen
lunggulhna hi a, a taksuak zawhna dingin akua mapeuh in ma I pan khoploh ong phamawh ngel ding hi.


liantuang
tawmvei Falam ( 09 400511757 )
 


Comments




Leave a Reply