WWW.TUNGZANGNEWS.COM

 
2044 Myanmar Census le Chin State Khuahun

2044 March kha sung ni khat Chin State khuapi Haka Wantumong tualpi ah hi. Alu uh ah Kawlte lukhu mei-kai nei mong kyat tayi lukhu khu tek Kawl puan taihpong dan in aki khui Haka puan silh, Falam nik teng numei le pasal designed tawh numei pasal honkhat, Haka khuadam sungah puansilh lo, taw guak in a om, ciltang kidawk khai liklek honkhat, puan silh napi, a nawi langkhat kimu sak honkhat tawh, lai at nasem tawh aki gawm mi 56 kim a tu uhi. A ihmu kha tawh phone game kimawl sim tawh internet chatting tusim tawh lusu sa tek in,dai dipdep in a tut laitak uhi. ‘Put ‘cih kua hiam kitel pak lo veih kipek sim na ngawn a gin kizak phengphang laitak hi. A sawtlo in, veih uih lua mahmah ahimanin pau lo in atu tengin a nak uh hum in, lusukna tek pan khuadak in khat le khat ki en khuan khuan uhi. Veih ging kiza teng bek ahilo aging kiza lo in veih pek asiam mahmah honkhat in zong a veih uh na pek sim uh ahimanin veih uh lua mahmah mawk hi.

 

Tua tualpi kiu li umcih in, Meiteite makaih palik galkap a dim in phalna omlo in kuamah lut theih lohna dingin a cing zong om dimdem hi. Meiteite zong Chin State minam sungah kihel uhi. Nidang a China le Wa training tuak Meitei galkap te in Chin State ah Border Guard Force makaih kipan uhi. Nidang lai Chin galkap CNF makai te atamzaw pen 1990-2012 dong phial kum 20 val leitung kim vel in khualzin, gamvai paulap zuau khem in noptak oltak in sum muthei uh ahimanin 2010 khit Kawlgam ah aciah uh ciangin midan in milak ah nasem thei nawn lo uhi. Gamdang mi citizen card tawi vive sa uhi, sabuti sangin macdona duh zaw uh ahimanin 2015 khit pawl in agam tek uh ah ciahkik zaw uhi, tampi mah in leitung hong nusia khin uhi. CNF naltangte lah kum 20 val mah guta, buluh in a om khit uh ciangin milak ah om thei lo, nasem nuam lo uhi. Mizo gam ah YMA te sawltak in om zel, Ciau dungah sumbawl khualzinte lamkal ah pangin sum ngen zel cihte nop sa zaw uhi, khang thakte in lah thau tawi ding sangin laptop tawi nuam zaw ta uh ahimanin mithak ki tatsat in CNFte Chin State ah tam om nawn lo uhi. Tua teng tawh Meitei te in palik galkap lam ah munkip ngah in thu nei mahmah uhi.

Biakna tawh kisai in bel Northern lam ah Christian a tam pen mah hilai in, pawlpi kikhelna tampi piang hi. “ Christian suah veve Baptist sungah lah I om hang USA te in hong en kei lua. Ei piangna ABM Southern Baptist Convention te lah Baptist World Alliance pan apai khiat uh sawtta e. USA tawh ki gam la tektek mawk hang ei. Anglican Pawlpi ah lut ni, topa te, pastor te in zinei thei, zu nek zong ki nak kham lo, piangthak zong ki sang thei, kam tuam pau zong kikham lo, seidei thei veve ding, England kumpi in zong hong huh zaw ding hi, Premier League zong England pan hilo ahiam, nidang pek in e lut ding hi, ABM pawlpi, AG, RC, EBC, LaiPian cihte pen minam sung kikhen khapna hi lel e, RC ahoih hang zi ki nei thei lo, pasal ki nei thei lo in, minam tawm tawh Anglican Chin sungah ki pumkhat ni ”ci’n leitung noptuamna bekbek deihte uh ahimanin aminam a nusiat mah bang un apianna pawlpi lui teng uh zong nusia in Anglican Pawlpi ah England huhna lam etna tawh lut gai phial uhi. Southern lam ah bel Buddish biakna khang hi. Kawl kumppi Chin State pen nidang lai pek in Northern le Southern akhen na uh pen Buddish le Christian akhen nop na man uh cih kitel mahmah ta sam hi.

 

Pawl khat in bel “ pawl tai veve ii aw Muslim ah peileng hoih sa lo ii, tam Muslim mihau ten ei huh zeahzeah zo ding akhu, zu le vawhsa mahmah ei duh luat ahi vem, ne sim mai leng e leh Allah pen e aw Abraham Pasian mah hi lo akhu, bangci na sa uh ei ma” aci zong om hi. Mi pawlkhat Chin Zo Muslim ci’n om uhi, a zi ate uh zong Muslim ah lutpih uhi. Khang khat khit teh Arab te huhna tawh Chin sungah Muslim mimal hong khang mahmah zo hi.

 

Bawhlung tualpi laizang ah excersice bawl lah hilo tuabang puan silh, nisa nuai ah tutphah tawh tu demdamte pen midang hi lo in, Kawlgam state sagih sung ah azawng pen le mimal atawm pen gamke hi napi member of parliament kici MP atamna pen Chin State paliman in emergency meeting tu uh ahi hi.

 

Meeting tu ci’n apau omloh pen sunni loh aki nialnialna, aki kupkupna uh gim lua ta in’ lusu in a pau zawh loh laitak uhi. Bawhlung tualpi ah meeting tutna thu in bel, MP tuazah tutna ding paliman zum inn sung kicing lo ahihman hi. Nidang lai a Bo Ni Win galkap kumpi hun lai akipan aki zang Chin Special Division uk zumpi pen ulian khat tawh naltang nasem, a zaneute tawh a om lai hunin mi kita mahmah napi, democracy tawh kituak in minam kim in Minister aki neih hun ciangin paliman meeting tutna ding kizang thei nawn lo hi. Zumpi nasemte zum kahna ding zong kicing lo hi. Haka ah tenglo te, zinbuk pan, inn sapna pan le Haka ah innneite in inn panin internet zangin zumkah uhi. Zin tunna ding anei zolo te in lamgei ah giak in, handphone tawh lamgei pan internet tawh zum kah uhi. Zum nasem tuazha in atamna pen nidang zum nasem omsa bek ahi lo minam kim panin a tawm pen 34 akihel theihna dingin akisam lo in bangmah thei lo honkhat zum nasem behlap uh ahihman hi.

