WWW.TUNGZANGNEWS.COM

 
Picture
Kawlgam sunga om " Mualtung mi Thau tawi Kipawlna-United Nationalities Federal Council (UNFC) le United Nationalities Alliance (UNA) pan makaite le Kawl kumpi lam pan kilemna bawl makai vaisaite tawh Shan (SNLD) makaipi & UNA makaipi ahi U Hkun Thu Oo i teenna inn, Yangon ah March 12,2014 ni-in, kimuhkhopna thupitak nei uh a, ZCD party pan Pu Cin Suan Mang (Treasurer-CEC) le Pu Khup Mung (CEC member)te zong kihelthei uh cih kiza hi.

Tua kimuhkhopna ah UNFC pan Colonel Hkun Okker le Mon Thautawi makaipi U Naing Han Tha te zong kihel thei uh hi. Tua banah Mualtung mi  Thautawi te kipawlna (UNFC) pan Kawl kumpi tawh kihotheihna dinga kiphuankhia NCCT leh Kawl kumpite kikal nasiatak genkhopna nei uh hi. NCCT leh Kawl kumpi lamte in abeisa March 10-11,2014 -ninih sung Yangon khua pi ah kimuhkhopna panin thugen cianna nei thei uh hi. Hih thukikupna ah Kumpi lam pan 1, Galkap mangpi lamte 6, Kumpi lam pan Minister  5, le Hluttaw pan zong kihelthei uh cih ZCD tangmi Pu Suanmang in Tongsan Media tanute zasak hi.

Pu Suanmang in a genna ah, " abeisa hunin NCCT le Kumpi lamte kimuhkhopna nei zelzel uh hi mah le Galkap lam le Hluttaw lam pan tutung simloh kihel ngeilo uh hi " ci-in gen hi. Kawl galkapte in zong galkap mangpipa kiang pan apuak uh thubul siksan nam 6 pulakkhiat ding paulap nei uh ci hi. Hih bangin galkpate hong kihelna hangin Kawlgam a dingin hoih lam manawh semsem hi cih zong Pu Suanmang in genbeh hi.  Ahi zongin hong tung ding August 1, 2014 ma in Kawlgam bup kilemna kician khat piang sak ding cih thu Kumpi lam vaisaite in in genkhia uh ci hi.

Tua hi -in mai lam thukikupna diingin Kawlgam kumpi pan 3, Galkap lam pan 3, Hluttaw pan 3, Mualtungmi thauitawi te sung pan mi 9 kihel in thu kikum toto ding uh cih zong tutung kimuhkhopna pan pulakna om ci hi. Amau teng kikupna pen langnih tuak makaite kiang ciatah genkik ding uh a, kimumu in thu kikumtoto lai ding uh hi. Holimna tungtawn in a thupipen ah Kikapna le kigalneihnate bei siang sakin, tua khit teh gamthu (politic) holimna kineito suak ding cih hi a, tua ding pen kum sawtto lai ding ahi hi. Hih kilemna (kikap nonlo) bawlma in Kawlgam sungah thautawi laitak ahi NCCT sung aa kihelnai lo Wah, Maila, ABSDF(Sangnaupang thau tawite), RCSS(Shan)leh Naga gamnuai mite zong a kihel zawhna ding uh hanciam lai kul dingin gen uh hi. Hih teng kihel loin Kawlgambup kilemna bukim kingah thei ngeilo ding ahihna zong genkhia uh hi.

Tua ahih manin, Kawlgam ah hun thak hong tung ding hi ta ahih manin, hih hun sungah Zomi nam ading pen minam min pua khat mah akihel kei leh I gam I lei aading i lunggulhnate  kiciantak a hong sunsak thei ding haksa mahmah ding hi cih Pu Suanmang in gen hi. Tutung hih kimuhkhopna sungah ZCD min tawh i kiheltheihna hangin, mai lam Kawlgam ki-ukna thak sungah Zomite minam kician hihna, ngeina kician neihna, lai leh pau kician nei i hihna le Zogam khantohna ding vai tuamtuamte i suntheihna kalsuanna hoih mahmah khat hi dingin Pu Suanmang (ZCD-CEC) in genkhia hi.


Reported by: Pu Cin Suan Mang (ZCD Treasurer), Yangon.

 


Comments




Leave a Reply