WWW.TUNGZANGNEWS.COM

 
THU PATNA

………………..Amah in akhate tawh nang hong tuam dinga, ama khate nuai ah bukna ding na mu ding hi, ama thumanna in nang hong dal in hong hu ding hi………………………………. LATE 91:4

 Tulaitak pen 2014 Kawlgam Census tawh kisai in eimi sungah ei minam min tawh kisai ki buaipih mahmah hi. Bang hangin hun hoih hun thak 2014 Myanmar Census ah Code 914 Zomi (၉၁၄ ဇိုမီး) kici ding ihiam cih thu tawh kisai in pawl khat tung pan Zomi le 914 gensiatnate dawn kikna le Pawite a pimuh Chin ut luate tungah sanggam thu hilhna cih bangin muhna honkhat gen ding hihang.


Zomi sung pan Chin kicih Sawmte

Kawlte paunak ah “Na sakol tuan a nu hiam apa hiam thei in” (ကိုယ္စီးတဲ့ျမင္းအထီးမွန္္းအမမွန္းသိပါ)ci uhi.  Zomi ihih na genkhiat ding a thupitna theilo zong ki om thei khamah ding hi, tua dante va genpih leng thei pah ding uhi. Zomite om na tengah pai in evangelish nasep mission nasep dan in va gen koikoi leng thei pah kisang thei pah hi.  Aihang in Kawlte paunak khat leuleu ah “A ihmu ki neihte phot hak hi”(အိပ္ခ်င္ေယာင္ေဆာင္သူႏိုး၇ခက္သည္) acih dan in pawl khatte pen Zomi ki ci nuam lo in  Chin mah kicih sawm teitei uhi. Tua bek tham lo in a minam pihte a taisan sawm uh amai zum selna uh in paulap tuamtuam zongin Zomi min tungah mawhna hong zong uhi, a paulapte uh en leng a picing lohna uh kimu hi, pawl khat pen a kum uh enleng naupang lai vive hi’n pilna lah kicing nai lo vive hi, paunak ah “Tui dimlo bel ki loklok hi’ (မျပည့္တ့ဲအိုးေဘာင္ဘင္ခတ္တယ္)kici hi. Khangno lai in mimuhna ah khialta le hang ei utna ei upna bek ki thupi sak in, a thu man kisa kha in kipau, ki gamta in kisem hi, tua pen mite in ki mawhsak khin lo, ki theih siam in “Aki zangdawn muan laitak ‘ki cise hi, tuadan hun khangual kibang lawmtate kithuah khawm in khialhna bawl om leh zong ki maisak in “A kihai thutuah laitak uhi e” kici hi. Aihang in tulaitak 2014 Census ah minam ading a kisap mahmah laitak in a ki zang theilo bek hilo in, minam sung ah minam bup mailam hun ding hong nawngkai sak nuam aki thawite pen  minam ading in ‘mival mi nawngkai’ ( ဆန္ကုန္ေျမေလး) cih ding honkhat hong om hi. Tua bek hilo in, Zomi himah hang, Zomi mah ka it pen hi, aihang in, Chin kici kei kha leng minuai tung kha ni, nam neu suak kha ni, utta kei leng Chin mah kici ni cih Self-confidence neih loh ei le ei ki muan lohna neite (ကိုယ့္ကိုကိုယ္ယုံၾကည္မႈေပ်ာက္ဆုံးသူမ်ား) a nei honkhat in zong amau lungneu thanem le minam vai hong kop kha om uhi. Eimi sung min kisap dan pen nuntakna nei mihing ahih leh Zomi kici  adang gam le lei ganhing aki pan singkung lopa nek theih dawn theih nikten puan silh akipan ei vanzatte ei min tap sak in Zogam, Zolo, Zotung, Zo inn, Zothau, Zozu, Zo ak, Zo vok, An Zoteh, Zo an, Zo dial, Zo puan, Zo nik cihbang in min ki vawh koikoi hi. A taktak in mihing tawh kisai pen Zomi lo ngal Zo cih lian bek a minam tuam in om lo in zo lak ah atengte Zo ana kici bek hi, ee aww te zong ki ci zaw hi, Zo cih bek pen minam min hi lo hi. Mihing tawh kisai pen Zomi cih loh buang a ki sang thei tek pen zo su le zo zang bek om phial ding hi. Ei bek original Zomi hihang Zo MI ci’n Chin ah tai ni aci A theih tam in a tel tawm mimawl (အတတ္ၾကူးအရူးျဖစ္)pawl khat om uhi. Tua lo bel phattuamna om nak leh aman lang mahmah den a nungsang a khuatsiam honk hat om in, tuate pen tam pau lo in dai dide tak in Chin a lut sawm uh pil vang tak in tuitang lo thuk bangin tam pau lo in om zong om hi. Bo Than Shwe hun bei khit 2010 Thein Sein democracy hong kahteh gamvai ki sem thei, ki gentheita in cikmah in theih ngei loh gamvai nasem (ခါေတာ္မွီႏိုင္ငံေ၇းသမား)honkhat hong piang in Census hong om teh ZCD party gensiat le CNF te khateh kia (အခြင့္အေ၇း)duh in Zomi taisan ding Chin lutding ci in Code 914 pen Rohanger (Bengali)ta ding hi ci in mipi khem uhi. A taktak in tuabang mite in Bengali te min Rohanger in asap uh pen mi zuau phuah propaganda khat a huh lam khak na ahih lam thei lo uhi. Gamvai uk khangthakte ZCD in zong thapia nuam ahimanin pan mun lian pia in, party sung thanem nate ah thahat nading le ki khelna ding in pan mun a piak hangin ut lo in, ZCD gen siat le Chin party te khateh kia pangin phat tuamna ngak in (အေပါစားအေခ်ာင္သမားနိုင္ငံေ၇းသမား)om uhi. ZNC party gen siat pen a beisa kum 20 val sungah CNF te leitung kim vel in azin nate uh ah anasep khat uh ahi hi. ZCD te pen DASSKyi tawh kipawl hi’n 2015 kitel teh NLD in lel ding in, a zawh leh zong party khat bek in nidang dan in mun khempeuh phial ah zo nawn lo ding hi. 2014 Census ah Zomi I cih hang DASSKyi le NLD party in 2015 ah zo nawn kei leh Zomi min piang zolo ding hi aci 2015 gamvai thu le 2014Census khit Zomi mailam thu ding tello pi thu ki theisak mi mawl (ႏိုင္ငံေ၇းသူငယ္နာမစင္ ေသာငတုန္း)zong om hi.