 

2016 khit akipan Paliman meeting om sim in bel tualpi ah akibawl ngeina ahi hi. Tua bek tham lo, MP kibeh lap nading om lai kha thei ahimanin a paliman inn ding athak alamsak ding Kawl kumpi in alamsak zo nai lo ahi hi. Gambup minam 135 ading kumpi budget kicing thei mahmah lo zong ahi hi. 2014 Census kipat dingin Code Nambat anei Chin State minam 34 pan minam kim ading ethnic affair minister 34te, township 18 pan in mipi telcing MPte le tua zah in a kigawmte 25 % cih 4in1 apha ding galkap MP te cih teng paliman kah den uhi. Meeting kah mi kim zolo den ahimanin meeting sim ih atuzah kibang thei lo hi. Meeting ah kizang pen galkapte lo siah Haka pau ahi hi. Minam sung kipum khat nading in pau kibang sakni cih tawh Haka pau le Falam Laizo pau kitelna ah Haka in sum tawh golhguk piakna, Haka lai zang Matupi te metang le Southern lamte metang tawh kigawm in Tedim lam pawlkhat le Falamte kigawm azawh uhi.

 

Mi atam pen pau ahi Tedim pau le lai pen Zomi cih kammal tawh Chin State sungah zat loh dingin kikham hi. Cope topa le Sia Kam Khaw Thang at sak Tedim Lasiangtho bu zong zatding kikham in, kihal tum hi. Tedim pau le lai akipan Zomi cih kammal pen Chin State sungah kikham hi. Chin utlo ahimanin minam sung khen kham cih tawh aki kham ahi hi. Chin State pualam leitung bup ah mihau, mipil tampi in minam min Zomi cih suakta tak in, kizang tek hi. Tedim Laisiangtho zangin ahing sak zo uhi.


Nidang in gamdang tun na ding ahi leh Kawl galkap te bawlsiatna, buanna, pawta cihthu te tawh UNHCR ah thu kigen hi. Tuhun ciangin Kawlgam pan in atai Zomi hi ing aci te UN zumte le leitung gamte ah kisang hi, bangmah thudot haksa om lo in, refugee kipia hi. A ki lawm sakna in bel Penglam, Dahpa, Lengtong Hoih, Cing Khup le Ngam Bawm, Galngam le Hangsai cihte sungpan atheih tangthu khat ki gensak hi, a gen theih leh UN a ong ding hi. Zomi cih sitna dingin a si kisit lai kul hi, a si asan leh Zomi hi mah cei ci’n asylum ki pia pah hi. Tua thu teng hangin Zomi ki ut lua mahmah in, gamdang ah mi tampi atai uhi. “Kawl kumpi in ka gamtat uh khel mah nung, Chin state government na en cik nung,Ka minam pi khat uh ka gam uh pan bei pet mah in teh.., UN in hehpihna tawh Zomi cih refugee na piak sak nawn kei un, cih athum ciangin Zomi te gambel huhna piak khawl phot hi.

 

2014 Census lai in Zomi minam min taktak zat ding cih le Chin cih sila min, pakik min zat ding tawh kikal ah minam sung buaina tampi apiang ngei hi, cih Chin State sungah khanghamte in gen sim uhi. Internet suakta tak in aki zat theih hangin Zomi cih kammal ki banned ahimanin khangthak te in bangmah thei lo uhi. A en simte ki thei leh kum 10 thong tung uhi. Zomi a et simna tawh thongkia activist te suahtak nading leitung in nget sak den hi. Zomi athei nuamte in Kalay ah paisuk in online tu uhi. Kalay University mun pen Tedim gam, Chin state sung hi’n Zomi kammal kikham ahimanin Chin Siamsin Kipawlna om hi, Technology University le Computer University ah Zomi Siamsin Kipawlna thahat pen hi. Chin State government in Kawlgam bup ah Zomi cih kammal banned ding a nget laitak uhi’n kuamah in thukim lo hi. Gamdang mun tuamtuam ah ateng Zosuan tate in a passport tungah minam min Zomi cih at uh ahimanin Myanmar gam ah tourist in azin theih uhang in Chin State ah lut thei lo uhi.

 

2014 Census lai in 914 Zomi le Anti Zomi 4xx kibuaina pan kizom toto in, 2020 kum in tualgal piang khia hi. Chin deih lam pan in Haka, Falam akipan Southern lamte le Meitei te in huh hi. Chin National Front in 1990 khit akipan athat uh Zomi te that theih nading lampi kihong kik ei cilian in Zomi tampi mah that dingin Chin National Safe and Unity Planning (CHINSUPI) cih min tawh ni thum sungin Zomi deih thuman gente honkhat uithah akthah in that man uhi.

 

Meitei te in bel kum zalom 18 a Pu Kam Hau hun lai pek in alelh uh Zomite that theih nading lampi kihong ei ci’n pau kitel loh tawh mel le sa kibat tekna tawh zong a muh peuhpeuh uh bangmi cih dongin Zo cih azak limlimte athat uhi.Zan khat zu kham le zakang khamsa in khua khat a buluh uh leh khuazang in Zo cih kammal tawh adawng lian Phaitu khuazang that in kihal tum man lai hi. Kawl kumpi in zo nawn lo in, huhna anget ciangin UN tangin India Assam Rifle te makaih galkap te alut suk uh ciangin Zomi beina ding genocide kici minam bup thahna tuak lo uhi. Minam min tawh buaina aveng na dingin, Chin State bup ah Zomi le Chin minam min telding Referandum kibawk sak ahimanin Zomite in lel hi. Metang 45 % tawh alelh uh ahi hi. Tua khit akipan Zomite in Zogam nusia phot in, gamdang a lunggulhna uh ah pai khia uhi. Apaina ding uh gam tuamtuam in gammi dingin deih mahmah uhi.

 

Zote in na sa mahmah napi 2014 lai a minam min Zomi azuak na uh tawh Pawite tungpan anek sateng a ngahsa teng un hangin kam nei lo, khuak le lungtang neilo bang sak zo hi. Meiteite hu vang nuai pan Zokual le Thahdo kual ah a beng cin theih teng uh lungdam lua uh ahimanin kha sia ngam lo leuleu uhi. Pawite le Meitei te langpang ngam lo uh ahimanin 2014 in Zo pan Zo Chin akicih na uh pen Chin Zo cih tawh a minam min uh laih leuleu liang uhi. Pu Zo cih zong ataktak amin pen Chin Zou hi ci’n tangthu hong muthak uhi. Chin le Zomi buailai in Zomi galkap Zomi Revolutionary Army in zong a mipihte huh dingin delh napi athau tawite uh kikap thei lo in, Kawlgam lutphet Ciau dungah CNF tawh kikapna ah alel pah uhi. Thau hoih om ma sasa a tam zaw Assam, Kashmiar lam ah a President un zuak pahpah in training ah zat theih ding ciang bek om phial laitak, kua ma deihlo teng ZRA galkap te in atawi laitak hang hi kici hi.

 

ZRA makai pawl khat in Kawl kumpi tawh kilemna ala Ethnic thautawi kipawlna tuamtuamte hamphatna te amuh uh ciangin englua uh ahimanin cabinet sungah Paite sim theih loh dingin Kawllai tawh lai at sim-in, “ko ZRA pen Zomi kacih uh hangin Chin hi’ung, Burma zong hong ci nawn kei nung, no deih dan in Myanmar hong cita nung” ci’n 26 Feb 2014 in United Nationalities Federal Council ah CNF te santheih nading le Kawl kumpi santheih dingin milak lut zawh nading lampi om sunsun ahi inn nung ekbuk lam pan lutna Statement thoh liang ngei uhi. Thai gamgi ah vak thap ZRA galkap tai, ZIA galkap tai leuleu khat recommendation pia in palai in koih sai ngei uhi. Tua vai tawh kisai in, Chin hilo Zomi hi ung cih thu tawh 2014 Census ah ding 914 Zomi Campaign lut ziahziah Zomi khempeuh heh sak mahmah uhi.

