WWW.TUNGZANGNEWS.COM

 
Pumpi Cidam Nading Nang leh Kei

2014 Kawlgam Census vaai-ah "Zomite' ading lampi hoihpen hikha dinghi" cih lametna leh upna-tawh naakpi-in kalsuanna leh sepsuahna tampi kinei-a, internet laaimaai pan-inzong atheithei-in, aveivei-in, lungdeih suutna, thusunna leh atawpna-ah kinialna-a kipan akilawmlo kampau nangawn kiza dinmun tung-hi. Kigelh ciat-a, lungdeih kisuut ciat-hi. Asiam zawdeuhte-in malmat kiptak honkhat-tawh, asiamlo zawdeuhte-in malmat nei selo, pausuk giapgiap, siampipi akisiam losakte-in akawinono-a heizeel cihteng-tawh census vaai-pen minam ideological concept liimlang-a etna bang-in kimu diimdiam ahihman-in akilawmlo zahdong lehpanna upmawhhuailo pipi tungpan-in ging-hi.

Banghang-in gui neuno ahihkeileh awsuah kidanna kohkanpih?

Kohkang (ngawngkhauh: stubborn) cihciang-in taangpi-in amaan thuhual khat-ah atotna hual sung-a kihel noplohna, tuampan-nopna, tangpeek-nopna hi-a, cultic movement nam-khat ahihi. Zomi sung-ah banghang-in upmawh lohpipi-in tangpeek-nopna pawlkhat hong pianghiam cihciang-in aziak thum (kei' muhna-ah);

Census-pen minam khat-a luankhop nading legalisation of national identity (minampi hihna thukhaamzil suaksakna) ahi kimlaai, politics kimawlna tualpi kisa khialkha-hi. Politics-pen I' kimawl khial vaanglakleh akhang akhang-in kisuplawh-hi. Adiak-in vaaihawmna hualpi khat sung-ah nambiing lungsim-tawh behlehboung lungtang-tawh politics akimawl khialkha te-in huangdaai kaihna/daaikhanna thuak thei-hi. Col. Lian Cin Zam-in Kawlgam thaupi khempeuh alet hun-in ama' masuan telkhial leh kampau akidop zawhloh man-in, "Yangon kahong kaap dinghi" ci-in Kawlmi leh Zomi kaal-a adongdaii politics (cheap/shallow politics) akimawl khaak man-in tua hun-in 'pasalvaai' mahmah saamding himahtaleh tuni ciangdong Zomite gaalkaap ulianpi asuah nading pan-a akikhaaktanna, hongki tuam ciapteh giugiauna, hongki gimneihna kilawhtaak-hi. Kawlte-in naakpheh avawhloh peuhmah gaalkaap ulianpi leh kiukna lam-a ulianpi dinmun-ah Zomite hongkoih ngei nawnlo-a, hongkoih ngei nawnlo dinghi. 
Marxism guipi khat ahi, "milipphung' sahkhua vaan khialhna" -zong aziak nampi khat ahihi. Milipphung (majority) cih ciang-in minam lamsang-ah, minam sung-ah milip tampen, sahkhua gamtatluheek azanghtaang atampen mipawl cihna ahihi. Hih milipphung akici tualsung leh tualleenphung (community & society) sung-a atampen ahihkeileh athuneipen mipawl-in miliphiang (minority) te' tung-ah khentuamna, tuambawlna akhauh leh aneem zil-in miliphiang kaatkhiatna, tuamleenna piangden cihpen sahkhuasiampi Karl Marx-in kum tampi-sung kansuutna abawl khitteh kiciantak-in laaibu gelh-a, tuni dongmah akisin ahihi Bourgeois nationalism akhanzia pianzil (nature)-pen ahun amual zil-in paito zeel-a, tualleenphung sung-a thuneidiakte, mipi akisadiakte' guptuam paihtuam neihna leh angsung behlaplapna ziak pan-a agahte ahihi.