 ZCD Party le Census 2014

Zomi National Congress kipat tungin party policy tangkona ah Minam min Chin cih pen sila min hi’n minam min taktak Zomi kici ding cih thu khat kihel hi. Tua pen Chin pan tai khiatna hi lo, minam neu lungsim hilo in ei inn taktak minam min taktak ah ciah kikna, thuman tungah dingna (အမွန္တ၇ားဘက္မွ၇ပ္တည္ျခင္း) ahi hi. Kum 20 val galkap kumpi khut nuai ah mipi tawh gen theihna haksatna thuak khawm in Zogam le minam ading bek ahi lo Kawlgam bup mipi suahtakna ding ki pia khia in nasem hi. Mihau teng mipil pen teng sung pan hilo hi, dawi havang kawm ah haksatna gentheihna lak ah nungta ahimanin picing lo mah ding hi. Tuni dong gam le minam ading bek ngaihsun in nasem in hun bei lai ahimanin party sung ah mimal kim pilna le nop tuam na ding sem zo nai lo hi. Galkap kumpi hun bei ciangin gam ading nasemte kipiak khiatna agah khat ahi Census hong om teh abeisa in khialhna ahi 135 minam vai hong kipuahna in Code 914 hong piang ahi hi. 1962 a kipan Kawl uitalte Pupi Bo Ni Win in zawh thawh thu tawh zuau ana phuah minam 135 cihte Zomi min thei gegu napi ana paihte, tangthu ah omlo, aki zong thei lo Chin cih min hong piak cih bek hi lo, Zo, Sihzang, Saizang, Teizang, Khuano aki pan  tenna khua le kampau awkaih zui in Zomi sung hong khen kham hi. Ka beh min uh Guite zong minam khat hong suak sak bek tham lo in ei minam gal Meitei zong Chin a suak sak hi. Tua thu kawmkal ah 2014 Census hong om teh Code 914 hong kikoih ciangin kum tampi gamvai nasem khin ZNC in Zomi tading a hoihna mupah hi. Party policy tawh a kituak hangin party ading hilo hi.  2015 kitelna ah mipi in na deih party uh vote na pia un, aihang in 2014 Census teh Code 914 ah Zomi ki ciding cih awareness sem in campaign hong lut uh ahi hi.  Census ah 914 Zomi kici ding cih Kawlgam sungah awareness sem campaign lut pen ZCD le party member bek hilo in, a tam zaw Zomi ading in tutung adiang pen ZCD member ahi lo minam it mi manpha a tam zaw (မ်ဳိးခ်စ္အမ်ဳိးသားေ၇းလႈပ္၇ွားမႈ) kihel in up mawh loh teng hong diang khia uhi.