 

Democratic Karen Buddish Army te khut nuai ah om Zomi Independence Army kicite in Karen te kum 60 bang a land mile siahteng uh lakkhiat pih kik pih teng peuh Kawl galdo zah in Zomi sung media ah kigen uhi. DKBA a lut ZIA mi thum bulphuh in USA pan internet galdona makai ZIA General te in zong UNFC ah alut sawmna uh lampi kikhak ahimanin heh mahmah uhi. ZIA atang ko tung un agen pi uh ahi Tan Lwin gun, Sit Taung gun, Irrawady gun, Chin Twin gunte kanto ding, lamkal ah Nipidaw la dingin, Zogam la to suak dingin gualzo sa in inn tung ding acih uh daipah zo hi.

Mikim lusu kawm, veih uih lua nak hum kawm in a om laitak un, Chin Paliman Chairman Pu Salai Netum Thang in akhuang hong tum in ‘A zahtak huai MP te aw ei kikupna Agenda nambat nih na ah khin mai ni, tusun niloh ei kinial agenda nambat khat na ki nung kup kik ni’ ci hi. Sihzang Affair Minister Pu Salai Ngo Thian Siyan in a khang mulong sa in (Sii) cih aging abell hong mek in ‘Agenda nambat 1. Tu laitak buaina ahi minam thakte ading 2044 Census ah code nambat thak behlap ding mipi lungphona tawh kisai pen kikum siang vet leng hoih sa ing, tua hi kei leh Agenda nambat nih ah Chin State Paliman building thak lamkik nading Nipidaw ah budget ngetzah ding ki khensat thei lo ding hi’ ci hi. 2044 Census pen March kha bei ni zan pan kipan in May kha ni 10 dong sawt ding hi’n naih ta hi.

Facebook ah tangvalno teng tawh ki noh kawm in Khuano Affair Minister Pi Mai Khai Lam Cing in a bell hong tum in ‘ Tu a Ethnic Affair Minister mun ding MP deih teng bangmah piak ding hi kei… ei MP neisa teng pen 1974 pek in minam khat I hih lam kumpipa General Ni Win in hong ciapteh sak hi ei, tu ate kuamah in aciapteh sakna om loh pi, tua sangin Agenda pai mengmeng ni, Agenda thumna General tun teh Phunom khua township piak ding kikum ni ’ ci’n ama deihna agen khit ciang tu kik vat in facebook en hi. ‘Hih bellte mahmah mek leng.. Si.. ci in gingse..C..Chin cih nopna aihang… koma pau in dead cihna hi sese’ ci’n ngaihsun kawm hi.

 

Tedim Affair Minister Pu Salai Lo Lam Mung in abell hong mek in hong ding lau hi ‘kei muhna ah bel minam min thak ngah nading 2044 Census ah code nambat thak hong ngente piak huai sa ing… MP hong ki behlap hang kumpi khasum piaksa vive hi lel hi ei…ei supna lah om lo minam sungah ki lem zawk na ding hi e’ ci hi. Pi Mai Khai Lam Cing in a tutna pan en gega in a mit tawh sal lela hi ‘hih putek ki Tedim tual suak sakpa.. mi ki phasak pa.. ki hausak lailai .. 2014 Census ah minam min kibuai lai Zomi cih ding sang Tedim District ngah ding bek deih zaw pa.. tun ngah khin cileng thu nuam lua kisa aki ngen bangbang pia nuam mah lo dia atanu te dongin’cih ngaihsun kawm-in FB mit khahlo in offline pan en hi.

 

Pu Salai Lo Lam Mung in zong en kik napi in amu lo kineih hi “imm..hi pitek nu seuhsauh mahmah.. 2014 Census lai Khuano sungah 407 Khuano minam cih thang sak mahmah….1990 kum kitel lai in NLD Ngin Thang in azawh hanga ZNC le Zomi it tengin ei Khuanote hong haza lua in heh lua uhi….tua tawh Khuano mite hong muhdah kipan uhi….914Zomi ki ci lo ding ci’n azuau gen pongmawk…..alawm ngaih pa in lah ka minam le suvang khat khek kei ning ci’n…. Zomi it Seventh Day Adventist te nungak melhoih mahmah khat tawh kiteng vitvet ziau lel… a minam min paih sangin aduh phadiak voksa ngawl ding tel zaw….US ah tai san ziau lel… hih pitek in a MP khasung teng aki puahna apuan leina tawh bei den….a FB ah lah anu ngak lai mante suang lai… a thei lo khangnote like ki piapia sak” cihteng ngaihsun detdat in nui hiuhiau hi.

 

Chin Zo Affair Minister Pu Salai Hau Kang in zong a bell mek in hong ding hi “Kei muhna ah bel Pi Mai Khai Lam Cing genna thukim ing, ei a omsa minister 34 ban ah tu a census ah code thak hong ngen teng beh lap in, kampau awkaih, khuamin, behmin kibang loteng minam thak suaksak lehang MP pia tek ding hi leh adangMPte tawh kigawm vekpi 666 ki pha hi, code thak hog ngen nai lo tampi om lai hi, code thak kipia ding hi leh piak kul veve ding hi. Kumpi in khasum piak hak hongsa in ei khasum ngahsa teng hong khiam leh na mahmah ding hi, Gullu Mual lah bei khin e” cih gen in atu kik hi. ‘Beh min le khua min tawh minam thak ei kibeh lap lai leh ei Zote Phaitu minam, Tung Nung minam cihtawh ki khen kham tahtah ta ding akhu’ cih ngaihsut kawm in, deih loh teng hong piang leh Meiteite tawh a thusim gelsa khat uh sep dingin khensat hi.