Dominant over dominants cihciang-in milipphung' tuihualpi nuai-a patriotism akici minam itna veina hongkhan ciang-in akicing siamsinna-in aphungvuh lohteh tualleenphung' milipphung huatna hipahlo napi-in ethnic minority (nambiing miliphiang) sung-a behpih phungpihte' tung-ah dominant power akici tungnunzawhna lunggulhna-tawh ahaanciam, milipphung anial, alangpan, alehpan mi pawlkhat hongkhang thei-a, tuate' ziak-in national movement-a tuihual apaiding kimlaai, ethnic conflict akici nambiing kitukalhna hongpiang ahihi. Nambiing kitukalhna-a amakaaite ataangpi-pen leitung khanzia-tawh kizuui-a sahkhuasiamzil, kiuknalam siamsinna, leh khantohna lamsang abulpi siamsinna aneilote hi-nuam phadeuh-in, anti-democratic ideologists vive hizaw ahihman-in ataangpi za-aseh 80-in amau' behlehphung' maaimialna lawhden uhhi. Hihpen Huumpineelkaai' gamvaak kaal-a, anote' kiang-ah "hongngaap a-omhiam?" ci-a azawhthawh ngia (fox) lungsim kici-hi. Milipphung' nuai-a miliphiang pihte' tung-ah tungnunnopna-pen democracy inzong phallo-hi, banghanghiam cihleh aituam meetna ding-in nambiing namneute vanzat bang-a zatding leitung buppi-in aphalloh ahihi.
Hih guipi thumte khatbeek-tawh akinahvawh khalo Zomi khatzong omlo-hi. Aziak-pen "Zomi" acite inzong "legalisation of national identity" mah-tawh kipan napi-in gelhzomzom, atawpna-ah adongdaii politics huangsung mah-ah khumh-zeel, mimal leh aboung-a elcihgiapna nangawn-tawh kizom zeel-hi. "Code omsa" acite'n-lah "legalisation of national identity" sang-in "promotion of ethnicity" mitsuan zaw-a, "nationalism" -pen anti-ethinical movement" sa-khialkha uhhi. Hih saankhialhna nuazuui-in asaantaak, a-uphuai thusuutna anei siamlo pawlkhatte' ziak-in Zomi sung-ah theihlohkaal-in "ethnical altercation" akici kitotna ling-in zungkha-hi.

Legalisation of national identity promotes ethnical rights

Gamlei zuui-a minam khat-a akalsuan tualleenphung-in gamukte' tungpan-in minam khat hihna upazil (legal)-a kipsakna a-om mateng-in tua minam sung-a ethnic akici nambiing namneute-in phungvuhna leh zuunna ngah theilo-hi, banghanghiam cihleh pumpi' set bulpi ahi lutang (khuak) acidam keileh pumpi hiangte cidam cihbang om theilo-hi. Lpd: Khuak sung munkhat asiat man-in khut, khe-a kipan pumpi hiang khatpeuh zaw-thei, si-thei, cihbang ahihman-in lutangpi acidam loh-in ahiangte cidam theilo-hi.

Ahon-a a-om minam khat' kalsuanna sung-ah sahkhuasiampi Max Weber-in "Tualleenphung (mihing hualpi khat)-pen aziak khatpeuh-in tumtan thei-a, tangteel (earthworm) bang-in aki tumtan zahzah hing ciat-hi" ci-in genteh-a, ahizong-in alulam-in lei aneek nading kam aneih hang-in aki tumtan atumtawng dangte-in lei neek nading kam angaak na-in pawlkhat si-hi. Émile Durkham' kansuutna leuleu-ah kician tak-in, "sahkhua tualleenphung-pen mihing pumpi-tawh kibang-hi, hiang khat acinatleh pumpi khempeuh-in atawm atam-in thuak tek-hi" ci-in pulaak-hi. Minam hualpi ahi pumpi hiangte acinat ciang-in minam buppi naa-a, minam phungpi acidam ciang-in minam hiangte cidam theipan-hi.

