WWW.TUNGZANGNEWS.COM

 
Picture
66-veina Zomi Nam Ni Singapore Ah Nuamtak Kizo

 

Tuun sung khat pan piang hi ngeingei hang e... cih la in Singapore khuapi sung kithawn ziahziah a, Zomi Nam Ni zang dinga hong paite in gal khat panin zong za ciaiciai uh hi. Zomi khempeuh zingsang ni suak tung pan ZOMI NAM NI hi ciin zingtho pah, lawptak a ann huai saisai in Zomi khempeuh kituahkhopna ah pai manloh ding lau in anhuan saisai, anne saisai in pawi bawl na ding lam manawh ziahziah uh hi. 

Lia leh Taang te Zopuan kilawm sitset tawh kizem in Singapore khuasung lampi dung limlang banga tee ziahziah tungah khedap sang leh khedap nawtsiang sitset tawh hong kizui daudau vua, lamgei a dingte in nung-et diamdiam in hoihsa peuhmah vua, sumbuk gei a ding tangvalte leh nungakte in zong lampi na awn diamdiam uh hi. Zomi te in leitung a etlawm sak ahihna kilanga, mite in Zomi hong pi muh uh hi cih kilang hi. 

Zomi Innkuan Singapore (ZIS)  vaihawmna tawh kibawl a 66veina Zomi Nam Ni ah kihel loh ding a patauh manun pawlkhat bangin a leave, tawlngak hun, akhuan nangawn Zomi Nam Ni adingin na sit tentan uh hi. Minam itna leh Zomi vai thupi ah kihel ding a lawphuaizia hong musak hi. 

Zomi Nam Ni bawlna ding innpi kiang a kitun ciang vaidawn pawl (ushers) te in mipi hong paite maitai takin na vaidawn in na khutlet ziahziah uh a, inn sunga music tumte in Zogam ngaih la a sak ziahziahte un innpua hong thawn daldal in a huih zong hong nungkhia ziahziah hi. Min khumna leh hunzeekna laidal a kipiak khit ciangin vaidawnte in inn sungah tutna ding mun ah mipite na lutpih in a sungah Zomi vive, Zopuan silh zihziah in na tu dimdiam uh a, leitunga khuapi minthang Singapore himawk ahih manin mite etlawm in kizepna zong thupi mahmah hi. 

Zomi a hong bawl Pasian tungah lungdam hang. Leitung gam minthang khat ah Zomi hizah hong tungsak cih ka ngaihsut ciang lungdam lo thei ka hi kei hi. Lungdam, lungdam, lungdam...

1. Hun Kipanta: Tuun sung khat pan piang hi ngeingei hang e... cih la sa in mipi dingto a, thungetna tawh vai khempeuh Topa tungah ap khit ciangin Zomi Nam Ni nasia takin kizom suak ziahziah hi. 

Zomi lasiam mi 18 te in Zogam ngaihna leh Zomi zuunna late hong awi in hong sa ziahziah uh a, kikhop hun sung khempeuh amau nopci takin hong awiawi ziahziah den uh hi. Zomi Nam Ni ah pau dang tawh la kisa om vetlo in Zola vive kisa a Pu Lengtong Pauno lakam kawm pak leng, 'Zomi gim hong nam' mahmah in kuamah tek innteek ihihna kilang a, ei a ahihna kilang mahmah a, nuam kisa in ki-am mahmah hi. Lasate lah siam, late lah hoih thei, music tumte lah siam, music lah ngaih, hizah val kan leitungah om tuan kei Zomi!

2. Vaidawnna Thugen: Dr. Hau Za Cin, President, Zomi Innkuan Singapore in Zomi Nam Ni a 66veina hong zangte khempeuh vaidawnna hong nei a, mipi in khutbeng ziahziah in kimuak hi. Zomi a ka pian hampha kisa ing. Zomi a ka pian ding kei deihtel hilo hi. Zomi ka hih pen van leh lei a bawlpa in kei adingin a hoihpen a hong sehsak hi. Zomi ka hihna pen ka sisan sungah om hi a, koi mun peuh ah ka om zongin a kikhel thei hilo hi. Ka minam hihna ka khek thei kei a, Zomi khempeuh hau ding kici leh a hau ding khat mah ka hipah hi. 