 

“Minam thak om leh khua min, beh min, kampau awkaih tawh minam thak ki ciamteh ding cileng….. Mualbem khua min tawh khat, Sukte beh min tawh khat, neihsa Teizang Pau min tawh khat kigawm in MP thum bang ki nei ding hi a….supna omlo metna bek .. nidang CNF te nung kazuih sangin sum kingah zaw ding” cih a ngaih sunsun Teizang Affair Minister Pu Salai Mang Suan Tuang in a bell hong mek in zu neknek na tawh mai san teitai sa in hong din leh tuk dektak hi“ A zahtak huai MP te aw…kei muhna ah bel minam min thak ading code thak piak ding hoih sa ing, ei thukim kei leng zong 914 Other om hi. Kumpi in khasum aki cingin hong piak zawh kei leh zong sum ngahna ding in-come kician khat om hi. Gul Lumual bup Sente in apuak khiat khit sumlom lutna hong kang kik mah hi. Tun sum ngahna thak dingin Paletwa gam teng Rakhine te zuak leng deih mahmah uhi. Kum sim in US Dollar million 1 ta hong pia den zo ding uhi. Amau deihna pen Rakhine State gamlim sungah 1974 khit asup uh Paletwa gam beh lap kik nuam, Paletwa khantohna ding sem nuam uhi. Ei Haka pan Paletwa haksa pi’npai kul nawn lo pah ding hi. Haka-Mandalay-Magwe-Pyay-Taung Kote- Sit Twe- Kyauk Phyu – Paletwa pai ki gim mahmah hi. Amau Paletwa te zong Haka zumkah hongpai gim mahmah uhi. Tu’a kong gen pen win-win situation cih theih hi, ei lah khual zin gim lah om nawn lo ding, kum sim US Dollar 1 million ngah den ding, Rakhine te zong nuam mahmah ding uhi, tua pen game theory tawh zong kituak cih thei hi’ ci’n a tut kik leh tukhial in ki taw khet hi.

 

Paletwa pan meeting kah haksa sa lua in, Haka ah innsap in a om Khami Affair Minister MP Pu Salai Saw Tin Aung in a bell hong mek in thu hong gen a “Tu a Pu Salai Mang Suan Tuang gen pen ong ngaihsut pih mai un, kei ka lungkim hi. Paletwa-Haka khualzin pen Rakhine State-Pegu Division-Magwe Division-Mandalay Division cihteng kitawn hi. Nidang in Mandalay-Haka lampi om ma bang ka pu ka pa te uh Sagaing Division dongah Kalay tot kul lai hi. Rakhine state ah kihel mai le ung ko ading nop zaw hi. Mizawng State Chin pan mihau State Rakhine ah lut le ung ka gil uh zong vah zaw ding hi’ ci’n a tu kik hi. Bo Than Shwe galkap kumpi in Sente kiangah Gullu Mual azuak nangawn aphal, sum ngah leh anuam, minam min Zomi taisante, ang sung khuat hat MP te sungah minam min thak asang thei tawh minam min thak deih lo tawh khat le khat ki en ngeingai uhi. MP te mit hah dan amuh ciangin Chairman of Chin State Parliament Pu Salai Ne Tum Thang in a khuang hong tum in “tuni meeting kikupna te kicing sak ta ni, eimuhna tek gentek leng man zolo ding aiteh metang khia in khetsat ni, tu’n nitak an ne khawm masa ni’n aman ciang gilvah tak in metang tawh khensat ni” ci’n meeting tawlnga phot sak hi.

 

Meeting hun awng sung anne dingin apu suahna lampi uh ah media te in thu dong dingin ngak dimdem uhi. “bangmah thu kitel siang nai lo hi ei..annek khit ciang metang tawh ki khensat ding hi ei.. up mawh loh thu thak zong om thei ding hi ei” ci’n media te dotte adawng ding kituh ngei ngai uhi. Media te camera in bel ngeina bangin ciltang khai liklek tawh meeting kah hong pai Kanpalet lampan pasal MP te man nak zaih mahmah uhi. Tua bek tham lo in ngeina bangmah ci’n a nawi lang khat dawk sak litlet Kanpalet numei MP te paina lampi ah camera tawh man zaih atam ban ah, nawi mek ding pasal kigual zihziah hi, MP pawl khat zong a ki gualh sawm uh leh, palik te in lampi bawl sak in, amai pen ah ding sak uhi.

 

A ngei-na uh ah pen a pasal ading anawi lang khat sitsak in adang langkhat pen zindo na ahi hi. A mai uh ah tattoo kuih bel deih nawn lo vet se uhi, tua tang in made up nak kinuh mahmah uhi. Nawi mek ding ki gual atam tawh, a mek sa te kigualh kikna tawh, hun awng atom tawh, aman lang thei dingin, pasal nei nai lo MP te in a nawi nih uh honsak in meksak mai uhi. Leitung ah MP te nawi kimek sak theihna, Chin State Paliman bek om ahimanin mihing in kapian buang MP nawi mah mek ngei nuam ing aci Kawlgam sungpan le gamdang tourist tampi Haka ah tung ziahziah ta hi. Nungak pi khat ahi Pi Mai Khai Lam Cing bangin “ kei mahmah tek sih ding hita..tudong ka nawi hong ki mek sak nai lo” cih ngaih sun kawmin Kanpalet MP pasal neilo te zui in anih in hon sawm dektak napi, camera lau ahimanin zui ngam lo kik hi.

 

Haka ah paliman meeting hun awng sungin MP te zu le sa tawh nitak annek sungin minam min thak deih a lungpho te sung zong Chin State sung a munmun ah thu kituak thei lo in buai mahmah uhi. Tedim khua Kamhau tualpi dimin lungphona neite zong kihel hi. Minam Pi Ki-ukna Deih-lo… Deih…lo! Behkim Khuakim Paukim Thuneih Kikim Ding…..Deih…Deih ! ci’n a deihna uh tangko ziahziah uhi. 2014 Census lai in, a sisan uh ahi minam min Zomi taisan in Chin asuak Zo, Sihzang, Khuazno cihte suan le khak te akipan akhangual putek pitek dongte zong kihel uhi. Zote sungah zong Pu Salai Hau Kang in MP za len cipin, tek mahmah napi a tawlngak lohna akipan phattuamna teng amah bek in, netum den ahimanin, Zote sungah lungkim lohna le thu theihna hong khang ciangin Chin Zo cih nung zuih sangin, ei khua min, beh min tawh zong minam min ngah theih akhu ci’n khanglo mahmah uhi. Tua mah bangin Khuano, Sihzang sungah zong khanlawhna tung hi.

 

Tedim le Saizang panin kampau le khua min tawh MP nih tuak nei khin uhi. Guite in beh min tawh Guite le Gunte(Nguite)cih om ahimanin MP nih tak nei khin uhi. Dim, Ngawn, Khuano, Sihzang, Zo le Thahdo in kampau awkaih tawh MP nei tek khin uhi, tua teng tawh liangko kikim nuam acian lai Beh min teng le khua min nei tengin minam min ngahna dingin 2044 Census ah code number ngah nading a deih uh ahi hi. A ngah kei uh leh zong 914 Other pan minam min attek ding ki thukim uhi. Amau kampau awkaih le khuamin tawh minam min deih uh ahi Vangteh, Tuithang, Haicin,Tuimui, Tuilang, Kaptel, Zampi, Dalkhai etc .. hi’n Sukte, Samte, Tung Nung, Neih Khup, Suante, Bawm Khai ..ect in zong beh min tawh minam min deih uhi. Minam min neih khin tek leng MP ngahna ding bek hi lo, phattuamna khempeuh minam min neisa te tawh liangko kikim in kingah ding hi cih upna ahi hi.