Daw ASSKyi NLD le Census 2014 Zomi Mailam Thu

Daw Aung San Su Kyi makaih NLD akipan Kawlgam democracy movement ah kihel khempeuh in ZNC le Zomi hong thei bek hilo tang thu ah hong ki mang ngilh ngei lo ding hi. DASSK a tamzaw akimat sung le a om hunte ah zong Kawl galkap kumpi satan kawlngian hangin democratic te lampi bei phial in a ki om na pan 7 vei val Zomite ZNC idea in lampi zong khia in mipi ading aki phu khia den hi. Aihang in political alliance hihna hangin DASSKyi tawh Zomi hihna Census 2014 kisai lo hi. Tua ban ah 2015 Kitelna ah partyte zawh le lelh tawh zong kisai lo hi. Kawlgam sungah Census ki sep sungin a om Zomi mimal kim khut le kam bek in minam mailam thu khensatna pia thei bek ding hi. Tua thu atel Chin partyte le Chin State USDP in 2015 kitelna ah a lelh ding uh patau khol lua uh ahimanin 914 le Ruhanger suahna gam mi pan hamphatna kiamna kici zuau thu hong phuak tawm uhi.


1962-2014 Code Number 914 le Israelte Suahtaknate

Zomite hamphatna, khantohna le thupha sang ding deih lo haza Pawite in thu phuak tawm in Code 914 pen Bengali te ading hi. Tua mun ah na min na at leh supna pi piang ding hi ci’n a zuau phuak uhi. Zomi sungah pawl khat in tua bekbek gen in, kumpi thu neite genna le laihawmte thei napi, nelh siah in Code 914 zat loh ding a zuau phuak sawn uhi. Bengali cih pen Bangaladesh gamgi pan Kawlgam sung hong lutsimte hi. Kawlgam leitang tungah tangthu, gam neilo uhi. Hong ken uh ahi, ngeina le biakna, lai le kampaute nei bek ding uhi. Kawlgam ah tang tawngin ateng, leitang, gam, ngeina, kampau le lai, minam, biakna  anei Zomi te tawh Bengalite kiteh thei ngei lo ding hi. 1962 khit Bo Ni Win galkap kumpi khialhna ahi minam 135 puahna ding in a ki hong lampi 914 hi. A taktak in bel 1974 khit a kitang ko mimal hi, minam 135 apha pen gam 135 ah kikhen kham loh nading in galkap kumpi in khauhtak in uk kul ci’n leitung a khem nopna uh hang hi.  1962-2014 kikal kum 52 sung galkap sila in ki om bek hi lo, minam min zat theih lohna hun bei in suahtakna hun thak hong tungta hi. BC 586  in Babylon ah sal in akila Israel te saltan zawh kum 50 khit ciangin Percia kumpi Cyrus in Babylon a zawh teh Israelte sal pan suah takna pia in Jerusalem ah a ciah sak phawk huai hi. Pasian in a Pu Abraham apiak Canon gam ciah kik nuam lo le Israel minam a ut lo Persia gam minam a ut Jews zong na om lua uhi. Tua bang mite tuhun in kua mah in kikan zolo le kikan nuam nawn lo hi. Minam dangte lak ah mang thang uhi, pawl khatte Persia te in zong na deih lo in, Afaganistan lam tungin tuni dong mual kawm ken kawm ah om in, gal le sa sisan luang den hi, a sisan uh minam dang tawh kihel ban ah, a minam pianna uh na nial khin uh ahimanin a nam uh thei nawn lo uhi. Babylon le Persia sila pan suakta in a minam pihte uh tawh Canon ah Jerusalem lam kik na ah biakna makai  Siampi Ezra le gam uk makai Nehemiah  in makaih uhi cih phawk ni. Bo Ni Win pat galkap ukna kipat kum 52 khitteh democracy kumpi kipat hun in Census ah mi pawlkhat hong langpan Code 914 pan in Zomi suahtak ding bangin mi tampi lang panna kawmkal pan Ezra le Jehemiah makaih khopna tawh ni 52 sungin Israel te in Jerusarem kulhpi a ciang zo uhi.Tua mah bangin Egypt gam ah saltan na pan Israelte suahtakna ding Faroh in a phal loh ciangin Egypt teta upa te vantung mite in a thah ding ciangin minam khialh lohna dingin Jews te kong tungah tuuno sisan tat uhi. Egypt pan Canon a ciah uh ciang zong santuipi  ngap in kan uhi. 2014 Census ah zong Zomi hihna lakna in tuuno sisan tat tawh akibang 914 ah na at kul hi, san tuipi kan zah in a lau huai lo, Bengali te suak ding ci’n phuah tawm zuau thu tawh hong kilau sak hi. Kum 1500 val sung gam nei lo in, Jews le ui ki ci zah in mite simmawhna pan Pasian piak a minnam min uh Israel hong phawk hong zat kik uh ciangin gam hong nei kik ban ah gal lelh nei lo in gam nuamsa minam pi hong suak kik uhi. Lai Siangtho sung le leitung tangthu ah I sin khak le ei muh  Israel te Pasian thupha santé mah bangin leitung bei dong a aki sin ding Zomi tang thu a sawt lo in na khut le na muk tawh na at ding hi.