Kua teng Zomi hiam cih gen ding hile hang Zomi khempeuh Zomi hipah hi. Zomi na kicih mana Zomi a piang hilo in Zomi na hih mana Zomi na hi lel hi. Pu zukholh, nau minphuah, min kitap, mo kipui cih khawng Zomi ngeina hi a, minam dangte in neilo uh hi. Minam ihihna a lak, Zomi i hihna a lak tuate hi a, tuni a i kizepna puan leh melte himasalo hi. Pupa hun pek pan i zat suksuk, i luahsuksuk gamtat dan ngeina te Zomi ngeina hi a, Zomi nam pai zia ahi hi. Lawmte hutna dingin a si ngam, a ki sihpih ngam Zomite hi hang. Gal leh sa mai ah a kihung, a kisihpih ngamte hi hang. 

Pum khat suak pen kiphelkham gawmtuah kik sangin thupizaw hi (the whole is better than the sum of its parts). Innkuan khat pen inn tuan ziazuate sang thupizaw hi. Zomi cih pen Zomi sungah tuateng tuateng om cih sangin thupizaw hi. 

A hun a cingkhin khat pen kinang zolo hi. Zomi huih hong nung pen kuamah in nang zolo ding hi. Huih pen nanzawh cih bang omlo a, a hun tawh, a huih tawh luankhop siam ding a thupi penpen hi. Tu laitak Zomi huih nung a hih manin Zomi huih tawh i kalsuan khawm siamding a thupi penpen hi. Makaite cih bangbang mang in limtak ngaihsun in a hoihzaw i theih leh hilh in gen ni. Lui tui bang luangkhawm ni. Hun thak ah kilut a, Zomi te ading zingni hong suakta hi. 

Tuni a kipahtawi ding Zomi laipilna nei mi 18 te lungdampihna ka pulak hi. Singapore ah laipilna leh degree ngah thak mite kong pahtawi uh hi. Note, kumlui 65th Zomi Nam Ni pan tuni 66th Zomi Nam Ni kikal a laizo thakte na hi uh hi. Kote kong pahtawi uh hilo in no leh no a kipahtawi hi in Zomi zong a hong pahtawi na hi uh hi. Note lawhcinna in nang bek hong minphasak hilo in na innkuan uh, na minam uh hong minpha sak ahih manin tuni in na Zomi pih uh Singapore a Zomi om khempeuh taang in pahtawina hong pia ka hizaw uh hi. Khutbengin lungdampih ciat ni. Den ciang makaite in pahtawina hong piaksak ding hi.  

Zomi a minpha sak leh a pahtawi Topa in hong kibehlapsak semsem hen. 

Zomite hanlungciam khangto diam! 

Ka lungdam. 


3. Chief Guest Dr. Chinkhanlun Guite Thugenna: Dr. Lun in Chief Guest hihna tawh Zomi Nam Ni hong uap thei ahih manin nakpi takin Zomi khempeuh kilungdam mahmah hi. Amah pen Lamka pan National Technological University, Singapore ah Research Fellow hi a, Indian Institute of Science, Bangalore, India pan Physics tawh PhD a zawh khit ciang hong paisuk ahi hi. Physics leh Magnetism bek buaipih hilo in Zomi i hihna zong nakpi taka buaipih in Zomi khempeuh - kawlgam, vaigam, mikanggam ah om taleng minam khat i hihna bittak, kiptak len den ding leh minam khat banga lawng khat a ging thei ding a lunggulh den khat ahi hi. 

Tua banga lawng khata i gin theih nadingin bangteng sem ding i hiam cih nakpi takin Zomi Nam Ni ah hong gen hi. Minam nasep pen a sem theilo omlo hi hang. Minam adingin a hoih zong thei tek hi hang. Ahi zongin a sem thei khempeuh in semlo in a sem nuam khempeuh in zong sem thei tuanlo hi. Makaih khawng baih mahmah ding kisa in makaite kihawmthawh in kigensia nuam pahpah hi. Ahi zongin makaite in makai dinmun a tunna dingin haksatna leh thuakna na palsat uh hiam cih kuamah in kitheihpih lo hi. I hawmthawh mahmahte zong amau mun ah va sem hileng amau zah in kisem zolo ding vive hi. Tua ahih manin makaite thu zui photphot dingin a hoihzaw i theih leh bel hangsan taka genpih, kuppih ding ahi hi. Tua ahih kei leh makaite mawk hawmthawh a gensiat kipat hetlo ding ahi hi. 