 

Chin Siamsin Kipawlna pan makaite sungah zong thu tampi kituak lo uhi. A om sa minam sung khen kham nuamlo in code lui tek zang nuam pawl, behmin, khuamin, awkaih kampau zui in minam thak ut pawl, minam thak suah ding veve Kawlte kici in, Kawl suak leng updated pen hi, President dong kisuak thei ding hi, black and white hun bei khin pek hi aci pawl, minam min taktak Zomi ah ciah kik ni aci pawl cih bangin ki khen pheng phang uhi. Pi Mai Khai Lam Cing mintap tunu ahi a ute tanu neu pen ahi Mai Cing Sian Hoih Khuano Chin le alawmte a tam zaw in bel Khuano cih minam min 34te tawh Chin kicih sangin Phunom cih ei khuamin lak ding hiam Kawlte suahna ding Myanmar la ding ihiam cih kikum uhi.

 

“ Guai ei khuamin, behmin te tawh minam thak in om leng ki thahat zolo, minam neu kisuak zaw ding hi veh aw, tu a omsa, minam 34 te zong nusia in, minam thak cih veve Myanmar kici leng bangci na sa uh a” ci’n Dr Siam Bawi tapa upen Siamsin makai lui Salai Thang Sian Muang in gen hi. 2010 kimlai in Siamsin makai Salai Zam Thuam tapa thumna Salai ThangThang in “ ei pa te hunlai in bel, ei sisan Zomi sangin Chin suak leng hoihzaw ding na ci uh, tun lah ei hun dong bangmah khantohna pi om lo, Hakate peipeina ah ki om, Zomi akem teng lah Chin State ah teng thei nawn lo in, mundang ah tengin, nuntak nuam in khangto mahmah ve uh aw, ei hoh Kawlte suak vet leng bel kikhangto zaw mah ding aive, President dong kisuak thei ding aive” ci’n thukim hi.

 

“Ei guai Zomi cih tampau kei vo, lau huai ei..kei zong ka khuamin athangna dingin Phunom minam kicih ding ka ngaihsut hi ven, aihang ki ci tawm lua ding ee, Myanmar kici vet leng hoih samah ing, milah kitam ding, phattuam na zong tampi kingah ding, kumpi te zong lungkim mahmah ding hi ei”ci’n Mai Cing Sian Hoih Khuano Chin in gen hi. “Myanamr kici leng guai “Buddish biakna Myanmar minam” kici hi ven ei Christian sungah zong Anglican ah tai khin, tua pan Buddish ah tai suak ding maw”ci’n Salai Thang Thang in gen hi.

 

“Myanmar suak ding cihpen Buddish suah ding bel kisam mah aive.. ei Christian I kicih sam hang e, Kawlgam pen Christian gam hi lo pi, Buddish gam hi ven, Pasian in Kawlgam mite ading Budish biakna akoi hi’n teh, vantung gam tun nading lampi tampi om veh aw, ei Siamsin sungah bang Myanmar ah lut kha leng President suak zo ding qualify tam mahmah hang ei” ci’n Salai Junior Deric in akhiatna om lo thu tuamtuam tawh gentehna tampi gen hi. A pianna pa sang nasia zaw cih ding hi. Apa khanlai dan in Chin National Party te akipan Pawite in Zomi sung thukan le thu sia bawl dingin khawisa in aom hilo in, Kawl lutolte 969 (666)te khawi sa in Buddish mission sem in a om khat hi. Tua bangteng tawh Myanmar Census 2044 hun ciangin Myanmar kicih ding khensat uhi.

 

Chin sungah sangnaupang kipawlna dangte ahi Chin Student Union akipan meltheih kithuah pih, ki uitui pih teng tawh thu kiza in Myanmar suah ding thu internet pan skype le phone conference tawh kikum uhi. Pawite sungah bel Chin nusia in Myanmar suah ding haksa asa om mawh lo sam uhi. Chin mah kem cip nuam zaw uhi, a tam zaw in bel khantohna ding, Kawlgam minam kimsung ki lem zawkna ding ci’n Myanmar suah ding sang thei uhi. Tua bang tawh 2014 Census lai in One Chin aci Anti Zomi te suan le khakte le Pawite pawlkhat in a uitui uh buak suah ta uhi. Mipi sungah Myanmar suah ding thu media tuamtuam pan holh thawh ziahziah kipan uhi.

 

Bengalite pen Muslim gampi tengin kikhen in atam zaw la khin tek uh ahimanin Kawlgam ah Bengali buaina dai ta phial hi. Buaina thak hong om pen bel Thai gam ah nidangThatsin Nawatra Idea ahi Republic deihte le a omsa Kingdom gam deihte kikal Thaigam sak le khang tualgal apiang laitak hi. Thai galtai tampi Kawlgam hong lut in, a om uh kum 10 val khinta cih ding hi. 2044 ciangin minam thak deih Chinte launa dingin “Code 914 pen Thai te ading hi, 914 na zat leh gamdang mi Thai asuak bek hilo, Buddish hong ki suaksak ding, citizen right supna tamding hi” ci in, Myanmar ut Chin Siamsinte le apawl dangte in minam min ciaptehna deih Chin sungah holh thawh ziahziah uhi.

 

“Minam min ciaptehna ngahna ding na deihna bang ahiam, minam min nei khinte eng na ahih leh Chin sung sangin a om sa, minam lian pen ahi Myanmar ah lutkhawm ni sanggam aw, ataktak in Chin cih pen Kawl pau in a Chin Chin cihna, ei leh ei cihna hi’n nidang in Kawlte tawh unau khat hihang, tua pan in Kawlzang ah gal le sa tamna hang, an kikham lohna hangin, khamtung ah ei pu le pa te ana kituah to uhi ding hi, Chin le Myanmar pen unau khat hihang, ei inn ah upa kiangah ciah kik ni” ci’n mi khem kawikawi uhi. Tua bek hilo in, Kawl lutol 969 (666) te thupiakna tawh Kawl mihaute inChin State sungah huhna pia ziahziah lai uhi.2014 Censua lai-in CNFte inTonzang Zokual ah Computer ahawm dan uhi.

 

Internet ah webside-te ah function thak tampi ki behlap lah hi, connection zong 7G+ bang kingah ahimanin thu kizakna man lang lua mahmah hi.Mun khempeuh ah thupiang teng internet pan ki en thei pah ahimanin facebook le blog te bang pen privacy vive tam zaw in ei ut bangbang ki at thei bek hilo thu puakna manlang mahmah hi. Thu ki puakte manlang dan pen Ni suak phet leitung hong tung vat manlang dan ahi khuavak sangin manlang zaw ta cih ding hi.

 

Haka ah meeting kah MP tengin nitak anne khin meeting hong ki pan kik ta uhi. Mun tuamtuam pan mipi lungphona te zong online ah en kawm in a tut uh leh Myanmar code ah lut ding cih Siamsinte pawlkhat kihona, thugente mu kha uhi. Pawl khatte heh mahmah uh in, pawl khatte bel nui hiuhiau uhi. “Ei sisan Zomi nusia in Chin asuak ei pawl bel Myanamr minam ah lut le hang zong ki lamdang nawn kei e, bang ngah ding cih et huai sa ing, Chin min tawh ei khang ah MP suak zo cileng, Myanmar va suak leng ei tu ei ta khang ah President ciang suak zo ding uhi ei, lampi thak hoih khak kei ni, naupangte bel eimah hong sun uh in, ahi lolo haipil mahmah uh ei.. a thei lo kineih in bangmah pau kei ni maw guai aw.. ei MP term beima le ei MP sep kik zawh sungin ei zat ziahziah dingin Paletwa zuak ni maw” ci’n group chatting tawh MP pawlkhat kikum ziahziah pah uhi.