Zomi le Pawite Kibat Lohna

Thai gam ah ka om lai in  Kawlgam mi khempeuh Phama(ဗမာ) ki cihna lak ah ka minam min Phama(ဗမာ)hi lo Zomi kacih uh leh Thaite in Zomi mah hong ci pah uhi. Ei minam min eimah in gen khia leng hong ki zahtak in hong ki ciapteh sak pah hi. Ei mi pen lai ki nei lo in kam tawh thu ki vaikhak minamte hi'n ei tangthu a khang akhang in kam tawh ki ciamteh in ki thei hi. Zomi pian hun asawt dan ding pen leitung piancil in Zomi na om khin ahimanin Khul pan apiang (ဂူေအာင္း ေက်ာက္ေခတ္ လူမ်ဳိး) hihang ci in ki ciamteh hi. Eite pen Pawite dan in bangmah ciapteh na nei lo thei lo in mi cih peuh zui in Chin peuh Salai, Mai peuh a ki cite, pianna kip nei lo minam(အုတ္ၾကားျမက္ေပါက္ လူမ်ဳိး) ki hi lo hi. Beh le phung nei, Pu, Pi, Pa, Nu, Lia, Tang, Ni, Gang, Tu le Ta, Bangkua, Haitawi neite hi hang. Zomi cih pen Pawite dan in Chin min deihna tawh pianna pu le nam dingin Sen kumpi nam Qin (က်င္)Dynastyte peuh Chin suaksakte hi lo hihang. Qin (Chin) kumpi nam taktak hi leng ngeina kip, tangthu, lai, milim biakna, pilna, hauhna nei bek tham lo in Sen gam bek hilo,Kawlgam aki pan leitung ah beh le phung sanggam ding mipil, mihau tam lua mahmah a ki nei  ding hi. Ei lam pan Chin aki taisan hilo in, minam min kikem cing hi zaw hi, Zomi a sang nuam lo khempeuh in a minam uh a taisan hi zaw hi. Nidang in Laimi, Zomi kici in, tuhun in Chin akici pen hun khatteh bang hong kici ding uh hiam ki thei zo nai lo hi. Zomi te bel leitung piancil in Zomi hi a, leitung beidong Zomi mah kici ding hi.  Tuhun teh  CBC asuak ZBC ah Pawite tawh kipawl khop hun lai in zong hong ne tum uhi, a sum nek tum uh selna in TBA te GS hun in zong hong awn nuam lo in, mi na khem kawikawi in vote na lei uh ahiman in TBA gam sung Khuasak pan inntek te gual lel sa in ki ciah hi. CNF te zong Kawl galkap sangin Zomite hong that uh tam zaw hi. Zan mah in zong Tedim district ngah nading pan Haka in sum tawh vote lei, a vek un kipawl in Tedim lamte hong zo thawh bawl den uhi a, Tedimte district ngah ding hong tuh khia   ahimanin Zomi te supna lian hi. Kawlgam ah border-trade om na khuapi te sungah district ngah lo Tedim bek suak ding hi. Party sung khat pan member kibat pih MPte lam pan vote pia lo in, opposition te lam pan vote apia Chin State USDP le majority party hi na pi state parliament pan gual lel in akap sa in a ciah Tedim, Tonzang USDP MP te bek leitung ah om ding hi. Refugee sungah zong nidang in Zomite nunung in Pawite bek pai masa den uhi, tua bek tham lo in, Zomi te munte sum tawh Bengalite Kawlte na zuak uhi. Tuni dong Malaysia ah UN thu neihna zang sim in Zomite hong khel bawl lai uhi.  Kei tung ah zong a min gen nuam lo pawite numei khat in UN phone tawh hong ho in nanau UN ngah ding Jan 24 hong pai pih in ci hi, Jan 21 akipan Sen kum thak sung Malaysia ah Opera C om in mi kiman ziahziah lak ah lau pipi in UN kapai uh leh zuau na hi mawk hi. Tu ateng zong aki tom gen pak hi bek hi’n minam ki pummuh dahna hilo in kidop theihna ding hi. Pawite in tangthu le bangmah thei lo minam dangte le Zomi khang thakte hong khem na un Zosuante ki pumkhat ding cih One Chin Ideology genpi in nei uhi. Tua thu nidang agen masak hun uh le tuni dong thu piangte en kik leng One Chin cih pen zuau pi ahih lam UTOPIA ahih lam khuak neite in kitel khin tek hi.