Minam sungah a thupilo leh a thuneulua kuamah kiomlo hi. I septheih zong omtek hi. Mualpi khat sungah Zusa om in, mualpi in zusa simmawh hi, kici hi. Mualpi tungah singkungte po in singteh lopa te po in zusa vasa te in nuamsa uh hi. Ahi zongin a thupi zah in ahih theihloh khat om hi. Singgahte sukham in ne theilo sese hi. Zusa in bel singgahte petkham in ne ziauziau hi. Mihing i hih theih a tuamtek hi. A neu a lian thupi lo a, i sep theih tek i kizahtaksak ding, i kithupisimsak ding ahi hi. 

Mi cih khempeuh zong zuih khit ding hilo hi. Khatvei uiphuk kua gei singkung tungah daiva (nightingale) hong ham ciauciau a, nuamsa in lasa thapai hi. Uiphuk in zong lasak siam mahmah ciai, ahi zongin na hih theiloh khat omlai, ci hi. Daiva in zong 'bang ahiam?' ciin theinuam in dong hi. Uiphuk in, 'keimah bangin sun thapai in lasak kisin lecin tua sang siamzaw ding hiteh' ci hi. Daiva zong lasak siam nuam kaan lai ahih manin sun thapai in lasak a kisin leh nitak lam ciang a gawl gui in zo nawnlo in si hi. Ei hih theih bang ciang cih theilopi in mi cih khempeuh zui kawikawi leng a tawpna ah sihna phual kitung ding hi. Nang hihna, daiva in sun thapai lasa nam ahihlohna, theilo pi in hong kisapna lam peuh, hong kizol na lam peuh ah na pai leh a tawpna ah mangthanna tung ding hiteh. 

4. ZIS Vice President Pa Hang Khan Lian thugen: Zomi kua hi a, Zomi i cih ciang kuateng huam hiam, Zomi te kuate hiam cih suut ding hileng sun thapai zong kisut zolo ding ahih manin tua lam sut kei phot ni. Zomi leh Census vai lam tam gen zaw ni. Zomi sungah Census ciangin Zomi kigelh leng bangzahta in metna om ding hiam cih a thei nailo om kha ding ihih manin tua lam tam gen nuam zaw hi hang. Minam khat in a minam hihna mahmah uh a kiciamteh pen leitungah a meet penpen hikhin hi. Mikang khat English, French, German ciin a kiciamteh pen a vun a kibang vive ahih hang a thupina uh hikhin hi. Zomi te Zomi ciin i kiciamteh khit ciang a meet khin ahi hi. I tenna mun leh mual, i pu i pa hun ah kizopna leh kikawmna a haksat manin awsuah kidang kha mah leh midang i hi hetkei a, kuamah pau kitello a om kei hi. Kuamah midang a om kei hi. Tua pau awsuah khempeuh mun khat ah i gawmna pen Zomi leh Zopau, Zokam hipah a, tua ah tutung kisimna om ciangin gelh tek ding ahi hi. 

Na innkuanpih tek uh na phone unla, na gen un. Na khuapihte tek uh na gen unla, na hilh un. 

5. Zopuan lahna (Zomi Fashion Show): Zomi numei te pen khutsiam a khau phan, siamgan, khauphek te ahih manin puan tawh kisai peuhmah numei khut ah a om ahi hi. Innkuan kimin puansilh hong guan numeite hi a, a hoihmah vive hong bawlsak uh hi. Tualpuan pan khui puan dong ah numeite in innsung puansilh ding mawhpuak in nei uh hi. A mel puak ding leh a kikhui ding dan zong amau sep hi a, a silh dan ding zong a mau gelna mah ahi hi. Tua pen tuni in zong kidang nailo a, numeite in Zopuan tuamtuam lahna hong nei uh hi. Numei puan san, a gial, kang, a vom leh a pak kihelh, cih bangin hong lak uh hi. Zolia leh Zotaang te in kituak diamdiam in tui luang bangin hong pai deudeu uh etlawm in mipi in khutbeng in maan zaih ziahziah uh hi. Zomi te puan silh kilawm thei mahmah hong bawlsakte leh hong lakte tungah nakpi takin lungdam hi. Ngeina leh Lai lam makaite makaihna tawh kicing takin kilak hi. 