 

Pu Salai Ne Tum Thang in a khuang hong tum kik ta hi “Azah tak huai MP teng aw ankam lim tak in anne thei tek dingin ong lam en ing, tu ni ei kikup pi pem ahi Agenda Nambat Khat ah minam thak vai tawh kisai in Census ah Code Nambat thak piak ding tawh kisai metang khia ding hi ta hihang. Tulai tak mipi pawlkhat ngetna ahi Minam thak te ading Code nambat thak piak ding ei thukim leh bel Paletwa gam teng Rakhine te kiang ap kul ding hi cih phawk gige un, Minam min thak thukimte in Red Colour ah click ding, minam min thak a deih-lo te in, Black Colour ah click ding hi ei ” ci’n a gen hi. MP tengin atutna tek uh ah computer tawh online pan in metang pia uhi.

 

Tua laitak in mipi sungah We are One in Myanmar ! We are One in Chin ! We are One in Phaileng! We are One in Keltal ! We are One in Siang Sawn, We are One in……. Etc: cih bangin slogan tuamtuam ki zel ziahziah hi. Gamdang India, USA, EU gamte le Australia, Japan ah teng khin sa Zomi te sungah bel bangmah buaina om sak lua lo hi. Zomi te in bel en cik veve sam mah uhi. Thu sia lasia apiang leh kuamah deidan neilo in, itna tawh huhna piak ding bek mah sawm uhi.

 

Pawl khat in bel a beh min, akhua min, a kam pau min uh tawh minam kingah ding cih pen tha lawp napi pawlkhat in bel haivai sa lua mahmah uhi. Pawite sungah bel We are One in Myanmar! cih azak uh ciang patau in lungbuai mahmah uhi. We are One in Chin aci te bek support ding ki thukim uhi. We are One in Myanmar acite tawh internet tungpan debate na nasia mahmah piang khia sak zo uhi. Myanmar suaknuam lua uh in, Chin ut api apu, anu apa te in 2014 lai in Zomi a gensiat mah bang un Chin te mawhna zongzong uh in, Myanmar suahna ding pau lap tuamtuam tawh gen koikoi uhi.

 

Atung ah Myanmar deih Chin Siamsin Kipawlna makai lui pawlkhat in, tulaitak Siamsin makaite zo bilbel uh ahih na tawh, makaite tung pan in mipi in Myanmar kicih ding genkhia sak uhi. Minam min Chin sungah 34 tawh kep suak ding deihte, minam min thak tek Beh, Khua, KamPau zui in neih tek ding deihte, Myanmar kici ding cih deihte, a aw suak zolo ahi Zomi ah ciah kik ding deihte cih bangteng tawh mipi sung so ziahziah laitak hi.

 

Chin Siamsin Kipawlna min tawh kuama letmat palo, nimit palo No 1/ 2044 cih thu tangkona statement khat hong thoh dengdang uhi. Statement sungah “1)Chin Siamsin Kipawlna in kuamah NGO, Party kipawlna khutnuai ah om lo a suakta kipawlna hi. 2) Chin Siamsin Kipawlna in 2044 Census ah panmun lakna omlo hi. 3) Chin Siamsin te in Census ciangin mikim in amau deihna bangin minam min apiak ding uh pen democracy dan mah hi ci’n ka sang uhi.4) Chin Siamsinte in 2044 Census ciangin Chin sungah minam 34 te hi ta leh, minam min thak deih na tawh 914 pan in Beh, Khua, Kampau bulphuh minam thak ciapteh sakna ngente ahizongin avek uh in, Myanmar gam mi hi ci’n, ka ciamteh uhi” cih ahi hi. Mi tampi in amuh ciangin bangmah akhiatna om lo bek hilo Myanmar deihna thu tangkona ci’n heh lua mahmah uhi.

 

Chin State Parliament ah metang piakna zong na man ta hi. Chairman Pu Salai Ne Tum Thang in “Zahtak MP te aw tu in, mikim metang piak phazah hong sim khia ding hi ing” ci’n them vei sung dai dide in ding hi. Tua pan in “Chin minam 34 ban ah minam thak te sang nading Code Nambat thak pia ding cih thukimna metang kia 100% ahi hi” ci in tangko hi. Mi khempeuh in hui hut bang tum, lam liang in khut beng ziahziah uhi. Tua laitak in, Pu Salai Ne Tum Thang thu tangkona asim laitak handphone le a laptop pan video zaih sim ahi Pu Salai Hau Kang in internet pan in Meitei galkap mangpite ahi General Chit San Maung le Colonel Tun Tun kiang ah live in ana lak sim gige ahih lam kuamah in thei kha lo hi. Meitei singnuai mite Kawlgam sungah suakta tak in aom theih nading uh in, nidang Bo Than Shwe hun lai pek akipan Militry Inteligence te in matpongtin IC card apiak sim uhi. A min ding uh zong a ciapteh nop dingin Kawlgam ah celebrity te min te pia ziauziau uhi. Mangpau,Senpau, Hindu pau, Wa pau, Kawlpau, Tedim pau siam mahmah phadiak uhi. 2014 Census ciangin Chin nuai ah Meitei minam mintawh Code 402 ngah lai uh ahimanin official taktak in Chin State pan in Kawlgam mi asuak hiau uhi.

 

Chin State Parliament sung thu khensatna internet pan in chatting tawh MP te in meeting thu apuak khia simtek uhi. Minam min thak ding campaign abawl lungphona nei mipi te in azak uh ciangin nuam mahmah uhi. Gualzo in lam khawm ziahziah uhi. Myanmar deih Chin Siamsim lam te pawlkhat muhna kibang lo uhi. “ bang cih mawk ding Chin ah nam 34 ban ah athak zong sang ding ci ve uh e paliman ah tam lua lo ding maw bang cih ding ihia” a ci tawh “Minam thak asang uh hoih zaw e, minam min lak ding veve Myanmar ah lut ni cih gen huan ni ei lampi hoih zaw ei” aci tawh om ngeingai hi.