Zomi-pen adiak-in Tedim, Tonzaang, Cikha kuamteng-ah (ka' theihkhial keileh) milipphung (majority) ahihi. Kawlmaangte' hong tenneenna gaalhiam ziak-in awsuah leh akualkual, akhawkkhawk-in kitukalh theih nading-in malmat ding-a amaan akisa khialkha zahdong-a I' minam atheilo minamte' ciaptehna omsa-pen naakpi-a angaihsut-huai mahmah thugui lianpi khat ahihi.

Atung-a sahkhualam thuluan (sociological/social theory) te ngaihsun lehang; "code omsa" te-pen ei unauteng hongki khenna ahih ziak-in, tua a-omsa I' phungvuh sawmna-tawh I' lutang I' langdo khaakleh koimah-ah khuasuak loding I-hihlam phawkding thupi-hi. Milipphung-a akinei, milipphung sungpan-a kampau-a akineite inzong "hiang khat, nih acinatna tung-ah naa sakna, thuakpihna" a-om keileh milipphung lungpuak hilo-a, I' minam phungcing ngeilo dinghi.

Mittang-in khe' mun-ah paileh mittang sung-ah leivuui luut-in pumpi buppi-in khuamu thei nawnlo dinghi. Khe-in mittang mun-ah tu-nuam liauluau mawkleh koimah kitung theilo dinghi. Minam-pen pumpi-bang hi-a, asamzang nangawn acidamding akisam ahihi. Samzang cidam lo-in pulhmangleh lutang kolh ding-a, khutcin, khecin nangawn cidam keileh "dammawhna"-mah ahihman-in minam sung-a beh-om phung-om khempeuh acidam kimding naakpi-a thungetna leh itna-tawh mapanding ahihi. Minam vaai hi-a, kiukna vaai hilo-hi; minam vaai-ah pumpi acidam loh-in kiukna kimawlna tualpi-ah aluut-in kiluut ngeilo dinghi.

Zomi-in kolbulh khaukhih thuakna pan-in kol akiphel (akizop tohsuakding lamen ni)-tuung hipan-a, khutte naa laai-in, khe-te nim laai-hi. Cidam nading zatui ne-in, thahaat nading vitamin ne-a, thazanna (exercise) laak kipanding hihang! Ameima khutte, animgawp khete zatui nuhding hihang! I' nuhsiam keileh sakol eek khawng, bawng eek khawng nuhnuh loding hihang, tua hikeileh guuluut-in pumpi thazawn sakkha dinghi. Minam' liamnate guu nuhding kituhteh lo-in, zatui ahihkeileh tuisiang beek-tawh sil siamding haanciam ciatni!

Zomi thazanna (exercise) masapen 914-ah kuuiciau-in, agei-ah (ဇိုမီး) cihding kal masa ahihi. Minam lutang Thaang Mual-ah om-in, akhete, agilpite Lungleen Kawl-ah omleh koici lampai thei, koici gamta theiding ahihiam? Lutang' omnana-ah omding thumasa hi-a, hih pumpi hoihtak kizom khin peuhleh pai nading akilawm munte-ah paithei-in, sepding kilawm bangbang kiseem theipan ding-a, neekding kilawm bangbang ne-thei panding-hi. Pumpi hiang khempeuh agawm khawmding Nang leh Kei hihang!

Zomi Pasian' Thupha!

Zokhai

*********************************************** 
T. Zokhai ITNA-IN GUABANG HINNA-HI 
60 Narr-Maen Drive 
Croydon Hills VIC 3136 
Melbourne, AU 
Tel: +61 39723 0460 
Mob: +61 420 800 560 
***********************************************

 


Comments

04/12/2017 05:12

The analysis of the political PEST can also extend further depending on the needs that they should see in order for them to check the other factors. Once they incorporate the important areas in the others, then they will get the stable company that they prefer.

Reply



Leave a Reply