6. Zongeina lam (Zomi Cultural Dance): Zomi ngeina ah lungdam ni leh gual tungtuan ni in la kisa in kilam a, hanla kisa in kiko in kitangko hi. Mi khempeuh muh theih dingin mipi maiah kilak in min kisial hi. Tua Zomi ngeina lahna mah Ngeina lam makaite mah in hong makaih in - Sawngsik, Ton Lam, Saipi Khuksu, Cing Pian Dan, etc cihte kilak ziahziah a, Zomi ngeina a thupina hong musak in khangthakte adingin ciamteh, zuun ding a thupina hong genkhia uh hi. 

7. Zomi Nam Ni ankuang umna: Zomi Nam Ni hong siim min khum khempeuh a vekpi in 189 hi a, hun kipat khit, min khumna laibu a kikhup khit ciang hong pai, hong tung zong mi 20 val bang om lai ahih manin tukum Zomi Nam Ni a mipi hong pai khempeuh 220 khawng peuhmah a pha ahi hi. Tua pen Singapore ah Zomi om khempeuh seh thum suah seh nih dektak hipan dingin kituat hi. Mai kum ciang Zomi khempeuh kihel kim zawh ding, nasepna pan leave/akhuan ngahna dingin kihanciam ding hi. 

Zomi Nam Ni hong siim khempeuh Vaimimciim leh Bawngsa, Voksa leh Vokngoi ban ah zasan lim sitset hong kibawlsakte tawh nitak ankuang umna kinei a, gilvah tak in inn lam kizuan ciat hi. 

'A nuamzaw kumte in hong ngak hi' cih bangin mai kum ciang nuamzaw lai ding hi. 

A tom thei pen a kong hanciam uh hi. Maan leh video te youtube leh facebook pan na en un. 

Lungdam. 


PS: Zomi Nam Ni a PAHTAWINA LAIPI ngahte min anuai ah kong gual suk hi.
 
1. Rev. Dr. Nang Sawm Piang, Doctor of Theology, Trinity Theological College
2. Rev. Vungh Suan Kham, Master of Arts in Christian Studies, Baptist Theological Seminary
3. Nu Dim Hawm Lian, Master of Divinity, Trinity Theological College
4. Nu Cing Lian Don, Master of Science in Electrical Power, Nanyang Technological University
5. Lia Sian Lun Niang, Master of Science in Management (Banking & Finance), Management Development Institute of Singapore
6. Dr. Hau Za Cin Suante, Master of Social Work, Singapore Institute of Management
7. Lia Kim San Lun, Bachelor of Science in Facilities Management, Heriot Watt, Scotland, United Kingdom, and Specialist Diploma in Industrial Waste Management, Temasek Polytechnic
8. Lia Cing Sian Nem, Bachelor of Nursing Science, University of Sydney
9. Lia Khawm Suan Ciin, Diploma in Chemical and Green Technology, Nanyang Polytechnic
10. Tg. Zam Sian Khai, Specialist Diploma in Construction Management, Building & Construction Authority Academy
11. Tg. Lian Lam Mang, Specialist Diploma in Facilities and Energy Management, Building & Construction Authority Academy
12. Pa Thang En Cin, Specialist Diploma in Web Development Technology, Singapore Polytechnic
13. Tg. Sian Lian Sum, Specialist Diploma in Construction Management, Building & Construction Authority Academy
14. Lia Zen San Mang, Diploma in Nursing, Nanyang Polytechnic
15. Tg. Thang Lian Khup, Diploma in Education, National Institute of Education
16. Lia Cing Ngaih Kim, Diploma in Nursing, Ngee Ann Polytechnic
17. Tg. Thang Khaw Dal, GCE "N" level, Ministry of Education
18. Tg. Khup Pian Sian Siam, National Service, Ministry of Defence


By
66th Zomi Nam Ni Committee
Zomi Innkuan Singapore




 
Hau Za Cin
Phuitong Liim
www.hauzacin.blogspot.com

 


Comments




Leave a Reply