Paliman ah Chairman Pu Salai Ne Tum Thang in a khuang hong tum in “Agenda nihna ahi Chin State Paliman Building lam kik nading tawh kisai budget gel ding kikup na ding hong sam ing” ci hi. Zahau Affair Minister Pi Mai Cheery Zahau in a bell hong mek in “Budget suaih ding pen hiteng ah gel ding hun kicing lo haksa ding hi, Committee khat phuat sak ding hi hang, tua Committee in meeting kik ciangin aki cingin hong lak ding kisam pah hi” ci’n gen hi. Matupi pan CNuai Affair Minister (Zotung te hi, Zomi tawh kibang ahi amin masa uh Zo phiat in, Chintung cih ding ciang lah Pawite in zadah in, C Nuai cih min tawh khelsak uhi) Pu Salai Za Rian Mang in a bell hong mek in “MP Pi Mai Cheery Zahau gen mah thukim pih ing, amah zong gamdang ah kum tampi nasem ngei ahimanin experience tampi nei hi, committee ah amah zong guang ding deih ing, Committee sungah makai dingin Paliman Chairman Pu Ne Tum Thang, member dinginPi Mai Cheery Zahau, Tedim MP Pu Salai Lo Lam Mung, Mindat MP Pu Salai Khui Shang le Matupi MP Pi Mai Subintai te guan ding hoih sapah ing, ei sung kiho sim na in bel, tu a kacih tengin Budget hong gelle uh ei MP kim ading zong acian dingin hong gel siam ding uh ka muanna hang zong hi ei ” ci’n a tu kik hi.

 

Tua ban kuamah pau nawn lo ahimanin Pu Salai Ne Tum Thang in “ MP te aw Pu Salai Za Rian Mang thu pulakna athu kim lo a om leh khut lam tek ni, a thu kim om leh khut lam kei ni, 1 2 3 kong sap sungin na deihna uh ong lak un” aci hi. Khat, Nih, Thum cih minute khat halta in, asap hangin, kithu kimna in khut kilam lo ahimanin “Pu Salai Za Rian Mang thu pulakna a kip hi, Committee member te in meeting man ciang kimuh kul ding hi, tu ni Agenda Nambat Thum na ahi General kikum ding hihang, na kikup nop teng uh ong pualak un” aci hi.

 

“ Chin cih mahmah pen Kawlte in vanpuakna in aneih Chin, a utut un adeih bang un asuih theih Chin Lone cih bangin min ngaih lo vive kipia hi’n Kawlgam ah Chin cih pen ei minam min bek ah zat dingin Nipidaw Pyi-Thawng-Suh Luatdaw ah nget ding vai kikum ni, 2010 kum pawl akipan kumpi thuneihna tawh, galkap sung hang sanna tawh kisai pahtawina min te, cih theih ahi Tura, Teha Thura, Aung San Turiya cih te mi maimaite in a min uh ah hel oh ding, anei sa te in zong min laih ding acih uh kazak pen hoih sa ing, tua leh Zu min pen ko lam ah Zo Zu cih tawh, Zo ak, Zo ui, Zo vok, inn lui hoihlo te Zo inn cihbang kizang tam in, tuate phiat in min thak vawh ding kisam sa ing” ci’n Agenda thum na ahi General ah kikupna ah hel dingin Tonzang pan telcing MP Pi Mai Veronica Niang in a bell mek sai in gen hi.

 

Kanpalet MP Pu Salai Phucil Thang in a bell hong mek in “Ko gam ah Victoria mual kuam pen singkung lopate kumpi in hong kep sak khit no silsial in hoih mahmah hi, gan hing zong anam kim in om hi, kuamah theih khak loh in, leitung ah bei khin kici, tangthu bek ah om zar-ma-ni (Phoenix)vasa te om lai hi. Chin gam bek ah om lai zar-ma-ni (Phoenix)vasa hangin ei pen kipak huai mahmah hi, Chin minam te ngeina lim ah I zat Vaphual sangin zar-ma-ni (Pheonix)vasa lim zat ding kikup ding Agenda Thum na ah hel nuam ing” ci’n agen leh annek khit zukham in, a ih mu tawh, internet ah Facebook online te tawh khua phawk lo teng in, lamdang sa vat in, en ngei ngai uhi. “Vaphual cih Hornbill sangin si khin ta leh zong meikuang sung pan atho kik Zar-Ma-Ni (Phoenix)Chin minam logo in zang leng mi lak ah hoih suah zaw ding, hong ki pimuh zaw ding” cih ngaihsutna nei tek man uhi. “Va man sim in, sum tawh zuak leng zong tam man ding hi” cih angaih sun zong om hi.

 

“Phunom khua adingin Township piak nading Agenda Thum na General hun ciang kikum ni kacih ong mang ngilh sak kei un maw” ci’n Pi Mai Khai Lam Cing in Facebook ah a tutsim na pan bell mek kha lo in, ding vat in, thu ong gen hi. “Phunom pen ka khua cihna bek hilo, 2014 lai in 914 Zomi deih lo Code 407 Khuano mi ci dingin Chin ah lut ding cih KYA te in, ka tangko na uh, kei lah ka tek tawh ka guai tawh ka sihma in Township ngah sak ding, hong ki piak kei leh lah Myanmar suah khit ciang ngah nading ngen veve lai ding” ci’n ngaihsun hi.

 

Chairman Pu Salai Ne Tum Thang in a khuang hong tum leuleu in “MP te aw hun awng lak hun hita ahimanin, ei tut kik ciangin a nunung pen ahi Agenda tawpna General sungah kikup ding hong kigen ahi, Chin, Chin Lone le Zo Zu, Zo Vok, Zo Ui min vai, Chin Minam logo ahi Vaphual mun ah Zar-Ma-Ni Vasa (Phoenix) laih ding cih vai le Phunom khua Township piak ding vai kikum kik ding hi hang” ci’n hun awng minute 15 pia hi. Chin State Paliman ah hun awng la in internet enman lo MPte pen apua lam ah meeting minute thute media interview dawng ding kituh ziahziah uhi. Kanpalet MP numei te zong anawi uh aki mekmek sakna in, golh lua ta ahimanin, a pasal ading asit uh thoh khia in, alang tuam uhi, a thoh thak uh mipi angakte meksak leuleu uhi. Hun awng aihang in, asung ah gimna omlo cih theih ahi bangmah pau lo, ihmu tawh, lusu tawh, internet online tawh atu uhi zaw in, a pusuah uh ciang gim zaw uhi.

 

Tua laitak in, Zangkong ah Bo Ni Win tupa Aye Ni Win in, a cidam lo pi in, media te sam in press conference abawl laitak hi. 2003 kum in athong kiatna pan 2013 khit asuah tak kik ciangin kum10 a ngolh ahi zu neknek luatna hangin, a sinna kibawl zo nawn lo ding cih atheih ciangin, media te asap hi.A Pu akipan a innkuan un mipi tung amawhnate uh athum nuam ahi hi. Thu tampi gen hi, a lamdang khat ah “ Chinte tawh kisai ka Pu in hong gen ngeina khat pen amau le mau Zomi kici minam a hih lam kapu in thei mah hi, aihang galkap sungah Zomite galhangna, thahatnate, ki-itna te amuh ciangin, hih minamte hong thahat le uh, Karen tawh dan in gal le sa kisuah leng ki do zolo ding, ki uk zo lo ding, cih tawh minam tampi in 1970 khit akipan akhen khap hi, Zomi te aw hong thum ing, na omom na uh pan na et hunhun in, kamawhna uh hong maisak un” ci’n a khut nih tawh Kawl ngeina dan in a thumna zong kimu hi. Internet ah suak ziahziah pah hi.