                                                               

THU KHUP NA

Topa Pasian in a minam Israel te Egypt, Babylon, Percia cihte ah saltanna pan suakta sak in Canon gam a puak kik na thu, leitung ah kum 1500 val bang a ki theh thang gam le leitang, gam le minam min a nei nawn lo mite simmawh ui le Jews aki ci ziaute a hun tun ciang Israel gam, Israel minam ci in  Pasian thupha  kong a ki honteh  leitungmite  in a nan zawh loh uh Lai Siangtho le tangthu ah I theih tek mah bangin tuni tuhun in Zomi le Zogam ading Pasian thupha kongpi mihing mitmuh in nang khut le kam tawn in ki hongta ahi hi. Zomi a nial zong hong om mah ding hi, tua dan mah in Babylon le Percia ah saltanna pan suakta in Canon gam ciah ding sang Israel minam nial in a kim apam ah muhpak leitung nopsakna le Babylon, Percia minam hamphatnate deih zaw uh ahimanin Israel a na nial Babilon, Parsia mi ana suak om lua hi. Lai Siangtho sung le tangthu ah tuadan mite thu kisin kha lo hi. Sin ding zong om lo zah dongin, mi na suak lo pah uhi, api muh uh ahi Babylon, Percia mite in zong amau minam sung ah na bei sak ziau uhi, pawl khatte bang na ki deih tuan lo ahiman in om na ding le belh ding minam le gam kician nei lo uh a,  Afaganistan gam ah tung in tuni dong mual kawm ken kawm ah tengin gal le sa hau den in sisan  luang den hi. Tua ahimanin na lawm na gual sanggam u le nau khat in zong Zomi hong nial khamah ding hi, tua bang mite kho in, thu hilh in, bang mah genpih theih loh zah in zong hong om kha mah ding hi. Lam dang sa in, dah lua, thang pai lua kha mah ding  na hi.  Tua dan mite in Israel nial in Babilon mi na suak ngei lua uhi cih phawk in ki heh nem siam in. Aihang in mi atam zaw in ၉၁၄ ဇိုမီး(914  Zomi) kici ding uh ahimanin Zomite in Sian Piaksa Pupa gam leitang ah suahtakna man, thu neihna ei ngah ding thupha tuamtuam ngah in tang thu thak hong kipan ta ding hi. 


Note: Zosuan Zomi taktak sungah akiza lo ahi 914 Zomi anial Chin a ut dihdih mi tawm khat ka it ka ngaih teng le ka ki pakna Siamsin sung pan hong piang khia sese ahimanin kei theihnate lai in at in Siamsin min dai loh nading Siamsin group ah hong khak ing. Na nuntakna nang thu hi. Tg Salai Aa Zo Lai Chin Kuki na utut ki ci in. Hun khat lai in ko zong  human bek asang, Zomi minam vai buainate deih lo in, ki pumkhat nang ainak leh ei vek in nial theih loh, kibat ahi EK Minam kici zongin phamawh sa lo ci in, kipawlna min zong mikim san theih ding Vaphual Journal hawm khia Hornbill National Org na phuan ngei ung. Ai hangin 914 nusia in 4xx tel in na sakol tuan na theih kei leh ni khat ni ciang na tainate in na min kipatna Salai Mai cihte akipan hong laih sak ding hi.  Na kam pau zat dingin zong Haka hiam Falam hiam ah ki sin khol in. Khalkhate in satan kawl  ngian nei uh in amau pau kizang dingin lam en zaw ing. Tusung Lai kongat kik aleh  2012 kum kipat lam in, ZNC party register kik ding lai in Election Commission in Zomi cih minam om lo cih hong nial uh ciangin lung himawhna tawh zan khat tha khat thu in Pasian thupha hangin ka pumpi nih suak in khat Maesod ah om in khat Zangkong ah U Khup (Pu Kam Lam Khup)ka zonna thu a tom no khat hong  at nuam lai ing.


Zomi sungah itna tawh,
Kim Tuang

 


Comments




Leave a Reply