 

Chin Paliman MP meeting kipan kik dingin tualpi dungah tutphah tek ah ong tun uh ciangin, internet a en simte in a et kik uh leh Zangkong ah Aye Ni Win thugennate amu kha uhi. A etet uh leh Zomi thu agenna amuh uh ciangin cihna ding thei lo in, ling gawp uhi. A diakdiak in Tedim, Tonzang, Cikha gam pan in MP tuamtuam min tawh apaite asibup lawh phial zong om hi. Tua laitak tha khat in Deng.. det..det..det..det.. cih tawh thau ging kiza ziahziah hi. Bang hiam ci’n dipkua in akhua dak uh leh a mau teng cing dingin mun ala ahi Meitei te in, thau tawh ngim in a um cih lam mu uhi.

 

Meitei te gakap bu major puansilh khat hong lut hi, ama thu tawh, Paliman Chairman Pu Salai Ne Tum Thang khut sung pan in microphone la in “Thukin thu tangko na, Chin State sung ah kilem nading, minam kikhen khap lohna ding, Chin State leitang kep cing nading in, Chin State bup siatna ding pan in a hun lap kiau in, ka hon khia uhi, Chin State government le Paliman ka phiat uhi….. General Chit San Maung” cih lai hong sim ziau hi.

 

Tua khitteh “no teng na utut uh tuni sun niloh dan in hai ciak thei, internet line zong a kikhak laitak hi, noteng guan na ding thong lah akicing om loh tawh hiteng mah ah zan giak suak ding cih ong thei sak pah ing, kong mat thongkiate hiuh teh cih telpah un, koimah pusuak kei un, ki pusuak thei lo hi, zun suak ek suak te in na omom na ah thak ding hi” ci’n a gen suk pah hi. Palaiman ah Chairman Pu Salai Ne Tum Thang mun ah Pu Salai Haukang in hong makaih ding hi ci suk lai hi. Mi khempeuh in Salai Hau Kang en ngei ngai bek uhi.

 

Meitei galkap major pa in tualpi ah MP teng mai pan apu suah ma in, Salai Hau Kang khut sungah lai ip khat guang sai’n pu suak vingveng kik hi. Salai Hau Kang in Meitei Major pa lai ip piak a hon leh a lam et mahmah pen na hi pah hi. “ kavoi kavoi ka deihdeih ngahta vawvaw ka khu, CNF te zui leng zavom cinna ei noptuam sah ding ka sah leh na hisih ei, ka zavom cin sateng uh leitung ah lah kawikawi in sum zonna in nei lel tah uh, tu a Meitei te bel tam CNF te bang lo akhu, tu mamah in Tonzang gam, Zokual, Thahdo kual a zavom cin theihna ding phalna lai eipia akhu, pasean min thang tahen oh” ci’n ngaihsun kawm in anui hiauhiau hi.

 

Thu manlang lua ahimanin Meiteite in Chin State ah Junta kici galkapte in ukna lakna abawl lam leitung ah ki thei pah hi. Zomi te sung, Pawite sungah thakhat in sms tawh kizel hi. Kawl kumpi in zong galkapte ukna lakna Junta deih nawn lo uh ahimanin Meitei te pai khiat ding warning apia hi. A sawt lo in, Meitei General Chin San Maung in, Eastern Manipur Indepence ci’n tangko ta hi. Tua gam pen Chin State ahimanin Nipidaw le Delhi hotline pan thu ki nak kup mahmah pah uhi. India gam Manipur pan, Sen gam lam pan, Kawl gam sung mun tuamtuam pan Meitei te Chin State hong lut ziahziah uh ahimanin thautawi galkap thakhat in Lakh khat pha mawk uhi. Kawl galkap te lah atha akiam mahmah lai tak uhi. Tualgal bei tawh, mipi sung galkapte tung ah mudah in 1962 khit akipan 2015 dong phial na asakna uh tam lua ahimanin galkap muhdahna tawh kidim uhi. Kawlte in SIT TA te mudah lua uh in, tui nangawn Yi Sit tawh dawn nuam lo, SIT cih kammal mahmah aza nuam lo uhi. Galkap ding bang a om lo phial hi, putek galkap pension sa atam zaw in galkap sungah nasem in lut kik phial uhi.

 

Meiteite khut sungpan Chin State lak kikna ding huhna ngen in Kawl kumpite, vanleng tawh azin khia phengphang uhi. Tua laitak in Leitungbup Zomi Innkuan makaite tawh UN zumpi New York ah kituak kha uhi. Zomi te tawh thu tampi kikum thei in, Zomite deihna teng UN Secretary General le USA President pa mai ah ka thu kim uhi cih kiciamna bawl uhi. Zogam leitang ngahkik mateng aci Zomi te thakhat in thu kiza in, ong kikai khawm ziahziah uhi. USA le EU gamte ah galkap sungah sem laitak te in duty offday vive la, angah lote nasep khawl uh in, Zogam om na lam zuan in Churachanpu (Lamka) le Kalay airport ah a vanleng tek uh tawh hong tung ziahziah uhi. Khapi tungah a tung Zomite mi nih zong tua thu azak uh ciang Zogam la kik dingin khapi tungpan tuah sawm liang uhi. Mars tung ah leng masa ding ah kihel Zosuan khat zong NASA pan off ngen in, Tedim lam ah hong leng zaw vingveng hi. Zomite thakhat in, vanhoih pen galvan teng tawh akim in, India lam pan alutte, Ciau pan, Zangkong pan alutte, Kalay ah vanleng tawh tute, Tinbaw tawh tuipi lam pan alute in Paletwa lampan, cih bang Chin State um cih sa in koih uhi. Meitei galkapte in tuazah in thakhat in, galkap atung le a um cih lam amuh uh ciang lau lua in ling keuhkeuh uhi. Chin Paliman ah kiman MP te in zong Meitei te mit-hek amuh ciang un thu hoih om lam thei uhi. Internet line aki phiat hangin, anai pen line te ngah nading amatmat uh leh, online slow mahmah khat ngah thei uhi, Meiteite theihloh kal in, thu thak a sim uh leh Zomite in Chin State bup um cih, Meitei te lau lua in, a pusuah theih nading uh, aciah kik na ding uh, lampi a hon sakna ding ngen cih thute sim kha uh ahimanin, nuam ding sangin, dah zaw uhi. Meitei te thah in sinuam zaw zong om liang uhi, anuai ah kua vang om leh alut nuam zong om hi. A mawhna uh kisik in Zomi te tungah lungdam akoko pah thu hoih thu man ana mu thei zong na om bilbel sam hi.



Manta Hi

Kim Tuang 21 March 2014 6:00 AM
Note: A sungah lai kiat khempeuh mal khat zong a susia ding,sukpuah topuah ding kuamah kiphal lo hi. 

 


Comments




Leave a Reply